Web News

ଦୋବଲ ଏସ୍‌ବିଆଇ ଶାଖା ବିରୋଧରେ ଥାନାରେ ଅଭିଯୋଗ ଧାମନଗର, ୧୮।୯: କୃଷି ଋଣ ଖାତାରୁ ତାଙ୍କ ସମ୍ମତି ବିନା ୧୩,୧୯୯ ଟଙ୍କା ଡେବିଟ୍ ହୋଇଥିବା ଅଭିଯୋଗ କରିଛନ୍ତି ରାଧାବଲ୍ଲଭପୁର ଗ୍ରାମର ସଞ୍ଜୀବ କୁମାର ମହାନ୍ତି। ଏନେଇ ସେ ଧାମନଗର ଥାନାରେ ଲିଖିତ ଅଭିଯୋଗ କରି ଘଟଣାର ତଦନ୍ତ ସହ ଟଙ୍କା ଫେରସ୍ତ ଦାବି କରିଛନ୍ତି। ଅଭିଯୋଗ ଅନୁସାରେ, ସଞ୍ଜୀବ କୃଷି ଋଣ ପାଇଁ ଦୋବଲ ଏସ୍‌ବିଆଇ ଶାଖାରେ ଆବଶ୍ୟକ କାଗଜପତ୍ର ଦାଖଲ କରିଥିଲେ। ପରେ ତାଙ୍କ ନାମରେ ଏକ କୃଷି ଋଣ ଖାତା ଖୋଲାଯାଇଥିଲା। ତେବେ ଗତ ଅଗଷ୍ଟ ୧୯ ତାରିଖରେ ତାଙ୍କ ଅଜାଣତରେ ଉକ୍ତ ଖାତାରୁ ୧୩,୧୯୯ ଟଙ୍କା ଡେବିଟ୍ ହୋଇଥିବା ସେ ଜାଣିବାକୁ ପାଇଥିଲେ। ଏହି ଟଙ୍କା କେଉଁ କାରଣରେ ଡେବିଟ୍ ହେଲା ଏବଂ କେଉଁ ଖାତାକୁ ଟଙ୍କା ଯାଇଛି, ସେ ସମ୍ପର୍କରେ ତାଙ୍କୁ ସ୍ପଷ୍ଟ ସୂଚନା ମିଳିନଥିବା ସଞ୍ଜୀବ ଅଭିଯୋଗରେ ଦର୍ଶାଇଛନ୍ତି। ଟଙ୍କା ଫେରସ୍ତ ଓ ଡେବିଟ୍‌ର କାରଣ ଜାଣିବା ପାଇଁ ସେ ବ୍ୟାଙ୍କ ଶାଖାକୁ ଯାଇଥିଲେ ମଧ୍ୟ ସମାଧାନ ହୋଇନଥିବା ସେ ଅଭିଯୋଗ କରିଛନ୍ତି। ଏହି ଟଙ୍କା କିପରି ଡେବିଟ୍ ହେଲା, କାହା ନିର୍ଦ୍ଦେଶରେ ହେଲା ଏବଂ ଟଙ୍କା କେଉଁ ଖାତାକୁ ଯାଇଛି, ତାହାର ତଦନ୍ତ କରାଯାଇ ଟଙ୍କା ଫେରସ୍ତ କରାଯାଉ ବୋଲି ସଞ୍ଜୀବ ଦାବି କରିଛନ୍ତି।

ଝାରବନ୍ଧ -ପଶ୍ଚିମ ଓଡ଼ିଶାର କୃଷିଭିତ୍ତିକ ଗଣପର୍ବ ନୂଆଁଖାଇ ଅବସରରେ ବରଗଡ଼ ଜିଲ୍ଲା ଝାରବନ୍ଧ ବ୍ଲକ ଅନ୍ତର୍ଗତ ସାରମସିଲି ଗ୍ରାମର ମଝିପଡ଼ାରେ ସାମୂହିକ ଭାବେ ନୂଆଁଖାଇ ପର୍ବ ପାଳିତ ହୋଇଯାଇଛି। ଗ୍ରାମବାସୀ ଏକାଠି ହୋଇ ଚଳିତବର୍ଷ ମଝିପଡ଼ାରେ ଉତ୍ସବମୁଖର ପରିବେଶ ସୃଷ୍ଟି କରିଥିଲେ। ନୂଆଁଖାଇ ହେଉଛି ନୂଆ ଧାନକୁ ଇଷ୍ଟଦେବୀଙ୍କ ନିକଟରେ ଅର୍ପଣ କରିବା ପରେ ପରିବାର ଓ ସମାଜ ସହ ଏକାଠି ନବାନ୍ନ ଭୋଜନ କରିବାର ପରମ୍ପରା। ଏହି ପର୍ବ ଚାଷୀଙ୍କ ଜୀବନ, କୃଷି ଓ ମାଟି ସହ ଜଡ଼ିତ ଥିବାରୁ ପଶ୍ଚିମ ଓଡ଼ିଶାରେ ଏହାର ସ୍ୱତନ୍ତ୍ର ମହତ୍ତ୍ୱ ରହିଛି। ସାରମସିଲି ମଝିପଡ଼ାରେ ଆୟୋଜିତ ସାମୂହିକ ନୂଆଁଖାଇରେ ମଝି ପଡ଼ାର ବୟସ୍କଙ୍କଠାରୁ ଆରମ୍ଭ କରି ଯୁବକ, ମହିଳା ଓ ଶିଶୁମାନେ ଉତ୍ସାହର ସହ ସାମିଲ ହୋଇଥିଲେ। ପରସ୍ପରକୁ ନୂଆଁଖାଇ ଜୁହାର ଜଣାଇବା ସହ ପାରମ୍ପରିକ ନବାନ୍ନ ଭୋଜନକୁ ନେଇ ସମସ୍ତଙ୍କ ମଧ୍ୟରେ ବିଶେଷ ଆନନ୍ଦ ପରିଲକ୍ଷିତ ହୋଇଥିଲା। ସାମୂହିକ ନୂଆଁଖାଇ ମାଧ୍ୟମରେ ଗ୍ରାମର ଭାଇଚାରା, ସାମାଜିକ ଏକତା ଓ ପରସ୍ପର ସହଯୋଗର ଭାବନା ଆହୁରି ମଜବୁତ ହୋଇଛି। ଏହି ଅବସରରେ ମଝିପଡ଼ାର ଗ୍ରାମବାସୀ ସହଦେବ ସାହୁ, ଗିରଧାରୀ ସାହୁ, ପରମାନନ୍ଦ ସାହୁ, ସୂରିତ ସାହୁ, ଦିଲ୍ଲୀପ ସାହୁ, ଦୀନବନ୍ଧୁ ସାହୁ, ଗୋବର୍ଦ୍ଧନ ସାହୁ, ଗର୍ଜନ ସାହୁ, ରିଖିରାମ ଶତନାମୀ ସହ ପ୍ରମୁଖ ଉପସ୍ଥିତ ଥିଲେ। ନିମନ୍ତ୍ରିତ ଅତିଥି ଭାବେ ବିଜେପି ଜଗଦଲପୁର ମଣ୍ଡଳ ସଭାପତି କ୍ଷୀରସାଗର ସାହୁ, ପଦ୍ମନ ରଣା, ହରେକୃଷ୍ଣ ପଟେଲ, ମଦନ ପଟେଲ, ସତ୍ୟମ ପ୍ରଧାନ, ଗଣେଶ ସାହୁ, ତୁଳସୀ ସାହୁ, ପ୍ରଦ୍ୟୁମ୍ନ ସାହୁ ଯୋଗଦେଇ ନୂଆ ପିଢ଼ିକୁ ନିଜ ମାଟି, ପରମ୍ପରା ଓ ସଂସ୍କୃତି ସହ ଯୋଡ଼ି ରଖିବାକୁ ଆହ୍ୱାନ ଦେଇଥିଲେ।

ବରଗଡ଼ ଜିଲ୍ଲା ବିଜେପୁର ବ୍ଲକ ବରମୁଣ୍ଡା ଗ୍ରାମରେ ଆୟୋଜିତ ‘ନୂଆଁଖାଇ ଭେଟ୍‌ଘାଟ୍‌-୨୦୨୬’ ତିନିଦିନ ଧରି ଧୁମ୍‌ଧାମ୍‌ରେ ପାଳିତ ହୋଇଯାଇଛି । ପ୍ରଥମ ଦିନରେ ଛାତ୍ରଛାତ୍ରୀ ଓ ଯୁବପିଢ଼ିଙ୍କୁ ନେଇ ବିଭିନ୍ନ ପ୍ରତିଯୋଗିତା ହୋଇଥିଲା। ପ୍ରବନ୍ଧ, ରସିଘିଚା, ମ୍ୟୁଜିକ ଚେୟାର, ରଙ୍ଗୋଲି, କ୍ୟାରମ ଓ ଚିତ୍ରାଙ୍କନ ଭଳି ପ୍ରତିଯୋଗିତାରେ ଗ୍ରାମର ଯୁବକଯୁବତୀ ଓ ଛାତ୍ରଛାତ୍ରୀ ଉତ୍ସାହର ସହ ଭାଗ ନେଇଥିଲେ। ବିଜେପୁର ବ୍ଲକ ଚେୟାରମ୍ୟାନ ଜୟକୃଷ୍ଣ ଡନସେନା ଏହି କାର୍ଯ୍ୟକ୍ରମର ଉଦ୍‌ଘାଟନ କରିଥିବାବେଳେ ଗୌନ୍ତିଆ ଚନ୍ଦ୍ରଗୁପ୍ତ ନାଏକଙ୍କ ସଭାପତିତ୍ୱରେ ସାଧାରଣ ସଭାରେ ରିତା ସାହୁ ଯୋଗଦାନ କରିଥିବାବେଳେ ଜିଲ୍ଲା ପରିଷଦ ଅଧ୍ୟକ୍ଷା ମାନିନୀ ଭୋଇଙ୍କ ସମେତ ବିଭିନ୍ନ ଜନପ୍ରତିନିଧି, ବୁଦ୍ଧିଜୀବୀ, ଚାଷୀ ଓ କଳାକାର ଉପସ୍ଥିତ ଥିଲେ।ସମାଜସେବା ଓ ଗ୍ରାମର ପୂଜାର୍ଚ୍ଚନା କ୍ଷେତ୍ରରେ ଅବଦାନ ପାଇଁ ସ୍ୱର୍ଗତ ରୋହିତାସ୍ଵ ମାଝୀଙ୍କୁ ମରଣୋତ୍ତର ଭାବେ ‘ଅମୂଲ୍ୟ ରତନ ବରମୁଣ୍ଡା’ ସମ୍ମାନ ପ୍ରଦାନ କରାଯାଇଥିଲା।ସନ୍ଧ୍ୟାରେ ଗ୍ରାମର ଛାତ୍ରଛାତ୍ରୀଙ୍କ ଲୋକନୃତ୍ୟ ଓ ସଙ୍ଗୀତ ପରିବେଷଣ ସହ ‘ବୁଢ଼ାରଜା କଳା ପରିଷଦ’ର ଦୁଲ୍‌ଦୁଲି ଦର୍ଶକଙ୍କୁ ଆକୃଷ୍ଟ କରିଥିଲା। ଏହାପରେ ହେମନ୍ତ କୁମାର ପଧାନଙ୍କ ନିର୍ଦ୍ଦେଶନାରେ ସମ୍ବଲପୁରୀ ନାଟକ ‘ସମିଆର୍‌ ଖେଲ୍‌’ ମଞ୍ଚସ୍ଥ ହୋଇଥିଲା। ଅନ୍ତିମ ଦିନରେ ଡ. ବୃନ୍ଦାବନ ନାଏକଙ୍କ ସଭାପତିତ୍ୱରେ ସଭା ଅନୁଷ୍ଠିତ ହୋଇଥିଲା। ବରଗଡ଼ ସାଂସଦ ପ୍ରଦୀପ ପୁରୋହିତ ଓ ବିଜେପୁର ବିଧାୟକ ସନତ କୁମାର ଗଡତିୟା ଯୋଗଦେଇଥିଲେ। ଏହି ଅବସରରେ ସ୍ୱଚ୍ଛ ପରିବେଶ, ବୃକ୍ଷରୋପଣ ଓ ସମାଜକଲ୍ୟାଣ ଉପରେ ଅତିଥିମାନେ ମତ ରଖିଥିଲେ।ବୃକ୍ଷରୋପଣ, ହସ୍ତତନ୍ତ ଓ ସମାଜସେବା କ୍ଷେତ୍ରରେ ଅବଦାନ ପାଇଁ କନଗାଁର ରାମଚନ୍ଦ୍ର ସାହୁଙ୍କୁ ‘ମିତ୍‌ ମଏତର’ ସମ୍ମାନରେ ସମ୍ମାନିତ କରାଯାଇଥିଲା। ପରେ ପଦ୍ମପୁରର ‘ଏକ ଟଙ୍କିଆ ସଙ୍ଗୀତ ବିଦ୍ୟାଳୟ’ର ଦୁଲ୍‌ଦୁଲି, ମହୁଲପାଲି କଳାକାରଙ୍କ ରାଧାକୃଷ୍ଣ ଲୀଳା ନୃତ୍ୟ ଏବଂ ଶେଷରେ ଗୁରୁଶ୍ରୀ ଜଗନ୍ନାଥ ସେଟ୍‌ଙ୍କ ନିର୍ଦ୍ଦେଶିତ ନାଟକ ‘ଆଦମ୍‌ ଖୋର୍‌’ ପରିବେଷିତ ହୋଇଥିଲା। ନାଟକ ମାଧ୍ୟମରେ ପାରିବାରିକ ସମ୍ପର୍କ ଓ ଲୋଭର ପରିଣାମ ନେଇ ସାମାଜିକ ବାର୍ତ୍ତା ଦିଆ ଯାଇଥିଲା। ଶିକ୍ଷକ ଡୋଲାମଣି ପଧାନ, ବିଭୂତି ଭୂଷଣ ସାହୁ ଓ ଆଶିଷ ପାଧନ ମଞ୍ଚ ପରିଚାଳନା କରିଥିବାବେଳେ ଶେଷଦେବ ପଧାନ ଧନ୍ୟବାଦ ଅର୍ପଣ କରିଥିଲେ।

ଶିହିଡିଆ: ଶିହିଡିଆ ଗ୍ରାମରେ ଗଣପତି ୟୁଥ୍ କ୍ଲବ୍, ଶିହିଡିଆ ପକ୍ଷରୁ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଭକ୍ତି ଓ ଉତ୍ସାହର ସହିତ ଶ୍ରୀ ଗଣେଶ ପୂଜା ଆୟୋଜିତ ହୋଇଛି। ଏହି ଅବସରରେ ଆକର୍ଷଣୀୟ ପୂଜା ମଣ୍ଡପ ସଜାଯାଇଥିବା ବେଳେ ଗ୍ରାମବାସୀ ଓ ଭକ୍ତମାନଙ୍କ ମଧ୍ୟରେ ବେଶ୍ ଉତ୍ସାହ ପରିଲକ୍ଷିତ ହୋଇଛି। ପୂଜା କାର୍ଯ୍ୟକ୍ରମର ଆରମ୍ଭରେ କଳସ ଯାତ୍ରା ଓ ନଗର ପରିକ୍ରମା ଅନୁଷ୍ଠିତ ହୋଇଥିଲା। ପରେ ବିଧିବିଧାନ ଅନୁଯାୟୀ ଶ୍ରୀ ଗଣେଶଙ୍କ ପୂଜା, ଆରତୀ, ପୁଷ୍ପାଞ୍ଜଳି ଓ ପ୍ରସାଦ ବଣ୍ଟନ କରାଯାଇଥିଲା। ଏହାସହ ନାମ ସଂକୀର୍ତ୍ତନ, ମେଲୋଡି ଡ୍ୟାନ୍ସ ପ୍ରୋଗ୍ରାମ୍ ଆଦି ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ଆୟୋଜନ କରାଯାଇଛି। ଗଣପତି ୟୁଥ୍ କ୍ଲବ୍ ପକ୍ଷରୁ ପ୍ରତିବର୍ଷ କେବଳ ଧାର୍ମିକ କାର୍ଯ୍ୟ ନୁହେଁ, ବରଂ ରକ୍ତଦାନ ଶିବିର, ବୃକ୍ଷରୋପଣ ଓ ବିଭିନ୍ନ ସେବାମୂଳକ କାର୍ଯ୍ୟ ମଧ୍ୟ କରାଯାଉଛି। ଯୁବପିଢ଼ିଙ୍କୁ ଏକତ୍ରିତ କରି ସମାଜସେବା ଓ ଭାଇଚାରାର ବାର୍ତ୍ତା ପ୍ରସାର କରିବା କ୍ଲବ୍‌ର ମୁଖ୍ୟ ଉଦ୍ଦେଶ୍ୟ ବୋଲି କ୍ଲବ୍ ସଦସ୍ୟମାନେ କହିଛନ୍ତି। ପୂଜା ଓ ସମସ୍ତ କାର୍ଯ୍ୟକ୍ରମକୁ ସଫଳ କରିବାରେ ଗ୍ରାମବାସୀ, ଯୁବକ ସଂଘର ସମସ୍ତ ସଦସ୍ୟ ଓ ଭକ୍ତମାନଙ୍କର ସହଯୋଗ ରହିଛି। ଶେଷରେ କ୍ଲବ୍ ପକ୍ଷରୁ ସମସ୍ତ ସହଯୋଗୀ, ଶୁଭେଚ୍ଛୁ ଓ ଭକ୍ତମାନଙ୍କୁ ହୃଦୟରୁ କୃତଜ୍ଞତା ଜଣାଯାଇଛି।

ବଣାଇ: ଦିନକୁ ଦିନ ବଣାଇ ବନଖଣ୍ଡ ଅଞ୍ଚଳରେ ବଣୁଆ ହାତୀଙ୍କ ଉପଦ୍ରବ ବୃଦ୍ଧି ପାଇବାରେ ଲାଗିଛି। ଆଜି ବଣାଇ ବନଖଣ୍ଡ ଅନ୍ତର୍ଗତ ଭାଙ୍ଗଡିହି ଅଞ୍ଚଳରେ ଏକ ବଣୁଆ ହାତୀ ବୁଲୁଥିବା ଦେଖିବାକୁ ମିଳିଛି। ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଭୟ ଓ ଆତଙ୍କ ସୃଷ୍ଟି ହୋଇଛି। ପ୍ରତ୍ୟେକ ଦିନ ବଣାଇ ଅଞ୍ଚଳର ବିଭିନ୍ନ ଗ୍ରାମରେ ବଣୁଆ ହାତୀଙ୍କ ଉପଦ୍ରବ ଲାଗିରହିଛି। ହାତୀମାନେ ଗ୍ରାମ ଭିତରକୁ ପଶି ଚାଷଜମିରେ ଥିବା ଫସଲ ନଷ୍ଟ କରିବା ସହିତ ଘରଦ୍ୱାର ଭାଙ୍ଗି ଦେଉଥିବା ଅଭିଯୋଗ ହେଉଛି। ଫଳରେ ଚାଷୀ ଓ ସାଧାରଣ ଲୋକମାନେ ଆର୍ଥିକ କ୍ଷତି ସହିବା ସହିତ ନିଜ ଜୀବନ ଓ ସମ୍ପତ୍ତିର ସୁରକ୍ଷା ନେଇ ଚିନ୍ତିତ ହୋଇପଡ଼ିଛନ୍ତି। ହାତୀଙ୍କ ଗତିବିଧି ଯୋଗୁଁ ଗ୍ରାମବାସୀଙ୍କ ମଧ୍ୟରେ ଭୟର ପରିବେଶ ଦେଖାଦେଇଛି। ତେଣୁ ବନ ବିଭାଗ ପକ୍ଷରୁ ହାତୀଙ୍କ ଗତିବିଧି ଉପରେ ନଜର ରଖିବା ସହିତ ଗ୍ରାମବାସୀଙ୍କ ସୁରକ୍ଷା ପାଇଁ ଆବଶ୍ୟକ ପଦକ୍ଷେପ ନେବାକୁ ସ୍ଥାନୀୟ ଲୋକମାନେ ଦାବି କରିଛନ୍ତି।

ବ୍ୟାସନଗର ଆଜି ତା ୧୮, ୯, ୨୦୨୬ ରିଖ ଯାଜପୁରଜିଲ୍ଲା ଶ୍ରମକାର୍ଯ୍ୟାଳୟ ରେ ବ୍ୟାପକ ଦୁର୍ନୀତି ଓ ସହାୟତା ରାଶି ପ୍ରଦାନ ରେ ଅନିୟମିତତା ପ୍ରତିବାଦ କରି ଶତାଧିକ ନିର୍ମାଣ ଶ୍ରମିକ ହିତାଧିକାରୀ ତୁରନ୍ତ ଅର୍ଥପ୍ରଦାନ ଦାବିରେ ଗଣଧାରଣା ଦେଇଥିଲେ, ଏହାକୁ ସମର୍ଥନ କରି ନିଖିଳ ଉତ୍କଳ ନିର୍ମାଣ ଶ୍ରମିକ ସଂଘ ସଭାପତି ତଥା ଓ, ଜେ ସି ଜିଲ୍ଲା ସଭାପତି ବିଦ୍ୟାଧର ମହାନ୍ତି ଧାରଣା ସ୍ଥଳରେ ପହଂଚିଥିଲେ ଓ ଆୟୋଜିତ ପ୍ରତିବାଦ ସଭାରେ ଭାଷଣ ଦେଇ ଏହି ଶ୍ରମକାର୍ଯ୍ୟାଳୟ ଦଲାଲ ଓ ମାଲିକ ମାନଙ୍କ ହାତରେ ପରିଚାଳିତ ହେବାଦ୍ୱାରା ବହୁ ଶ୍ରମିକ ସାମାଜିକସୁରକ୍ଷା ରୁ ବଂଚିତହେଉଛନ୍ତି, | ଅନେକ ଅଣଶ୍ରମିକ ଅଧିକାରୀମାନଙ୍କୁ ଲାଞ୍ଚ ଦେଇ ନିଜର ନାମ ପଞ୍ଜିକୃତ କରିବା ଘଟଣା କୁ ଶ୍ରୀ ମହାନ୍ତି ଦୃଢ଼ ନିନ୍ଦା କରିଥିଲେ, ପରିସ୍ଥିତି ଉତ୍ତଜନାପୂର୍ଣ୍ଣ ହେବାରୁ ଜିଲ୍ଲାଶ୍ରମଅଧିକାରୀ ସୁଧୀର ସାହୁ ଓ ଅହକାରୀ ଶ୍ରମଅଧିକାରୀ ଅଭିଜିତ ପ୍ରଧାନ ଧାରଣା କାରିଙ୍କ ସହି ଆଲୋଚନା କରି ଆସନ୍ତା ମାସରେ ଦରଖାସ୍ତ କାରୀକୁ ସହାୟତାପ୍ରଦାନ କରାଯିବ ସହ, କୋରାଇ ଓ ବ୍ୟାସନଗର ପାଇଁ ଶ୍ରୀ ପ୍ରଧାନ ନିଯୁକ୍ତ ଅଛନ୍ତି ବୋଲି ଘୋଷଣା କରିଥିଲେ |ଏହି ଆଲୋଚନା ରେ ଅନ୍ୟ ମାନଙ୍କ ମଧ୍ୟରେ ବିଦ୍ୟାଧର ଯେନା, ଅଭିମନ୍ୟୁ ପାତ୍ର, ମଦନ ସାହୁ,ପ୍ରଶାନ୍ତ ଜେନା ଶତ୍ରୁଘନ ମଲିକ, ଲଷ୍ମୀଧର ପାତ୍ର ରାକେଶ କୁମାର ଓ ପ୍ରଦୀପ ସେଠି ପ୍ରମୁଖ ଅଂଶଗ୍ରହଣ କରିଥିଲେ

ଭୁବନେଶ୍ୱର, : ଜାବିହାର ଛକଠାରୁ ହାତୀଆଶୁଣି ଅଭିମୁଖେ ଯାଇଥିବା ରାସ୍ତାକଡ଼ରେ କେତେକ କବାଡ଼ିଆ ଦୋକାନ ଖୋଲି ରାସ୍ତା ଉପରକୁ ଲୁହା, ଟିଣ ଓ ବିଭିନ୍ନ ସାମଗ୍ରୀ ରଖି ମେସିନ୍‌ ସାହାଯ୍ୟରେ କାଟୁଥିବା ଅଭିଯୋଗ ହୋଇଛି। ଏହା ଯୋଗୁଁ ରାସ୍ତା ସଙ୍କୁଚିତ ହେବା ସହ ଗାଡ଼ିମୋଟର ଚଳାଚଳ ଓ ପଥଚାରୀଙ୍କ ଯାତାୟାତରେ ସମସ୍ୟା ସୃଷ୍ଟି ହେଉଛି। ରାସ୍ତା ଉପରେ ଲୁହା ଓ ଟିଣ କାଟିବା ବେଳେ ସାମଗ୍ରୀ ଖସି ପଥଚାରୀ କିମ୍ବା ଗାଡ଼ି ଉପରେ ପଡ଼ିବାର ଆଶଙ୍କା ମଧ୍ୟ ରହିଛି। ସ୍ଥାନୀୟ ବସ୍ତିବାସିନ୍ଦାଙ୍କ ପ୍ରଶ୍ନ—ଏଭଳି ଭାବେ ରାସ୍ତା ଦଖଲ କରି କାମ ଚାଲୁଥିବା ବେଳେ BMC ଓ ମହାନଗର ନିଗମର ନଜର କାହିଁକି ପଡ଼ୁନାହିଁ? ସ୍ଥାନୀୟ ଲୋକଙ୍କ ଦାବି, ତୁରନ୍ତ ଘଟଣାସ୍ଥଳ ଯାଞ୍ଚ କରି ରାସ୍ତା ଅବରୋଧ ହଟାଯାଉ ଏବଂ ପଥଚାରୀ ଓ ଯାନବାହନ ଚଳାଚଳ ପାଇଁ ସୁରକ୍ଷିତ ବ୍ୟବସ୍ଥା କରାଯାଉ। ଯଦି ସମସ୍ୟାର ସମାଧାନ ଶୀଘ୍ର ନହୁଏ, ତେବେ ବସ୍ତିବାସିନ୍ଦାମାନେ BMC କାର୍ଯ୍ୟାଳୟ ଘେରାଉ କରିବାକୁ ବାଧ୍ୟ ହୋଇପାରନ୍ତି ବୋଲି ସୂଚନା ଦେଇଛନ୍ତି।

ଯାଜପୁର: ଯାଜପୁର ଜିଲ୍ଲା ବିଞ୍ଝାରପୁର ବ୍ଲକ ଅନ୍ତର୍ଗତ କପିଳା ଗ୍ରାମପଞ୍ଚାୟତର ରାହଂସ ଗ୍ରାମରେ ଆର୍.ଏସ୍. ଗଣେଶ ପୂଜା କମିଟି ପକ୍ଷରୁ ବିଘ୍ନବିନାଶକ ଭଗବାନ ଶ୍ରୀଗଣେଶଙ୍କ ପୂଜା ଧୁମଧାମରେ ପାଳିତ ହୋଇଯାଇଛି। ପୂଜା କମିଟିର ସଭାପତି, ସମ୍ପାଦକଙ୍କ ସମେତ ସମସ୍ତ ସଦସ୍ୟଙ୍କ ସହଯୋଗରେ ପୂଜାକୁ ଶୃଙ୍ଖଳିତ ଓ ଆକର୍ଷଣୀୟ ଭାବେ ଆୟୋଜନ କରାଯାଇଥିଲା। ଏହି ଅବସରରେ ଗ୍ରାମବାସୀଙ୍କ ଚିତ୍ତବିନୋଦନ ସହ ଶିଶୁ କଳାକାରମାନଙ୍କ ପ୍ରତିଭାକୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ସ୍ୱତନ୍ତ୍ର ନୃତ୍ୟ ପ୍ରତିଯୋଗିତା ଆୟୋଜିତ ହୋଇଥିଲା। ଏହି ପ୍ରତିଯୋଗିତାରେ ବିଭିନ୍ନ ଅଞ୍ଚଳରୁ ଶିଶୁ କଳାକାରମାନେ ଯୋଗଦେଇ ନିଜ ନୃତ୍ୟ ପ୍ରତିଭା ପ୍ରଦର୍ଶନ କରିଥିଲେ। ଶିଶୁ କଳାକାରମାନଙ୍କ ଚମତ୍କାର ପ୍ରଦର୍ଶନ ଉପସ୍ଥିତ ଦର୍ଶକଙ୍କୁ ଆକର୍ଷିତ କରିଥିଲା। ବିଚାରକମାନେ କଳାକାରମାନଙ୍କ ପ୍ରଦର୍ଶନକୁ ମୂଲ୍ୟାୟନ କରି ବିଜେତା ଓ ଯୋଗ୍ୟ ସ୍ଥାନ ଅଧିକାର କରିଥିବା ଶିଶୁ କଳାକାରମାନଙ୍କୁ ଟ୍ରଫି ପ୍ରଦାନ କରିଥିଲେ। ପୂଜା କମିଟି ପକ୍ଷରୁ ସମଗ୍ର କାର୍ଯ୍ୟକ୍ରମକୁ ସୁଚାରୁ ଓ ଶୃଙ୍ଖଳିତ ଭାବେ ପରିଚାଳନା କରାଯାଇଥିବା ବେଳେ ଗ୍ରାମବାସୀଙ୍କ ସହଯୋଗ ଓ ଉପସ୍ଥିତି କାର୍ଯ୍ୟକ୍ରମକୁ ଅଧିକ ସଫଳ କରିଥିଲା।

ଜଗତପୁର: ମହାନଦୀକୁ ଗାଧୋଇବାକୁ ଯାଇ ନିଖୋଜ ହୋଇଯାଇଥିବା ଛାତ୍ର ଦିବ୍ୟାଂଶୁ ନାୟକ (୧୪)ଙ୍କ ମୃତଦେହ ଶୁକ୍ରବାର ସକାଳେ ଉଦ୍ଧାର କରାଯାଇଛି l ଗତ କାଲି ନିଖୋଜ ସ୍ଥାନ ଠାରୁ ମାତ୍ର ୧ କିଲୋମିଟର ଦୂର ନୂଆସାହି ନିକଟରୁ ମୃତ ଦେହ ଭାସୁଥିବା ବେଳେ ଏହାକୁ ଉଦ୍ଧାର କରାଯାଇଛି l ସୂଚନା ଯୋଗ୍ୟ ଯେ ଗତ କାଲି ଗୁରୁବାର ସକାଳ ପ୍ରାୟ ସାଢେ ଦଶଟା ବେଳେ ମୃତକ ଦିବ୍ୟାଂଶୁ ତା' ଅନ୍ୟ ଦୁଇ ସାଙ୍ଗ ନାନକାରର ଶୁଭମ ସିଂହ ଓ ଅଶ୍ୱିନୀ କୁମାର ଗିରିଙ୍କ ସହ ତରୋଳରେ ଚାଲିଥିବା ଗଣେଶ ମହୋତ୍ସବ ଦେଖିବାକୁ ଯାଇଥିଲେ l ସେଠାରୁ ଗାଧୋଇବା ପାଇଁ ମହାନଦୀକୁ ଯାଇଥିଲେ l ବାଲିସାହି ନିକଟରେ ମହାନଦୀରେ ଗାଧୋଇବାକୁ ପସିଥିବା ସମୟରେ ଦିବ୍ୟାଂଶୁର ଗୋଡ଼ ଖସିଯାଇଥିଲା ଓ ସେ ବୁଡ଼ିଯାଇଥିଲା l ଏହି ସମୟରେ ସେଠାରେ ଥିବା ଲୋକମାନେ ଅନ୍ୟ ଦୁଇ ଜଣଙ୍କୁ ଉଦ୍ଧାର କରିଥିଲେ ମଧ୍ୟ ଦିବ୍ୟାଂଶୁର ପତ୍ତା ପାଇପାରିନଥିଲେ l ଖବର ପାଇ ଅଗ୍ନିଶମ ବାହିନୀ, ଓଡ୍ରାଫ୍ ଓ ସ୍କୁବା ଉଦ୍ଧାରକାରୀ ଦଳ ବହୁ ଖୋଜାଖୋଜି କରିଥିଲେ ହେଁ ସଂନ୍ଧ୍ଯା ପର୍ଯ୍ୟନ୍ତ ନିଖୋଜ ଛାତ୍ରଙ୍କ ସନ୍ଧାନ ପାଇପାରି ନଥିଲେ। ଶୁକ୍ରବାର ସକାଳେ ଅଗ୍ନିଶମ ବାହୀନୀଙ୍କ ଦ୍ୱାରା ନିଖୋଜ ନାବାଳକ ଛାତ୍ରର ମୃତଦେହ ଉଦ୍ଧାର କରାଯାଇଛି | ଜଗତପୁର ପୁଲିସ ଉଦ୍ଧାର ମୃତ ଦେହକୁ ଜବତକରି ସାବିତ୍ରୀ ସ୍ୱେଚ୍ଛାସେବୀ ଅନୁଷ୍ଠାନ ସହାୟତାରେ ଶବ ବ୍ୟବଛେଦ ନିମନ୍ତେ କଟକ ବଡ ମେଡିକାଲକୁ ପଠାଇବା ସହ ଏକ ଅପମୃତ୍ୟୁ ମାମଲା ରୁଜୁ କରିଛି l

ଖଲ୍ଲିକୋଟ, ୧୭/୦୯: କନ୍ୟା ସଂକ୍ରାନ୍ତି ଅବସରରେ ଖଲ୍ଲିକୋଟ ଅଞ୍ଚଳର ବିଭିନ୍ନ ସ୍ଥାନରେ ଦେବଶିଳ୍ପୀ ଭଗବାନ ଶ୍ରୀ ବିଶ୍ୱକର୍ମାଙ୍କ ପୂଜା ଭକ୍ତି ଓ ଉତ୍ସାହର ସହିତ ପାଳିତ ହୋଇଯାଇଛି। ଏହା ସହିତ ଷଷ୍ଠୀ ଓଷା ବ୍ରତ, ଲଳିତା ସପ୍ତମୀ, କୁକୁଟୀ ବ୍ରତ ଓ ସୋମନାଥ ବ୍ରତାରମ୍ଭ ମଧ୍ୟ ପାଳନ କରାଯାଇଥିଲା। ଏହି ଅବସରରେ ପଲ୍ଲୀଠାରୁ ସହର ପର୍ଯ୍ୟନ୍ତ ଘରେ ଘରେ ମା’ ଷଷ୍ଠୀ ଦେବୀଙ୍କ ପୂଜା କରାଯାଇଥିବାବେଳେ ବିଭିନ୍ନ କାରିଗରୀ ଅନୁଷ୍ଠାନ, ଗାଡ଼ି ମାଲିକ ସଂଘ ଓ ସରକାରୀ କାର୍ଯ୍ୟାଳୟରେ ବିଶ୍ୱକର୍ମା ପୂଜାକୁ ନେଇ ବେଶ୍‌ ଉତ୍ସାହ ପରିଲକ୍ଷିତ ହୋଇଥିଲା। ଖଲ୍ଲିକୋଟ ବାଲୁଙ୍କେଶ୍ୱର ମନ୍ଦିର ନିକଟରେ କାର୍‌, ବୋଲେରୋ ଓ ଟ୍ୟାକ୍ସି ମାଲିକ ଏବଂ ଡ୍ରାଇଭରମାନଙ୍କ ପକ୍ଷରୁ ଭଗବାନ ବିଶ୍ୱକର୍ମାଙ୍କ ପ୍ରତିମୂର୍ତ୍ତି ସ୍ଥାପନ କରାଯାଇ ପାରମ୍ପରିକ ରୀତିନୀତିରେ ପୂଜାର୍ଚ୍ଚନା କରାଯାଇଥିଲା। ଗାଡ଼ି ଓ ଯନ୍ତ୍ରପାତିର ସୁରକ୍ଷା ସହିତ ସମୃଦ୍ଧି ଓ ଶୁଭଫଳ କାମନା କରି ଚାଳକ ଓ ମାଲିକମାନେ ପୂଜା କରିଥିଲେ। ସେହିପରି ମର୍ଦ୍ଦରାଜ ଶିଶୁ ଉଦ୍ୟାନ ନିକଟରେ ଥିବା ଜଳଯୋଗାଣ ବିଭାଗ ପକ୍ଷରୁ ମଧ୍ୟ ପ୍ରତିବର୍ଷ ଭଳି ଏବର୍ଷ ଧୁମଧାମରେ ବିଶ୍ୱକର୍ମା ପୂଜା ପାଳନ କରାଯାଇଥିଲା। ବିଭାଗୀୟ କର୍ମଚାରୀମାନେ ପୂଜାରେ ସାମିଲ ହୋଇ ଭଗବାନ ବିଶ୍ୱକର୍ମାଙ୍କ ଆଶୀର୍ବାଦ କାମନା କରିଥିଲେ। ଅନ୍ୟପକ୍ଷରେ ଖଲ୍ଲିକୋଟ ବ୍ଲକ୍‌ ଅନ୍ତର୍ଗତ କେଶପୁର ଗ୍ରାମରେ ମହାରଣା ସଂଘ ତଥା ବିଶ୍ୱକର୍ମା ସମ୍ପ୍ରଦାୟର କାରିଗରମାନଙ୍କ ପକ୍ଷରୁ ମଧ୍ୟ ଆଡ଼ମ୍ବରପୂର୍ଣ୍ଣ ଭାବେ ବିଶ୍ୱକର୍ମା ପୂଜା ଆୟୋଜିତ ହୋଇଥିଲା। ଏହି ପୂଜା ଦୀର୍ଘ ପଚାଶ ବର୍ଷ ଧରି ନିରନ୍ତର ଭାବେ ଆୟୋଜିତ ହୋଇଆସୁଥିବା ଜଣାପଡ଼ିଛି। କେଶପୁରରେ ଆୟୋଜିତ ପୂଜା କାର୍ଯ୍ୟକ୍ରମରେ ଅବସରପ୍ରାପ୍ତ ପ୍ରଧାନ ଶିକ୍ଷକ ଭାସ୍କର ମହାରଣା, ଗଞ୍ଜାମ ଜିଲ୍ଲା ବିଶ୍ୱକର୍ମା ସମାଜ ତଥା ରାଜ୍ୟ ଉପଦେଷ୍ଟା ଦୟାନିଧି ମହାରଣା, ସୁଦର୍ଶନ ମହାରଣା, ପଦ୍ମନାଭ ମହାରଣା, ବାଉରୀବନ୍ଧୁ ମହାରଣା, ଅଭିମନ୍ୟୁ ମହାରଣା, କିଶୋର ମହାରଣା, ଶିବାନୀ ମହାରଣା, ନରୋତ୍ତମ ମହାରଣା, ବୁଲୁ ମହାରଣା, କବିରାଜ ମହାରଣା ଓ ପ୍ରଭାକର ମହାରଣାଙ୍କ ସମେତ ବହୁ ବ୍ୟକ୍ତି ଉପସ୍ଥିତ ଥିଲେ। ଏଥିସହ ସ୍ଥାନୀୟ ବୁଦ୍ଧିଜୀବୀ ତଥା ବିଭିନ୍ନ ଯାନିଯାତ୍ରା ଓ ପର୍ବପର୍ବାଣୀରେ ସହଯୋଗ କରୁଥିବା ଶଙ୍କର ପାହାନ, ଭୋଳା ପାହାନ, ଅନାଥ ପାହାନ ଓ ରାଜୁ ଚଣ୍ଡଙ୍କ ସମେତ ଅନ୍ୟମାନେ ପୂଜା କାର୍ଯ୍ୟକ୍ରମରେ ଯୋଗଦେଇଥିଲେ। ବିଶ୍ୱକର୍ମା ପୂଜାକୁ ନେଇ ଖଲ୍ଲିକୋଟ ଅଞ୍ଚଳର ବିଭିନ୍ନ କାରିଗର, ଶ୍ରମିକ, ଗାଡ଼ି ମାଲିକ ଓ ଡ୍ରାଇଭରଙ୍କ ମଧ୍ୟରେ ଉତ୍ସାହର ପରିବେଶ ସୃଷ୍ଟି ହୋଇଥିଲା। ପୂଜାସ୍ଥଳଗୁଡ଼ିକରେ ଭକ୍ତଙ୍କ ସମାଗମ ସହ ଧୂପ, ଦୀପ ଓ ପୂଜାର୍ଚ୍ଚନାରେ ସମଗ୍ର ପରିବେଶ ଭକ୍ତିମୟ ହୋଇଉଠିଥିଲା।

ଛେଣ୍ଡିପଦା: ବିଶ୍ୱକର୍ମା ପୂଜା ଅବସରରେ ଆବଶ୍ୟକ ଅନୁମତି ବିନା ଡିଜେ ଚଳାଇବା ମହଙ୍ଗା ପଡ଼ିଛି। ଛେଣ୍ଡିପଦା ପୋଲିସ ନିୟମିତ ଯାଞ୍ଚ ସମୟରେ ଅନୁମତି ବିନା ଚାଲୁଥିବା ଏକ ଡିଜେ ଗାଡ଼ିକୁ ଅଟକ ରଖିଥିବା ଜଣାପଡ଼ିଛି। ଏନେଇ ଅନୁଗୋଳ ଆରଟିଓ ପକ୍ଷରୁ ୪୫,୦୦୦ ଟଙ୍କା ଜୋରିମାନା ଧାର୍ଯ୍ୟ କରାଯାଇଛି। ପୂଜା ଓ ଉତ୍ସବ ସମୟରେ ଉଚ୍ଚ ସ୍ୱରରେ ଏବଂ ବିନା ଅନୁମତିରେ ଡିଜେ ବ୍ୟବହାର ନକରିବାକୁ ପୋଲିସ ପକ୍ଷରୁ ସାଧାରଣ ଲୋକଙ୍କୁ ଅନୁରୋଧ କରାଯାଇଛି। ଅତ୍ୟଧିକ ଶବ୍ଦ ଯୋଗୁଁ ରୋଗୀ, ବୟସ୍କ ବ୍ୟକ୍ତି, ଶିଶୁ ଏବଂ ଅନ୍ୟାନ୍ୟ ସମ୍ବେଦନଶୀଳ ବ୍ୟକ୍ତିମାନେ ଅସୁବିଧାରେ ପଡ଼ିପାରନ୍ତି। ତେଣୁ ଉତ୍ସବ ପାଳନ ସମୟରେ ନିୟମକାନୁନ ପ୍ରତି ସମ୍ମାନ ରଖିବା ସହ ଦାୟିତ୍ୱପୂର୍ଣ୍ଣ ଭାବେ ପୂଜା ପାଳନ କରିବାକୁ ପୋଲିସ ପକ୍ଷରୁ ଆହ୍ୱାନ କରାଯାଇଛି। ନିଜର ଉତ୍ସବ ପାଳନ ଯେପରି ଅନ୍ୟମାନଙ୍କ ପାଇଁ ଦୁଃଖ ବା ଅସୁବିଧାର କାରଣ ନହୁଏ, ସେଥିପ୍ରତି ସମସ୍ତେ ସଚେତନ ରହିବାକୁ ଅନୁଗୋଳ ପୋଲିସ ଅନୁରୋଧ କରିଛି।

ଛେଣ୍ଡିପଦା: ନିୟମିତ ମୋଟରଯାନ ଯାଞ୍ଚ ସମୟରେ ଛେଣ୍ଡିପଦା ପୋଲିସ୍‌କୁ ମିଳିଛି ବନ୍ୟପ୍ରାଣୀ ସମ୍ପର୍କିତ ସନ୍ଦିଗ୍ଧ ସାମଗ୍ରୀ। ହାତୀର ଦାନ୍ତ (molar tooth) ସନ୍ଦେହରେ ପ୍ରାୟ ୩.୦୧୮ କିଲୋଗ୍ରାମ ଓଜନର ଏକ ସାମଗ୍ରୀ ପରିବହନ କରୁଥିବା ଅଭିଯୋଗରେ ପୋଲିସ୍ ଜଣେ ବ୍ୟକ୍ତିଙ୍କୁ ଅଟକ ରଖିଛି। ଯାଞ୍ଚ ସମୟରେ ସନ୍ଦିଗ୍ଧ ସାମଗ୍ରୀଟି ପୋଲିସ୍ ଜବତ କରିବା ସହ ଏହାର ପରିବହନରେ ବ୍ୟବହୃତ ମୋଟରସାଇକେଲକୁ ମଧ୍ୟ ଜବତ କରାଯାଇଛି। ଘଟଣା ପରେ ଆଇନ ଅନୁଯାୟୀ ପରବର୍ତ୍ତୀ ଆବଶ୍ୟକ କାର୍ଯ୍ୟାନୁଷ୍ଠାନ ପାଇଁ ମାମଲାଟିକୁ ବନ ବିଭାଗକୁ ହସ୍ତାନ୍ତର କରାଯାଇଛି। ସନ୍ଦିଗ୍ଧ ବନ୍ୟପ୍ରାଣୀ ସାମଗ୍ରୀର ପ୍ରକୃତି ଓ ଏହାର ପରିବହନ ସମ୍ପର୍କରେ ବନ ବିଭାଗ ପକ୍ଷରୁ ଆବଶ୍ୟକ ତଦନ୍ତ କରାଯିବ। ଘଟଣାକୁ ନେଇ ସମ୍ପୃକ୍ତ ଆଇନର ଧାରା ଅନୁଯାୟୀ ଆଗାମୀ ଆଇନଗତ ପଦକ୍ଷେପ ଗ୍ରହଣ କରାଯିବ।