ଖୋର୍ଦ୍ଧା: ପାରମ୍ପରିକ ରୀତିନୀତି ଓ ଭକ୍ତିମୟ ପରିବେଶ ମଧ୍ୟରେ ମଳିପଡ଼ା ବଡ଼ମଠରେ ଚାଲିଥିବା ପବିତ୍ର ଝୁଲଣ ଯାତ୍ରା ମହାଆଡ଼ମ୍ବରରେ ସମାପନ ହୋଇଛି। ପ୍ରାୟ ୬ ଦିନ ଧରି ଚାଲିଥିବା ଏହି ଝୁଲଣ ଯାତ୍ରାରେ ପ୍ରତ୍ୟେକ ଦିନ ଠାକୁରଙ୍କ ବିଭିନ୍ନ ନୀତିକାନ୍ତି ସହ ସ୍ୱତନ୍ତ୍ର ଧାର୍ମିକ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା। ପ୍ରାୟ ୭୦୦ ବର୍ଷର ପୁରାତନ ଏହି ବଡ଼ମଠରେ ପୁରୀ ଶ୍ରୀମନ୍ଦିରର ପରମ୍ପରା ଓ ନୀତିକାନ୍ତି ଅନୁସାରେ ବିଭିନ୍ନ ଧାର୍ମିକ ନୀତି ସମ୍ପନ୍ନ ହୋଇଆସୁଥିବା କୁହାଯାଏ। ଏହି ପରମ୍ପରା ଝୁଲଣ ଯାତ୍ରାକୁ ଆହୁରି ଆକର୍ଷଣୀୟ କରିଥିଲା। ଝୁଲଣ ଯାତ୍ରା ଅବସରରେ ୬ ଦିନ ଧରି ବିଭିନ୍ନ ସାଂସ୍କୃତିକ ଓ ଧାର୍ମିକ କାର୍ଯ୍ୟକ୍ରମରେ ମଠ ପରିସର ଚଳଚଞ୍ଚଳ ହୋଇଉଠିଥିଲା। ସମାପନୀ ଦିବସରେ ଅସଂଖ୍ୟ ଶ୍ରଦ୍ଧାଳୁ ମଠରେ ପହଞ୍ଚି ଠାକୁରଙ୍କ ଦର୍ଶନ କରିବା ସହ ଝୁଲଣ ଯାତ୍ରାର ଆନନ୍ଦ ଉପଭୋଗ କରିଥିଲେ। ପରେ ଶ୍ରଦ୍ଧାଳୁମାନେ ପ୍ରସାଦ ସେବନ କରିଥିଲେ।ବଡ଼ମଠର ମହନ୍ତ ଅନନ୍ତ ନାରାୟଣ ଦେବାଚାର୍ଯ୍ୟଙ୍କ ତତ୍ତ୍ୱାବଧାନରେ ସମଗ୍ର ଝୁଲଣ ଯାତ୍ରା ଆୟୋଜିତ ହୋଇଥିଲା। ପୁରାତନ ପରମ୍ପରା, ଧାର୍ମିକ ନୀତିକାନ୍ତି ଓ ସାଂସ୍କୃତିକ ଆୟୋଜନର ମିଶ୍ରଣରେ ଚଳିତ ବର୍ଷର ଝୁଲଣ ଯାତ୍ରା ଶ୍ରଦ୍ଧାଳୁଙ୍କ ମନରେ ସ୍ୱତନ୍ତ୍ର ଛାପ ଛାଡ଼ିଛି।

ଶକ୍ତି ଶ୍ରୀ ଯୋଜନା ଓଡ଼ିଶାର ଶିକ୍ଷାନୁଷ୍ଠାନରେ ଛାତ୍ରୀମାନଙ୍କ ସୁରକ୍ଷା ଓ ଆତ୍ମବିଶ୍ୱାସ ବୃଦ୍ଧି ଉପରେ ଗୁରୁତ୍ୱ ଦିଏ। ଏଥିରେ ଆତ୍ମରକ୍ଷା ପ୍ରଶିକ୍ଷଣ ସହିତ ,କମ୍ପାସ ସୁରକ୍ଷା, ସିସିଟିଭି ପରିଚାଳନା ତଥା ବାହ୍ୟ ପରିବେଶ ସୁରକ୍ଷା ର ବ୍ୟବସ୍ଥା ଓ ସଚେତନତା ଭଳି ବିଷୟ ରହିଛି। ସେଭଳି କାର୍ଯ୍ୟ କ୍ରମ ଚିକିଟି ବ୍ଲକ ଅନ୍ତର୍ଗତ ନୂଆପଡା ଶ୍ରୀ ବାଲାଜୀ ମହାବିଦ୍ୟାଳୟ ଶକ୍ତି ଶ୍ରୀ ଆତ୍ମାରକ୍ଷର ଗୋଟେ ଦିନିଆ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଅଛି ଗତ ୨୯/୮/୨୬ ତାରିଖରେ। ଶକ୍ତି ଶ୍ର ଆତ୍ମାରକ୍ଷର ଗୋଟେ ଦିନିଆ ନାରୀ ଅଧିକାର ଶିବିର ରେ ମହାବିଦ୍ୟାଳୟ ର 80 ଜଣ ଛାତ୍ରୀ ଅଂଶଗ୍ରହଣ କରିଛନ୍ତି। ମହାବିଦ୍ୟାଳୟର ଭାର ପ୍ରାପ୍ତ ଅଧ୍ୟକ୍ଷ ଡାକ୍ତର ସୁଦର୍ଶନ ପଟ୍ଟନାୟକ ତତ୍ଵାବଧାନରେ ଏହି କାଯ୍ୟକ୍ରମଟି ପରିଚାଳିତ ହୋଇଥିଲା। ଏହି କାଯ୍ୟକ୍ରମର ପ୍ରୋଗ୍ରାମ କୋର୍ଡିନେଟର ଥିଲେ ମହାବିଦ୍ୟାଳୟର ଅଧ୍ୟାପିକା ସୁଚିତ୍ରା ମହାନ୍ତି। ଏହି କର୍ମଶାଳାରେ ଆଡ଼ଭୋକେଟ ନୀଳାମ୍ବର ମହାପାତ୍ର ଯୋଗ ଦେଇଥିଲେ।

ଗୁଡାରି: ଗୁମୁଡା-ଗୁଡାରି ସଂଯୋଗୀ ରାସ୍ତା ନିର୍ମାଣ ହୋଇଥିଲେ ମଧ୍ୟ ଏହାର ଅନେକ ସ୍ଥାନରେ ଦୁରବସ୍ଥା ଯୋଗୁଁ ଲୋକେ ଆଶାନୁରୂପ ସୁବିଧା ପାଇପାରୁନାହାନ୍ତି। ବିଶେଷକରି ଖାଲଗୁମୁଡା ନିକଟର ପ୍ରାୟ ୩ କିଲୋମିଟର ରାସ୍ତା ଏବଂ ନାଇରାଗୁଡା ଅଞ୍ଚଳରେ ରାସ୍ତା ମଝିରେ ଥିବା ବଡ଼ ବଡ଼ ଖାଲ ଯାତାୟାତ ପାଇଁ ସମସ୍ୟା ସୃଷ୍ଟି କରୁଛି। ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ସାମାନ୍ୟ ବର୍ଷା ହେଲେ ମଧ୍ୟ ରାସ୍ତାର ଖାଲଗୁଡ଼ିକରେ ପାଣି ଜମି ଯାଉଛି। ଫଳରେ ରାସ୍ତା ଉପରେ କୃତ୍ରିମ ବନ୍ଧ ଭଳି ପରିସ୍ଥିତି ସୃଷ୍ଟି ହେଉଛି। ଏହି ରାସ୍ତା ଦେଇ ନିତିଦିନ ବଡ଼ ବସ୍‌ ଓ ମାଲବାହୀ ଯାନ ଚଳାଚଳ କରୁଥିବାରୁ ଦୁର୍ଘଟଣାର ଆଶଙ୍କା ମଧ୍ୟ ରହୁଛି। ଏହାସହ ଗୁଡାରିର ମୁଖ୍ୟ ରାସ୍ତା ଭାବେ ପରିଚିତ ବଂଶଧାରା ନଦୀ ପାଲୋ ନିକଟରୁ ଶିରିଗୁଡା ଛକ ପର୍ଯ୍ୟନ୍ତ ରାସ୍ତାର ଅବସ୍ଥା ମଧ୍ୟ ଚିନ୍ତାଜନକ ବୋଲି ସ୍ଥାନୀୟ ଲୋକେ କହିଛନ୍ତି। ପ୍ରତିଦିନ ଏହି ରାସ୍ତା ଦେଇ ତିନିଟି ପଞ୍ଚାୟତର ଲୋକେ ଯାତାୟାତ କରୁଥିବାରୁ ରାସ୍ତାର ଦୁରବସ୍ଥା ଯୋଗୁଁ ସେମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି। ସ୍ଥାନୀୟ ବାସିନ୍ଦା ନିରଞ୍ଜନ ପୂଜାରୀଙ୍କ କହିବାନୁଯାୟୀ, ଗୁଡାରିର ମୁଖ୍ୟ ରାସ୍ତାର ଦୁରବସ୍ଥା ନେଇ ଦୀର୍ଘଦିନ ଧରି ଅଭିଯୋଗ ହୋଇଆସୁଛି। ଜିଲ୍ଲା ପ୍ରଶାସନ ଓ ଲୋକପ୍ରତିନିଧିମାନେ ଏହି ରାସ୍ତା ଦେଇ ଯାତାୟାତ କରୁଥିଲେ ମଧ୍ୟ ସମସ୍ୟାର ସ୍ଥାୟୀ ସମାଧାନ ହେଉନଥିବାରୁ ସାଧାରଣରେ ଅସନ୍ତୋଷ ବଢ଼ୁଛି। ଗତ ୨୪ ବର୍ଷର ଶାସନ କାଳରେ ମଧ୍ୟ ଗୁଡାରିବାସୀଙ୍କ ରାସ୍ତା ସମସ୍ୟାର ସମାଧାନ ହୋଇନଥିବା ଅଭିଯୋଗ ହୋଇଥିବାବେଳେ, ବର୍ତ୍ତମାନର ସରକାର ମଧ୍ୟ ଏହି ସମସ୍ୟା ପ୍ରତି ଅଣଦେଖା କରୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଗୁଡାରି ଏନ୍‌ଏସିକୁ ବିଭିନ୍ନ କ୍ଷେତ୍ରରେ ପୁରସ୍କାର ମିଳୁଥିବା ବେଳେ ସହରର ମୁଖ୍ୟ ରାସ୍ତାର ଏଭଳି ଦୁରବସ୍ଥାକୁ ନେଇ ମଧ୍ୟ ପ୍ରଶ୍ନ ଉଠୁଛି। “ଗୁଡାରିବାସୀ କଣ ଭୋଟ ଦେଉନାହାନ୍ତି? ଟିକସ ଦେଉନାହାନ୍ତି କି?” ବୋଲି ସାଧାରଣରେ ପ୍ରଶ୍ନ ଉଠିଛି। ତୁରନ୍ତ ରାସ୍ତାର ଖାଲଖମା ସମତଳ କରିବା ସହ ନିଷ୍କାସନ ବ୍ୟବସ୍ଥା ସୁଧାରି ସ୍ଥାୟୀ ଭାବେ ରାସ୍ତା ମରାମତି କରିବାକୁ ଗୁଡାରିବାସୀ ଦାବି କରିଛନ୍ତି। ଏନେଇ ଜିଲ୍ଲା ପ୍ରଶାସନ ଓ ସମ୍ପୃକ୍ତ ବିଭାଗ କେବେ ପଦକ୍ଷେପ ନେବେ, ତାହାକୁ ଅପେକ୍ଷା କରିଛନ୍ତି ସ୍ଥାନୀୟ ଲୋକେ।