Web News

ନୂଆପଡା, ସିନାପାଲି: ନୂଆପଡା ଉପଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ସିନାପାଲି ବ୍ଲକ ଅନ୍ତର୍ଗତ ଗଣ୍ଡାବାହାଳୀ ମୌଜାରେ ସରକାରୀ ଜମି ଉପରେ ହୋଇଥିବା ବିବାଦୀୟ ଜବରଦଖଲ ଉଚ୍ଛେଦ କାର୍ଯ୍ୟ ପ୍ରଶାସନ ପକ୍ଷରୁ ହୋଇଥିଲେ ମଧ୍ୟ, ସମାନ ଅବସ୍ଥାରେ ଥିବା ଅନ୍ୟାନ୍ୟ ଗ୍ରାମ ଯଥା ଡୁଆଝର, ବରଗାଁ ରେ ଏହାର କୌଣସି ପ୍ରଭାବ ଦେଖାଯାଇନାହିଁ । ଏହାକୁ କେନ୍ଦ୍ର କରି ସାଧାରଣ ଲୋକଙ୍କ ମଧ୍ୟରେ ପ୍ରଶାସନର କାର୍ଯ୍ୟପ୍ରଣାଳୀ ଉପରେ ପ୍ରଶ୍ନଚିହ୍ନ ଉଠିଛି । ସିନାପାଲି–ଖଡ଼ିଆଳ ମୁଖ୍ୟ ରାସ୍ତା ସହ ଜଡିତ ଡୁଆଝର ଓ ବରଗାଁ ପରି ଗ୍ରାମଗୁଡିକରେ ଏପର୍ଯ୍ୟନ୍ତ ଜବରଦଖଲ ଉଚ୍ଛେଦ କାର୍ଯ୍ୟ ଆରମ୍ଭ ହୋଇନଥିବାରୁ “ପ୍ରଶାସନ କାହାର ଚାପରେ କାମ କରୁଛି କି?” ବୋଲି ସାଧାରଣରେ ଚର୍ଚ୍ଚା ଜୋରଦାର ହୋଇଛି । ଓଡିଶା ପ୍ରିଭେନ୍ସନ ଅଫ୍ ଲ୍ୟାଣ୍ଡ ଏନକ୍ରୋଚ୍ମେଣ୍ଟ ଆକ୍ଟ–୧୯୭୨ ଅନୁସାରେ ଜବରଦଖଲକାରୀଙ୍କୁ ପ୍ରଥମେ ନୋଟିସ ଜାରି କରି, ନିର୍ଦ୍ଧାରିତ ସମୟ ସୀମା ପରେ ଉଚ୍ଛେଦ କରିବା ନିୟମ ରହିଛି । କିନ୍ତୁ ଏହି ନିୟମ ପ୍ରୟୋଗରେ ଅସମତା ଥିବା ନେଇ ଗ୍ରାମବାସୀଙ୍କ ଅଭିଯୋଗ ଗୁରୁତ୍ୱ ନେଇଛି । ଗଣ୍ଡାବାହାଳୀରେ ହୋଇଥିବା ଉଚ୍ଛେଦ କାର୍ଯ୍ୟକୁ ନେଇ ଗ୍ରାମବାସୀମାନେ କିଛିଦିନ ପୂର୍ବରୁ ସାମ୍ବାଦିକ ସମ୍ମିଳନୀ କରି ଗୁରୁତର ଅଭିଯୋଗ ଉଠାଇଥିଲେ । ସେମାନଙ୍କ କହିବା ଅନୁଯାୟୀ, ପ୍ରଶାସନ ବଡ଼ ବଡ଼ ପ୍ରଭାବଶାଳୀ ଲୋକଙ୍କ ଘରକୁ ଛାଡି ଛୋଟ ଲୋକଙ୍କ ଘରକୁ ଟାର୍ଗେଟ କରି ଭାଙ୍ଗିଛି । ସିନାପାଲି ମୁଖ୍ୟ ରାସ୍ତା ପ୍ରଶସ୍ତିକରଣ ଓ ଡ୍ରେନ ନିର୍ମାଣ ପାଇଁ ଜବରଦଖଲ ଉଚ୍ଛେଦ ଅତ୍ୟାବଶ୍ୟକ ହୋଇଥିବା ବେଳେ, ଗଣ୍ଡାବାହାଳୀରେ ଏହା ବିବାଦୀୟ ରୂପ ନେଇଥିଲା । ଗ୍ରାମବାସୀମାନେ ପୂର୍ବରୁ ବାରମ୍ବାର ବ୍ଲକ ଓ ଜିଲ୍ଲା ପ୍ରଶାସନଙ୍କ ନିକଟରେ ଏହି ନେଇ ଅଭିଯୋଗ କରିଥିଲେ । ମାର୍ଚ୍ଚ ୫ ତାରିଖରେ ରାସ୍ତା ରୋକ ଆନ୍ଦୋଳନ କରିବାକୁ ଚେତାବନୀ ଦେବା ପରେ ପ୍ରଶାସନ ଚେତିଥିଲା । ପରେ ଏକ ପ୍ରଶାସନିକ ଟିମ ଗଣ୍ଡାବାହାଳୀରେ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା କରି ଶୀଘ୍ର ଉଚ୍ଛେଦ କାର୍ଯ୍ୟ ଆରମ୍ଭ କରିବାକୁ ଆଶ୍ୱାସନ ଦେଇଥିଲା । ଏହା ପରେ ଜେସିବି ସହାୟତାରେ କିଛି ଅଂଶରେ ଉଚ୍ଛେଦ କାର୍ଯ୍ୟ ହୋଇଥିଲା ଓ ସେତେବେଳେ ବ୍ଲକ, ଜିଲ୍ଲା ଓ ପୋଲିସ ପ୍ରଶାସନ ଉପସ୍ଥିତ ଥିଲେ । ତଥାପି, ସେହି ଉଚ୍ଛେଦ ପ୍ରକ୍ରିୟାକୁ ନେଇ ପକ୍ଷପାତ ଅଭିଯୋଗ ଶାନ୍ତ ହୋଇନାହିଁ । ବର୍ତ୍ତମାନ ପ୍ରଶ୍ନ ଉଠୁଛି ଯେ ଗଣ୍ଡାବାହାଳୀର ବିବାଦ କେବେ ସମାଧାନ ହେବ ଓ ଡୁଆଝର, ବରଗାଁ ପରି ଅନ୍ୟ ଗ୍ରାମରେ ଜବରଦଖଲ ଉଚ୍ଛେଦ କାର୍ଯ୍ୟ କେବେ ଆରମ୍ଭ ହେବ ? ସମୟ ଦେଖାଇବ, ପ୍ରଶାସନ ନିଷ୍ପକ୍ଷ ଭାବେ କାର୍ଯ୍ୟ କରି ସମସ୍ତଙ୍କୁ ସମାନ ନ୍ୟାୟ ଦେବ କି, ନା ଏହି ବିବାଦ ଆଉ ଗଭୀର ରୂପ ନେବ ।

ହଜିଯାଉଛି କି ଦଣ୍ଡ ନାଚର ମୌଳିକତା? ପରମ୍ପରା ନାଁରେ ଅଶ୍ଳୀଳତା କେତେଦୂର ଯୁକ୍ତିଯୁକ୍ତ! ଗଞ୍ଜାମର କଳା, ସଂସ୍କୃତି ଓ ପରମ୍ପରାର ଅନନ୍ୟ ପ୍ରତୀକ ହେଉଛି 'ଦଣ୍ଡ ନାଚ'। ଏହା କେବଳ ଏକ ମନୋରଞ୍ଜନର ମାଧ୍ୟମ ନୁହେଁ, ବରଂ ପ୍ରଭୁ ଶ୍ରୀ ସିଦ୍ଧ ଭୈରବ ଓ ମା’ କାଳୀଙ୍କ ଆରାଧନାର ଏକ କଠୋର ଆଧ୍ୟାତ୍ମିକ ପର୍ବ। ଶରୀରକୁ କଷ୍ଟ ଦେଇ, ଅଗ୍ନି ଓ ଧୂଳି ସହ ଖେଳି ଭକ୍ତ ଯେଉଁ ତପସ୍ୟା କରେ, ତାହା ବିଶ୍ୱବିଦିତ। ମାତ୍ର ଦୁଃଖର ବିଷୟ, ସମୟ ବଦଳିବା ସହ ଏହି ପବିତ୍ର ପରମ୍ପରାରେ ଏବେ 'ଆଧୁନିକତା'ର ବିଷ ପ୍ରବେଶ କରିଛି। ​ଆଧୁନିକତା ନାଁରେ ଅପସଂସ୍କୃତି: ​ଆଜିକାଲି ଦଣ୍ଡ ନାଚର ମଞ୍ଚରେ ପାରମ୍ପରିକ ପ୍ରଭା ଓ ଭଜନ ବଦଳରେ ଉଚ୍ଚ ସ୍ୱରରେ ଡିଜେ ଗୀତ ଏବଂ ଅଶ୍ଳୀଳ ନୃତ୍ୟର ପ୍ରାଦୁର୍ଭାବ ବଢ଼ିବାରେ ଲାଗିଛି। "ମେଲୋଡି" ନାମରେ ପରିବେଷଣ କରାଯାଉଥିବା ଅରୁଚିକର ନୃତ୍ୟ ଦର୍ଶକଙ୍କୁ ଆକୃଷ୍ଟ କରିବା ପାଇଁ ଏକ ଶସ୍ତା ମାଧ୍ୟମ ପାଲଟିଛି। ଯେଉଁଠି ପବିତ୍ର ଶଙ୍ଖ ଓ ମହୁରୀର ସ୍ୱର ଶୁଭିବା କଥା, ସେଠାରେ ଦ୍ୱିଅର୍ଥବୋଧକ ଗୀତର ତାଳେ ତାଳେ ଅଶାଳୀନ ଅଙ୍ଗଭଙ୍ଗୀ ପ୍ରଦର୍ଶନ କରାଯାଉଛି। ଏହା କେବଳ ପରମ୍ପରାକୁ ନଷ୍ଟ କରୁନାହିଁ, ବରଂ ଶହ ଶହ ବର୍ଷର ଗୌରବମୟ ଇତିହାସକୁ ଧୂଳିସାତ କରିଦେଉଛି। ​ଯୁବପିଢ଼ିଙ୍କ ଉପରେ କୁପ୍ରଭାବ: ​ସମାଜର ମେରୁଦଣ୍ଡ ହେଉଛନ୍ତି ଯୁବପିଢ଼ି। ପରମ୍ପରା ମାଧ୍ୟମରେ ସେମାନେ ଶୃଙ୍ଖଳା ଓ ଆଧ୍ୟାତ୍ମିକତା ଶିଖିବା କଥା। କିନ୍ତୁ ମଞ୍ଚରେ ପ୍ରଦର୍ଶିତ ହେଉଥିବା ଏହି ଅଶ୍ଳୀଳତା ଯୁବପିଢ଼ିଙ୍କ ମାନସିକତାକୁ ବିପଥଗାମୀ କରୁଛି। ସେମାନେ ଭକ୍ତି ଓ ସଂସ୍କୃତି ଅପେକ୍ଷା ଉତ୍ତେଜନାପୂର୍ଣ୍ଣ ପ୍ରଦର୍ଶନକୁ ଗୁରୁତ୍ୱ ଦେଉଛନ୍ତି। ଯଦି ଏହି ଧାରା ଜାରି ରହେ, ତେବେ ଆଗାମୀ ଦିନରେ ଦଣ୍ଡ ନାଚରୁ "ଭକ୍ତି" ତତ୍ତ୍ୱ ସମ୍ପୂର୍ଣ୍ଣ ଭାବେ ହଜିଯିବ। ​ସଂସ୍କାରର ଆବଶ୍ୟକତା: ​ଆଧୁନିକତାକୁ ଆପଣେଇବାରେ କୌଣସି ବାଧା ନାହିଁ, କିନ୍ତୁ ତାହା ସଂସ୍କୃତିର ଗୁଣବତ୍ତାକୁ ନଷ୍ଟ କରିବା ଉଚିତ୍ ନୁହେଁ। ପରମ୍ପରାକୁ ବଞ୍ଚାଇ ରଖିବା ପାଇଁ ନିମ୍ନଲିଖିତ ପଦକ୍ଷେପ ନେବା ଜରୁରୀ:ଗ୍ରାମ୍ୟ କମିଟି ଓ ଦଣ୍ଡ ଦଳଗୁଡ଼ିକ ଅଶ୍ଳୀଳ ନୃତ୍ୟ ପରିବେଷଣ ନ କରିବାକୁ ସଂକଳ୍ପ ନେବା ଉଚିତ୍। ସାଂସ୍କୃତିକ କାର୍ଯ୍ୟକ୍ରମ ନାମରେ ହେଉଥିବା ଅଶ୍ଳୀଳତା ଉପରେ ସ୍ଥାନୀୟ ପ୍ରଶାସନ ଓ ପୋଲିସ ନଜର ରଖିବା ଆବଶ୍ୟକ। ଦଣ୍ଡ ନାଚର ପାରମ୍ପରିକ ଢୋଲ, ମହୁରୀ ଏବଂ ପୌରାଣିକ ବିଷୟବସ୍ତୁ ଉପରେ ଆଧାରିତ ନୃତ୍ୟକୁ ଅଧିକ ଗୁରୁତ୍ୱ ଦିଆଯାଉ। ଆମର ପରିଚୟ ହେଉଛି ଆମର ପରମ୍ପରା। ଏହି ପରମ୍ପରାକୁ ଆଗାମୀ ପିଢ଼ି ପାଇଁ ସୁରକ୍ଷିତ ରଖିବା ଆମ ସମସ୍ତଙ୍କର ନୈତିକ ଦାୟିତ୍ୱ। ଆସନ୍ତୁ, ଦଣ୍ଡ ନାଚରୁ ଅଶ୍ଳୀଳତାକୁ ଦୂର କରି ଏହାର ପବିତ୍ରତା ଓ ମର୍ଯ୍ୟାଦାକୁ ଫେରାଇ ଆଣିବା। ନଚେତ୍ ଇତିହାସ ଆମକୁ କେବେବି କ୍ଷମା ଦେବ ନାହିଁ।

ସେପ୍ଟେମ୍ବରରେ ରାଉରକେଲା ମହାନଗର ନିଗମ ନିର୍ବାଚନ ! ଭୁବନେଶ୍ୱର: ରାଉରକେଲା ମହାନଗର ନିଗମ ନିର୍ବାଚନକୁ ନେଇ ରାଜ୍ୟରେ ରାଜନୀତିକ ଚର୍ଚ୍ଚା ତେଜ ହୋଇଛି। ଓଡିଶା ହାଇକୋର୍ଟରେ ଏହି ସମ୍ବନ୍ଧୀୟ ମାମଲା ଚାଲିଥିବା ସତ୍ତ୍ୱେ ମଧ୍ୟ ରାଜ୍ୟ ସରକାର ନିର୍ବାଚନ ପ୍ରକ୍ରିୟାକୁ ଆଗେଇ ନେବାକୁ ପ୍ରଚେଷ୍ଟା ଜୋରଦାର କରିଛନ୍ତି। ବିଶେଷ ସୂତ୍ରରୁ ମିଳୁଥିବା ସୂଚନା ଅନୁଯାୟୀ, ମାନ୍ୟବର ହାଇକୋର୍ଟଙ୍କ ଅନୁମତି କ୍ରମେ ରାଉରକେଲା ମହାନଗର ନିଗମରେ ନିର୍ବାଚନ କରାଯିବା ପାଇଁ କାନୁନି ପ୍ରକ୍ରିୟା ଆରମ୍ଭ ହୋଇଛି । ସୂତ୍ର ଅନୁସାରେ, ଆସନ୍ତା ସେପ୍ଟେମ୍ବର ମାସରେ ସମ୍ବଲପୁର, ପୁରୀ ଓ ବାଲେଶ୍ୱର ସହିତ ରାଉରକେଲାରେ ମଧ୍ୟ ନିର୍ବାଚନ ଅନୁଷ୍ଠିତ ହେବାର ପୁରା ସମ୍ଭାବନା ରହିଛି। ଏପରି ସ୍ଥିତିରେ, ଏକ ପକ୍ଷରେ କୋର୍ଟରେ ମାମଲା ଚାଲିଥିବାବେଳେ ଅନ୍ୟ ପକ୍ଷରେ ନିର୍ବାଚନ ପ୍ରସ୍ତୁତି ଜୋରଦାର ହେବା ରାଜନୀତିକ ମହଳରେ ଚର୍ଚ୍ଚାର ବିଷୟ ହୋଇଛି। ଏବେ ସମସ୍ତଙ୍କ ଦୃଷ୍ଟି ହାଇକୋର୍ଟଙ୍କ ଅନ୍ତିମ ରାୟ ଉପରେ, ଯାହା ନିର୍ବାଚନର ଭବିଷ୍ୟତ ନିର୍ଣ୍ଣୟ କରିବ।

ବିଜୟ ଦାଶଙ୍କୁ “ବି.ବି. ମିଶ୍ର ଟ୍ରଫି” ରେ ସମ୍ମାନିତ ଭୁବନେଶ୍ୱର: ଓଡିଶା ପୋଲିସ ପକ୍ଷରୁ ପ୍ରତିଷ୍ଠିତ “ବି.ବି. ମିଶ୍ର ଟ୍ରଫି” ପାଇଁ ଚଳିତ ବର୍ଷର ସର୍ବଶ୍ରେଷ୍ଠ ଥାନା ଅଧିକାରୀ (IIC) ଭାବେ ସୁନ୍ଦରଗଡ ପୋଲିସ ଜିଲ୍ଲା ଅନ୍ତର୍ଗତ ରାଜଗାଙ୍ଗପୁର ଥାନା ଅଧିକାରୀ ଶ୍ରୀ ବିଜୟ କିଶୋର ଦାଶଙ୍କୁ ଚୟନ କରାଯାଇଥିଲା । ଆଜି ଏକ ବିଶେଷ କାର୍ଯକ୍ରମରେ ଶ୍ରୀ ଦାସଙ୍କୁ ଟ୍ରଫି ସହିତ ମାନପତ୍ର ଏବଂ ତିନି ହଜାର ଟଙ୍କାର ଅର୍ଥରାଶି ପ୍ରଦାନ କରାଯାଇଛି l ତାଙ୍କର କର୍ତ୍ତବ୍ୟନିଷ୍ଠା, ଦୃଢ଼ ପରିଚାଳନା ଶୈଳୀ ଏବଂ ଆଇନ-ଶୃଙ୍ଖଳା ରକ୍ଷାରେ ଉଲ୍ଲେଖନୀୟ ଭୂମିକା ପାଇଁ ଏହି ସମ୍ମାନ ଦିଆଯାଇଛି। ପ୍ରକାଶ ଥସୁ କି ସେ ଅପରାଧ ନିୟନ୍ତ୍ରଣ, ସାମାଜିକ ସମ୍ପର୍କ ସୁଦୃଢ଼ କରିବା ସହିତ ଲୋକମାନଙ୍କର ଭରସା ଜିତିବାରେ ବେଶ ସଫଳ ହୋଇଛନ୍ତି। ଜନସାଧାରଣଙ୍କ ସହ ସମନ୍ୱୟ ରଖି ପୋଲିସିଂରେ ସ୍ପଷ୍ଟତା ଏବଂ ଦାୟିତ୍ୱବୋଧ ପ୍ରଦର୍ଶନ କରିଥିବାରୁ ସେ ବିଶେଷ ଭାବରେ ପ୍ରଶଂସିତ ହୋଇଛନ୍ତି। ବିଶେଷ କଥା ହେଉଛି, ଶ୍ରୀ ଦାଶ ବିଗତ ଦିନରେ ତାଙ୍କର ଉତ୍କୃଷ୍ଟ ସେବା ପାଇଁ ଡିଜିପି ଡିସ୍କ ଆୱାର୍ଡ, ଡିଜିପି କମେଣ୍ଡେସନ ଆୱାର୍ଡ, ରାଜ୍ୟପାଳ ପଦକ ତଥା ରାଷ୍ଟ୍ରପତି ପଦକ ମଧ୍ୟ୍ୟ ପାଇ ସାରିଛନ୍ତି, ଯାହା ତାଙ୍କର ପେଶାଦାରୀ କୁଶଳତାକୁ ଆହୁରି ଉଜାଗର କରେ।

ନବରଙ୍ଗପୁର: ସପ୍ତାହକୁ ଥରେ ପ୍ରତି ସୋମବାର ଦିନ ଦୂର ଦୂରାନ୍ତ ରୋଗୀଙ୍କୁ ବସଷ୍ଟାଣ୍ଡରୁ ଡାକ୍ତରଖାନାକୁ ମାଗଣା ଅଟୋ ସେବା ମିଳିବ। ଏହା କୌଣସି ସରକାରୀ ଯୋଜନା ନୁହେଁ । ଅଟୋ ଡ୍ରାଇଭର ସୁରକ୍ଷା କମିଟି ପକ୍ଷରୁ ଏଭଳି ଅଭିନବ ପ୍ରୟାସ କରାଯାଇଛି। ଗୋଟିଏ କି ଦୁଇଟି ଗାଡି ନୁହେ ପ୍ରତି ସୋମବାର ବସଷ୍ଟାଣ୍ଟ ରୁ ମେଡିକାଲକୁ ଗଡ଼ିବ ୭୦ ଟି ଅଟୋ ଗାଡି l କମିଟି ପକ୍ଷରୁ ୭୦ ଜଣ ଅଟୋ ଚାଳକ ରୋଗୀଙ୍କୁ ସେବା ଯୋଗାଇବା ପାଇଁ ଘୋଷଣା କରିଛନ୍ତି। ସେମାନେ ନିଜର ପେଟପାଟଣାରୁ କାଟି ସପ୍ତାହକୁ ଥରେ ମାଗଣା ସେବା ଯୋଗାଇବେ। ଡ୍ରାଇଭର ସୁରକ୍ଷା କମିଟିର ଏଭଳି ମହତ କାର୍ଯ୍ୟକୁ ସାଧାରଣରେ ବେଶ ପ୍ରଶଂସା କରାଯାଇଛି l ଆଜି ଏହି କାର୍ଯ୍ୟକ୍ରମର ଶୁଭାରମ୍ଭ ଅବସରରେ ମୁଖ୍ୟଅତିଥି ଭାବେ ଅତିରିକ୍ତ ଜିଲ୍ଲାପାଳ ତପନ କୁମାର ଖୁଣ୍ଟିଆ, ସମ୍ମାନିତ ଅତିଥି ଏଡିପିଏଚଓ ଡା.ମଳୟ ତ୍ରିପାଠୀ, ମାତୃ ଆଶ୍ରୟ ଆଶ୍ରମ ଅଧ୍ଯକ୍ଷା କାଦମ୍ବିନୀ ତ୍ରିପାଠୀ, ମୁନ୍ନା ତ୍ରୀପାଠୀ, ଅବଦୁଲ ଫିରୋଜ ପ୍ରମୁଖ ଯୋଗ ଦେଇଥିଲେ। ଆଜି ପ୍ରଥମ ଦିନ ସନ୍ଧ୍ୟା ସୁଦ୍ଧା ୬ଜଣ ରୋଗୀ ଓ ସମ୍ପର୍କୀୟଙ୍କୁ ସହରରୁ ପ୍ରାୟ ୪ କିମି ଦୂର ମେଡିକାଲକୁ ମାଗଣାରେ ଅଟୋ ସେବା ଯୋଗାଇ ଦିଆଯାଇଥିଲା। ଏହି ଅବସରରେ ଅଟୋ ଡ୍ରାଇଭର ସୁରକ୍ଷା କମିଟି ସଭାପତି ବାର୍ଥ ହରିଜନ କହିଛନ୍ତି ଯେ ପ୍ରତି ସପ୍ତାହକୁ ଥରେ ଜଣେ ଅଟୋ ଚାଳକଙ୍କୁ ନିଜ ହାତରୁ ୭୦୦ ଟଙ୍କା ଗରିବ ରୋଗୀଙ୍କ ସେବା ପାଇଁ ଖର୍ଚ୍ଚ କରିବାକୁ ନିଷ୍ପତି ହୋଇଛି।

ନବରଙ୍ଗପୁର-ତେନ୍ତୁଳି ଖୁଣ୍ଟି: କୃଷକ ମାନଙ୍କ ସୁବିଧା ଏବଂ ସାର ର ସଠିକ୍ ବଣ୍ଟନ ନିଶ୍ଚିତ କରିବା ପାଇଁ ଆଜି ତେନ୍ତୁଳିଖୁଣ୍ଟି ପ୍ରଶାସନ ପକ୍ଷରୁ ଏକ ମିଳିତ ଯାଞ୍ଚ କରାଯାଇଛି। ତେନ୍ତୁଳିଖୁଣ୍ଟି ତହସିଲଦାର ପୁଷ୍ପାଞ୍ଜଳି ଦଣ୍ଡପାଟ ସମେତ ଭାରପ୍ରାପ୍ତ ଏଡିଓ, ବିଏଓ ବରୁଣ ଧନଫୁଲ, ସହକାରୀ କୃଷି ଅଧୂକାରୀ ତଥା ସାର ପରିଦର୍ଶକ ପ୍ରତିଭା ତିରିଆ, କୃଷି ଓଭର୍ଶୀୟର ଜିତେନ୍ଦ୍ର ଟାକ୍ରି ଏବଂ ଏଟିଏମ୍ ବାଳଗୋବିନ୍ଦ ସାହୁ ପ୍ରମୁଖ ଏହି ପରିଦର୍ଶନରେ ସାମିଲ ଥିଲେ। ଅଧୂକାରୀମାନେ ତେନ୍ତୁଳିଖୁଣ୍ଟି ଲ୍ୟାମ୍ପ ଅଞ୍ଚଳ ଗୁମ୍ମା ଲ୍ୟାମ୍ପ ଅଞ୍ଚଳର ୫ ରୁ ୭ ଜଣ ଲାଇସେନ୍ସ ଧାରିଙ୍କ ସାର ଗୋଦାମ ପରିଦର୍ଶନ କରିଥିଲେ। ପରିଦର୍ଶନ ସମୟରେ ଗୋଦାମରେ ଥିବା ସାରର ଷ୍ଟକ୍ ରିପୋର୍ଟ ଏବଂ ପ୍ରକୃତ ସାମଗ୍ରୀର ତନ୍ନ ତନ୍ନ କରି ଯାଞ୍ଚ କରାଯାଇଥିଲା। ସାର ର ସୁପରିଚାଳନା ପାଇଁ ପ୍ରଶାସନ ପକ୍ଷରୁ ପରବର୍ତ୍ତୀ ନିର୍ଦ୍ଦେଶ ନ ଆସିବା ପର୍ଯ୍ୟନ୍ତ ସାର ବିକ୍ରି ନ କରିବାକୁ ସମସ୍ତ ଡିଲର ଓ ଲ୍ୟାମ୍ପ ପରିଚାଳକଙ୍କୁ ନିର୍ଦ୍ଦେଶ ଦିଆଯାଇଛି ।

ଧରମପୁର (କନ୍ଧମାଳ), କଳା ଓ କଳାକାର ହିତୈଷୀ ମହାମଞ୍ଚ "କନ୍ଧମାଳ ଜିଲ୍ଲା ବରିଷ୍ଠ କଳାକାର ସଂଘ" ପକ୍ଷରୁ ଏକ କଳାକାର ସମାବେଶ ସ୍ଥାନୀୟ ପାଟଖଣ୍ଡା ମନ୍ଦିର ପରିସରରେ ଅନୁଷ୍ଠିତ ହୋଇଯାଇଛି। ସଂଘ କାର୍ଯ୍ୟକାରୀ ସଭାପତି ତ୍ରିନାଥ ପଣ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମାବେଶକୁ ନିଖିଳ ଓଡ଼ିଶା ବରିଷ୍ଠ କଳାକାର ମହାସଂଘ ମହାସଚିବ ସୁବାସ ଚନ୍ଦ୍ର ସାହୁ ରୋଶନ୍ ଉଦବୋଧନ ଦେଇ କଳାକାରମାନଙ୍କ ସଂଘ ମନସ୍କତା ଭିତରେ ଉଭୟ କଳା ଓ କଳାକାରଙ୍କ ଉନ୍ନତି ସଂଗୋପିତ ବୋଲି କହିଥିଲେ। ମହାସଂଘ କୋଷାଧ୍ୟକ୍ଷ ମହେନ୍ଦ୍ର କୁମାର ସାହୁଙ୍କ ସମେତ ଶବର ପାତ୍ର, ସନ୍ନ୍ୟାସୀ ବାଘ, କରୁଣାକର ଦିଗାଳ ପ୍ରମୁଖ ଅତିଥି ଭାବେ ଯୋଗଦେଇ କଳାକାର ଜନ୍ମର ମହନୀୟତା ସମ୍ପର୍କରେ ଆଲୋକପାତ କରିଥିଲେ । ସୁକାନ୍ତ ବେହେର୍ଦ୍ଦଳାଇ ଅତିଥି ପରିଚୟ ଓ ସ୍ୱାଗତ ଭାଷଣ ପ୍ରଦାନ କରିଥିଲେ। କାର୍ଯ୍ୟକ୍ରମ ପରିଚାଳନା କ୍ଷେତ୍ରରେ ସର୍ବଶ୍ରୀ ଉମାକାନ୍ତ ସାହୁ, ପାର୍ଥବ ବେହେର୍ଦ୍ଦଳାଇ, ରମାକାନ୍ତ ବେହେର୍ଦ୍ଦଳାଇ, ଶ୍ରୀକୃଷ୍ଣ ବେହେରା, ନାରାୟଣ ବେହେରା, ମାଞ୍ଚା ଦିଗାଳ, ଋଷିନାଥ ବିଷୋୟୀ, ସଲମନ୍ ନାୟକ, ସରୋଜିନୀ ଶତପଥୀ, ସୁବାସିନୀ ପ୍ରଧାନ, ଜୟନ୍ତି ସାହୁ, କମଳିନୀ ପ୍ରଧାନ ପ୍ରମୁଖ ସହଯୋଗ କରିଥିଲେ। ଏଥିରେ କନ୍ଧମାଳ ଜିଲ୍ଲାର ବାଲିଗୁଡା, ଦାରିଙ୍ଗବାଡି, ସରଙ୍ଗଗଡ଼, ବୁଡଗୁଡା, ଫିରିଙ୍ଗିଆ, ଉଦୟଗିରି, ଫୁଲବାଣୀ, ଖଜୁରୀପଡା, କୋଟଗଡ଼ ଆଦି ଅଂଚଳରୁ ବହୁ କଳାକାର ଯୋଗଦେଇଥିଲେ। ପରିଶେଷରେ ସନାତନ ଗୌଡ଼ ଆନୁଷ୍ଠାନିକ ଧନ୍ୟବାଦ ଅର୍ପଣ କରିଥିଲେ।

ସିନାପାଲି: ଉଦନ୍ତୀ ନଦୀ ଧାର ସିନାପାଲି ସହରରେ ତିନି ଦିନ ଧରି ଚାଲିଥିବା କଳା, ସାହିତ୍ୟ ଓ ସଂସ୍କୃତିର ମହାଉତ୍ସବ ଉଦନ୍ତୀ ମହୋତ୍ସବ ସିନାପାଲି ୨୦୨୬ ଅତ୍ୟନ୍ତ ଭବ୍ୟ ଓ ଗରିମାମୟ ଭାବରେ ସମାପନ ହୋଇଛି । ୨୭ ରୁ ୨୯ ତାରିଖ ପର୍ଯ୍ୟନ୍ତ ଚାଲିଥିବା ଏହି ତ୍ରିଦିବସୀୟ ଉତ୍ସବ ହଜାର ହଜାର ଦର୍ଶକଙ୍କ ହୃଦୟକୁ ବାନ୍ଧି ରଖି ଏକ ସ୍ମରଣୀୟ ଅନୁଭବ ଦେଇଛି । ଶେଷ ସନ୍ଧ୍ୟାରେ ଲକ୍ଷାଧିକ ଦର୍ଶକଙ୍କ ଭିଡ଼ ଉତ୍ସବକୁ ଏକ ନୂତନ ଉଚ୍ଚତାରେ ପହଞ୍ଚାଇଥିଲା । ମହୋତ୍ସବର ଶେଷ ଦିନଟି ଥିଲା ସତରେ ଏକ “ଷ୍ଟାର ନାଇଟ”। ସମ୍ବଲପୁରୀ ସଙ୍ଗୀତ ଜଗତର ପ୍ରସିଦ୍ଧ ଗାୟକ ଉମାକାନ୍ତ ବାରିକଙ୍କ ମନମୋହନୀ ସୁର ଓ ତାଳରେ ସମଗ୍ର ଜନସମାଗମ ଝୁମିଉଠିଥିଲା । ତାଙ୍କର ସ୍ୱରର ମାୟା ଦର୍ଶକମାନଙ୍କୁ ମନମୁଗ୍ଧ କରିଦେଇଥିଲା । ଏହା ସହ ଓଡ଼ିଆ ଅଭିନେତ୍ରୀ ସୁଚରିତା ସ୍ୱାଇଁ ତାଙ୍କ ଆକର୍ଷଣୀୟ ନୃତ୍ୟ ପ୍ରଦର୍ଶନରେ ମଞ୍ଚକୁ ରଙ୍ଗିନ କରିଥିଲେ । ହାସ୍ୟ ଅଭିନେତା ଟୁକୁନା ତାଙ୍କ ହାସ୍ୟରସରେ ପ୍ରେକ୍ଷକମାନଙ୍କୁ ହସି ହସି ଲୁହ ଆଣିଦେଇଥିଲେ ।ଏହି ମହୋତ୍ସବ କେବଳ ମନୋରଞ୍ଜନରେ ସୀମିତ ନୁହେଁ, ବରଂ ଲୋକକଳା ଓ ପାରମ୍ପରିକ ସଂସ୍କୃତିର ଏକ ସଜିବ ମଞ୍ଚ ରୂପେ ପରିଣତ ହୋଇଥିଲା । ବିଭିନ୍ନ ଲୋକନୃତ୍ୟ ଓ ଲୋକସଙ୍ଗୀତର ଅପୂର୍ବ ପ୍ରଦର୍ଶନ ଦର୍ଶକମାନଙ୍କୁ ମୂଳ ମାଟିର ସୁଗନ୍ଧ ଅନୁଭବ କରାଇଥିଲା । ଗାଁର ସଂସ୍କୃତି, ଐତିହ୍ୟ ଓ ପରମ୍ପରାର ଏକ ସୁନ୍ଦର ପ୍ରତିଛବି ମଞ୍ଚରେ ଜୀବନ୍ତ ହୋଇଉଠିଥିଲା । ଶେଷ ଦିନର ଅନୁଷ୍ଠାନରେ ଅତିଥିମାନଙ୍କୁ ମଞ୍ଚକୁ ଆମନ୍ତ୍ରଣ ଓ ପରିଚୟ ପ୍ରଦାନ କରିଥିଲେ ଉପସଭାପତି ଶ୍ରୀ ମନୋରଞ୍ଜନ ମେହେର । ଗାୟତ୍ରୀ ଶକ୍ତିପୀଠ, ସିନାପାଲିଙ୍କ ଦ୍ୱାରା ଦେବପୂଜନ ଓ ବେଦପାଠରେ ଅନୁଷ୍ଠାନର ଆରମ୍ଭ ହୋଇଥିଲା । ସିନାପାଲି ଉଚ୍ଚବିଦ୍ୟାଳୟର ଛାତ୍ରଛାତ୍ରୀମାନଙ୍କ ପ୍ରାରମ୍ଭିକ ସଙ୍ଗୀତ ଅନୁଷ୍ଠାନକୁ ଏକ ଗମ୍ଭୀର ମାହୋଲ ଦେଇଥିଲା । ସଭାପତି ଶ୍ରୀ ବୈଶମ୍ପାୟନ ମେହେରଙ୍କ ନେତୃତ୍ୱରେ ସଭାକାର୍ଯ୍ୟ ସୁଚାରୁ ଭାବେ ପରିଚାଳିତ ହୋଇଥିଲା । ବିବରଣୀ ପଠନ କରିଥିଲେ ଶ୍ରୀ ସନ୍ତୋଷ କୁମାର ବାଗ ଓ ସମ୍ବର୍ଦ୍ଧନା କାର୍ଯ୍ୟକ୍ରମକୁ ସୁନିୟୋଜିତ କରିଥିଲେ ଶ୍ରୀ ଗୌତମ ମେହେର । ମାନପତ୍ର ପଠନ ମାଧ୍ୟମରେ ସ୍ମୃତିରେ ରହିଥିବା ମହାନ ବ୍ୟକ୍ତିତ୍ୱମାନଙ୍କୁ ଶ୍ରଦ୍ଧାଞ୍ଜଳି ଜଣାଯାଇଥିଲା । ଏହି ଅବସରରେ ମୁଖ୍ୟ ଅତିଥି ଭାବେ ଖଡ଼ିଆଳର ବିଧାୟକ ଶ୍ରୀ ଅଧୀରାଜ ମୋହନ ପାଣିଗ୍ରାହୀ ଉପସ୍ଥିତ ରହି ସଂସ୍କୃତିର ସୁରକ୍ଷା ଓ ପ୍ରଚାରରେ ଏପରି ମହୋତ୍ସବର ଗୁରୁତ୍ୱକୁ ଉଲ୍ଲେଖ କରିଥିଲେ । ସମ୍ମାନିତ ଅତିଥି ଭାବେ ଶ୍ରୀ ବସନ୍ତ କୁମାର ପଣ୍ଡା ସହ ଅନ୍ୟାନ୍ୟ ବିଶିଷ୍ଟ ଅତିଥିମାନେ ଯୋଗଦେଇଥିଲେ । ପୁରସ୍କାର ବିତରଣ ଓ ସ୍ମୃତିଚିହ୍ନ ପ୍ରଦାନ ମାଧ୍ୟମରେ ପ୍ରତିଭାମାନଙ୍କୁ ସମ୍ମାନିତ କରାଯାଇଥିଲା । ଶେଷରେ କୋଷାଧକ୍ଷ୍ୟ ଶ୍ରୀ ଦିବ୍ୟ ରଞ୍ଜନ ନାଏକ ଧନ୍ୟବାଦ ଅର୍ପଣ କରିଥିଲେ ।୨୧ତମ ଉଦନ୍ତୀ ମହୋତ୍ସବ କଳା, ସାହିତ୍ୟ, ସଂସ୍କୃତି ଓ ଐତିହ୍ୟର ଏକ ଅମୂଲ୍ୟ ପରମ୍ପରାକୁ ଆଉ ଏକ ପଦକ୍ଷେପ ଆଗକୁ ବଢ଼ାଇ ଦେଇଛି । ଏହି ମହୋତ୍ସବ ନା କେବଳ ଏକ ଉତ୍ସବ, ବରଂ ଏକ ଆତ୍ମୀୟତାର ସେତୁ, ଯେଉଁଠାରେ ମନ ଓ ମାଟି ମିଶିଯାଏ । ଏବେ ଅପେକ୍ଷା, ଆସନ୍ତା ବର୍ଷରେ ଆଉ ଏକ ନୂତନ ଆୟାମରେ ଫେରିବାକୁ ଯାଉଥିବା ଉଦନ୍ତୀ ମହୋତ୍ସବକୁ |

ତେନ୍ତୁଳିଖୁଣ୍ଟି, ୨୯।୩, ଯୁଦ୍ଧ ପରିସ୍ଥିତି ପାଇଁ ଖରିଫ୍ ଋତୁରେ ସାର ଅଭାବ ସୃଷ୍ଟି ହେବାର ଆଶଙ୍କା ଦେଖାଦେଇଛି। ତେଣୁ ଏଭଳି ପରିସ୍ଥିତିରୁ ମୁକ୍ତି ପାଇଁ ବର୍ତ୍ତମାନ ସାର ବିକ୍ରି ବନ୍ଦ କରିବାକୁ ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ୍‌ରେ ଥୁବା ଲାଇସେନ୍ସଧାରୀ ସାର ବିକ୍ରେତାଙ୍କ ନିକଟରେ କୃଷି ବିଭାଗ ଅଧିକାରୀ ପହଞ୍ଚି ତାଗିଦ କରିଛନ୍ତି । ଅନଧୂକୃତ ସାର ବିକ୍ରି ଉପରେ ଅଙ୍କୁଶ, ବେଆଇନ ଭାବେ ବିକ୍ରି ହେଉଥିବା ସାର ଜବତ କରିବା, ବେଆଇନ ବିକ୍ରେତାଙ୍କ ଉପରେ ଆଇନଗତ ତଥା ପ୍ରଶାସନିକ କାର୍ଯ୍ୟାନୁଷ୍ଠାନ ଗ୍ରହଣ କରିବା, ପରବର୍ତ୍ତୀ ସରକାରୀ ନିର୍ଦ୍ଦେଶ ଦୋକାନୀ ସାର ବିକ୍ରି ବନ୍ଦ କରିବାକୁ ସଚେତନ କରାଯାଇଥିଲା। ଭାରପ୍ରାପ୍ତ ଏଡିଏଓ ବରୁଣ ଧନଫୁଲ, ବ୍ଳକ ସହକାରୀ କୃଷି ଅଧିକାରୀ ଫର୍ଟିଲାଇଜର ଇନ୍ସପେକ୍ଟର ପ୍ରତିଭା ତିରିଆ ଓ କୃଷି ଓଭରସିୟର ଧୀରେଳ ବେନ୍ୟା, ଭିତେନ୍ଦ୍ର ଟାକ୍ରି, ଏଟିଏମ୍ ବାଳଗୋବିନ୍ଦ ସାହୁ, ଆଶିଷ ପରିଡ଼ା ପ୍ରମୁଖ ପ୍ରତି ବ୍ଲକ୍‌ରେ ଥିବା ଲାଇସେନ୍ସ ଧାରୀ ୩୪ ଟି ସାର ଦୋକାନରେ ପହଞ୍ଚୁ ଯାହାବି ଷ୍ଟକ ଅଛି ସେହି ଷ୍ଟକରୁ କିଛି ବିକ୍ରି ନ କରିବାକୁ ସରକାରୀ ଆଦେଶ ଆସିଛି, ତାର ଅନୁପାଳନ କରିବାକୁ କହିଥିଲେ।

ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଡି ବ୍ଲକ ବେଗୁଗୁଡ଼ାଠାରେ ଥିବା ଉପ ଡାକଘର ବିଭିନ୍ନ ଅବ୍ୟବସ୍ଥା ଘେରରେ ରହିଛି। ଏଠାରେ ଜଣେ କର୍ମଚାରୀ କାର୍ଯ୍ୟରତ ଥିଲେ ମଧ୍ୟ ଅନେକ ସମୟରେ ଉପସ୍ଥିତ ରହୁ ନ ଥିବାରୁ ଉପଜାକଘରେ ତ।ଲା ପଢୁଛି। ଫଳରେ ବହୁ ଦୂରଦୂରାନ୍ତରୁ ଆସୁଥିବା ଉପଭୋକ୍ତାମାନେ ଫେରିପାଇଥୁବା ଦେଖିବାକୁ ମିଳୁଛି। ୧୯୯୨ରେ ବେଲୁଗୁଡ଼ାଠାରେ ଶାଖା ଡାକଘର ଚାଲିଆସୁଥୁଲା । ଇତିମଧ୍ୟରେ ଲୋକନାଥ ନାୟକ, ରୋହିଣୀ ଖରା ଏହିଠାରେ କାର୍ଯ୍ୟ କରିଥିଲେ । ୨୦୨୩ରୁ ଜ୍ୟୋସ୍ନା କାର୍ଗୀ କାର୍ଯ୍ୟ ତୁଲାଇଛନ୍ତି | ସେ ଜଣେ କେନ୍ଦ୍ର ସରକାରଙ୍କ କର୍ମଚାରୀ ହୋଇଥିଲେ ମଧ୍ୟ ନିୟମିତ ଭାବେ କାର୍ଯ୍ୟରେ ଯୋଗଦେଉ ନ ଥିବା ଅଭିଯୋଗ ହେଉଛି! ପୋଷ୍ଟ ଅଫିସକୁ ଆସୁଥିବା ଆକାଉଣ୍ଟଧାରୀଙ୍କ କାମ ନ କରି ସେମାନଙ୍କୁ ହଇରାଣ କରୁଥିବା ଅଭିଯୋଗ ହେଉଛି । କେନ୍ଦ୍ର ଏବଂ ରାଜ୍ୟ ସରକାରଙ୍କ ବିଭିନ୍ନ ଲୋକାଭିମୁଖୀ ଯୋଜନା ସବୁ ବେଲୁଗୁଡ଼ାଠାରେ ଥିବା ଉପଡ।କଘରକୁ ଆସିଥିବା ମ ହିଳାମାନେ । ଗ୍ରାମାଞ୍ଚଳର ମହିଳାଙ୍କୁ ସଶସ୍ତୀକରଣ ଓ ସ୍ବାବଲମ୍ବୀ କରୁଥିବା ବେଳେ ଏହି ଶାଖାର ଆକାରଧାରୀ ପିଏମ୍ ଆବାସ ଓ ରାଜ୍ୟ ସରକାରଙ୍କ ଅଜ୍ୟୋଦୟ ଗୃହ କାର୍ଯ୍ୟର ଅର୍ଥ ରାଶି ଠିକ୍ ସମୟରେ ପାଇପାରୁ ନ ଥିବାରୁ ଗୃହ ନିର୍ମାଣ କାର୍ଯ୍ୟରେ ବାଧା ସୃଷ୍ଟି ହେଉଥିବା ଅଭିଯୋଗ ହେଉଛି। ସୁଭଦ୍ରା ଯୋଜନାର ଅର୍ଥ ରାଶିକୁ ମଧ୍ୟ ଇଠାଇବା ପାଇଁ ମହିଳାମାନେ ବାରମ୍ବାର ଆସି ନୟାନ୍ତ ହୋଇ ଫେରୁଥିବା ଦେଖିବାକୁ ମିଳିଛି। କେନ୍ଦ୍ର ସରକାର ଗ୍ରାମାଞ୍ଚଳର ଲୋକଙ୍କ ହାତ ପାହାନ୍ତାରେ ସମସ୍ତ ବ୍ୟାଙ୍କିଙ୍ଗ୍ ସୁବିଧାକୁ ଆହୁରି ସରଳ କରିବା ସହ ବିଭିନ୍ନ ସୁବିଧା ସୁଯୋଗ ସାଧାରଣ ଲୋକଙ୍କ ନିକଟତର କରିବାକୁ ଚେଷ୍ଟା କରୁଥିବା ବେଳେ ଏଭଳି କେତେଜଣ କର୍ମଚାରୀଙ୍କ କାର୍ଯ୍ୟକଳାପ ଯୋଗୁ ଲୋକେ ପୋଷ୍ଟ ଅଫିସଠାରୁ ମୁହଁ ଅବ୍ୟବସ୍ଥା ଘେରରେ ବେଜୁଗୁଡ଼ା ଉପଡାକଘର ସମୟରେ ଅଫିସରେ ଯୋଗ ନ ଦେଇ କେବଳ ନାମକୁ ମାତ୍ର କିଛି ସମୟ ବସି ଚାଲିଯାଇଥିବାରୁ ଦୂରଦୂରାନ୍ତରୁ ବିଭିନ୍ନ କାର୍ଯ୍ୟରେ ଆସୁଥିବା ଲୋକେ ଅପେକ୍ଷା କରି କରି ଫେରିଯାଇଥିବା ଲଳିତା ସୌରା, ମାଳଦୀ ସୌରା, କନକ ସୌରା, ରଶ୍ମିତା ନାୟକ, ବୈଦି ସୌରା, ପ୍ରତିମା ସୌରା, ମମତା ପାଇକ, ଜମାଇ ସୌରା, ଚକ୍ରପାଣି ନାୟକ ପ୍ରମୁଖ ପ୍ରକାଶ କରିଛନ୍ତି । ପ୍ରଶାସନ ପକ୍ଷରୁ ଖୁବ୍‌ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ସମ୍ପୃକ୍ତ ଅଧିକାରୀଙ୍କୁ ଅନ୍ୟତ୍ର ବଦଳି ପାଇଁ ସାଧାରଣରେ ଦାବି ହୋଇଛି। ଏ ସମ୍ପର୍କରେ କର୍ମଚାରୀ ଜ୍ୟୋତ୍ସ୍ନା କାର୍ଗୀଙ୍କୁ ପଚାରିବାରୁ ୫ ଦିନ ଧରି ପୋଷ୍ଟ ଅଫିସ ବନ୍ଦ ଥିବା କଥାକୁ ସେ ସ୍ବୀକାର କରିଛନ୍ତି। କାହିଁକି ଦୂରଦୂରାନ୍ତରୁ ଆସୁଥିବା ଗ୍ରାହକଙ୍କୁ ବାରମ୍ବାର ଆସିବାକୁ କହି କାର୍ଯ୍ୟ କରୁନାହାରି ବୋଲି କହିବାରୁ ସେ ଚୁପ୍ ରହିଥିଲେ।

ପୁରୀ: ପୁରୀ ଜିଲ୍ଲା ଓକିଲ ସଂଘର ସମ୍ପ୍ରତି ଅନୁଷ୍ଠିତ ନିର୍ବାଚନରେ ସହ-ସମ୍ପାଦକ ପଦବୀରେ ଶ୍ରୀ ଅନିଲ କୁମାର ସାହୁ ସର୍ବାଧିକ ଭୋଟ୍ ପାଇ ବିଜୟୀ ହୋଇଛନ୍ତି। ଏହି ବିଜୟ ସହିତ ସେ ସଂଘର ନୂତନ ସହ-ସମ୍ପାଦକ ଭାବେ ନିର୍ବାଚିତ ହୋଇଛନ୍ତି। ନିର୍ବାଚନରେ ଜିଲ୍ଲାର ବିଭିନ୍ନ ଅଞ୍ଚଳର ଆଇନଜୀବୀମାନେ ଉତ୍ସାହର ସହିତ ଭୋଟଦାନ କରିଥିଲେ। ଏହାରେ ଶ୍ରୀ ସାହୁଙ୍କ ପକ୍ଷରେ ଭାରୀ ସମର୍ଥନ ଦେଖିବାକୁ ମିଳିଥିଲା, ଯାହା ତାଙ୍କ ବ୍ୟକ୍ତିଗତ ପ୍ରତିଷ୍ଠା ଓ ସେବାଭାବକୁ ପ୍ରତିଫଳିତ କରୁଛି। ବିଜୟ ପରେ ଶ୍ରୀ ଅନିଲ କୁମାର ସାହୁ ତାଙ୍କ ପ୍ରତି ସମର୍ଥନ ଜଣାଇଥିବା ସମସ୍ତ ଗୁରୁଜନ, ବରିଷ୍ଠ ଆଇନଜୀବୀ ଏବଂ ଓକିଲ ଭାଇ-ଭଉଣୀ ମାନଙ୍କୁ ଆନ୍ତରିକ ଧନ୍ୟବାଦ୍ ଜଣାଇଛନ୍ତି। ସେ କହିଛନ୍ତି ଯେ, ସଂଘର ସାମଗ୍ରିକ ଉନ୍ନତି, ଆଇନଜୀବୀ ମାନଙ୍କ ହିତ ଓ ସୁରକ୍ଷା ଏବଂ ପେଶାଗତ ସୁବିଧା ବୃଦ୍ଧି ପାଇଁ ସେ ନିଷ୍ଠାପୂର୍ଣ୍ଣ ଭାବେ କାମ କରିବେ। ତାଙ୍କ ବିଜୟକୁ ନେଇ ସଂଘର ଅନ୍ୟାନ୍ୟ ସଦସ୍ୟମାନେ ମଧ୍ୟ ଖୁସି ପ୍ରକାଶ କରିଥିବା ବେଳେ, ଆଗାମୀ ଦିନରେ ସଂଘର କାର୍ଯ୍ୟକଳାପ ଅଧିକ ସକ୍ରିୟ ହେବ ବୋଲି ଆଶା କରାଯାଉଛି।

ଭଞ୍ଜନଗର: ରାଜ୍ୟବ୍ୟାପୀ ଓକିଲ ସଂଘ ନିର୍ବାଚନ ଅବସରରେ ଭଞ୍ଜନଗର ଓକିଲ ସଂଘରେ ନୂତନ ପଦାଧିକାରୀ ମାନଙ୍କ ନିର୍ବାଚନ ସଫଳତାର ସହ ସମ୍ପନ୍ନ ହୋଇଛି। ଏହି ନିର୍ବାଚନରେ ସଭାପତି ଭାବେ ସନ୍ତୋଷ ନାୟକ ନିର୍ବାଚିତ ହୋଇଥିବାବେଳେ, ଉପ-ସଭାପତି ଭାବେ ରଜତ କୁମାର ଦାସ ଚୟନିତ ହୋଇଛନ୍ତି। ସାଧାରଣ ସମ୍ପାଦକ ଭାବେ ଧିରେନ ସ୍ୱାଇଁ ଏବଂ ଯୁଗ୍ମ ସମ୍ପାଦକ ଭାବେ ସ୍ନିଗ୍ଧା ଦାସ ନିର୍ବାଚିତ ହୋଇଛନ୍ତି ଏବଂ କୋଷାଧକ୍ଷ ପଦବୀରେ ମଧୁସୂଦନ ପଣ୍ଡା ଜିତିଛନ୍ତି। ନିର୍ବାଚନ ପ୍ରକ୍ରିୟାକୁ ବରିଷ୍ଠ ଓକିଲ ଲଡୁକିଶୋର ଆଲତିଆ ପରିଚାଳନା କରିଥିଲେ। ଶାନ୍ତିପୂର୍ଣ୍ଣ ଓ ସୁସଂଘଟିତ ପରିବେଶରେ ଏହି ନିର୍ବାଚନ ସମ୍ପନ୍ନ ହୋଇଥିବା ସୂଚନା ମିଳିଛି। ନବନିର୍ବାଚିତ ପଦାଧିକାରୀମାନଙ୍କୁ ସଂଘର ସଦସ୍ୟମାନେ ଅଭିନନ୍ଦନ ଜଣାଇଥିବା ସହ, ସଂଘର ସାମଗ୍ରିକ ଉନ୍ନତି ଓ ଓକିଲମାନଙ୍କ ହିତରେ କାମ କରିବେ ବୋଲି ଆଶା ପ୍ରକାଶ କରିଛନ୍ତି।