Web News

ତାଳଚେର: ତାଳଚେର ଅଞ୍ଚଳର ଜଗନ୍ନାଥ ମାଇନ୍ସରେ କୋଇଲା ଉତ୍ତୋଳନକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିଛି। ସ୍ଥାନୀୟ ମହଲରେ ଅଭିଯୋଗ ହେଉଛି ଯେ, ଅନୁମୋଦିତ ସୀମା (ସିଲିଂ) ଠାରୁ ଅଧିକ ପରିମାଣରେ କୋଇଲା ଉତ୍ତୋଳନ କରାଯାଉଛି। ଏଥିସହ କୋଟି କୋଟି ଟଙ୍କା ମୂଲ୍ୟର କୋଇଲା ନିଆଁ ଲାଗି ନଷ୍ଟ ହେଉଥିବା ନେଇ ମଧ୍ୟ ଚର୍ଚ୍ଚା ହେଉଛି। ଅଭିଯୋଗକାରୀଙ୍କ ପ୍ରଶ୍ନ, ଯଦି ନିର୍ଦ୍ଧାରିତ ସୀମା ନାହିଁ କିମ୍ବା ଉତ୍ତୋଳନରେ କଟକଣା ରହିଛି, ତେବେ ଏତେ ପରିମାଣରେ କୋଇଲା ଉତ୍ତୋଳନ କେଉଁ ଆଧାରରେ କରାଯାଉଛି? ଏଥିପ୍ରତି ଏମ୍‌ସିଏଲ୍ କର୍ତ୍ତୃପକ୍ଷଙ୍କ ନଜର ପଡ଼ୁନାହିଁ, ନା କି ସବୁକିଛି ଜାଣିଶୁଣି ନିରବତା ଅବଲମ୍ବନ କରାଯାଉଛି? ଏଭଳି ପ୍ରଶ୍ନ ବୁଦ୍ଧିଜୀବୀ ଓ ସ୍ଥାନୀୟ ମହଲରେ ଉଠୁଥିବା ଚର୍ଚ୍ଚାର ବିଷୟ ପାଲଟିଛି।

ବଅଁରପାଳ: ପବିତ୍ର ସ୍ନାନ ପୂର୍ଣ୍ଣିମା ଅବସରରେ ବଅଁରପାଳସ୍ଥିତ ଶ୍ରୀଜଗନ୍ନାଥ ମନ୍ଦିରରେ ଆଧ୍ୟାତ୍ମିକ ପରିବେଶ ଓ ଭକ୍ତିର ଅନନ୍ୟ ଦୃଶ୍ୟ ପରିଲକ୍ଷିତ ହୋଇଥିଲା। ପ୍ରଭୁ ଶ୍ରୀଜଗନ୍ନାଥ, ବଡ଼ଭାଇ ବଳଭଦ୍ର, ଦେବୀ ସୁଭଦ୍ରା ଓ ସୁଦର୍ଶନଙ୍କ ଚତୁର୍ଧା ବିଗ୍ରହଙ୍କ ପବିତ୍ର ସ୍ନାନ ନୀତି ବୈଦିକ ରୀତିନୀତି ଓ ପାରମ୍ପରିକ ବିଧିବିଧାନ ଅନୁଯାୟୀ ଶ୍ରଦ୍ଧାର ସହ ସମ୍ପନ୍ନ କରାଯାଇଥିଲା। ସ୍ନାନ ପୂର୍ଣ୍ଣିମାର ପବିତ୍ର ଦର୍ଶନ ପାଇଁ ସକାଳୁ ହିଁ ମନ୍ଦିର ପରିସରରେ ହଜାର ହଜାର ଭକ୍ତଙ୍କ ସମାଗମ ହୋଇଥିଲା। ଭକ୍ତମାନେ ଶ୍ରୀବିଗ୍ରହଙ୍କ ଦର୍ଶନ କରି ପ୍ରଭୁଙ୍କ ନିକଟରେ ସମସ୍ତଙ୍କ ସୁଖ, ଶାନ୍ତି, ସମୃଦ୍ଧି ଓ ମଙ୍ଗଳ କାମନା କରିଥିଲେ। ହରିବୋଲ, ଜୟ ଜଗନ୍ନାଥ ଧ୍ୱନି ଓ ଭଜନ-କୀର୍ତ୍ତନରେ ସମଗ୍ର ମନ୍ଦିର ପରିସର ଭକ୍ତିମୟ ପରିବେଶରେ ମୁଖରିତ ହୋଇଉଠିଥିଲା। ମନ୍ଦିର ପରିଚାଳନା କମିଟି ପକ୍ଷରୁ ସ୍ନାନ ପୂର୍ଣ୍ଣିମାର ସମସ୍ତ ନୀତିକାନ୍ତି ସୁଚାରୁ ରୂପେ ସମ୍ପାଦନ କରାଯାଇଥିବାବେଳେ ଭକ୍ତମାନଙ୍କ ସୁରକ୍ଷା, ଶୃଙ୍ଖଳିତ ଦର୍ଶନ ଓ ଆବଶ୍ୟକ ସୁବିଧା ପାଇଁ ସ୍ୱେଚ୍ଛାସେବକ ଏବଂ କମିଟି ସଦସ୍ୟମାନେ ସକ୍ରିୟ ଭାବେ ଦାୟିତ୍ୱ ତୁଲାଇଥିଲେ। ସ୍ନାନ ପୂର୍ଣ୍ଣିମା ପରେ ଅନସର ନୀତି ଆରମ୍ଭ ହେବା ସହିତ ଭକ୍ତମାନେ ଆସନ୍ତା ରଥଯାତ୍ରାକୁ ନେଇ ଉତ୍ସାହ ଓ ଉତ୍କଣ୍ଠା ପ୍ରକାଶ କରିଥିଲେ। ବଅଁରପାଳ ଶ୍ରୀଜଗନ୍ନାଥ ମନ୍ଦିରରେ ଏହି ପବିତ୍ର ଉତ୍ସବ ଭକ୍ତି, ଶ୍ରଦ୍ଧା ଓ ଆଧ୍ୟାତ୍ମିକ ଉଲ୍ଲାସର ପରିବେଶ ମଧ୍ୟରେ ସଫଳତାର ସହ ସମ୍ପନ୍ନ ହୋଇଥିଲା।

ଭଞ୍ଜନଗର ଅଞ୍ଚଳରେ ବେଆଇନ ଭାବେ ଓଭରଲୋଡ୍ ବାଲି ପରିବହନ ଦିନକୁ ଦିନ ବଢ଼ିବାରେ ଲାଗିଛି। ହାଇୱାରେ କ୍ଷମତାଠାରୁ ଅଧିକ ବାଲି ବୋଝେଇ ନୀତି ଦିନିଆ ରାସ୍ତାରେ ଚଳାଚଳ କରୁଥିବା ଅଭିଯୋଗ ସାମ୍ନାକୁ ଆସିଛି। ଏହା ଫଳରେ ସଡ଼କ ସୁରକ୍ଷା ପ୍ରତି ବିପଦ ସୃଷ୍ଟି ହେଉଥିବା ସହ ସରକାରଙ୍କ ରାଜସ୍ୱ କ୍ଷତିଗ୍ରସ୍ତ ହେଉଥିବା ଆଶଙ୍କା ମଧ୍ୟ ପ୍ରକାଶ ପାଉଛି। ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ବାଲି ମାଫିଆମାନେ ଖୋଲାଖୋଲି ଓଭରଲୋଡ୍ ଗାଡ଼ି ଚଳାଚଳ କରୁଥିବା ସତ୍ତ୍ୱେ ସମ୍ପୃକ୍ତ ବିଭାଗ ପକ୍ଷରୁ ସେଭଳି କୌଣସି ଦୃଶ୍ୟମାନ କାର୍ଯ୍ୟାନୁଷ୍ଠାନ ହେଉନାହିଁ। ଫଳରେ ସାଧାରଣରେ ପ୍ରଶ୍ନ ଉଠୁଛି—କାହା ସ୍ୱାର୍ଥରେ ଏହି ବେଧଡ଼କ ବାଲି ଚାଲାଣ ଚାଲିଛି? ଏପରି ପରିସ୍ଥିତିରେ ପରିବହନ ବିଭାଗ (RTO)ର ଭୂମିକାକୁ ନେଇ ମଧ୍ୟ ପ୍ରଶ୍ନ ଉଠିଛି। ଅଭିଯୋଗ ଅନୁଯାୟୀ, ନୀତି ଦିନିଆ ଓଭରଲୋଡ୍ ଗାଡ଼ି ଚଳାଚଳ କରୁଥିଲେ ମଧ୍ୟ ବିଭାଗ ପକ୍ଷରୁ ପ୍ରଭାବଶାଳୀ ଯାଞ୍ଚ କିମ୍ବା କଡ଼ା ପଦକ୍ଷେପ ନେଉଥିବା ଦେଖିବାକୁ ମିଳୁନାହିଁ। ଏହାକୁ ନେଇ ଲୋକମାନଙ୍କ ମଧ୍ୟରେ ପରିବହନ ବିଭାଗ (RTO) ନିଘୋଡ଼ ନିଦରେ ଶୋଇ ପଡ଼ିଛି କି? ବୋଲି ଚର୍ଚ୍ଚା ଜୋର ଧରିଛି। ସ୍ଥାନୀୟ ବୁଦ୍ଧିଜୀବୀ ଓ ସାଧାରଣ ଲୋକ ଦାବି କରିଛନ୍ତି ଯେ, ଜିଲ୍ଲା ପ୍ରଶାସନ, ଖଣି ବିଭାଗ ଓ ପରିବହନ ବିଭାଗ ଏହି ଘଟଣାର ନିରପେକ୍ଷ ତଦନ୍ତ କରି ଯଦି ବେଆଇନ ଓଭରଲୋଡ୍ ପରିବହନ ହେଉଥାଏ, ତେବେ ଦୋଷୀଙ୍କ ବିରୋଧରେ କଡ଼ା ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ। ଏଥିସହ ନିୟମିତ ଯାଞ୍ଚ କରି ଏଭଳି ବେଆଇନ କାରବାର ଉପରେ ରୋକ ଲଗାଇବାକୁ ସାଧାରଣରେ ଦାବି ହେଉଛି।

ସରକାରୀ ଶିଳ୍ପ ତାଲିମ ପ୍ରତିଷ୍ଠାନ (ITI), ଭୁବନେଶ୍ୱର ୧୯୮୫ ମସିହାରେ ସ୍ଥାପିତ ହୋଇଥିଲା। ସ୍ଥାପନା ପରଠାରୁ ଏହି ପ୍ରତିଷ୍ଠାନ ୪୧ ବର୍ଷରୁ ଅଧିକ ସମୟ ଧରି ଓଡ଼ିଶାର ଛାତ୍ରଛାତ୍ରୀମାନଙ୍କୁ ବିଭିନ୍ନ ରୋଜଗାରମୂଳକ ଦକ୍ଷତା ପ୍ରଦାନ କରି ସେମାନଙ୍କର ଜୀବନଯାପନର ମାନ ଉନ୍ନତ କରିବାରେ ସଫଳତାର ସହ କାର୍ଯ୍ୟ କରୁଛି। ପ୍ରତିଷ୍ଠାନର ୧୬ଟି ବ୍ୟବସାୟ (Trades) NCVT ସହ ଅନୁବନ୍ଧିତ। ବୈଷୟିକ ଶିକ୍ଷା ସହିତ ଆମେ ଛାତ୍ରଛାତ୍ରୀମାନଙ୍କ ମଧ୍ୟରେ କର୍ମନିଷ୍ଠା, ସକାରାତ୍ମକ କାର୍ଯ୍ୟ ମନୋଭାବ ଏବଂ ସୁସ୍ଥ ଓ ଉଦ୍ଦେଶ୍ୟମୂଳକ ଜୀବନଧାରାର ମୂଲ୍ୟବୋଧ ଗଢ଼ି ତୋଳିବାକୁ ଗୁରୁତ୍ୱ ଦେଇଥାଉ। ଏହି ସମସ୍ତ ପାଠ୍ୟକ୍ରମ ଛାତ୍ରୀମାନଙ୍କ ପାଇଁ ସମ୍ପୂର୍ଣ୍ଣ ମାଗଣା। ସେମାନଙ୍କୁ ସମ୍ପୂର୍ଣ୍ଣ ପାଠ୍ୟକ୍ରମ ପାଇଁ କେବଳ ₹୨୦୦ ଦେବାକୁ ପଡ଼େ। ରେଳବାଇ ଏବଂ ଅନ୍ୟାନ୍ୟ ସରକାରୀ ସାର୍ବଜନିକ ଉଦ୍ୟୋଗ (PSUs)ରେ ନିଯୁକ୍ତି ସୁଯୋଗ ବୃଦ୍ଧି ପାଇଁ ଆମର ବିଭିନ୍ନ ପ୍ରମୁଖ ପ୍ଲେସମେଣ୍ଟ-ଆଧାରିତ କୋଚିଂ ପ୍ରତିଷ୍ଠାନ ସହ ଟାଇ-ଅପ୍ (Tie-up) ରହିଛି। ପ୍ରଶିକ୍ଷଣ ସମୟରେ ଶିଳ୍ପ କ୍ଷେତ୍ରର ବୈଷୟିକ ଦକ୍ଷତା ଆଦାନ-ପ୍ରଦାନ ପାଇଁ ୩୦ଟି ସକ୍ରିୟ ଶିଳ୍ପ ସଂସ୍ଥା ସହ ଆମର ବୁଝାମଣା ପତ୍ର (MoU) ସ୍ୱାକ୍ଷରିତ ହୋଇଛି। ସରକାରଙ୍କ ବିଭିନ୍ନ ଯୋଜନା ମାଧ୍ୟମରେ ଉଭୟ ଛାତ୍ର ଓ ଛାତ୍ରୀଙ୍କୁ ବୃତ୍ତି (Stipend) ପ୍ରଦାନ କରାଯାଉଛି। ବହୁରାଷ୍ଟ୍ରୀୟ କମ୍ପାନୀଗୁଡ଼ିକରେ ନିଯୁକ୍ତି ସୁଯୋଗ ବୃଦ୍ଧି ପାଇଁ ଇଂରାଜୀ ଯୋଗାଯୋଗ ଦକ୍ଷତା (English Communication Skills)ର ସ୍ୱତନ୍ତ୍ର ପ୍ରଶିକ୍ଷଣ ମଧ୍ୟ ଦିଆଯାଉଛି। କ୍ରୀଡ଼ା, ବିତର୍କ, ଛାତ୍ର ସେମିନାର, TATA STRIVE ଦ୍ୱାରା ଜୀବନ କୌଶଳ (Life Skills) ପ୍ରଶିକ୍ଷଣ, ସାଂସ୍କୃତିକ କାର୍ଯ୍ୟକ୍ରମ ଏବଂ ସାମାଜିକ ସେବାମୂଳକ କାର୍ଯ୍ୟକଳାପ ମାଧ୍ୟମରେ ଛାତ୍ରଛାତ୍ରୀମାନଙ୍କ ସର୍ବାଙ୍ଗୀଣ ବିକାଶ ଓ ଆନ୍ତର୍ବ୍ୟକ୍ତିକ ଦକ୍ଷତାର ବିକାଶ ଉପରେ ବିଶେଷ ଗୁରୁତ୍ୱ ଦିଆଯାଉଛି। ଏହା ସହିତ, ଛାତ୍ରଛାତ୍ରୀମାନଙ୍କୁ ବାସ୍ତବ ଶିଳ୍ପ ପରିବେଶ ସହ ପରିଚିତ କରାଇବା ପାଇଁ ନିୟମିତ ଭାବରେ ବିଭିନ୍ନ ଶିଳ୍ପ ପ୍ରତିଷ୍ଠାନକୁ ଇଣ୍ଡଷ୍ଟ୍ରି ଏକ୍ସପୋଜର୍ ଭିଜିଟ୍ (Industry Exposure Visit) ଆୟୋଜନ କରାଯାଉଛି।

ଯାଜପୁର: ଯାଜପୁର ରୋଡ ନିକଟସ୍ଥ ପନାସିଆ ଗ୍ରାମର ଯୁବତୀ ସୁଭଦ୍ରା ମହାରଣା ଦୀର୍ଘ ୨୫ ବର୍ଷ ଧରି ଶଯ୍ୟାଶାୟୀ ଅବସ୍ଥାରେ ଜୀବନ ବିତାଉଛନ୍ତି। ତାଙ୍କ ସେବାଶୁଶ୍ରୂଷାର ସମସ୍ତ ଦାୟିତ୍ୱ ଏକାକୀ ବହନ କରୁଛନ୍ତି ତାଙ୍କ ମା' ଲତାଞ୍ଜଳି ମହାରଣା। ପରିବାର ସୂଚନା ଅନୁସାରେ, ସୁଭଦ୍ରାଙ୍କ ପିତା ଜନ୍ମେଜୟ ମହାରଣା ଝିଅର ବୟସ ପ୍ରାୟ ୧୦ ବର୍ଷ ଥିବାବେଳେ ହୃଦଘାତରେ ପରଲୋକ ଗମନ କରିଥିଲେ। ସେହିଦିନଠାରୁ ପରିବାରର ସମସ୍ତ ଦାୟିତ୍ୱ ଲତାଞ୍ଜଳିଙ୍କ ଉପରେ ପଡ଼ିଥିଲା। ସେ ଝିଅର ପାଠପଢ଼ାଠାରୁ ଆରମ୍ଭ କରି ଦୈନନ୍ଦିନ ସେବା, ଖାଦ୍ୟ ଖୁଆଇବା ଓ ଅନ୍ୟାନ୍ୟ ସମସ୍ତ କାର୍ଯ୍ୟ ନିଜେ କରିଆସୁଛନ୍ତି। ସୁଭଦ୍ରା ସରକାରଙ୍କ ପକ୍ଷରୁ ଦିବ୍ୟାଙ୍ଗ ଭତ୍ତା ପାଉଥିଲେ ମଧ୍ୟ ପରିବାର ପାଖରେ ବସବାସ ପାଇଁ ପକ୍କା ଘର ନାହିଁ। ଏନେଇ ଲତାଞ୍ଜଳି ବାରମ୍ବାର ସରକାରୀ କାର୍ଯ୍ୟାଳୟରେ ଆବେଦନ କରିଥିବା ସତ୍ତ୍ୱେ ଏପର୍ଯ୍ୟନ୍ତ କୌଣସି ସହାୟତା ମିଳିନଥିବା ଅଭିଯୋଗ କରିଛନ୍ତି। ସ୍ରିଷ୍ଟି ନ୍ୟୁଜ୍ ଟିମ୍ ଘଟଣାସ୍ଥଳକୁ ଯାଇଥିବା ବେଳେ ସୁଭଦ୍ରାଙ୍କ ମା' ସରକାରଙ୍କୁ ଆକୁଳ ନିବେଦନ କରି କହିଛନ୍ତି ଯେ, ତାଙ୍କ ଝିଅ ପାଇଁ ଏକ ବାସଗୃହ ଏବଂ ଆବଶ୍ୟକ ସରକାରୀ ସହାୟତା ଯୋଗାଇ ଦିଆଯାଉ, ଯାହାଦ୍ୱାରା ସେମାନଙ୍କ ଜୀବନ କିଛିଟା ସହଜ ହୋଇପାରିବ। ସ୍ଥାନୀୟ ଲୋକମାନେ ମଧ୍ୟ ଏହି ପରିବାର ପ୍ରତି ସରକାର ଓ ପ୍ରଶାସନ ସମ୍ବେଦନଶୀଳ ହୋଇ ଯଥାଶୀଘ୍ର ସହାୟତା ଯୋଗାଇବାକୁ ଦାବି କରିଛନ୍ତି।

ନୟାଗଡ ଜିଲ୍ଲା ନୂଆଗାଁ ବ୍ଲକ ଉଦୟପୁର ପଂଚାୟତ ଅନ୍ତର୍ଗତ ଜୟପଲ୍ଲୀ ଗ୍ରାମଠାରୁ ସିଙ୍ଗପୁର ଗ୍ରାମ ପର୍ଯ୍ୟନ୍ତ ସିମେଣ୍ଟ କଂକ୍ରିଟ ରାସ୍ତା ନଥିବାରୁ ଜନସାଧାରଣ ଲୋକ ଯାତାୟତ କରିବାରେ ବହୁତ ଅସୁବିଧା ର ସମୁଖୀନ ହେଉଛନ୍ତି l ସ୍ଥାନୀୟ ଲୋକଙ୍କ କହିବା ଅନୁସାରେ ପଂଚାୟତରେ ଅଭିଯୋଗ ଜଣାଇଥିଲେ ମଧ୍ୟ ପଂଚାୟତ କତୃପକ୍ଷ କଥାକୁ ଏଡ଼େଇ ଦେଇଥିବା ସ୍ଥାନୀୟ ଲୋକେ କହିଛନ୍ତି l ଏନେଇ ବ୍ଲକ ପ୍ରଶାସନଙ୍କ ନିକଟରେ ଅଭିଯୋଗ କରାଯାଇଥିଲେ ମଧ୍ୟ କୌଣସି ସକାରାତ୍ମକ ପଦକ୍ଷେପ କିମ୍ବା ସ୍ପଷ୍ଟ ଉତ୍ତର ମିଳିନଥିବାରୁ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି l ସ୍ଥାନୀୟ ଲୋକେ ସିମେଣ୍ଟ କଂକ୍ରିଟ ରାସ୍ତା ନିର୍ମାଣ କାର୍ଯ୍ୟ ଆରମ୍ଭ କରିବାକୁ ଜିଲ୍ଲା ପ୍ରଶାସନଙ୍କ ନିକଟରେ ଦାବି କରିଛନ୍ତି

ଭୁବନେଶ୍ୱର: ରାଜଧାନୀ ଭୁବନେଶ୍ୱରର ଆଇଆରସି ଭିଲେଜ୍ ହାଇସ୍କୁଲ ପରିସରରେ ସୋମବାର ଛାତ୍ରଛାତ୍ରୀଙ୍କ ସୁରକ୍ଷିତ ଓ ସୁବିଧାଜନକ ଯାତାୟାତ ପାଇଁ ନୂତନ ରାସ୍ତା ନିର୍ମାଣ କାର୍ଯ୍ୟର ଶୁଭାରମ୍ଭ କରାଯାଇଛି। ଏହି ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ ଉତ୍ସବ ଉତ୍ସାହର ସହ ଅନୁଷ୍ଠିତ ହୋଇଥିଲା। କାର୍ଯ୍ୟକ୍ରମରେ ଭୁବନେଶ୍ୱର ମହାନଗର ନିଗମ (BMC)ର ମେୟର ଶ୍ରୀମତୀ ସୁଲୋଚନା ଦାସ ମୁଖ୍ୟ ଅତିଥି ଭାବେ ଯୋଗଦେଇଥିବାବେଳେ, ଉତ୍ତର ଭୁବନେଶ୍ୱରର ବିଧାୟକ ଶ୍ରୀ ସୁଶାନ୍ତ କୁମାର ରାଉତ ସମ୍ମାନିତ ଅତିଥି ଭାବେ ଉପସ୍ଥିତ ରହି ପ୍ରକଳ୍ପର ଶୁଭାରମ୍ଭ କରିଥିଲେ। ଏହି ଅବସରରେ ୧୫ ନମ୍ବର ୱାର୍ଡର କର୍ପୋରେଟର ଶ୍ରୀମତୀ ମାନସୀ ରାଣୀ ସୁନ୍ଦରରାୟ, ବିଦ୍ୟାଳୟର ପ୍ରଧାନଶିକ୍ଷକ, ଶିକ୍ଷକ-ଶିକ୍ଷୟିତ୍ରୀ, କର୍ମଚାରୀ, ଅଭିଭାବକ ଏବଂ ସ୍ଥାନୀୟ ବାସିନ୍ଦାମାନେ ଉପସ୍ଥିତ ଥିଲେ। ଅତିଥିମାନେ ନିଜ ବକ୍ତବ୍ୟରେ କହିଥିଲେ ଯେ, ଏହି ନୂତନ ରାସ୍ତା ନିର୍ମାଣ ଦ୍ୱାରା ବିଦ୍ୟାଳୟକୁ ଆସୁଥିବା ଛାତ୍ରଛାତ୍ରୀଙ୍କ ଯାତାୟାତ ଅଧିକ ସୁରକ୍ଷିତ ଓ ସୁଗମ ହେବ। ସେଥିସହ ସହରୀ ଭିତ୍ତିଭୂମିର ବିକାଶ ଏବଂ ଶିକ୍ଷାନୁଷ୍ଠାନଗୁଡ଼ିକର ମୌଳିକ ସୁବିଧା ବୃଦ୍ଧି ପାଇଁ ବିଏମସି ଓ ସରକାର ପକ୍ଷରୁ ଏଭଳି ଉନ୍ନୟନମୂଳକ କାର୍ଯ୍ୟ ଜାରି ରହିବ ବୋଲି ସେମାନେ ପ୍ରକାଶ କରିଥିଲେ। ସ୍ଥାନୀୟ ବାସିନ୍ଦା ଓ ବିଦ୍ୟାଳୟ କର୍ତ୍ତୃପକ୍ଷ ଏହି ପଦକ୍ଷେପକୁ ସ୍ୱାଗତ କରିବା ସହ ଏହା ଅଞ୍ଚଳର ସାମଗ୍ରିକ ବିକାଶ ଏବଂ ଶିକ୍ଷା ପରିବେଶକୁ ଆହୁରି ସୁଦୃଢ଼ କରିବ ବୋଲି ମତ ପ୍ରକାଶ କରିଛନ୍ତି।

ଭୁବନେଶ୍ୱର/କଳାହାଣ୍ଡି, ଜୁନ ୨୯: ନିୟମଗିରି ସୁରକ୍ଷା ସମିତିର ପ୍ରମୁଖ ନେତା ଲଦ ସିକକାଙ୍କ ନାମରେ ସଙ୍ଗୀନ ଅଭିଯୋଗ ଉଠିଥିବା ବେଳେ, ଗତ ୧୫ ମାର୍ଚ୍ଚ ୨୦୨୬ରେ ଲାଞ୍ଜିଗଡ଼ ମୁନସିଫ କୋର୍ଟ ତାଙ୍କୁ ପଳାତକ ଘୋଷଣା କରିବା ସହ ତାଙ୍କ ସମ୍ପତ୍ତି ଜବତ କରିବାକୁ ଆଦେଶ ଜାରି କରିଛନ୍ତି। ଏହି ଆଦେଶ କଲ୍ୟାଣସିଂହପୁର ଥାନାର ଭାରପ୍ରାପ୍ତ ଅଧିକାରୀଙ୍କୁ ପ୍ରେରଣ କରାଯାଇଛି। ଏହି ଘଟଣାକୁ ନେଇ ଓକିଲ, ମାନବିକ ଅଧିକାର ସଂଗଠନ, ନାଗରିକ ସମାଜ ଏବଂ ବିଭିନ୍ନ ରାଜନୈତିକ ଗୋଷ୍ଠୀରେ ଚିନ୍ତା ଓ ଉଦ୍ବେଗ ପ୍ରକାଶ ପାଇଛି। ଲଦ ସିକକା ଡଙ୍ଗରିଆ କନ୍ଧ ଜନଜାତିର ଏକ ସଦସ୍ୟ, ଯାହାକି ଓଡ଼ିଶା ସରକାରଙ୍କ ଦ୍ୱାରା ଚିହ୍ନିତ ବିଶେଷ ଦୁର୍ବଳ ଆଦିବାସୀ ଗୋଷ୍ଠୀ (PVTG) ଭିତରେ ଅନ୍ତର୍ଭୁକ୍ତ। ସେ ନିୟମଗିରି ପର୍ବତକୁ ବକ୍ସାଇଟ ଖଣି ଖନନରୁ ସୁରକ୍ଷା କରିବା ପାଇଁ ଚାଲିଥିବା ଦୀର୍ଘଦିନର ଜନଆନ୍ଦୋଳନର ଏକ ଅଗ୍ରଣୀ ନେତା । ଦଶନ୍ଧି ଧରି ଚାଲିଥିବା ଏହି ଆନ୍ଦୋଳନ ତାଙ୍କୁ ଓଡ଼ିଶା ସହିତ ସମଗ୍ର ଦେଶରେ ପରିଚିତ କରାଇଛି। ଜଳ, ଜଙ୍ଗଲ ଓ ଜମିର ସୁରକ୍ଷା ପାଇଁ ଚାଲିଥିବା ବିଭିନ୍ନ ଆନ୍ଦୋଳନରେ ସେ ସଂହତି ଜଣେଇବା ସହିତ ଭୁବନେଶ୍ୱର ସମେତ ରାଜ୍ୟର ବିଭିନ୍ନ ସ୍ଥାନରେ ସଭାସମ୍ମେଳନରେ ଭାଗ ନେଇଆସୁଥିବା ସୂଚନା ମିଳିଛି। ଏହା ସହିତ ସେ ନିଜ ସମୁଦାୟର ମଙ୍ଗଳ ନିମନ୍ତେ କଳାହାଣ୍ଡି ଓ ରାୟଗଡ଼ା ଜିଲ୍ଲା ପ୍ରଶାସନ ସହ ସମ୍ପର୍କ ରଖିଆସୁଛନ୍ତି। ବିଶେଷଜ୍ଞମାନଙ୍କ ମତାନୁସାରେ, ବିକାଶ ନାମରେ ଆଦିବାସୀଙ୍କ ଜୀବନଜୀବିକା ଉପରେ ପଡ଼ୁଥିବା ପ୍ରଭାବର ଏହା ଏକ ଉଦାହରଣ। ଲଦ ସିକକାଙ୍କୁ ପଳାତକ ଘୋଷଣା କରିବା ନେଇ ବୁଦ୍ଧିଜୀବୀ ମହଳରେ ତୀବ୍ର ଅସନ୍ତୋଷ ଦେଖାଯାଇଛି। ଏହି ଘଟଣା ଆଗାମୀ ଦିନରେ ରାଜ୍ୟର ଆଦିବାସୀ ଆନ୍ଦୋଳନ ଓ ମାନବାଧିକାର ପ୍ରସଙ୍ଗରେ ନୂଆ ଚର୍ଚ୍ଚାକୁ ଜନ୍ମ ଦେଇପାରେ।

କୋକସରା/କଳାହାଣ୍ଡି: କଳାହାଣ୍ଡି ଜିଲ୍ଲା କୋକସରା ବ୍ଲକ ଅନ୍ତର୍ଗତ ଡାଲଗୁମା ଧାନମଣ୍ଡି ନିକଟରୁ ଶୁକଦେବ ଧରୁଆଙ୍କ ମୃତଦେହ ଉଦ୍ଧାର ହୋଇଥିବା ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ଘଟଣାର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନଥିବାବେଳେ, ଏହା ହତ୍ୟା ନା ଆତ୍ମହତ୍ୟା ତାହାକୁ ନେଇ ବିଭିନ୍ନ ଚର୍ଚ୍ଚା ଚାଲିଛି। ସୂଚନା ପାଇ କୋକସରା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ଘଟଣାର ତଦନ୍ତ ଆରମ୍ଭ କରିଛି। ମୃତ୍ୟୁର ପ୍ରକୃତ କାରଣ ପୋଷ୍ଟମର୍ଟମ ରିପୋର୍ଟ ଓ ପୋଲିସ ତଦନ୍ତ ପରେ ସ୍ପଷ୍ଟ ହେବ ବୋଲି ଜଣାପଡ଼ିଛି। ଘଟଣାକୁ ନେଇ ପୋଲିସ ବିଭିନ୍ନ ଦିଗରୁ ତଦନ୍ତ ଜାରି ରଖିଛି।

ଲକ୍ଷାଧିକ ଭକ୍ତଙ୍କ ସମାଗମ | ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ନେମାଳ:ପବିତ୍ର ଦେବସ୍ନାନ ପୂର୍ଣ୍ଣିମାରେ ଭକ୍ତ ଭଗବାନଙ୍କ ଅପୂର୍ବ ମିଳନ | ଭକ୍ତଙ୍କୁ ଦେଖିବା ପାଇଁ ଭଗବାନ ବ୍ୟାକୁଳ । କଳିଯୁଗର ଶ୍ରେଷ୍ଠ ଭକ୍ତ ଭବିଷ୍ୟ ମାଳିକା ରଚୟିତା ଶ୍ରୀ ଶ୍ରୀ ଅଚ୍ୟୁତାନନ୍ଦ ଦାସଙ୍କ ସାଧନା ପୀଠ ନେମାଳ ଠାରେ ଦେବସ୍ନାନ ପୂର୍ଣ୍ଣିମା ମହା ଆଡମ୍ବର ସହକାରେ ପାଳନ ହେଉଅଛି | ଏହି ଉପଲକ୍ଷେ ଏଠାରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଛି । ଲୋକକଥା ଅନୁସାରେ ଏହି ଦିନ ସ୍ୱୟଂ ଜଗନ୍ନାଥ ମହାପ୍ରଭୂ ମାଟି ଗଦା ସାଆନ୍ତ ଅଚ୍ୟୁତଙ୍କ ଶରୀରରେ ଅବତୀର୍ଣ୍ଣ ହୋଇ ଭକ୍ତ ମାନଙ୍କୁ ଦର୍ଶନ ଦିଅନ୍ତି। ଲକ୍ଷାଧିକ ଭକ୍ତଙ୍କ ସମାଗମ ନିମନ୍ତେ ମନ୍ଦିର କମିଟି ଟ୍ରଷ୍ଟ ବୋର୍ଡ ଓ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି | ପ୍ରାତଃରୁ ବିଭିନ୍ନ ନୀତି କାନ୍ତି ମଧ୍ୟରେ ଭକ୍ତ ମାନେ ମହାପୁରୁଷଙ୍କୁ ଦର୍ଶନ କରୁଛନ୍ତି | ରାଜ୍ୟର ବିଭିନ୍ନ ପ୍ରାନ୍ତରୁ ଶ୍ରଦ୍ଧାଳୁ ଓ ସାଧୁ ସନ୍ଥ ମାନଙ୍କ ଭିଡ଼ ଲାଗି ରହିଛି | ଏହି ଦେବସ୍ନାନ ପୂର୍ଣ୍ଣିମାକୁ ସୁଚାର ରୁପରେ ପରିଚାଳନା ପାଇଁ କଟକ ଜିଲ୍ଳା ପୋଲିସ୍ ପକ୍ଷରୁ ୧୩ ପ୍ଲାଟୁନ୍ ଫୋର୍ସ ସହ ଶାନ୍ତି କମିଟି ସଦସ୍ୟ ମାନେ ଭିଡ଼ ନିୟନ୍ତ୍ରଣ କରିବା ସହ ଭକ୍ତ ମାନଙ୍କୁ ସାହଯ୍ୟ କରୁଛନ୍ତି ।

ତାଳଚେର: ତାଳଚେର ବ୍ଲକ ଅନ୍ତର୍ଗତ ସାଉଥ୍ ବଲଣ୍ଡା ନିକଟସ୍ଥ ଏମ୍‌ସିଏଲ୍‌ର ସେଣ୍ଟ୍ରାଲ ୱର୍କଶପ୍‌ରେ ପ୍ରତିଦିନ ଶହ ଶହ ଭାରୀ ଯାନବାହନର ମରାମତି ଓ ରକ୍ଷଣାବେକ୍ଷଣ କାର୍ଯ୍ୟ ସମ୍ପାଦିତ ହେଉଛି। ଏହି କାରଖାନାରେ ପ୍ରାୟ ୫୦୦ରୁ ଅଧିକ କର୍ମଚାରୀ ନିୟୋଜିତ ଥିବା ସତ୍ତ୍ୱେ ସେମାନଙ୍କ ପାଇଁ ଆବଶ୍ୟକ ମୌଳିକ ସୁବିଧାର ଅଭାବ ଥିବା ଅଭିଯୋଗ ହେଉଛି। କର୍ମଚାରୀଙ୍କ କହିବା ଅନୁଯାୟୀ, କାର୍ଯ୍ୟସ୍ଥଳରେ ବିଶ୍ରାମ ଗୃହ, ଆବାସ (କ୍ୱାର୍ଟର) ସହ ଅନ୍ୟାନ୍ୟ ମୌଳିକ ସୁବିଧାର ବ୍ୟବସ୍ଥା ନଥିବାରୁ ସେମାନେ ବିଭିନ୍ନ ଅସୁବିଧାର ସମ୍ମୁଖୀନ ହେଉଛନ୍ତି। ତଥାପି ନିଜ ଦାୟିତ୍ୱକୁ ପ୍ରାଥମିକତା ଦେଇ ସେମାନେ ନିୟମିତ ଭାବେ କାର୍ଯ୍ୟ କରିଆସୁଛନ୍ତି। କର୍ମଚାରୀମାନେ ଏମ୍‌ସିଏଲ୍ କର୍ତ୍ତୃପକ୍ଷଙ୍କୁ ସେମାନଙ୍କ ସମସ୍ୟା ପ୍ରତି ସହାନୁଭୂତିଶୀଳ ହୋଇ ଆବଶ୍ୟକ ମୌଳିକ ସୁବିଧା ଯୋଗାଇ ଦେବାକୁ ଅନୁରୋଧ କରିଛନ୍ତି। ସମସ୍ୟାର ଶୀଘ୍ର ସମାଧାନ ହେଲେ କର୍ମଚାରୀମାନେ ଉପକୃତ ହେବା ସହ କାର୍ଯ୍ୟ ପରିବେଶ ଆହୁରି ସୁଦୃଢ଼ ହେବ ବୋଲି ସେମାନେ ମତ ପ୍ରକାଶ କରିଛନ୍ତି।

ତାଳଚେର: ପବିତ୍ର ସ୍ନାନ ପୂର୍ଣ୍ଣିମା ଅବସରରେ ତାଳଚେର ସାଉଥ୍ ବଲଣ୍ଡା ନିକଟସ୍ଥ ସେଣ୍ଟ୍ରାଲ ୱର୍କଶପ୍ ନିକଟରେ ଥିବା ଶ୍ରୀଜଗନ୍ନାଥ ମନ୍ଦିରରେ ଭକ୍ତିମୟ ପରିବେଶ ଦେଖିବାକୁ ମିଳିଥିଲା। ପ୍ରଭୁ ଶ୍ରୀଜଗନ୍ନାଥ, ବଳଭଦ୍ର, ଦେବୀ ସୁଭଦ୍ରା ଓ ସୁଦର୍ଶନଙ୍କ ଚତୁର୍ଧା ମୂର୍ତ୍ତିଙ୍କ ପବିତ୍ର ସ୍ନାନ ନୀତି ବିଧିବିଧାନ ଅନୁଯାୟୀ ସମ୍ପନ୍ନ ହୋଇଥିଲା। ସ୍ନାନ ପୂର୍ଣ୍ଣିମା ନୀତିର ଦର୍ଶନ ପାଇଁ ସକାଳଠାରୁ ମନ୍ଦିର ପରିସରରେ ବହୁ ସଂଖ୍ୟାରେ ଭକ୍ତଙ୍କ ସମାଗମ ହୋଇଥିଲା। ଭକ୍ତମାନେ ଶ୍ରୀବିଗ୍ରହଙ୍କ ଦର୍ଶନ କରି ପ୍ରଭୁଙ୍କ ନିକଟରେ ସୁଖ, ଶାନ୍ତି ଓ ସମୃଦ୍ଧି କାମନା କରିଥିଲେ। ସମଗ୍ର ଅଞ୍ଚଳ ହରିବୋଲ ଧ୍ୱନି ଓ ଭକ୍ତିମୟ ପରିବେଶରେ ମୁଖରିତ ହୋଇଉଠିଥିଲା। ମନ୍ଦିର ପକ୍ଷରୁ ସ୍ନାନ ପୂର୍ଣ୍ଣିମାର ସମସ୍ତ ନୀତିକାନ୍ତି ସୁଚାରୁରୂପେ ସମ୍ପନ୍ନ କରାଯାଇଥିବାବେଳେ ଭକ୍ତଙ୍କ ସୁବିଧା ପାଇଁ ଆବଶ୍ୟକ ବ୍ୟବସ୍ଥା ମଧ୍ୟ କରାଯାଇଥିଲା।