Web News

ଭଞ୍ଜନଗର ନିର୍ବାଚନମଣ୍ଡଳୀରେ ଜଳସେଚନ ପାଇଁ ୫୫୦ କୋଟିର ଯୋଜନା: ବିଧାୟକ ଗଞ୍ଜାମ ଜିଲା ଭଞ୍ଜନଗର ବାଇପାସ୍‌ ରାସ୍ତାସ୍ଥିତ ତ୍ରିରଙ୍ଗା ମିଡିଆ ଓ ସାମାଜିକ ସଂଗଠନର ନୂତନ କାର୍ଯ୍ୟାଳୟ ଶନିବାର ରାତିରେ ଉଦ୍‌ଘାଟିତ ହୋଇଯାଇଛି। ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ମୁଖ୍ୟ ଅତିଥି ଭାବେ ଯୋଗଦେଇ କାର୍ଯ୍ୟାଳୟର ଉଦ୍‌ଘାଟନ କରିଥିଲେ। ଏହି ଅବସରରେ ବିଧାୟକ ନାୟକ କହିଥିଲେ ଯେ, ସାମ୍ବାଦିକମାନେ ସମାଜସେବୀ ଭାବେ ମଧ୍ୟ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇଥାନ୍ତି। ସାଧାରଣ ଲୋକଙ୍କ ସମସ୍ୟାକୁ ଲୋକଲୋଚନକୁ ଆଣିବା ସହ ଏହାର ସମାଧାନ ଦିଗରେ ସେମାନେ ପ୍ରମୁଖ ଭୂମିକା ନିଭାଇଥାନ୍ତି। ସାମ୍ବାଦିକତା ସହ ସମାଜସେବାକୁ ଆଗେଇ ନେବା ପାଇଁ ଅନେକ ବ୍ୟକ୍ତି ଏହି ସଂଗଠନ ସହ ଯୋଡ଼ି ହୋଇଥିବାରୁ ଏହାର ଲକ୍ଷ୍ୟ ଓ ଉଦ୍ଦେଶ୍ୟ ଅନୁଯାୟୀ କାର୍ଯ୍ୟ କରାଗଲେ ଅଞ୍ଚଳବାସୀ ଉପକୃତ ହେବେ ବୋଲି ସେ ଆଶା ପ୍ରକାଶ କରିଥିଲେ। କାର୍ଯ୍ୟକ୍ରମରେ ବିଧାୟକ ଭଞ୍ଜନଗର ନିର୍ବାଚନମଣ୍ଡଳୀର ଜଳସେଚନ ବ୍ୟବସ୍ଥା ସମ୍ପର୍କରେ ମଧ୍ୟ ସୂଚନା ଦେଇଥିଲେ। ଜଳସେଚନ ପାଇଁ ପ୍ରାୟ ୫୫୦ କୋଟି ଟଙ୍କା ବ୍ୟୟ ହେବାକୁ ଥିବାବେଳେ ଏହାର ଡିପିଆର୍‌ ପ୍ରସ୍ତୁତ ହୋଇସାରିଛି। ମୁଖ୍ୟମନ୍ତ୍ରୀଙ୍କ ଅନୁମୋଦନ ସହ ଅନ୍ୟାନ୍ୟ ପ୍ରକ୍ରିୟା ଶେଷ ହେବା ପରେ କାମ ଆରମ୍ଭ ହେବ ବୋଲି ସେ କହିଥିଲେ। ଭଞ୍ଜନଗର ଜଳଭଣ୍ଡାର ପ୍ରାୟ ୧୦୦ ବର୍ଷ ପୁରୁଣା ହୋଇଥିବାରୁ ଦୀର୍ଘଦିନ ଧରି ମାଟି ପୋତି ହୋଇ ଜଳଧାରଣ କ୍ଷମତା ହ୍ରାସ ପାଇଥିବା ବିଧାୟକ କହିଥିଲେ। ଜଳଭଣ୍ଡାରରୁ ମାଟି ବାହାର କରିବା ପାଇଁ ପ୍ରାୟ ୨୦୦ କୋଟି ଟଙ୍କା ବ୍ୟୟ ହେବ। ବାହାର କରାଯିବାକୁ ଥିବା ମାଟିକୁ ଆମେରିକାର ଏକ କମ୍ପାନୀ କିଣିନେବ ବୋଲି ସେ ସୂଚନା ଦେଇଥିଲେ। ଭଞ୍ଜନଗର ବ୍ଲକ୍‌ର ସମସ୍ତ ଉଚ୍ଚ ବିଦ୍ୟାଳୟକୁ ଯୁକ୍ତ ୨ ସ୍ତରକୁ ଉନ୍ନୀତ କରିବା ପାଇଁ ସରକାର ପଦକ୍ଷେପ ନେଉଥିବା ସେ କହିଥିଲେ। ଏଥିସହ ପିଏମ୍‌ ଶ୍ରୀ ଉଚ୍ଚ ବିଦ୍ୟାଳୟଗୁଡ଼ିକର ଉନ୍ନତି ପାଇଁ ୬ କୋଟିରୁ ୧୨ କୋଟି ଟଙ୍କା ପର୍ଯ୍ୟନ୍ତ ଅନୁଦାନ ଦିଆଯାଉଥିବା ସେ ସୂଚନା ଦେଇଥିଲେ। କୃଷି ଓ ଜଳସେଚନ ବ୍ୟବସ୍ଥାକୁ ସୁଦୃଢ଼ କରିବା ଲାଗି ଅଞ୍ଚଳରେ ୨୦୦୦ଟି ବୋରୱେଲ୍‌ ଖନନ କରାଯିବା ସହ ହରିଗଡ଼ ଓ ଗେରେଡ଼ା ନିକଟରେ ଦୁଇଟି ଆନିକଟ୍‌ ନିର୍ମାଣ କରାଯିବ। ଏଥିପାଇଁ ପ୍ରାୟ ୩୫୦ କୋଟି ଟଙ୍କା ବ୍ୟୟ ହେବ ବୋଲି ବିଧାୟକ କହିଥିଲେ। କାର୍ଯ୍ୟକ୍ରମରେ ଗଞ୍ଜାମ ଜିଲା ସ୍ୱତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ ନୀଳମାଧବ ପାତ୍ର, ଭଞ୍ଜନଗର ପୌରପରିଷଦ ଅଧ୍ୟକ୍ଷ ଗୋପବନ୍ଧୁ ମହାପାତ୍ର, ଆଇନଜୀବୀ ତଥା ଭାଜପାର ବରିଷ୍ଠ ନେତା ବିଷ୍ଣୁ ପ୍ରସାଦ ପ୍ରଧାନ, ଭଞ୍ଜନଗର ଉପଖଣ୍ଡ ସୂଚନା ଓ ଲୋକସମ୍ପର୍କ ଅଧିକାରୀ ସନ୍ତୋଷ ନାୟକ, ବ୍ରହ୍ମାକୁମାରୀ ସନ୍ତୋଷିନୀ ଭଉଣୀ ଏବଂ ଅବସରପ୍ରାପ୍ତ ସୈନିକ ସଂଘ ସଭାପତି ମହେନ୍ଦ୍ର ସ୍ୱାଇଁ ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇଥିଲେ। କାର୍ଯ୍ୟକ୍ରମ ପରିଚାଳନାରେ ଉପଦେଷ୍ଟା ଧୀରେନ କୁମାର ସ୍ୱାଇଁ, ସଭାପତି ପୁରୁଷୋତ୍ତମ ମହାପାତ୍ର, ସମ୍ପାଦକ ଉଦୟନାଥ ପଣ୍ଡା, କାର୍ଯ୍ୟକାରୀ ସଭାପତି ଦଣ୍ଡପାଣି ପ୍ରଧାନ, ଉପସଭାପତି କେ. ହରି ସିଂହ, ଉପଦେଷ୍ଟା ସଞ୍ଜୀବ କୁମାର ପାତ୍ର, ଯୁଗ୍ମ ସମ୍ପାଦକ ମାନିନୀ ସ୍ୱାଇଁ ଓ କୋଷାଧ୍ୟକ୍ଷ ଡ. ତ୍ରିଲୋଚନ ଜେନା ପ୍ରମୁଖ ସହଯୋଗ କରିଥିଲେ।

ରାଉରକେଲା : ରାଉରକେଲାର ଅଗ୍ରଣୀ ନାଟ୍ଯାନୁଷ୍ଠାନ "ସଂପର୍କ" ର ରିପେର୍ଟୋରୀ ଦଳ ଦ୍ବାରା ସ୍ଥାନୀୟ ସିଭିକ ସେଣ୍ଟରରେ ନାଟକ "ଧର୍ମରାଜ " ମଞ୍ଚସ୍ଥ ହୋଇ ଯାଇଛି । ଏହି ନାଟକକୁ ଆନୁଷ୍ଠାନିକ ଭିବେ ରାଉରକେଲା ବିଧାୟକ ସାରଦା ପ୍ରସାଦ ନାୟକ ,ରଘୁନାଥପାଲୀ ବିଧାୟକ ଦୁର୍ଗା ଚରଣ ତନ୍ତୀ, ଦୀପିକା ମହିଳା ସଂହତିର ଅଧ୍ୟକ୍ଷା ନମ୍ରତା ବର୍ମା , ମହିଳା ସଂଘତିର ଉପାଧ୍ୟକ୍ଷା ପ୍ରତିଜ୍ଞା ପଲାଇ, ରୀତା ରାଣୀ ଓ ରାଉରକେଲା ଇସ୍ପାତ କାରଖାନାର ସି ଓ ସି ଅର୍ଚ୍ଚନା ଶତପଥୀ ଉଦ୍ଘାଟନ କରିଥିଲେ । ଯଦିଓ ନାଟକଟି ମହାଭାରତର ଶାନ୍ତିପର୍ବର କାହାଣୀ ଆଧାରିତ ଥିଲା ହେଲେ ଏଥିରେ ସାଂପ୍ରତିକ ସାମାଜିକ ବିଧି ବ୍ୟବସ୍ଥାର ଚିତ୍ର ସ୍ପଷ୍ଟ ଚିତ୍ରିତ କରାଯାଇଛି । କୁରୁକ୍ଷେତ୍ରରେ ଅନୁଷ୍ଠିତ ଧର୍ମଯୁଦ୍ଧ ପରର ୪୦ଦିନର ଘଟଣାବଳୀକୁ ନାଟ୍ଯକାର ଭାସ୍କର ଚନ୍ଦ୍ର ମହାପାତ୍ର ସାଂପ୍ରତିକ ରାଜନୈତିକ ବିଧି ବ୍ଯବସ୍ଥା ସହିତ ଅପୂର୍ବ ଶୈଳିରେ ସଂଯୋଜିତ କରିଛନ୍ତି ଏହି ନାଟକରେ । ଦ୍ବାପର ଯୁଗରେ କଳି ଦୁଇ ପାଦରେ ମର୍ତ୍ତ୍ଯରେ ନିଜର ଆଧିପତ୍ଯ ବିସ୍ତାର କରିବାର ନିୟତିଙ୍କ ଦ୍ବାରା ନିର୍ଦ୍ଧାରିତ ହୋଇଛି । ହେଲେ ଏହି ନିୟମକୁ ଉଲ୍ଲଂଘନ କରି ନିୟତିଙ୍କ ବାରଣ ସତ୍ତ୍ବେ କଳି ଧର୍ମଯୁଦ୍ଧ ପରେ ପରେ ମର୍ତ୍ତ୍ୟରେ ଚିରି ପାଦରେ ଆଧିପତ୍ଯ ବିସ୍ତାର କରିବାର ପ୍ରୟାସ କରି ଧୃତରାଷ୍ଟ୍ରଙ୍କ ମନରେ ପ୍ରତିହିଂସା ଓ ସିଂହାସନ ଲୋଭ, ଧର୍ମରାଜ ଯୁଧିଷ୍ଠିରଙ୍କ ମନରେ ବୈରାଗ୍ୟ ଭାବ ସ୍ପଷ୍ଟି କରିଛି । ଧର୍ମରାଜ ଯୁଧିଷ୍ଠିର କୁରୁକ୍ଷେତ୍ରରେ ଅନୁଷ୍ଠିତ ଧର୍ମଯୁଦ୍ଧରେ ମୃତ୍ଯୁବରଣ କରିଥିବା ଓ ଆହତ ହୋଇ ଥିବା ଲକ୍ଷ ଲକ୍ଷ ନୀରିହ ଲୋକଙ୍କ ଦୁଃଖ ର କାରଣ ବୋଲି ନିଜକୁ ଦାୟୀ କରିଛନ୍ତି । ଦ୍ରୌପଦୀଙ୍କ ସହ ଭୀମ ,ଅର୍ଜୁନ, ବିଦୂର , ଶ୍ରୀକୃଷ୍ଣ ଯେତେ ବୁଝାଇଲା ପରେ ବି ଲକ୍ଷ ଲକ୍ଷ ଲୋକଙ୍କ ରକ୍ତରେ ରଂଜିତ ହସ୍ତିନାପୁର ରାଜ ସିଂହାସନରେ ଉପବେଶନ ନ କରିବାକୁ ସେ ଦୃଢ ପରିକର ହୋଇଛନ୍ତି । ଶେଷରେ ଶରଶଯ୍ଯାରେ ଶାୟିତ ତଥା ଇଚ୍ଛାମୃତ୍ଯୁ ପାଇଁ ଅପେକ୍ଷାରତ ପିତାମହ ଭୀଷ୍ମଙ୍କ ଶେଷ ଉପଦେଶ କୁ ସମ୍ମାନ ଜଣାଇ ଧର୍ମରାଜ ଯୁଧିଷ୍ଠିର ହସ୍ତିନାପୁରର ଶାସନ ଭାର ଗ୍ରହଣ କରିଛନ୍ତି । କଳିର ପରାଜୟ ଓ ନିୟତିଙ୍କ ବିଜୟ ହୋଇଛି । ଏପରି ଏକ ପୌରାଣିକ କଥାବସ୍ତୁକୁ ଉଚ୍ଚ କୋଟୀର ସଂଳାପ , ହୃଦସ୍ପର୍ଶୀ ସଂଘାତ, ଅବାରିତ ଗତିଶୀଳତା ଓ ଉତ୍କଣ୍ଠା ଦ୍ବାରା ନାଟ୍ଯକାର ଶ୍ରୀ ମହାପାତ୍ର ସାଂପ୍ରତିକ ଯୁଦ୍ଧର ଭୟାବହତା ଓ ତାର ନିରାକରଣର ଉପାୟକୁ ସୁନ୍ଦର ଭାବରେ ଉପସ୍ଥାପନ କରି ସଫଳ ହୋଇଛନ୍ତି ଏହି ନାଟକ ରେ । ଶ୍ରୀ ମହାପାତ୍ରଙ୍କ ବଳିଷ୍ଠ ନିର୍ଦେଶନା ଓ ଏନଏସଡିଆନ ଜଗନ୍ନାଥ ସେଠଙ୍କ ଅଭୂତପୂର୍ବ ମଂଚ ପରିକଳ୍ପନା ଓ ରୂପସଜ୍ଜା ସହିତ ସହ ନିର୍ଦ୍ଦେଶନା, ଶକ୍ତି ପ୍ରସାଦ ମିଶ୍ରଙ୍କ ମନ ଛୁଆଁ ସଂଗୀତ, ରାକେଶ ଶତପଥୀଙ୍କ ଆଲୋକ ସଂପାତ,ପ୍ରଳୟ ଶତପଥୀଙ୍କ ମଂଚ ପରିଚାଳନା ଓ କଳାକାରମାନଙ୍କ ନିଖୁଣ ଅଭିନୟ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା । ଯଦିଓ ସବୁ କଳାକାର ନିଖୁଣ ଅଭିନୟ କରିଥିଲେ ବିଶେଷ କରି କଳି ଭୂମିକାରେ ସୁରେନ୍ଦ୍ର ପାଢୀ, ଧର୍ମରାଜ ଭୂମିକାରେ ଭାସ୍କର ମହାପାତ୍ର, ଦ୍ରୌପଦୀ ଭୂମିକାରେ ସସ୍ମିତା ବେକ୍ ଓ ସୂତ୍ରଧର ଭୂମିକାରେ ଆଠ ଜଣ ନବାଗତ କଳାକାରଙ୍କ ନିଖୁଣ ଅଭିନୟ ଦର୍ଶକଙ୍କୁ ବିଶେଷ ପ୍ରଭାବିତ କରିଥିଲା । ନାଟକକୁ ନିଜ ଅଭିନୟ ଚାତୁରୀରେ ଅଧିକ ଋଦ୍ଧିମନ୍ତ କରିଥିଲେ ସୁଦେଷ୍ଣା ରାଣୀ ରାଉତ, ପୁଷ୍ପଲତା ବିଶୋଇ ବିବେକାନନ୍ଦ ଦାଶ, ଭୀଷ୍ମ ନାରାୟଣ ସ୍ବାଇଁ, ସୌମ୍ୟରଞ୍ଜନ ବାରିକ୍, ମାନସ ସାହୁ, ପ୍ରଳୟ ଶତପଥୀ, ଜନ୍ମେଜୟ ମହାନ୍ତି, ସୁରଭି ରଣା, ସ୍ମାରକ ବାରିକ, ରିଶିତୋଷ ମହାନ୍ତି, ନିକିତା ଜେନା, ମୋହିନୀ ଦାସ, ଶ୍ରୟାଶ୍ରୀ ପ୍ରଧାନ, ସୁପ୍ରିୟା ପାଣିଗ୍ରାହୀ, ଅଭିଷେକ ମଲ୍ଲିକ, ଶ୍ରେୟାଶ୍ରୀ ଦାସ, ସଂଜୀବନୀ ମଲ୍ଲିକ ଓ ସୁନାଲୀ ମିଶ୍ର । ନାଟକ ପରେ ପରେ ଅତିଥିମାନେ କଳାକାର ମାନଙ୍କୁ ପ୍ରଶସ୍ତି ପତ୍ର ପ୍ରଦାନ କରିଥିଲେ ଓ ବିଶିଷ୍ଟ ଚଳଚ୍ଚିତ୍ର ତାରକା ଜଗନ୍ନାଥ ସେଠଙ୍କୁ ସଂପର୍କ ସମ୍ମାନ ରେ ସମ୍ମାନିତ କରାଯାଇଥିଲା । ଅନୁଷ୍ଠାନର କାର୍ଯ୍ୟକାରୀ ସଭାପତି ବିଜୟ ପାତ୍ର ମଂଚ ପରିଚାଳନା କରି ଥିବା ବେଳେ କଲ୍ଯାଣୀ ଦାସ, ସନ୍ଧ୍ଯାରାଣୀ ପଟ୍ଟନାୟକ ଓ ରୁନୁ ବେକ ମଂଚ ପରିଚାଳନାରେ ସହଯୋଗ କରିଥିଲେ ।

ଭୁବନେଶ୍ୱର: ୭ ଦଫା ଦାବି ନେଇ ଓଡ଼ିଶା ଅନଲାଇନ୍ ଡ୍ରାଇଭର୍ସ ୟୁନାଇଟେଡ୍ ଫୋରମ୍ ପକ୍ଷରୁ ରାଜ୍ୟବ୍ୟାପୀ ୧୨ ଘଣ୍ଟିଆ ‘ଜିରୋ ସପ୍ଲାଇ’ ଆନ୍ଦୋଳନ ଆରମ୍ଭ ହୋଇଛି। ଅନଲାଇନ୍ ଆପ୍‌ ଭିତ୍ତିକ ଟ୍ୟାକ୍ସି ସେବା ପ୍ରଦାନ କରୁଥିବା ଡ୍ରାଇଭରମାନେ ଏହି ଆନ୍ଦୋଳନରେ ସାମିଲ ହୋଇ ରାଜ୍ୟ ସରକାର ଓ ସମ୍ପୃକ୍ତ କମ୍ପାନୀଗୁଡ଼ିକ ନିକଟରେ ବିଭିନ୍ନ ଦାବି ଉପସ୍ଥାପନ କରିଛନ୍ତି। ଆନ୍ଦୋଳନକୁ ରାଜ୍ୟର ପ୍ରାୟ ୨୧ଟି ସଂଗଠନ ସମର୍ଥନ ଜଣାଇଥିବାରୁ ଭୁବନେଶ୍ୱର, କଟକ ସମେତ ବିଭିନ୍ନ ଜିଲ୍ଲାରେ ଆପ୍‌ ଭିତ୍ତିକ କ୍ୟାବ୍ ସେବା ପ୍ରଭାବିତ ହୋଇଛି। ଫଳରେ ଦୈନନ୍ଦିନ ଯାତାୟାତ ପାଇଁ ଅନଲାଇନ୍ କ୍ୟାବ୍ ଉପରେ ନିର୍ଭରଶୀଳ ଯାତ୍ରୀମାନେ ଅସୁବିଧାରେ ପଡ଼ିଥିବା ଦେଖାଯାଇଛି। ଫୋରମ୍‌ର ପ୍ରମୁଖ ଦାବି ମଧ୍ୟରେ ରାଜ୍ୟ ସରକାର ଓ କ୍ୟାବ୍ କମ୍ପାନୀଙ୍କ ମିଳିତ ସହଯୋଗରେ ନିର୍ଦ୍ଦିଷ୍ଟ ଭଡ଼ା ଧାର୍ଯ୍ୟ କରିବା ରହିଛି। ଗ୍ରାହକଙ୍କୁ ଦିଆଯାଉଥିବା ଡିସକାଉଣ୍ଟର ଭାର କମ୍ପାନୀ ବହନ କରୁ ଏବଂ ଡ୍ରାଇଭରଙ୍କ ଆୟରୁ ଏହା କାଟି ନିଆ ନଯାଉ ବୋଲି ଦାବି କରାଯାଇଛି। ସେହିପରି ବିନା ତଦନ୍ତରେ ବ୍ଲକ୍‌ କରାଯାଇଥିବା ଡ୍ରାଇଭରଙ୍କ ଆକାଉଣ୍ଟ ପୁନଃ ସଚଳ କରିବା, ମନଇଚ୍ଛା ଜୋରିମାନା ଆଦାୟ ବନ୍ଦ କରିବା, ଟ୍ରାଫିକ୍‌ ଜାମ୍‌ କିମ୍ବା ଗ୍ରାହକଙ୍କ ବିଳମ୍ବ ଯୋଗୁଁ ଅପେକ୍ଷା କରିବା ସମୟ ପାଇଁ ଉଚିତ୍‌ ୱେଟିଂ ଚାର୍ଜ ଦେବାକୁ ଡ୍ରାଇଭରମାନେ ଦାବି କରିଛନ୍ତି। ଯାତ୍ରା ଆରମ୍ଭ ହେବା ପରେ ଗ୍ରାହକଙ୍କ ପକ୍ଷରୁ ରାଇଡ୍‌ ବାତିଲ୍‌ କରାଗଲେ ବାତିଲ୍‌ ଫି’ର ସମ୍ପୂର୍ଣ୍ଣ ଅଂଶ ଡ୍ରାଇଭରଙ୍କୁ ପ୍ରଦାନ କରିବା, ଓଡ଼ିଶାରେ ସମସ୍ତ ଆପ୍‌ ଭିତ୍ତିକ ଅପରେଟରଙ୍କ ସ୍ଥାୟୀ କାର୍ଯ୍ୟାଳୟ ରହିବା ବାଧ୍ୟତାମୂଳକ କରିବା ଏବଂ ଚାହିଦା ଓ ଯୋଗାଣ ମଧ୍ୟରେ ସନ୍ତୁଳନ ରକ୍ଷା ପାଇଁ ନୂଆ ଗାଡ଼ି ସଂଯୋଗ ଉପରେ ନିୟନ୍ତ୍ରଣ ଲଗାଇବାକୁ ମଧ୍ୟ ଫୋରମ୍‌ ଦାବି କରିଛି। ଦୀର୍ଘଦିନ ଧରି ଡ୍ରାଇଭରମାନେ ଏହି ସମସ୍ୟାଗୁଡ଼ିକ ଉଠାଇ ଆସୁଥିବା ବେଳେ ଏହି ଧର୍ମଘଟ ମାଧ୍ୟମରେ ସରକାର ଓ କ୍ୟାବ୍‌ କମ୍ପାନୀଗୁଡ଼ିକ ଉପରେ ଚାପ ସୃଷ୍ଟି କରାଯାଇଛି। ଦାବିଗୁଡ଼ିକର ତୁରନ୍ତ ସମାଧାନ ନହେଲେ ଆଗାମୀ ଦିନରେ ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ଫୋରମ୍‌ ପକ୍ଷରୁ ଚେତାବନୀ ଦିଆଯାଇଛି।

ରାଉରକେଲା : ରଘୁନାଥପାଲ୍ଲୀ ବିଧାନସଭା ନିର୍ବାଚନ ମଣ୍ଡଳୀ ଅଞ୍ଚଳରେ ଥିବା ଲାଠିକଟା ବ୍ଲକରେ ଆଜି ରଘୁନାଥପାଲ୍ଲୀ ବିଧାୟକ ତଥା ଜିଲ୍ଲା ଯୋଜନା ବୋର୍ଡ଼ର ଅଧକ୍ଷ ଦୁର୍ଗା ଚରଣ ତନ୍ତୀଙ୍କ ନେତୃତ୍ୱରେ ତ୍ରିରଙ୍ଗା ଯାତ୍ରାର ଆୟୋଜନ ହୋଇଥିଲା । ଏହି ଯାତ୍ରାରେ ଲାଠିକଟା ବକ୍ସ ଉନ୍ନୟନ ଅଧିକାରୀ ମାନସ ରଞ୍ଜନ ସାହୁଙ୍କ ସମେତ ଦଳର ବହୁ କର୍ମକର୍ତ୍ତା ଏବଂ ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ଉପସ୍ଥିତ ଥିଲେ ।

ବଅଁରପାଳ: ବଅଁରପାଳ ବ୍ଲକ ହେଡକ୍ୱାର୍ଟରଠାରେ ଜିଲ୍ଲାପାଳ, ଆରକ୍ଷୀ ଅଧିକ୍ଷକ, ଅନୁଗୋଳଙ୍କ ସମେତ ଜିଲ୍ଲାସ୍ତରୀୟ ବିଭିନ୍ନ ସରକାରୀ ଅଧିକାରୀଙ୍କ ଉପସ୍ଥିତିରେ ମିଳିତ ଜନ ଅଭିଯୋଗ ଶୁଣାଣି ଅନୁଷ୍ଠିତ ହୋଇଯାଇଛି। ଏହି ଶୁଣାଣିରେ ସାଧାରଣ ଲୋକଙ୍କ ବିଭିନ୍ନ ସମସ୍ୟା ସମ୍ପର୍କିତ ମୋଟ ୨୭ଟି ଅଭିଯୋଗ ଶୁଣାଯାଇଥିଲା। ସେଥିମଧ୍ୟରୁ ୩ଟି ଅଭିଯୋଗର ତୁରନ୍ତ ସମାଧାନ କରାଯାଇଥିବା ଜଣାପଡ଼ିଛି। ଅନ୍ୟ ଅଭିଯୋଗଗୁଡ଼ିକର ଆବଶ୍ୟକ ତଦନ୍ତ ଓ ପଦକ୍ଷେପ ନେବାକୁ ସମ୍ପୃକ୍ତ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ଏହା ସହିତ ଜଣେ ଅଭାବୀ ଓ ଦୁଃଖୀ ବ୍ୟକ୍ତିଙ୍କୁ ରେଡକ୍ରସ ପାଣ୍ଠିରୁ ୫ ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରାଯାଇଥିଲା। ଜନସାଧାରଣଙ୍କ ସମସ୍ୟାର ସମାଧାନ ପାଇଁ ପ୍ରଶାସନର ଏଭଳି ମିଳିତ ଜନ ଅଭିଯୋଗ ଶୁଣାଣି ଗୁରୁତ୍ୱପୂର୍ଣ୍ଣ ବୋଲି ମତ ପ୍ରକାଶ ପାଇଛି।

ଅନୁଗୋଳ: ଅନୁଗୋଳ କଦମ ପଡ଼ିଆଠାରେ ବିଭିନ୍ନ ବିକାଶମୂଳକ ପ୍ରକଳ୍ପର ଉଦ୍‌ଘାଟନ ଓ ଶିଳାନ୍ୟାସ ସମାରୋହ ଅନୁଷ୍ଠିତ ହୋଇଛି। ପୌରାଞ୍ଚଳ ଓ ପୋଲିସ ପ୍ରଶାସନର କାର୍ଯ୍ୟଦକ୍ଷତା ବୃଦ୍ଧି ସହ ସହରର ସୌନ୍ଦର୍ଯ୍ୟକରଣ, ସ୍ୱଚ୍ଛତା, ପରିବେଶ, କ୍ରୀଡ଼ା ଓ ଆଇନଶୃଙ୍ଖଳା କ୍ଷେତ୍ରରେ ନୂତନ ସେବାର ଶୁଭାରମ୍ଭ କରାଯାଇଛି। ଡିଏମ୍‌ଏଫ୍‌ ପାଣ୍ଠି ମାଧ୍ୟମରେ ଶିକ୍ଷା, ସ୍ୱାସ୍ଥ୍ୟ, ପାନୀୟ ଜଳ ଓ ଭିତ୍ତିଭୂମି ବିକାଶକୁ ଗୁରୁତ୍ୱ ଦିଆଯାଉଛି। ୨୦୩୬ ଓ ୨୦୪୭ର ବିକଶିତ ଓଡ଼ିଶା ଏବଂ ବିକଶିତ ଭାରତ ଲକ୍ଷ୍ୟ ନେଇ ‘ସ୍କିଲ୍, ସ୍କେଲ୍ ଓ କ୍ୱାଲିଟି’ ମାଧ୍ୟମରେ ଅନୁଗୋଳକୁ ଏକ ମଡେଲ୍ ଜିଲ୍ଲା ଭାବେ ଗଢ଼ିତୋଳିବା ଉପରେ ଗୁରୁତ୍ୱ ଦିଆଯାଇଛି।

ତାଳଚେର: ତାଳଚେର ବ୍ଲକ ଅନ୍ତର୍ଗତ ହାଉସିଙ୍ଗ ବୋର୍ଡ କଲୋନୀରେ ଉପୁଜିଥିବା ବିଭିନ୍ନ ମୌଳିକ ସମସ୍ୟାକୁ ନେଇ ଆଜି କଲୋନୀବାସୀ ଓ ଆଞ୍ଚଳିକ ପ୍ରତିନିଧିମାନଙ୍କ ମଧ୍ୟରେ ବିସ୍ତୃତ ଆଲୋଚନା ହୋଇଛି। ଆଲୋଚନାରେ ପ୍ଲଟ୍ ଆବଣ୍ଟନ, ରାସ୍ତାଘାଟର ଦୁରବସ୍ଥା, ପାନୀୟ ଜଳ ସମସ୍ୟା, ଆଲୋକୀକରଣ ସହିତ ଅନ୍ୟାନ୍ୟ ନିତ୍ୟାବଶ୍ୟକୀୟ ସମସ୍ୟା ସମ୍ପର୍କରେ କଲୋନୀବାସୀମାନେ ନିଜ ନିଜ ସମସ୍ୟା ଉପସ୍ଥାପନ କରିଥିଲେ। କଲୋନୀବାସୀଙ୍କ ସମସ୍ୟାଗୁଡ଼ିକୁ ଗୁରୁତ୍ୱର ସହ ଶୁଣିବା ପରେ ଆଞ୍ଚଳିକ ପ୍ରତିନିଧିମାନେ ସମସ୍ୟାର ଶୀଘ୍ର ସମାଧାନ ଦିଗରେ ଆବଶ୍ୟକ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଥିଲେ। କଲୋନୀର ବିକାଶ ଓ ଲୋକଙ୍କ ମୌଳିକ ସୁବିଧା ସୁନିଶ୍ଚିତ କରିବା ନେଇ ଆଗାମୀ ଦିନରେ ପ୍ରଶାସନ ସହ ଆଲୋଚନା କରାଯିବ ବୋଲି ମଧ୍ୟ କୁହାଯାଇଛି।

ତାଳଚେର: ତାଳଚେର ପୌରପରିଷଦ ଅଞ୍ଚଳରେ ବିଭିନ୍ନ ବିକାଶମୂଳକ ପ୍ରକଳ୍ପର ଭିତ୍ତିପ୍ରସ୍ତର ଓ ଶୁଭଉଦ୍‌ଘାଟନ କରାଯାଇଛି। ତାଳଚେର ବସ୍‌ଷ୍ଟାଣ୍ଡଠାରେ ଆୟୋଜିତ ସମାବେଶରେ ମୁଖ୍ୟଅତିଥି ଭାବେ ସମ୍ବଲପୁର ସାଂସଦ ତଥା ପୂର୍ବତନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗଦେଇଥିଲେ। ତାଳଚେରର ବିକାଶ ପାଇଁ ଅର୍ଥ କେବେ ବି ପ୍ରତିବନ୍ଧକ ହେବ ନାହିଁ ବୋଲି ଶ୍ରୀ ପ୍ରଧାନ କହିଥିଲେ। ତାଳଚେରକୁ ପର୍ଯ୍ୟଟନସ୍ଥଳୀ ଭାବେ ବିକଶିତ କରିବା ସହ ୬୦୦ ଏକର ରାଣୀପାର୍କରେ ଚିଡ଼ିଆଖାନା ପ୍ରତିଷ୍ଠା ପାଇଁ ସେ ପ୍ରସ୍ତାବ ଦେଇଥିଲେ। ଏଥିସହ ମଣ୍ଡାପାଳ ଛକରୁ ସନ୍ଥପଡ଼ା, ରାଜବାଟୀରୁ ନାଲକୋ ଏବଂ ଭୋଗବେରଣୀ ଷ୍ଟେସନରୁ ଥର୍ମାଲ ପର୍ଯ୍ୟନ୍ତ ନୂତନ ରାସ୍ତା ନିର୍ମାଣ ସହ ତାଳଚେର-ଅନୁଗୋଳ ମଧ୍ୟରେ ନୂତନ ଯୋଗାଯୋଗ ବ୍ୟବସ୍ଥା ପାଇଁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଥିଲେ। ତାଳଚେରର ବିକାଶ ପାଇଁ ଦଳୀୟ ରାଜନୀତିରୁ ଊର୍ଦ୍ଧ୍ୱରେ ରହି ସମସ୍ତେ ଏକାଠି ହୋଇ କାମ କରିବାକୁ ସେ ଆହ୍ୱାନ ଦେଇଥିଲେ। ଅନ୍ୟପକ୍ଷରେ, ଡିଏମ୍‌ଏଫ୍‌ରୁ ୨୫ କୋଟି ଓ ମୁଖ୍ୟମନ୍ତ୍ରୀ ସହରୀ ଯୋଜନାରୁ ୭ କୋଟି ଟଙ୍କା ବ୍ୟୟରେ ୧୫୦ଟି ପ୍ରକଳ୍ପର ଶିଳାନ୍ୟାସ କରାଯାଇଥିବା ସୂଚନା ମିଳିଛି। ସମାବେଶରେ ଢେଙ୍କାନାଳ ସାଂସଦ ରୁଦ୍ରନାରାୟଣ ପାଣି, ତାଳଚେର ବିଧାୟକ ବ୍ରଜକିଶୋର ପ୍ରଧାନ, ପାଲଲହଡ଼ା ବିଧାୟକ ଅଶୋକ ମହାନ୍ତି, ପର୍ଜଙ୍ଗ ବିଧାୟକ ବିଭୂତି ପ୍ରଧାନ, ଅନୁଗୋଳ ବିଧାୟକ ପ୍ରତାପ ପ୍ରଧାନ, ଜିଲ୍ଲାପାଳ ଏମ୍. ଅଖତର, ଏସ୍‌ପି ରାହୁଲ ଜୈନଙ୍କ ସମେତ ପୌରପରିଷଦର ଅଧିକାରୀ, କାଉନସିଲର, ଯନ୍ତ୍ରୀ, କର୍ମଚାରୀ ଓ ବହୁ ଜନସାଧାରଣ ଉପସ୍ଥିତ ଥିଲେ।

ବଅଁରପାଳ: ବଅଁରପାଳ ଅଞ୍ଚଳର ବିଭିନ୍ନ ଶିକ୍ଷାନୁଷ୍ଠାନ, ସରକାରୀ ଓ ବେସରକାରୀ କାର୍ଯ୍ୟାଳୟ, ବ୍ୟାଙ୍କ, କ୍ଲବ ଓ ବିଭିନ୍ନ ସଂଗଠନରେ ୮୦ତମ ସ୍ୱାଧୀନତା ଦିବସ ଉତ୍ସାହର ସହ ପାଳିତ ହୋଇଯାଇଛି। ସରସ୍ୱତୀ ଶିଶୁ ବିଦ୍ୟାମନ୍ଦିରରେ ସଭାପତି ସତ୍ୟବାନ ବରାହ ପତାକା ଉତ୍ତୋଳନ କରିଥିବା ବେଳେ ପିବିକେ ହାଇସ୍କୁଲରେ ପ୍ରଧାନଶିକ୍ଷକ ପବିତ୍ର ମୋହନ ପ୍ରଧାନ ପତାକା ଉତ୍ତୋଳନ ସହ ପ୍ୟାରେଡରେ ଅଭିବାଦନ ଗ୍ରହଣ କରିଥିଲେ। ବଅଁରପାଳ ଥାନା, ଗୋତମରା ହାଇସ୍କୁଲ, ବିଶ୍ୱନାଥପୁର ୟୁପି ସ୍କୁଲ, ପିଏସଏସଜେ +୨ ଓ +୩ ମହାବିଦ୍ୟାଳୟ ସମେତ ବିଭିନ୍ନ ସ୍ଥାନରେ ମଧ୍ୟ ପତାକା ଉତ୍ତୋଳନ କରାଯାଇଥିଲା। ଏହି ଅବସରରେ ବିଦ୍ୟାଳୟଗୁଡ଼ିକରେ ବିଭିନ୍ନ ପ୍ରତିଯୋଗିତା ଓ ପୁରସ୍କାର ବିତରଣ କରାଯାଇଥିଲା। ବନ୍ଦାସ୍ଥିତ ‘ଶେଷ ଜୀବନ ସାଥୀ’ ସଂଗଠନ ପକ୍ଷରୁ କେଦାରଗୌରୀ ଆଶ୍ରମର ଅନ୍ତେବାସୀଙ୍କୁ ନୂତନ ବସ୍ତ୍ର ବଣ୍ଟନ କରାଯାଇ ସ୍ୱାଧୀନତା ଦିବସକୁ ସେବାମୂଳକ ଭାବେ ପାଳନ କରାଯାଇଥିଲା।

ବଅଁରପାଳ: ବଅଁରପାଳ ଥାନା ଅନ୍ତର୍ଗତ ଗୋତମରା ପଞ୍ଚାୟତ ବିଶ୍ୱନାଥପୁର ସାହିରେ ଜଣେ ନବବଧୂଙ୍କ ମୃତ୍ୟୁକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଛି। ମୃତ ନବବଧୂ ହେଲେ ଢେଙ୍କାନାଳ ଜିଲ୍ଲା ମୋଟଙ୍ଗା ଥାନା କୁଶୁପଙ୍ଗା ଗ୍ରାମର ଗିରୀଶ ଚନ୍ଦ୍ର ନାୟକଙ୍କ ଝିଅ ସୋନାଲି ନାୟକ। ସୂଚନା ଅନୁସାରେ, ସୋନାଲି ଗତ ଫେବୃଆରୀ ୨୨ ତାରିଖରେ ଗୋତମରା ଗ୍ରାମର ମନ୍ଦର ସାମଲଙ୍କ ପୁଅ ଗଣେଶ ସାମଲଙ୍କୁ ବୈଦିକ ରୀତିରେ ବିବାହ କରିଥିଲେ। ବିବାହର କିଛିଦିନ ସବୁକିଛି ଠିକ୍‌ଠାକ୍‌ ଚାଲିଥିବା ବେଳେ ଗତ ୧୪ ତାରିଖ ରାତି ପ୍ରାୟ ୧୦ଟାରେ ସୋନାଲି ସ୍ୱାମୀଙ୍କ ମୋବାଇଲ ଫୋନରୁ ତାଙ୍କ ବାପାଙ୍କ ସହ କଥା ହୋଇଥିଲେ। ତେବେ ୧୫ ତାରିଖ ସକାଳ ପ୍ରାୟ ୧୦ଟାରେ ଘରୁ ସୋନାଲିଙ୍କ ମୃତଦେହ ମିଳିଥିଲା। ଏହାକୁ ନେଇ ସୋନାଲିଙ୍କ ଭାଇ ସତ୍ୟରଞ୍ଜନ ନାୟକ ବଅଁରପାଳ ଥାନାରେ ହତ୍ୟା ଅଭିଯୋଗ କରିଛନ୍ତି। ଅନ୍ୟପକ୍ଷରେ, ସୋନାଲିଙ୍କ ଶ୍ୱଶୁର ମନ୍ଦର ସାମଲ ଏକ ଚିଠି ଦେଖାଇ ଏହା ସୋନାଲି ମୃତ୍ୟୁ ପୂର୍ବରୁ ଲେଖିଥିବା ଦାବି କରିଥିବା ଜଣାପଡ଼ିଛି। ତେବେ ଏହି ଘଟଣାରେ ଶ୍ୱଶୁର ବାରମ୍ବାର ମତ ପରିବର୍ତ୍ତନ କରୁଥିବାରୁ ସନ୍ଦେହ ଉପୁଜିଥିବା ସତ୍ୟରଞ୍ଜନ କହିଛନ୍ତି। ଅଭିଯୋଗ ପରେ ବଅଁରପାଳ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଏନେଇ ଏକ ମାମଲା ରୁଜୁ କରି ପୋଲିସ ଘଟଣାର ବିଭିନ୍ନ ଦିଗରୁ ତଦନ୍ତ ଚଳାଇଛି। ବ୍ୟବଚ୍ଛେଦ ରିପୋର୍ଟ ଓ ତଦନ୍ତ ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ।

ଓଡ଼ିଶା ଗ୍ରାମୀଣ ବ୍ୟାଙ୍କର ଅଧିକାରୀ ଓ କର୍ମଚାରୀଙ୍କ ବିଭିନ୍ନ ଦୀର୍ଘଦିନର ସମସ୍ୟା ଏବଂ ନ୍ୟାୟସଙ୍ଗତ ଦାବିର ସମାଧାନ ଦାବିରେ ଆଜି ଏକଦିନିଆ ଧର୍ମଘଟ ଅନୁଷ୍ଠିତ ହୋଇଛି। AOGBO ଓ OGBEAର ମିଳିତ ଆହ୍ୱାନରେ ହୋଇଥିବା ଏହି ଧର୍ମଘଟରେ ରାଜ୍ୟର ବିଭିନ୍ନ ଅଞ୍ଚଳରୁ ପ୍ରାୟ ୨,୪୦୦ରୁ ଅଧିକ ଅଧିକାରୀ ଓ କର୍ମଚାରୀ ସାମିଲ ହୋଇଥିବା ର ଜଣାପଡ଼ିଛି। ଭୁବନେଶ୍ୱରସ୍ଥିତ ଓଡ଼ିଶା ଗ୍ରାମୀଣ ବ୍ୟାଙ୍କର ମୁଖ୍ୟ କାର୍ଯ୍ୟାଳୟ ସମ୍ମୁଖରେ ପ୍ରାୟ ୧,୦୦୦ ଅଧିକାରୀ ଓ କର୍ମଚାରୀଙ୍କ ବିଶାଳ ସମାବେଶ ଓ ପ୍ରତିବାଦ ଅନୁଷ୍ଠିତ ହୋଇଥିଲା। ବ୍ୟାଙ୍କର ୯୦୦ରୁ ଅଧିକ ଶାଖା ମଧ୍ୟରୁ ପ୍ରାୟ ୯୦ ପ୍ରତିଶତ ଶାଖା ବନ୍ଦ ରହିଥିବା ସହ ପ୍ରାୟ ସମସ୍ତ ଆଞ୍ଚଳିକ କାର୍ଯ୍ୟାଳୟ ମଧ୍ୟ ବନ୍ଦ ରହିଥିବା ଦାବି କରାଯାଇଛି। ଏହା ଫଳରେ ବ୍ୟାଙ୍କର ସାଧାରଣ କାର୍ଯ୍ୟକଳାପ ଓ ଗ୍ରାହକ ସେବା ପ୍ରଭାବିତ ହୋଇଥିବା ର ସୂଚନା ମିଳିଛି। AOGBO ଓ OGBEA ପକ୍ଷରୁ ୭ ଜୁଲାଇ ୨୦୨୬ରେ ବ୍ୟାଙ୍କ ପରିଚାଳନାକୁ ୨୦-ଦଫା ଦାବିପତ୍ର ଦିଆଯାଇଥିଲା। ଦାବିଗୁଡ଼ିକ ମଧ୍ୟରେ ଉଭୟ ସଂଗଠନକୁ ଔପଚାରିକ ସ୍ୱୀକୃତି, ୨୦୨୬ର ଅନିୟମିତ ବଦଳିର ପୁନର୍ବିଚାର, DFS Transfer Policyର ସମ୍ପୂର୍ଣ୍ଣ କାର୍ଯ୍ୟକାରୀକରଣ, ୧୨ତମ Bipartite Settlement ଓ ୯ମ Joint Noteର କାର୍ଯ୍ୟକାରୀକରଣ ଆଦି ରହିଛି। ଏଥିସହ Overtime Allowance ଓ Officiating Allowance ଲାଗୁ କରିବା, Staff Loanର ସୁଧ ହ୍ରାସ ଓ ଋଣ ସୀମା ବୃଦ୍ଧି, Sponsored Bank ସହ ସମାନ ଭତ୍ତା, ଖାଲି ପଦବୀଗୁଡ଼ିକୁ ଶୀଘ୍ର ପ୍ରତ୍ୟକ୍ଷ ନିଯୁକ୍ତିରେ ପୂରଣ, ଶାଖାଗୁଡ଼ିକର ଭିତ୍ତିଭୂମି ବିକାଶ ଓ AC ବ୍ୟବସ୍ଥା, କର୍ମଚାରୀ ସୁରକ୍ଷା ପାଇଁ Armed Security Guard ଓ Cash Van ବ୍ୟବସ୍ଥା ଏବଂ ପଦୋନ୍ନତି ପ୍ରକ୍ରିୟାରେ ସ୍ୱଚ୍ଛତା ଭଳି ଦାବି ରହିଛି। କର୍ମଚାରୀଙ୍କ ଅଭିଯୋଗର ଶୀଘ୍ର ସମାଧାନ ସହ CSA/Senior CSAଙ୍କ designation, seniority ଓ service benefits ସୁରକ୍ଷା ପାଇଁ ମଧ୍ୟ ଦାବି କରାଯାଇଛି। ଦାବିଗୁଡ଼ିକର ସମାଧାନ ନହେବାରୁ ୨୩ ଜୁଲାଇରୁ ବିଭିନ୍ନ ପର୍ଯ୍ୟାୟରେ ଆନ୍ଦୋଳନ ଆରମ୍ଭ ହୋଇ ଶେଷରେ ୧୭ ଅଗଷ୍ଟରେ ଏକଦିନିଆ ଧର୍ମଘଟ ଘୋଷଣା କରାଯାଇଥିଲା। ଧର୍ମଘଟ ଏଡ଼ାଇବା ଏବଂ ଦାବିଗୁଡ଼ିକର ସମାଧାନ ପାଇଁ ୧୨ ଅଗଷ୍ଟ ୨୦୨୬ରେ AOGBO, OGBEA ଓ ବ୍ୟାଙ୍କ ପରିଚାଳନା ମଧ୍ୟରେ ବିସ୍ତୃତ ଆଲୋଚନା ହୋଇଥିଲା। ଆଲୋଚନାରେ ବିଭିନ୍ନ ଦାବି ଉପରେ ପରିଚାଳନା ପକ୍ଷରୁ ଆଶ୍ୱାସନ ଓ ସମୟସୀମା ଦିଆଯାଇଥିବା ଦାବି କରାଯାଇଛି। ୧୩ ଅଗଷ୍ଟରେ ଆଲୋଚନାର Minutes of Discussion ପରିଚାଳନାକୁ ସ୍ୱାକ୍ଷର ପାଇଁ ଦାଖଲ କରାଯାଇଥିଲା। କିନ୍ତୁ ୧୪ ଅଗଷ୍ଟରେ ପରିଚାଳନା ମିନିଟ୍ସରେ ସ୍ୱାକ୍ଷର କରିବାକୁ ମନା କରିଥିବାରୁ ଧର୍ମଘଟ ପ୍ରତ୍ୟାହାର କରିବା ସମ୍ଭବ ହୋଇନଥିବା ସଂଗଠନଗୁଡ଼ିକ ପକ୍ଷରୁ କୁହାଯାଇଛି। AOGBO ଓ OGBEA ପକ୍ଷରୁ ଏହି ଧର୍ମଘଟକୁ ଐତିହାସିକ ସଫଳତା ବୋଲି ଅଭିହିତ କରାଯାଇଛି। ପ୍ରାୟ ୨,୪୦୦ ଅଧିକାରୀ ଓ କର୍ମଚାରୀଙ୍କ ଅଂଶଗ୍ରହଣ, ଭୁବନେଶ୍ୱର ମୁଖ୍ୟ କାର୍ଯ୍ୟାଳୟରେ ପ୍ରାୟ ୧,୦୦୦ କର୍ମଚାରୀଙ୍କ ସମାବେଶ, ପ୍ରାୟ ୯୦ ପ୍ରତିଶତ ଶାଖା ବନ୍ଦ ଏବଂ ପ୍ରାୟ ସମସ୍ତ Regional Office ବନ୍ଦ ରହିବା ଦାବିଗୁଡ଼ିକ ପ୍ରତି କର୍ମଚାରୀଙ୍କ ବ୍ୟାପକ ସମର୍ଥନକୁ ଦର୍ଶାଉଛି ବୋଲି ସଂଗଠନ ଦାବି କରିଛି। AOGBO ଓ OGBEA ପକ୍ଷରୁ ଓଡ଼ିଶା ଗ୍ରାମୀଣ ବ୍ୟାଙ୍କ ପରିଚାଳନାକୁ ୧୨ ଅଗଷ୍ଟର ଆଲୋଚନାରେ ଦିଆଯାଇଥିବା ଆଶ୍ୱାସନଗୁଡ଼ିକୁ ଲିଖିତ ଭାବେ ରେକର୍ଡ କରି ଶୀଘ୍ର କାର୍ଯ୍ୟକାରୀ କରିବାକୁ ଆହ୍ୱାନ ଦିଆଯାଇଛି। କର୍ମଚାରୀଙ୍କ ନ୍ୟାୟସଙ୍ଗତ ଦାବି, ମର୍ଯ୍ୟାଦା, ସୁରକ୍ଷା, ମାନବ ସମ୍ବଳ, ସ୍ୱଚ୍ଛ ବଦଳି ଓ ପଦୋନ୍ନତି ବ୍ୟବସ୍ଥା ଏବଂ ସୁସ୍ଥ ଶିଳ୍ପ ସମ୍ପର୍କ ଏକ ଶକ୍ତିଶାଳୀ ଓଡ଼ିଶା ଗ୍ରାମୀଣ ବ୍ୟାଙ୍କର ଆଧାର ବୋଲି ସଂଗଠନଗୁଡ଼ିକ କହିଛନ୍ତି। ଧର୍ମଘଟ ଯୋଗୁଁ ଗ୍ରାହକମାନେ ଭୋଗିଥିବା ଅସୁବିଧା ପାଇଁ AOGBO ଓ OGBEA ପକ୍ଷରୁ ଦୁଃଖ ପ୍ରକାଶ କରାଯାଇଛି। ଦୀର୍ଘଦିନ ଧରି ସମାଧାନର ପ୍ରୟାସ ବିଫଳ ହେବା ପରେ ଧର୍ମଘଟକୁ ଶେଷ ଗଣତାନ୍ତ୍ରିକ ପଦକ୍ଷେପ ଭାବେ ଗ୍ରହଣ କରାଯାଇଥିବା ସଂଗଠନ ପକ୍ଷରୁ କୁହାଯାଇଛି। AOGBO ପକ୍ଷରୁ ସଭାପତି ମାନଭଞ୍ଜନ ମିଶ୍ର, ଏବଂ ସଧାରଣ ସମ୍ପାଦକ ପିତାବାସ ଜେନା ,OGBEA ପକ୍ଷରୁ:  ସଭାପତି ବିଶ୍ଵ ଜିତ ମିଶ୍ର, ଏବଂ ସଧାରଣ ସମ୍ପାଦକ ହୃଷିପ୍ରକାଶ ପାତ୍ର ସହିତ ଦୁଇ ସଙ୍ଗଠନ ଅନେକ କର୍ମ କର୍ତ୍ତା ଉପସ୍ଥିତ ରହି ଥିବାର ଦେଖା ଯାଇଥିଲା।

ଭୁବନେଶ୍ୱର: ମଧୁବାବୁ ପେନସନ ଯୋଜନାରେ ଦୀର୍ଘଦିନ ଧରି ପଡ଼ିରହିଥିବା ଆବେଦନଗୁଡ଼ିକର ତୁରନ୍ତ ଯାଞ୍ଚ କରିବାକୁ ସମସ୍ତ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛି ସମ୍ପୃକ୍ତ ବିଭାଗ। ଏନେଇ ବିଭାଗୀୟ ସଚିବ ସମସ୍ତ ଜିଲ୍ଲାପାଳଙ୍କୁ ପତ୍ର ଲେଖି ମିଶନ ମୋଡ୍‌ରେ ଆବେଦନଗୁଡ଼ିକର ଯାଞ୍ଚ ଶେଷ କରିବାକୁ କହିଛନ୍ତି। ବିଭାଗୀୟ ସୂଚନା ଅନୁସାରେ, ମଧୁବାବୁ ପେନସନ ଯୋଜନାରେ ବର୍ତ୍ତମାନ ସୁଦ୍ଧା ୬୩ ହଜାର ୮୪୮ଟି ଆବେଦନ ଯାଞ୍ଚ ଅପେକ୍ଷାରେ ପଡ଼ିରହିଛି। ଯୋଗ୍ୟ ଆବେଦନକାରୀମାନେ ଯେପରି ସରକାରୀ ପେନସନ ସୁବିଧାରୁ ବଞ୍ଚିତ ନହୁଅନ୍ତି, ସେଥିପାଇଁ ଏହି ଆବେଦନଗୁଡ଼ିକର ଶୀଘ୍ର ଯାଞ୍ଚ ଉପରେ ବିଭାଗ ଗୁରୁତ୍ୱ ଦେଇଛି। ଚିଠିରେ ସ୍ପଷ୍ଟ ଭାବେ ଆସନ୍ତା ୧୮ ତାରିଖ ସୁଦ୍ଧା ସମସ୍ତ ପଡ଼ିରହିଥିବା ଆବେଦନର ଯାଞ୍ଚ ପ୍ରକ୍ରିୟା ଶେଷ କରିବାକୁ ଜିଲ୍ଲାପାଳମାନଙ୍କୁ କୁହାଯାଇଛି। ଏଥିପାଇଁ ଜିଲ୍ଲା ଓ ବ୍ଲକ୍ ସ୍ତରରେ ଆବଶ୍ୟକ ପଦକ୍ଷେପ ନେଇ ଯାଞ୍ଚ ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ନିର୍ଦ୍ଦେଶ ରହିଛି। ସରକାରଙ୍କ ଏହି ପଦକ୍ଷେପ ଦ୍ୱାରା ଦୀର୍ଘଦିନ ଧରି ପେନସନ ପାଇଁ ଅପେକ୍ଷାରତ ଯୋଗ୍ୟ ହିତାଧିକାରୀମାନେ ଉପକୃତ ହେବେ ବୋଲି ଆଶା କରାଯାଉଛି।