Web News

ଆଜି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି), ପ୍ରାଣନାଥ ମହାବିଦ୍ୟାଳୟ ଶାଖା, ଖୋରଧା ଜିଲ୍ଲା ପକ୍ଷରୁ ଏକ ବିଶାଳ ତ୍ରିରଙ୍ଗା ଶୋଭାଯାତ୍ରା ସଫଳତାର ସହ ଅନୁଷ୍ଠିତ ହୋଇଛି। ଶତାଧିକ ଛାତ୍ରଛାତ୍ରୀଙ୍କ ସକ୍ରିୟ ଅଂଶଗ୍ରହଣ ଏବଂ ସହଯୋଗରେ କାର୍ଯ୍ୟକ୍ରମଟି ସଫଳ ହୋଇପାରିଛି । ଏହି କାର୍ଯ୍ୟକ୍ରମରେ ସ୍ୱଦେଶୀ ଭାରତ ର ଅଖିଳ ଭାରତୀୟ ପ୍ରମୁଖ ଶ୍ରୀ ଦିନେଶ ଜି, ପୁରୀ ବିଭାଗ ସଂଗଠନ ମନ୍ତ୍ରୀ ଶ୍ରୀମାନ ଅରିଜିତ ପଟ୍ଟନାୟକ , ଖୋରଧା ନଗର ବିସ୍ତାରକ ଶ୍ରୀମାନ୍ ସାଇ ଜୀବନ ଜ୍ୟୋତି ,ଖୋରଧା ଜିଲ୍ଲା ସଂଯୋଜକ ଶ୍ରୀମାନ ଦଧିବାମନ ଦାସ, ରାଜ୍ୟ ଖେଲୋ ଭାରତ ସହ ସଂଯୋଜିକା ଡି ନନ୍ଦିନୀ,ଜିଲ୍ଲା ଦାୟିତ୍ୱ ରେ ଥିବା ପ୍ରକାଶ ବେହେରା,ଶୁଭମ୍ ବେହେରା,ମାନସ ରଞ୍ଜନ ସାହୁ ,ରାଜେଶ ସାହୁ ,ସଞ୍ଜୟ ନାୟକ ,ଅଭିଳାଷ ସାହୁ ,ସୁଷମ ବେହେରା , ଏବଂ ଅନ୍ୟାନ୍ୟ ବିଦ୍ୟାର୍ଥୀ ପରିଷଦର କାର୍ଯ୍ୟକର୍ତ୍ତାମାନେ ଉପସ୍ଥିତ ଥିଲେ।ପ୍ରାଣନାଥ ମହାବିଦ୍ୟାଳୟ ସ୍ୱୟଂଶାସିତ ର ବହୁ ସଂଖ୍ୟକ ଛାତ୍ରଛାତ୍ରୀଙ୍କ ସହଭାଗିତାରେ ଶୋଭାଯାତ୍ରାଟି ଭବ୍ୟ ରୂପ ଧାରଣ କରିଥିଲା। ଏହି ତ୍ରିରଙ୍ଗା ଶୋଭାଯାତ୍ରା ପ୍ରାଣନାଥ ମହାବିଦ୍ୟାଳୟ ର ଏନସିସି ପଡ଼ିଆ ଠାରୁ ଆରମ୍ଭ ହୋଇ ମୁକୁନ୍ଦପ୍ରସାଦ ଟ୍ରାଫିକ ଏବଂ ଖୋର୍ଦ୍ଧା ବାଇପାସ୍ ଦେଇ କଲେଜ ର ଜୟୀରାଜଗୁରୁ ଙ୍କ ପ୍ରତିମୂର୍ତ୍ତି ପାଖକୁ ଆସିଥିଲା ।ଏହି ଅବସରରେ ବକ୍ତାମାନେ କହିଥିଲେ ଯେ, ତ୍ରିରଙ୍ଗା କେବଳ ଏକ ଜାତୀୟ ପତାକା ନୁହେଁ, ଏହା ଦେଶର ଗୌରବ, ସ୍ୱାଭିମାନ ଓ ଏକତାର ପ୍ରତୀକ। ଦେଶପ୍ରେମ, ରାଷ୍ଟ୍ରନିଷ୍ଠା ଓ ସାମାଜିକ ଦାୟିତ୍ୱବୋଧକୁ ଛାତ୍ରସମାଜ ମଧ୍ୟରେ ସୁଦୃଢ଼ କରିବା ପାଇଁ ଏପରି କାର୍ଯ୍ୟକ୍ରମ ଅତ୍ୟନ୍ତ ପ୍ରେରଣାଦାୟକ। ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ଦୀର୍ଘ ଦିନ ଧରି ଛାତ୍ରହିତ, ରାଷ୍ଟ୍ରହିତ ଓ ସମାଜହିତକୁ ପ୍ରାଧାନ୍ୟ ଦେଇ ଦେଶବ୍ୟାପୀ କାର୍ଯ୍ୟ କରିଆସୁଛି। ଶିକ୍ଷାର ଗୁଣାତ୍ମକ ବିକାଶ, ଛାତ୍ରଛାତ୍ରୀଙ୍କ ଅଧିକାର ସୁରକ୍ଷା, ସାମାଜିକ ସଚେତନତା, ପରିବେଶ ସୁରକ୍ଷା, ରକ୍ତଦାନ, ଦୁର୍ଯୋଗ ସମୟରେ ସେବାକାର୍ଯ୍ୟ ଏବଂ ଜାତୀୟ ଚେତନାର ବିକାଶ କ୍ଷେତ୍ରରେ ବିଦ୍ୟାର୍ଥୀ ପରିଷଦ ନିରନ୍ତର କାର୍ଯ୍ୟ କରିଆସୁଛି। ଆଜିର ଏହି ଐତିହାସିକ ତ୍ରିରଙ୍ଗା ଶୋଭାଯାତ୍ରା ପୁଣିଥରେ ପ୍ରମାଣ କରିଛି ଯେ, ଯୁବପିଢ଼ି ( ଜେନ୍-ଜି ) ଙ୍କ ମଧ୍ୟରେ ଦେଶଭକ୍ତି, ସାମାଜିକ ଦାୟିତ୍ବ କୁ ନିଭାଇବା ପାଇଁ ଗୁରୁତ୍ୱ ଭାବନା ଅଛି । ବହୁ ସଂଖ୍ୟକ ଛାତ୍ରଛାତ୍ରୀଙ୍କ ସ୍ୱତଃସ୍ଫୂର୍ତ୍ତ ଯୋଗଦାନ ଏବିଭିପି ପ୍ରତି ସେମାନଙ୍କ ବିଶ୍ୱାସ ଓ ଆସ୍ଥାର ପ୍ରତିଫଳନ ବୋଲି ସଂଗଠନ ପକ୍ଷରୁ କୁହାଯାଇଛି। "ଛାତ୍ର ଶକ୍ତି ହିଁ ରାଷ୍ଟ୍ର ଶକ୍ତି" ଏହି ମୂଳମନ୍ତ୍ରକୁ ଆଧାର କରି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ଆଗାମୀ ଦିନରେ ମଧ୍ୟ ରାଷ୍ଟ୍ର ନିର୍ମାଣରେ ଯୁବଶକ୍ତିଙ୍କୁ ସଂଗଠିତ କରିବା ସହ ସମାଜ ଓ ଶିକ୍ଷା କ୍ଷେତ୍ରରେ ବିଭିନ୍ନ ଗଠନମୂଳକ କାର୍ଯ୍ୟକ୍ରମ ଜାରି ରଖିବ।

ଖୋର୍ଦ୍ଧା, ଅଗଷ୍ଟ ୧୪: ସ୍ୱାଧୀନତା ଦିବସ ପୂର୍ବରୁ ଦେଶପ୍ରେମ, ଜାତୀୟ ଏକତା ଓ ତ୍ରିରଙ୍ଗା ପ୍ରତି ସମ୍ମାନର ଭାବନାରେ ଖୋର୍ଦ୍ଧା ସହର ଉତ୍ସବମୁଖର ହୋଇଉଠିଛି। ‘ହର ଘର ତ୍ରିରଙ୍ଗା’ ଅଭିଯାନର ଅଂଶ ଭାବେ ଇଣ୍ଡୋ-ତିବ୍ବତ ବର୍ଡର ପୋଲିସ (ଆଇଟିବିପି)ର ୪୧ତମ ବାଟାଲିୟନ, ଖୋର୍ଦ୍ଧା ଏବଂ ଛତିଶଗଡ଼ର କୋଣ୍ଡାଗାଓଁସ୍ଥିତ ଟିଏଚ୍‌କ୍ୟୁ ପକ୍ଷରୁ ଏକ ବିଶାଳ ତ୍ରିରଙ୍ଗା ଶୋଭାଯାତ୍ରା ଆୟୋଜିତ ହୋଇଥିଲା। ହାତରେ ଜାତୀୟ ପତାକା ଧରି ଶୃଙ୍ଖଳିତ ଭାବେ ଆଗେଇ ଚାଲିଥିବା ହିମବୀରମାନେ ଜନସାଧାରଣଙ୍କ ମଧ୍ୟରେ ଦେଶପ୍ରେମ, ଜାତୀୟ ସଂହତି ଓ ତ୍ରିରଙ୍ଗା ପ୍ରତି ଗଭୀର ସମ୍ମାନର ବାର୍ତ୍ତା ପହଞ୍ଚାଇଥିଲେ। ତ୍ରିରଙ୍ଗାର ଗରିମାମୟ ପ୍ରଦର୍ଶନ ଓ ବର୍ଦ୍ଦି ପରିହିତ ଆଇଟିବିପି ଯବାନଙ୍କ ଶୃଙ୍ଖଳିତ ଉପସ୍ଥିତି ଶୋଭାଯାତ୍ରାକୁ ଏକ ସ୍ୱତନ୍ତ୍ର ଆକର୍ଷଣ ଦେଇଥିଲା। ଏହା କେବଳ ଜାତୀୟ ପତାକା ପ୍ରଦର୍ଶନରେ ସୀମିତ ରହିନଥିଲା; ବରଂ ଦେଶର ଅଖଣ୍ଡତା, ସାମାଜିକ ଏକତା ଓ ଦାୟିତ୍ୱବୋଧକୁ ଆହୁରି ମଜବୁତ କରିବାର ଏକ ଜନସଚେତନତାମୂଳକ ପ୍ରୟାସ ଭାବେ ପରିଣତ ହୋଇଥିଲା।ହର ଘର ତ୍ରିରଙ୍ଗା’ ଅଭିଯାନର ମୂଳ ଲକ୍ଷ୍ୟ ହେଉଛି ପ୍ରତ୍ୟେକ ନାଗରିକଙ୍କ ମନରେ ଜାତୀୟ ପତାକା ପ୍ରତି ଗର୍ବ ଓ ଆତ୍ମୀୟତାର ଭାବନା ସୃଷ୍ଟି କରିବା। ସ୍ୱାଧୀନତା ଦିବସକୁ କେବଳ ଏକ ଆନୁଷ୍ଠାନିକ ଉତ୍ସବ ଭାବେ ପାଳନ ନକରି ଏହାକୁ ଜାତୀୟ ଦାୟିତ୍ୱ, ଏକତା ଓ ଦେଶପ୍ରେମର ଅବସରରେ ପରିଣତ କରିବା ପାଇଁ ଏହି ଅଭିଯାନ ଜନସାଧାରଣଙ୍କୁ ପ୍ରେରିତ କରୁଛି। ଖୋର୍ଦ୍ଧାରେ ଆୟୋଜିତ ଏହି ଶୋଭାଯାତ୍ରା ସେହି ବ୍ୟାପକ ଭାବନାକୁ ଆହୁରି ସୁଦୃଢ଼ କରିଥିଲା। ଦେଶର ଦୁର୍ଗମ ଓ ଉଚ୍ଚ ପର୍ବତୀୟ ସୀମାନ୍ତରେ ନିରନ୍ତର ଦାୟିତ୍ୱ ତୁଲାଉଥିବା ଆଇଟିବିପିର ହିମବୀରମାନଙ୍କ ପାଇଁ ତ୍ରିରଙ୍ଗା କେବଳ ଏକ ପତାକା ନୁହେଁ, ଏହା ଦେଶର ସାର୍ବଭୌମତ୍ୱ, ସୁରକ୍ଷା ଓ ଗୌରବର ପ୍ରତୀକ। ତେଣୁ ସୀମାରେ ଦେଶର ସୁରକ୍ଷା ପାଇଁ ନିଜ ଜୀବନକୁ ବିପଦରେ ପକାଇ ସେବା କରୁଥିବା ଯବାନମାନେ ଯେତେବେଳେ ସାଧାରଣ ଲୋକଙ୍କ ମଧ୍ୟରେ ତ୍ରିରଙ୍ଗା ଧରି ଦେଶପ୍ରେମର ବାର୍ତ୍ତା ନେଇ ପହଞ୍ଚନ୍ତି, ସେତେବେଳେ ଏହା ନାଗରିକଙ୍କ ମନରେ ଏକ ଭିନ୍ନ ଅନୁଭବ ସୃଷ୍ଟି କରିଥାଏ।ଶୋଭାଯାତ୍ରାରେ ତ୍ରିରଙ୍ଗା ହିଁ ଥିଲା ସମଗ୍ର କାର୍ଯ୍ୟକ୍ରମର କେନ୍ଦ୍ରବିନ୍ଦୁ। ଜାତୀୟ ପତାକା ହାତରେ ଧରି ଆଗକୁ ବଢ଼ୁଥିବା ହିମବୀରମାନଙ୍କ ଦୃଶ୍ୟ ଯୁବପିଢ଼ିଙ୍କ ମନରେ ଦେଶପ୍ରେମର ଭାବନା ଜାଗ୍ରତ କରିବା ସହ ତ୍ରିରଙ୍ଗାର ମର୍ଯ୍ୟାଦା ଓ ଏହା ପଛରେ ଥିବା ତ୍ୟାଗର ଇତିହାସକୁ ସ୍ମରଣ କରାଇଥିଲା। ତ୍ରିରଙ୍ଗା ଦେଶର ଏକତା, ସାହସ, ବଳିଦାନ, ଗରିମା ଓ ଦାୟିତ୍ୱବୋଧର ପ୍ରତୀକ ବୋଲି ଏହି ଅବସରରେ ବାର୍ତ୍ତା ଦିଆଯାଇଥିଲା।ଶୋଭାଯାତ୍ରା ମାଧ୍ୟମରେ ଜାତୀୟ ପତାକାର ମର୍ଯ୍ୟାଦା ରକ୍ଷା ଉପରେ ମଧ୍ୟ ବିଶେଷ ଗୁରୁତ୍ୱ ଦିଆଯାଇଥିଲା। ଜାତୀୟ ପତାକାକୁ ଯଥାଯଥ ସମ୍ମାନର ସହ ପ୍ରଦର୍ଶନ ଓ ବ୍ୟବହାର କରିବା ସହିତ ପତାକା ସମ୍ବନ୍ଧୀୟ ନିର୍ଦ୍ଧାରିତ ନିୟମ ଓ ମର୍ଯ୍ୟାଦା ପାଳନ କରିବାକୁ ଲୋକଙ୍କୁ ସଚେତନ କରାଯାଇଥିଲା। ସ୍ୱାଧୀନତା ଦିବସ ଭଳି ଜାତୀୟ ଉତ୍ସବ ସମୟରେ ଘର, ଅନୁଷ୍ଠାନ ଓ ସାର୍ବଜନୀନ ସ୍ଥାନରେ ତ୍ରିରଙ୍ଗାର ବ୍ୟବହାର ବଢ଼ୁଥିବାରୁ ଏହାର ମର୍ଯ୍ୟାଦା ଓ ଗରିମା ସୁରକ୍ଷିତ ରଖିବା ଆହୁରି ଗୁରୁତ୍ୱପୂର୍ଣ୍ଣ ବୋଲି ବାର୍ତ୍ତା ଦିଆଯାଇଥିଲା।ଛତିଶଗଡ଼ର କୋଣ୍ଡାଗାଓଁସ୍ଥିତ ଟିଏଚ୍‌କ୍ୟୁର ଅଂଶଗ୍ରହଣ ଏହି ଅଭିଯାନର ସର୍ବଭାରତୀୟ ଚରିତ୍ରକୁ ମଧ୍ୟ ପ୍ରତିଫଳିତ କରିଥିଲା। ଭୌଗୋଳିକ ସୀମାକୁ ଅତିକ୍ରମ କରି ଏକ ଜାତୀୟ ପ୍ରତୀକ ତଳେ ସମସ୍ତଙ୍କୁ ଏକାଠି କରିବା ହେଉଛି ‘ହର ଘର ତ୍ରିରଙ୍ଗା’ ଅଭିଯାନର ମୂଳ ଭାବନା। ଖୋର୍ଦ୍ଧାରେ ଏହି ଶୋଭାଯାତ୍ରା ସେହି ଜାତୀୟ ଏକତାର ଏକ ସୁନ୍ଦର ଚିତ୍ର ପ୍ରଦର୍ଶନ କରିଥିଲା।ଏହି କାର୍ଯ୍ୟକ୍ରମ ସୁରକ୍ଷା ବାହିନୀ ଓ ସାଧାରଣ ନାଗରିକଙ୍କ ମଧ୍ୟରେ ସମ୍ପର୍କକୁ ଆହୁରି ମଜବୁତ କରିବାର ଏକ ଅବସର ମଧ୍ୟ ସୃଷ୍ଟି କରିଥିଲା। ସୀମାରେ ଦେଶର ସୁରକ୍ଷା ପାଇଁ ଯବାନମାନେ କରୁଥିବା କଠିନ ଓ ତ୍ୟାଗପୂର୍ଣ୍ଣ ସେବା ସମ୍ପର୍କରେ ସାଧାରଣ ଲୋକଙ୍କ ମନରେ ଅଧିକ ଧାରଣା ସୃଷ୍ଟି କରିବା ସହ ନାଗରିକଙ୍କ ନିଜ ଦୈନନ୍ଦିନ ଜୀବନରେ ଦେଶପ୍ରତି ଦାୟିତ୍ୱବୋଧକୁ ମଧ୍ୟ ଏହି କାର୍ଯ୍ୟକ୍ରମ ସ୍ମରଣ କରାଇଥିଲା।ସ୍ୱାଧୀନତା ଦିବସ ପାଳନ ପାଇଁ ସମଗ୍ର ଦେଶ ପ୍ରସ୍ତୁତ ହେଉଥିବା ବେଳେ ଖୋର୍ଦ୍ଧାର ଏହି ତ୍ରିରଙ୍ଗା ଶୋଭାଯାତ୍ରା ଦେଶର ସ୍ୱାଧୀନତା ପଛରେ ଥିବା ଅସଂଖ୍ୟ ବଳିଦାନକୁ ସ୍ମରଣ କରାଇଥିଲା। ତ୍ରିରଙ୍ଗା ଭାରତର ସ୍ୱାଧୀନତା ସଂଗ୍ରାମର ଦୀର୍ଘ ଇତିହାସ, ସହିଦମାନଙ୍କ ତ୍ୟାଗ ଏବଂ ଦେଶର ବିବିଧତା ମଧ୍ୟରେ ଏକତାର ଅଦ୍ୱିତୀୟ ପ୍ରତୀକ ଭାବେ ନାଗରିକଙ୍କୁ ପ୍ରେରଣା ଦେଇଥାଏ।ଶୋଭାଯାତ୍ରାରେ ଦେଶପ୍ରେମମୂଳକ ସ୍ଲୋଗାନ ଓ ‘ବନ୍ଦେ ମାତରମ୍’ର ଧ୍ୱନି ପରିବେଶକୁ ଆହୁରି ଉତ୍ସାହପୂର୍ଣ୍ଣ କରିଥିଲା। ହିମବୀରମାନଙ୍କ ଉପସ୍ଥିତି ଓ ତ୍ରିରଙ୍ଗା ପ୍ରତି ଲୋକଙ୍କ ଉତ୍ସାହ ଏହି କାର୍ଯ୍ୟକ୍ରମକୁ ଏକ ଜନସମ୍ପୃକ୍ତ ଜାତୀୟ ଅଭିଯାନର ରୂପ ଦେଇଥିଲା।ଆଇଟିବିପି ଯବାନଙ୍କ ପାଇଁ ଏହି ପଦକ୍ଷେପ କେବଳ ନିଜର କର୍ତ୍ତବ୍ୟ ପରିସରରେ ସୀମିତ ନଥିଲା। ସୀମାରେ ଦେଶର ସୁରକ୍ଷା ଦାୟିତ୍ୱ ତୁଲାଇବା ସହିତ ସାଧାରଣ ଜନତାଙ୍କ ମଧ୍ୟରେ ଜାତୀୟ ଏକତା, ଦେଶପ୍ରେମ ଓ ନାଗରିକ ଦାୟିତ୍ୱର ଭାବନା ଜାଗ୍ରତ କରିବା ମଧ୍ୟ ଏହି ପ୍ରୟାସର ଏକ ବଡ଼ ବାର୍ତ୍ତା ଥିଲା।ଖୋର୍ଦ୍ଧାରେ ଆୟୋଜିତ ଏହି ତ୍ରିରଙ୍ଗା ଶୋଭାଯାତ୍ରା ‘ହର ଘର ତ୍ରିରଙ୍ଗା’ର ମୂଳ ଉଦ୍ଦେଶ୍ୟକୁ ସାକାର କରିବାର ଏକ ଦୃଶ୍ୟମାନ ପ୍ରୟାସ ହୋଇଥିଲା। ପ୍ରତ୍ୟେକ ଘରେ ତ୍ରିରଙ୍ଗା, ପ୍ରତ୍ୟେକ ହୃଦୟରେ ଦେଶପ୍ରେମ ଏବଂ ପ୍ରତ୍ୟେକ ନାଗରିକଙ୍କ ମନରେ ଦେଶ ପ୍ରତି ଦାୟିତ୍ୱବୋଧ—ଏହି ଭାବନାକୁ ନେଇ ଆଗକୁ ବଢ଼ିଥିବା ଏହି ଅଭିଯାନ ଖୋର୍ଦ୍ଧାରେ ଜାତୀୟ ଏକତାର ଏକ ଶକ୍ତିଶାଳୀ ସନ୍ଦେଶ ଦେଇଛି। ଦେଶର ଶକ୍ତି ତାହାର ବିବିଧତା ମଧ୍ୟରେ ଏକତାରେ ନିହିତ ଏବଂ ତ୍ରିରଙ୍ଗା ହେଉଛି ସେହି ଏକତାର ସର୍ବୋଚ୍ଚ ପ୍ରତୀକ—ଏହି ବାର୍ତ୍ତା ସହ ଶୋଭାଯାତ୍ରା ଜନସାଧାରଣଙ୍କ ମନରେ ଦେଶପ୍ରେମର ଭାବନାକୁ ଆହୁରି ଦୃଢ଼ କରିଥିଲା।

ନୂଆଗାଁ: ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ଦାମୋଦର ଦାସ ମୋଦିଙ୍କ ଆହ୍ୱାନ କ୍ରମେ ଦେଶ ବ୍ୟାପି ଅଗଷ୍ଟ ୯ ତାରିଖରୁ ଆସନ୍ତା ଅଗଷ୍ଟ ୧୭ ତାରିଖ ପର୍ଯ୍ୟନ୍ତ ଭାରତ ବର୍ଷର ଏକତା, ସଂହତି,ଅଖଣ୍ଡତା ସମନ୍ୱୟ,ଦେଶର ସୁରକ୍ଷା ଓ ଭାତୃଭାବ ସମ୍ପର୍କ ନିମନ୍ତେ ସମସ୍ତ ଜନସାଧାରଣ ଦେଶ ପ୍ରେମରେ ଜାଗ୍ରତ ରହି ଜାତୀୟ ପତାକାକୁ ସମ୍ମାନ ଜଣାଇ ହର ଘର ତ୍ରିରଙ୍ଗା କାର୍ଯ୍ୟକ୍ରମରେ ସାମିଲ ହୋଇ ଦେଶର ସମସ୍ତ ଘର,ବ୍ୟବସାୟିକ ଅନୁଷ୍ଠାନ,ସମସ୍ତ ସରକାରୀ ଓ ବେସରକାରୀ ଶିକ୍ଷାନୁଷ୍ଠାନ,ସମସ୍ତ ବ୍ୟାଙ୍କ,ସମସ୍ତ ସରକାରୀ କାର୍ଯ୍ୟାଳୟ ଗୁଡିକରେ ପବିତ୍ର ୮୦ ତମ ସ୍ୱାଧୀନତା ଦିବସ ଉପଲକ୍ଷେ ଜାତୀୟ ପତାକା ଉଡାଇବାକୁ ଆହ୍ୱାନ ଦିଆଯାଇଅଛି I ଏହି କାର୍ଯ୍ୟକ୍ରମ ଉପଲକ୍ଷେ ନୂଆଗାଁ ଶିକ୍ଷା ବ୍ଲକ ଅନ୍ତର୍ଗତ ଖୁଣ୍ଟଗାଁ ସ୍ଥିତ ପି. ଏମ.ଶ୍ରୀ ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟ ଖୁଣ୍ଟଗାଁ ଆନୁକୂଲ୍ୟରେ ଓ ଭାରପ୍ରାପ୍ତ ଅଧ୍ୟକ୍ଷା ତନୁଜା ନନ୍ଦିନୀ ତନ୍ତୀଙ୍କ ଆବାହକତ୍ୱରେ ବିଦ୍ୟାଳୟ ସ୍ତରୀୟ ହର ଘର ତ୍ରିରଙ୍ଗା ଚିତ୍ରାଙ୍କନ ପ୍ରତିଯୋଗିତା , ଅନଲାଇନ ସାଧାରଣ ଜ୍ଞାନ ପ୍ରତିଯୋଗିତା, ଜାତୀୟ ସ୍ତରୀୟ ଦେଶାତ୍ମକ ବକ୍ତୃତା ପ୍ରତିଯୋଗିତା,ରଙ୍ଗୋଲି ପ୍ରତିଯୋଗିତା, ପ୍ରବନ୍ଧ ପ୍ରତିଯୋଗିତା ,ତ୍ରିରଙ୍ଗା ଆଧାରିତ ବିଭିନ୍ନ ପ୍ରକାର ପ୍ରକଳ୍ପ ମେଳା ଇତ୍ୟାଦି ଅନୁଷ୍ଠିତ ହୋଇଥିଲା I ଏହି ପ୍ରତିଯୋଗିତା ଗୁଡିକରେ ବିଦ୍ୟାଳୟର ଶତାଧିକ ଛାତ୍ର ଛାତ୍ରୀମାନେ ଅଂଶ ଗ୍ରହଣ କରିଥିଲେ I ସମସ୍ତ ପ୍ରତିଯୋଗିତା ଗୁଡ଼ିକୁ ବିଦ୍ୟାଳୟର ସମସ୍ତ ଶିକ୍ଷକ,ଶିକ୍ଷୟିତ୍ରୀ, ଅଧ୍ୟାପକ ଓ ଅଧ୍ୟାପିକା ପ୍ରମୁଖ ମିଳିତ ଭାବେ ସହଯୋଗ କରି ପରିଚାଳନା କରିଥିଲେ I ସମସ୍ତ କୃତୀ ପ୍ରତିଯୋଗୀ ମାନଙ୍କୁ ଟ୍ରଫି ଓ ପ୍ରମାଣ ପତ୍ର ଆସନ୍ତା ଅଗଷ୍ଟ ୧୫ ତାରିଖ ଦିନ ପବିତ୍ର ୮୦ ତମ ସ୍ୱାଧୀନତା ଦିବସ ପାଳନ ଅବସରରେ ପୁରସ୍କୃତ କରାଯିବ ବୋଲି ଅଧ୍ୟକ୍ଷା ତନୁଜା ନନ୍ଦିନୀ ତନ୍ତୀ ସୂଚନା ପ୍ରଦାନ କରିଅଛନ୍ତି I ନୂଆଗାଁ ରୁ ଗଣପତି ଦାଶ ଙ୍କ ରିପୋର୍ଟ ସ୍ରୁଷ୍ଟି ନ୍ୟୁଜ

ଅନୁଗୋଳ: ନୈନି କୋଇଲା ଖଣିରୁ କୋଇଲା ପରିବହନକୁ ନେଇ ଅନୁଗୋଳ ଜିଲ୍ଲା ପ୍ରଶାସନ ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି। ଅନୁଗୋଳ ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ନୈନି କୋଇଲା ଖଣିରୁ କୋଇଲା ପରିବହନ କରୁଥିବା ଲୋଡେଡ୍ ଓ ଖାଲି ଗାଡ଼ିଗୁଡ଼ିକର ସୁବ୍ୟବସ୍ଥିତ ପାର୍କିଂ ଏବଂ ଚଳାଚଳ ନେଇ ଆଲୋଚନା କରାଯାଇଛି। କୋଇଲା ପରିବହନ ସମୟରେ ରାସ୍ତାରେ ଯେପରି ଟ୍ରାଫିକ୍ ସମସ୍ୟା ସୃଷ୍ଟି ନହୁଏ ଏବଂ ସାଧାରଣ ଯାତାୟାତ ବ୍ୟବସ୍ଥା ସୁଚାରୁ ରହେ, ସେଥିପାଇଁ ଗାଡ଼ି ପାର୍କିଂ ଓ ପରିଚାଳନା ନେଇ ଆବଶ୍ୟକ ନିର୍ଦ୍ଦେଶ ଦିଆଯାଇଛି। ପ୍ରଶାସନର ଏହି ପଦକ୍ଷେପ ଦ୍ୱାରା ନୈନି କୋଇଲା ଖଣିରୁ ଯାଉଥିବା ଏବଂ ଫେରୁଥିବା ଭାରୀଯାନଗୁଡ଼ିକର ଚଳାଚଳ ଅଧିକ ଶୃଙ୍ଖଳିତ ଓ ସୁବ୍ୟବସ୍ଥିତ ହେବା ସହ ଟ୍ରାଫିକ୍ ସମସ୍ୟା ହ୍ରାସ ପାଇବ ବୋଲି ଆଶା କରାଯାଉଛି।

ଭୁବନ : ଢେ଼ଙ୍କାନାଳ ଜିଲ୍ଲା ଭୁବନ ବ୍ଲକ ଅନ୍ତର୍ଗତ ନିଳକଣ୍ଠପୁରସ୍ଥ ସହିଦ୍ ବାଜି ରାଉତ ଙ୍କ ଜନ୍ମ ପୀଠରେ ଭାରତୀୟ ଜନତା ପାର୍ଟି ଭୁବନ ନଗର ମଣ୍ଡଳ ପକ୍ଷରୁ ତ୍ରିରଙ୍ଗା ଶୋଭାଯାତ୍ରା ଅନୁଷ୍ଠିତ ହୋଇଯାଇଛି। ନଗର ମଣ୍ଡଳ ସଭାପତି ଅଜିତ୍ କୁମାର ବିହାରୀ ଙ୍କ ଅଧ୍ୟକ୍ଷତା ଓ କାମାକ୍ଷାନଗର ବିଧାୟକ ଶତ୍ରୁଘ୍ନ ଜେନା ଙ୍କ ତତ୍ତ୍ଵାବଧାନରେ ଆୟୋଜିତ ତ୍ରିରଙ୍ଗା ଶୋଭାଯାତ୍ରା ରେ ସମ୍ବଲପୁର ସାଂସଦ ତଥା ପୂର୍ବତନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇ ସହିଦ୍ ଙ୍କୁ ପୁଷ୍ପମାଲ୍ୟ ଅର୍ପଣ କରି ଶ୍ରଦ୍ଧାଞ୍ଜଳି ଜଣାଇଥିଲେ । ବିଶ୍ୱର ସର୍ବ କନିଷ୍ଠ ସହିଦ ବୀର ବାଜି ରାଉତ କେବଳ ଭୁବନ କି ଢେଙ୍କାନାଳର ଗର୍ବ,ଗୌରବ ନୁହନ୍ତି । ସେ ସାରା ଓଡ଼ିଶା ଓ ଭାରତ ବର୍ଷର ଗର୍ବ ଓ ଗୌରବ। ବାଜି ରାଉତ ଙ୍କ ଦେଶପ୍ରେମ, ସାହସ ଓ ବଳିଦାନ ତାଙ୍କୁ ଚିର ଦିନ ପର୍ଯ୍ୟନ୍ତ ଅମର ରଖିବ ବୋଲି ମତବ୍ୟକ୍ତ କରିଥିଲେ। ଦେଶର ଯୁବବର୍ଗଙ୍କ ମଧ୍ୟରେ ଦେଶପ୍ରେମ ଜାଗ୍ରତ କରିବା ସହିତ ଏକତା,ଅଖଣ୍ଡତା,ଜାତୀତାବାଦ୍ ରକ୍ଷା କରିବା ପାଇଁ ତ୍ରିରଙ୍ଗା ଯାତ୍ରା ଅନୁଷ୍ଠିତ ହେଉଛି ବୋଲି କହିଥିଲେ । ସମ୍ମାନିତ ଅତିଥି ଭାବେ ଢେ଼ଙ୍କାନାଳ ସାଂସଦ ରୁଦ୍ର ନାରାୟଣ ପାଣି,ପରଜଙ୍ଗ ବିଧାୟକ ବିଭୂତି ଭୂଷଣ ପ୍ରଧାନ,ହିନ୍ଦୋଳ ବିଧୟିକା ସୀମାରାଣୀ ନାୟକ,ଜିଲ୍ଲାପାଳ ଆଶିଷ ଈଶ୍ୱର ପାଟିଲ,ଜିଲ୍ଲା ଆରକ୍ଷୀ ଅଧିକ୍ଷକ ଅଭିନବ ସୋନକର,ଜିଲ୍ଲା ବିଜେପି ସଭାପତି ରାସ ବିହାରୀ ବେହେରା ଙ୍କ ସମେତ ବହୁ ଦଳୀୟ କାର୍ଯ୍ୟକର୍ତ୍ତା ଯୋଗଦେଇଥିଲେ । ସାଂସଦ ଶ୍ରୀଯୁକ୍ତ ପ୍ରଧାନ ଙ୍କୁ ବାଜି ରାଉତ ସେତୁରୁ ସ୍ୱାଗତ କରି ନିଳକଣ୍ଠପୁର ପର୍ଯ୍ୟନ୍ତ ଅଣାଯାଇଥିଲା । ପରେ ନିଳକଣ୍ଠପୁର ରୁ ଭୁବନ କୋର୍ଟ ଛକ ପର୍ଯ୍ୟନ୍ତ ତ୍ରିରଙ୍ଗା ଶୋଭାଯାତ୍ରା ଅନୁଷ୍ଠିତ ହୋଇଥିଲା ଓ କୋର୍ଟ ଛକରେ ସ୍ଥାପିତ ସ୍ବର୍ଗତ ଦେବେନ୍ଦ୍ର ପ୍ରଧାନ ଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରାଯାଇଥିଲା । ଏହି ତ୍ରିରଙ୍ଗା ଶୋଭାଯାତ୍ରାରେ ସାରା ନିର୍ବାଚନ ମଣ୍ଡଳୀରୁ ପ୍ରାୟ ୨ ହଜାର ରୁ ଉର୍ଦ୍ଧ୍ବ ପୁରୁଷ ମହିଳା ଯୋଗଦେଇଥିଲେ ।ଭୁବନ ଥାନା ଆଇ ଆଇ ସି ରେଣୁବାଳା ସାହୁ ଦୁଇ ପ୍ଲାଟୁନ୍ ପୋଲିସ ଫୋର୍ସ ଙ୍କ ସହଯୋଗରେ ଶାନ୍ତି ରକ୍ଷା କରିଥିଲେ ।

ଜଗତପୁର: ଜଗତପୁର ଅଞ୍ଚଳର ବରିଷ୍ଠ କଂଗ୍ରେସ ନେତା ତଥା ୪୮ନଂ ୱାର୍ଡ କଂଗ୍ରେସ ସଭାପତି ରଶ୍ମିକାନ୍ତ ସାମଲଙ୍କ ବିୟୋଗରେ "ଜଗତପୁର କଂଗ୍ରେସ "ପକ୍ଷରୁ ବ୍ଲକ୍ କଂଗ୍ରେସ ସଭାପତି ଅଲେଖ ଚନ୍ଦ୍ର ବେହେରାଙ୍କ ଅଧ୍ୟକ୍ଷତାରେ ଏକ ଶ୍ରଦ୍ଧାଞ୍ଜଳି ସଭା ଜଗତପୁର ଡାକ ବଙ୍ଗଳା ଠାରେ ଅନୁଷ୍ଠିତ ହୋଇଯାଇଛି । ପ୍ରଥମେ ଅମର ଆତ୍ମାର ସଦଗତି ନିମନ୍ତେ ନୀରବ ପ୍ରାର୍ଥନା କରାଯାଇ ତାଙ୍କ ଗୁଣାବଳୀ ଉପରେ ଆଲୋଚନା କରାଯାଇଥିଲା । ଜଣେ ଶାନ୍ତ ସରଳ,କର୍ମଠ,ନିଷ୍ଠାପର ଓ ଅମାୟିକ ବ୍ୟକ୍ତିତ୍ୱ ଥିଲେ । ସେ ବହୁ ଅନୁଷ୍ଠାନ ସହିତ ଓତଃପ୍ରୋତ ଭାବରେ ଜଡ଼ିତ ଥିଲେ । ଏହି ଶ୍ରଦ୍ଧାଞ୍ଜଳି ସଭାରେ ଜଗତପୁର ଶାନ୍ତି କମିଟି ସଭାପତି ନିରଞ୍ଜନ ବିଶ୍ଵାଳ, କଂଗ୍ରେସ ମୁଖପାତ୍ର ମାନସ ପରିଡ଼ା, ସଦର କଂଗ୍ରେସ ନିର୍ବାଚନ ମଣ୍ଡଳୀ ବିଧାୟକ ପ୍ରାର୍ଥୀ ରାମଚନ୍ଦ୍ର ଗୋଚ୍ଛାୟତ, ପ୍ରାକ୍ତନ ପିସିସି ସମ୍ପାଦକ ମାନସ ନାୟକ, କୁଳମଣୀ ବେହେରା, କଂଗ୍ରେସ ନେତା ପ୍ରଦୀପ ପ୍ରଧାନ, ନଗର କଂଗ୍ରେସ ସାଧାରଣ ସମ୍ପାଦକ ନିର୍ମଳ ସ୍ୱାଇଁ, ଜିଲ୍ଲା କଂଗ୍ରେସ ଉପସଭାପତି ଶିଶିର ରଥ ଓ ରାଜେଶ୍ ସ୍ୱାଇଁ, ଛାତ୍ର ନେତା ସୁକାନ୍ତ ସାହାଣୀ ଓ ହରି ଶଙ୍କର ରାଉତ, ଆଇନଜୀବୀ ଆକାଶ ଭୂୟାଁ ଓ ପ୍ରକାଶ ମୁଦୁଲି, ଚୌଦ୍ୱାର ନଗର କଂଗ୍ରେସ ସଭାପତି ହରିହର ପରିଡ଼ା, ସଦର ବ୍ଲକ୍ କଂଗ୍ରେସ ସଭାପତି ସୀତାକାନ୍ତ ପଣ୍ଡା, କଂଗ୍ରେସ ନେତା ଲଳିତ ଭୂୟାଁ, ଡାକ୍ତର ଅରୁଣ ଖୁଣ୍ଟିଆ, ବିଜୟ କୁମାର ମିଶ୍ର, ପଞ୍ଚାନନ ପାଣିଗ୍ରାହୀ, ନାରୀନେତ୍ରୀ ମୋନାଲିସା ଦାସ ପ୍ରମୁଖ ସ୍ମୃତି ଚାରଣ କରିଥିଲେ | ଶେଷରେ କିଶୋର ନାୟକ ଧନ୍ୟବାଦ୍ ଅର୍ପଣ କରିଥିଲେ ।

ଅନୁଗୋଳ: ଦେଶର ୮୦ତମ ସ୍ୱାଧୀନତା ଦିବସ ପାଳନ ପୂର୍ବରୁ ଅନୁଗୋଳରେ ସୁରକ୍ଷା ବ୍ୟବସ୍ଥାକୁ ଜୋରଦାର କରାଯାଇଛି। ଜିଲ୍ଲାସ୍ତରୀୟ ସ୍ୱାଧୀନତା ଦିବସ ପାଳନକୁ ଶାନ୍ତିପୂର୍ଣ୍ଣ ଓ ସୁରକ୍ଷିତ ଭାବେ ସମ୍ପନ୍ନ କରିବା ପାଇଁ ଅନୁଗୋଳ ଏସ୍‌ପି, ଅତିରିକ୍ତ ଏସ୍‌ପିଙ୍କ ସମେତ ବରିଷ୍ଠ ପୋଲିସ ଅଧିକାରୀମାନେ ସୁରକ୍ଷା ବ୍ୟବସ୍ଥାର ସମୀକ୍ଷା ଓ ଯାଞ୍ଚ କରିଛନ୍ତି। ସ୍ୱାଧୀନତା ଦିବସ କାର୍ଯ୍ୟକ୍ରମସ୍ଥଳୀରେ ସୁରକ୍ଷା ବ୍ୟବସ୍ଥା, ଭିଡ଼ ନିୟନ୍ତ୍ରଣ ଓ ଯାତାୟାତ ବ୍ୟବସ୍ଥା ଉପରେ ପୋଲିସ ପକ୍ଷରୁ ବିଶେଷ ଗୁରୁତ୍ୱ ଦିଆଯାଇଛି। କୌଣସି ଅପ୍ରୀତିକର ପରିସ୍ଥିତି ଯେପରି ସୃଷ୍ଟି ନହୁଏ, ସେଥିପାଇଁ ପୋଲିସ ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଉଛି। ଏକ ସୁରକ୍ଷିତ, ଶୃଙ୍ଖଳିତ ଓ ଶାନ୍ତିପୂର୍ଣ୍ଣ ସ୍ୱାଧୀନତା ଦିବସ ପାଳନ ସୁନିଶ୍ଚିତ କରିବାକୁ ଅନୁଗୋଳ ପୋଲିସ ପ୍ରତିବଦ୍ଧ ବୋଲି କୁହାଯାଇଛି।

ଅନୁଗୋଳ: ଦିନକୁ ଦିନ ବଢ଼ୁଥିବା ସାଇବର ଠକେଇ ଓ ଅନଲାଇନ୍ ଅପରାଧରୁ ଛାତ୍ରଛାତ୍ରୀଙ୍କୁ ସଚେତନ କରିବା ଲକ୍ଷ୍ୟରେ ସାଇବର କ୍ରାଇମ୍ ୟୁନିଟ୍, ସିଆଇଡି, କ୍ରାଇମ୍ ବ୍ରାଞ୍ଚ, ଓଡ଼ିଶା ପକ୍ଷରୁ ଏକ ଭର୍ଚୁଆଲ୍ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ଅନୁଗୋଳ ଜିଲ୍ଲା ସାଇବର ଅପରାଧ ନୋଡାଲ୍ ଅଧିକାରୀ ନିଜ ଟିମ୍ ସହ ଜିଲ୍ଲା ମୁଖ୍ୟାଳୟର ବିଭିନ୍ନ ଶିକ୍ଷାନୁଷ୍ଠାନରେ ଏହି କାର୍ଯ୍ୟକ୍ରମର ସମନ୍ୱୟ କରିଥିଲେ। ଭର୍ଚୁଆଲ୍ ଅଧିବେଶନରେ ସାଇବର ସୁରକ୍ଷା, ଅନଲାଇନ୍ ଠକେଇରୁ ସୁରକ୍ଷିତ ରହିବା, ବ୍ୟକ୍ତିଗତ ତଥ୍ୟର ସୁରକ୍ଷା ଏବଂ ଦାୟିତ୍ୱପୂର୍ଣ୍ଣ ଡିଜିଟାଲ୍ ବ୍ୟବହାର ଉପରେ ଛାତ୍ରଛାତ୍ରୀଙ୍କୁ ସଚେତନ କରାଯାଇଥିଲା। ସାଇବର ଠକେଇର ବିଭିନ୍ନ ଉପାୟ ସମ୍ପର୍କରେ ସତର୍କ ରହିବା ସହ ନିଜର ଡିଜିଟାଲ୍ ତଥ୍ୟ ଓ ଆକାଉଣ୍ଟକୁ ସୁରକ୍ଷିତ ରଖିବା ପାଇଁ ମଧ୍ୟ ପରାମର୍ଶ ଦିଆଯାଇଥିଲା। ଛାତ୍ରଛାତ୍ରୀମାନେ ସାଇବର ଅପରାଧ ସମ୍ପର୍କରେ ସଚେତନ ହୋଇ ନିଜେ ସୁରକ୍ଷିତ ରହିବା ସହ ଅନ୍ୟମାନଙ୍କୁ ମଧ୍ୟ ସଚେତନ କରିବାକୁ ଆହ୍ୱାନ ଦିଆଯାଇଥିଲା।

ଛେଣ୍ଡିପଦା: ଛେଣ୍ଡିପଦା କଂଗ୍ରେସ କାର୍ଯ୍ୟାଳୟ ପରିସରରେ ଭୋଟର ତାଲିକା ସଂଶୋଧନ (SIR) ସମ୍ପର୍କିତ ବୁଥ୍‌ସ୍ତରୀୟ ଏଜେଣ୍ଟ (BLA-2)ମାନଙ୍କ ପାଇଁ ଏକ ପ୍ରଶିକ୍ଷଣ କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ଏହି ପ୍ରଶିକ୍ଷଣରେ ଅନୁଗୋଳ ଜିଲ୍ଲା କଂଗ୍ରେସ ସଭାପତି ସୁନୀଲ ପ୍ରଧାନ, ଛେଣ୍ଡିପଦା ବ୍ଲକ ସଭାପତି ଅଜୟ ବେହେରା, ବଅଁରପାଳ ବ୍ଲକ ସଭାପତି ବିନୋଦ ମାଝୀ, ଜିଲ୍ଲା ସାଧାରଣ ସମ୍ପାଦିକା ଅଳକାରାଣୀ ମହାପାତ୍ର, ଜିଲ୍ଲା ସମ୍ପାଦକ ସଞ୍ଜୟ ସାହୁଙ୍କ ସମେତ ସସ୍ମିତା ବେହେରା ଯୋଗଦେଇଥିଲେ। ପ୍ରଶିକ୍ଷଣରେ SIR ପ୍ରକ୍ରିୟା, ଭୋଟର ତାଲିକା ସଂଶୋଧନ ଏବଂ ବୁଥ୍‌ସ୍ତରରେ BLA-2ଙ୍କ ଦାୟିତ୍ୱ ଓ କାର୍ଯ୍ୟପ୍ରଣାଳୀ ସମ୍ପର୍କରେ ଆଲୋଚନା କରାଯାଇଥିଲା।

ଭଦ୍ରକ ଜିଲ୍ଲା ଧାମନଗର ଅଞ୍ଚଳରେ ଅଘଟଣ। ଗେଙ୍ଗୁଟି ନଦୀରେ ହଠାତ୍ ବନ୍ୟାଜଳ ବଢ଼ିବାରୁ ପାଣି ସ୍ରୋତରେ ଭାସି ଯାଇ ଜଣେ ଚାଷୀ ନିଖୋଜ ହୋଇଛନ୍ତି। ନିଖୋଜ ଚାଷୀ ହେଲେ ଧାମନଗର ଥାନା ଅଧୀନ ଆନନ୍ଦପୁର ପଞ୍ଚାୟତ ପାହାଡ଼ପୁର ଯେନାସାହିର ୫୨ ବର୍ଷୀୟ ଗଣେଶ ଯେନା। ସୂଚନା ଅନୁଯାୟୀ, ଆଜି ସକାଳେ ଗଣେଶଙ୍କ ସମେତ ୫ଜଣ ଚାଷୀ ଧାନ ରୋଇବା ପାଇଁ ବିଲକୁ ଯାଇଥିଲେ। କାମ ସାରି ସମସ୍ତେ ଘରକୁ ଫେରୁଥିବା ସମୟରେ ଗେଙ୍ଗୁଟି ନଦୀରେ ହଠାତ୍ ବନ୍ୟାଜଳ ବଢ଼ିଯାଇଥିଲା। ନଦୀ ପାର ହେଉଥିବା ବେଳେ ପ୍ରଖର ପାଣି ସ୍ରୋତରେ ଗଣେଶ ଭାସି ଯାଇଥିଲେ। ଘଟଣା ପରେ ପରିବାର ଓ ସ୍ଥାନୀୟ ଲୋକଙ୍କ ମଧ୍ୟରେ ଚିନ୍ତା ବଢ଼ିଛି। ନିଖୋଜ ଗଣେଶଙ୍କୁ ଖୋଜିବା ପାଇଁ ଉଦ୍ଧାରକାରୀ ଦଳ ଓ ପ୍ରଶାସନ ପକ୍ଷରୁ ତଲାସୀ ଅଭିଯାନ ଜାରି ରହିଛି। ଏପଟେ ଗେଙ୍ଗୁଟି ନଦୀ ସମେତ ଧାମନଗର ଅଞ୍ଚଳର ବିଭିନ୍ନ ନଦୀରେ ବନ୍ୟାଜଳ ବଢ଼ିଥିବାରୁ ନଦୀକୂଳିଆ ଅଞ୍ଚଳବାସୀଙ୍କ ମଧ୍ୟରେ ଭୟର ବାତାବରଣ ଦେଖାଦେଇଛି।

ନୂଆପଡ଼ା ସଦର ବ୍ଲକ ଅନ୍ତର୍ଗତ ବିଶୋରା ଗ୍ରାମପଞ୍ଚାୟତର ବାଉଣ୍ଡ୍ରି କାନ୍ଥ ଭାଙ୍ଗିଯାଇଥିବାରୁ ପଞ୍ଚାୟତ ପରିସରର ସୁରକ୍ଷା ବ୍ୟବସ୍ଥା ଏବେ ପ୍ରଶ୍ନରେ। କାନ୍ଥର କିଛି ଅଂଶ ଭାଙ୍ଗିଯାଇ ଖୋଲା ପଡ଼ିଥିବାରୁ ସେହି ବାଟ ଦେଇ ପ୍ରତିଦିନ ଗାଈଗୋରୁ, ଛେଳିମେଣ୍ଢା ଭଳି ଗୃହପାଳିତ ପଶୁ ପଞ୍ଚାୟତ ପରିସରକୁ ପଶିଯାଉଥିବା ଅଭିଯୋଗ ହୋଇଛି। ଏହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ସହ ଚିନ୍ତା ବଢ଼ିଛି। ପଞ୍ଚାୟତ ପରିସରକୁ ସୁରକ୍ଷିତ ଓ ସ୍ୱଚ୍ଛ ରଖିବା ପାଇଁ ବାଉଣ୍ଡ୍ରି କାନ୍ଥ ନିର୍ମାଣ କରାଯାଇଥିଲେ ମଧ୍ୟ ଏହାର କିଛି ଅଂଶ ଭାଙ୍ଗିଯିବା ପରେ ପରିସରର ସୁରକ୍ଷା ବ୍ୟବସ୍ଥା ଦୁର୍ବଳ ହୋଇପଡ଼ିଛି। ଭାଙ୍ଗିଥିବା ସ୍ଥାନ ଦେଇ ପଶୁମାନେ ଅବାଧରେ ପ୍ରବେଶ କରି ପଞ୍ଚାୟତ ପରିସରରେ ଏଣେତେଣେ ଘୁରୁଥିବାରୁ ଅସ୍ୱଚ୍ଛତା ସୃଷ୍ଟି ହେବା ସହ ପରିବେଶ ମଧ୍ୟ ପ୍ରଭାବିତ ହେଉଛି ବୋଲି ଗ୍ରାମବାସୀ କହିଛନ୍ତି। ପଞ୍ଚାୟତ କାର୍ଯ୍ୟାଳୟ ହେଉଛି ଗ୍ରାମବାସୀଙ୍କ ବିଭିନ୍ନ ସରକାରୀ କାର୍ଯ୍ୟ ସହ ଜଡ଼ିତ ଏକ ଗୁରୁତ୍ୱପୂର୍ଣ୍ଣ ସ୍ଥାନ। ପ୍ରତିଦିନ ବିଭିନ୍ନ କାମରେ ଲୋକେ ଏଠାକୁ ଆସୁଥିବା ବେଳେ ପରିସର ମଧ୍ୟରେ ପଶୁମାନଙ୍କ ଅବାଧ ଚଳାଚଳ ସମସ୍ୟାକୁ ଆହୁରି ଗୁରୁତର କରୁଛି। ଏହାଛଡ଼ା ଭାଙ୍ଗିଥିବା କାନ୍ଥ ଦେଇ ପଶୁମାନେ ବାହାରକୁ ଯାଇ ଦୁର୍ଘଟଣାର ଶିକାର ହେବାର ଆଶଙ୍କା ମଧ୍ୟ ରହିଛି। ଗ୍ରାମବାସୀଙ୍କ ମତରେ, କେବଳ ଭଙ୍ଗା ଅଂଶକୁ ନାମକୁ ମାତ୍ର ମରାମତି କରିଦେଲେ ସମସ୍ୟାର ସ୍ଥାୟୀ ସମାଧାନ ହେବ ନାହିଁ। ଆବଶ୍ୟକତା ଅନୁଯାୟୀ ମଜବୁତ ଓ ଦୀର୍ଘସ୍ଥାୟୀ ନୂଆ ବାଉଣ୍ଡ୍ରି କାନ୍ଥ ନିର୍ମାଣ କରାଗଲେ ପଞ୍ଚାୟତ ପରିସର ସୁରକ୍ଷିତ ରହିବା ସହ ପଶୁମାନଙ୍କ ଅବାଧ ପ୍ରବେଶ ମଧ୍ୟ ବନ୍ଦ ହୋଇପାରିବ। ଏନେଇ ଗ୍ରାମବାସୀ ପଞ୍ଚାୟତ ପ୍ରଶାସନ ଓ ସମ୍ପୃକ୍ତ ବିଭାଗର ଦୃଷ୍ଟି ଆକର୍ଷଣ କରିଛନ୍ତି। ତୁରନ୍ତ ଘଟଣାସ୍ଥଳ ପରିଦର୍ଶନ କରି ଭାଙ୍ଗିଥିବା କାନ୍ଥର ସ୍ଥିତି ଯାଞ୍ଚ କରିବା ସହ ପୁରୁଣା ଭଙ୍ଗା କାନ୍ଥକୁ ହଟାଇ ସେହି ସ୍ଥାନରେ ମଜବୁତ ନୂଆ ବାଉଣ୍ଡ୍ରି କାନ୍ଥ ନିର୍ମାଣ କରିବାକୁ ସେମାନେ ଦାବି କରିଛନ୍ତି। ଏବେ ଦେଖିବାକୁ ବାକି ରହିଲା, ବିଶୋରା ପଞ୍ଚାୟତବାସୀଙ୍କ ଏହି ସମସ୍ୟା ପ୍ରତି ପ୍ରଶାସନ କେତେ ଶୀଘ୍ର ଦୃଷ୍ଟି ଦେଉଛି ଏବଂ ପଞ୍ଚାୟତ ପରିସରର ସୁରକ୍ଷା ପାଇଁ କେବେ ନୂଆ ବାଉଣ୍ଡ୍ରି କାନ୍ଥ ନିର୍ମାଣ ହେଉଛି।

ନୂଆପଡ଼ା ସଦର ଯାମପାଣି ଠାରୁ ବିରୋମାଲକୁ ସଂଯୋଗ କରୁଥିବା PMGSY ରାସ୍ତା ଏବେ ଶୋଚନୀୟ ଅବସ୍ଥାରେ। ରାସ୍ତାର ୧ କିଲୋମିଟରରୁ ଅଧିକ ଅଞ୍ଚଳ ଖରାପ ହୋଇପଡ଼ିଥିବାରୁ ଦୈନନ୍ଦିନ ଯାତାୟାତରେ ଲୋକଙ୍କୁ ବହୁ ସମସ୍ୟା ଭୋଗିବାକୁ ପଡ଼ୁଛି। ବିଶେଷକରି ସ୍କୁଲ, ହଷ୍ଟେଲ ଓ ହସ୍ପିଟାଲ ଯିବାଆସିବାରେ ଛାତ୍ରଛାତ୍ରୀ ଓ ଗ୍ରାମବାସୀ ହନ୍ତସନ୍ତ ହେଉଛନ୍ତି। ଯାମପାଣି ଠାରୁ ବିରୋମାଲକୁ ସଂଯୋଗ କରୁଥିବା ଏହି PMGSY ରାସ୍ତା ଉପରେ ଅନେକ ଗ୍ରାମର ଲୋକ ନିର୍ଭର କରୁଛନ୍ତି। କିନ୍ତୁ ରାସ୍ତାର ଏକ କିଲୋମିଟରରୁ ଅଧିକ ଅଞ୍ଚଳ ଖରାପ ହୋଇଥିବାରୁ ଯାତାୟାତ ବାଧାପ୍ରାପ୍ତ ହେଉଛି। ବର୍ଷା ଦିନରେ ସମସ୍ୟା ଆହୁରି ବଢ଼ିଯାଉଛି। ରାସ୍ତାରେ ଖାଲଖମା ଓ ଅସମତଳ ଅବସ୍ଥା ଯୋଗୁଁ ଦୁଇଚକିଆ ଓ ଚାରିଚକିଆ ଯାନ ଚଳାଚଳ କରିବା କଷ୍ଟକର ହୋଇପଡ଼ିଛି। ସବୁଠାରୁ ଅଧିକ ସମସ୍ୟା ହେଉଛି ଜରୁରୀ ସମୟରେ ରୋଗୀଙ୍କୁ ହସ୍ପିଟାଲ ନେବାରେ। ରାସ୍ତାର ଅବସ୍ଥା ଖରାପ ଥିବାରୁ ଆମ୍ବୁଲାନ୍ସ ସମେତ ଅନ୍ୟ ଯାନବାହନ ଯାତାୟାତରେ ଅସୁବିଧା ହେଉଛି। ଫଳରେ ରୋଗୀ ଓ ସେମାନଙ୍କ ପରିବାର ଲୋକଙ୍କୁ ଚିନ୍ତାରେ ପଡ଼ିବାକୁ ପଡ଼ୁଛି। ଏହାସହିତ ସ୍କୁଲ ଓ ହଷ୍ଟେଲ ଯିବାଆସିବା କରୁଥିବା ଛାତ୍ରଛାତ୍ରୀମାନେ ମଧ୍ୟ ଦୈନନ୍ଦିନ ଭାବେ ଯାତାୟାତ ସମସ୍ୟାର ସମ୍ମୁଖୀନ ହେଉଛନ୍ତି। ରାସ୍ତାର ଏଭଳି ଅବସ୍ଥାକୁ ନେଇ ପୋଡ଼ଶୀ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତୁରନ୍ତ ରାସ୍ତାର ମରାମତି କରି ଯାତାୟାତ ବ୍ୟବସ୍ଥାକୁ ସ୍ୱାଭାବିକ କରିବା ପାଇଁ ସେମାନେ ସମ୍ପୃକ୍ତ ବିଭାଗ ଓ ପ୍ରଶାସନ ନିକଟରେ ଦାବି କରିଛନ୍ତି। ତେବେ ଗ୍ରାମବାସୀ, ଛାତ୍ରଛାତ୍ରୀ ଓ ରୋଗୀଙ୍କ ଯାତାୟାତ ସମସ୍ୟାକୁ ଦୃଷ୍ଟିରେ ରଖି ଯାମପାଣି–ବିରୋମାଲ PMGSY ରାସ୍ତାର ଶୀଘ୍ର ମରାମତି କେବେ ହେବ, ତାହାକୁ ନେଇ ଏବେ ସମସ୍ତଙ୍କ ନଜର ପ୍ରଶାସନ ଉପରେ।