Web News

Srishti News, a webpage-based digital news platform, has invited applications from aspiring and talented individuals for the position of Digital Media Journalist. Candidates who are passionate about journalism, possess good writing and reporting skills, and are comfortable working on digital media platforms are encouraged to apply. Srishti News has clarified that there are no joining charges or registration fees for applicants. Selected candidates will initially undergo a three-month probation period, during which they will be provided with an official Identity Card valid for the probationary period. Upon successful completion of the probation period and satisfactory performance, candidates will be considered for full-fledged engagement with Srishti News. Interested applicants may send their resume and relevant details to the contact information provided below: Mobile: 9668421545 E-Mail: srishtinews@gmail.com Website: www.srishtinews.in Srishti News stated that this initiative aims to provide a platform for enthusiastic individuals who wish to build a career in digital journalism and contribute to credible and responsible news reporting.

କୋମନା: କୃଷି କ୍ଷେତ୍ରରେ ଆଧୁନିକ ପ୍ରଯୁକ୍ତିର ପ୍ରୟୋଗକୁ ପ୍ରୋତ୍ସାହନ ଦେବା ଏବଂ ଚାଷୀଙ୍କ ଆୟ ବୃଦ୍ଧି ଲକ୍ଷ୍ୟରେ ନୂଆପଡ଼ା ଜିଲ୍ଲା କୋମନା ବ୍ଲକ ଅନ୍ତର୍ଗତ କୁରୁମପୁରୀ ଗ୍ରାମରେ ବୁଧବାର ଯାନ୍ତ୍ରିକ ପ୍ରତ୍ୟକ୍ଷ ବିହନ ବୁଣା (Mechanized Direct Seeded Rice - mDSR) ସମ୍ବନ୍ଧୀୟ ଏକ ବ୍ୟାପକ ପ୍ରଶିକ୍ଷଣ କାର୍ଯ୍ୟକ୍ରମ ସଫଳତାର ସହ ଅନୁଷ୍ଠିତ ହୋଇଯାଇଛି । ଆନ୍ତର୍ଜାତୀୟ ଧାନ ଗବେଷଣା ପ୍ରତିଷ୍ଠାନ (IRRI), କୃଷି ବିଭାଗ ଓ ଭରସା ଏନଜିଓର ମିଳିତ ସହଯୋଗରେ ଆୟୋଜିତ ଏହି କାର୍ଯ୍ୟକ୍ରମରେ କୃଷି କ୍ଷେତ୍ରର ବିଭିନ୍ନ ହିତାଧିକାରୀମାନେ ଯୋଗଦେଇଥିଲେ । ପ୍ରଶିକ୍ଷଣରେ କୃଷି ବିଜ୍ଞାନ କେନ୍ଦ୍ର (KVK)ର ବୈଜ୍ଞାନିକ, ବ୍ଲକ କୃଷି ଅଧିକାରୀ (BAO), ସହକାରୀ କୃଷି ଅଧିକାରୀ (AAO), କୃଷି ଅଧିକାରୀ (AO), ଗ୍ରାମ କୃଷି କର୍ମଚାରୀ (VAW), ଚାଷୀ ଏବଂ ଟ୍ରାକ୍ଟର ଚାଳକମାନଙ୍କୁ ମିଶାଇ ପ୍ରାୟ ୭୦ ଜଣ ଅଂଶଗ୍ରହଣ କରିଥିଲେ । ବିଶେଷଜ୍ଞମାନେ mDSR ପ୍ରଣାଳୀର ଉପକାରିତା ଉପରେ ବିସ୍ତୃତ ଆଲୋଚନା କରିଥିଲେ । ଏହି ଆଧୁନିକ ପଦ୍ଧତି ମାଧ୍ୟମରେ ଜଳ ସଞ୍ଚୟ, ଶ୍ରମିକ ଆବଶ୍ୟକତା ହ୍ରାସ ଏବଂ ଉତ୍ପାଦନ ଖର୍ଚ୍ଚ କମାଇ ଧାନ ଚାଷକୁ ଅଧିକ ଲାଭଜନକ କରାଯାଇପାରିବ ବୋଲି ସେମାନେ ମତ ରଖିଥିଲେ । ଏଥିସହ ଚାଷୀ ଓ ଟ୍ରାକ୍ଟର ଚାଳକମାନଙ୍କୁ mDSR ଯନ୍ତ୍ରର ସଠିକ ବ୍ୟବହାର, ବିହନ ବୁଣା କୌଶଳ ଓ ଫସଲ ପରିଚାଳନା ବିଷୟରେ ପ୍ରାୟୋଗିକ ତାଲିମ ଦିଆଯାଇଥିଲା । ଉଲ୍ଲେଖଯୋଗ୍ୟ ଯେ, ଭାରତ ସରକାରଙ୍କ ବିପର୍ଯ୍ୟୟ ପ୍ରଶମନ ବିଭାଗ, ଓଡ଼ିଶା ସରକାରଙ୍କ କୃଷି ଓ କୃଷକ ସଶକ୍ତିକରଣ ବିଭାଗ, IRRI ଓ ICRISATର ମିଳିତ ସହଯୋଗରେ କୋମନା ବ୍ଲକର ୧୭ଟି ଗ୍ରାମରେ ଏଭଳି କାର୍ଯ୍ୟକ୍ରମ ଚାଲିଛି । ଏହା ମାଧ୍ୟମରେ ମରୁଡ଼ି ଜନିତ କ୍ଷତି ହ୍ରାସ ସହ ଚାଷୀଙ୍କ ଜୀବନ ଓ ଜୀବିକାର ଉନ୍ନତି ସାଧନ କରିବା ଲକ୍ଷ୍ୟ ରହିଛି । ଏହି ପ୍ରଶିକ୍ଷଣ କାର୍ଯ୍ୟକ୍ରମ କେବଳ ଆଧୁନିକ କୃଷି ପ୍ରଯୁକ୍ତିର ପ୍ରସାର ନୁହେଁ, ବରଂ ଅଞ୍ଚଳର କୃଷକମାନଙ୍କୁ ଜଳବାୟୁ ପରିବର୍ତ୍ତନ ଓ ମରୁଡ଼ି ପରିସ୍ଥିତିକୁ ସଫଳତାର ସହ ମୁକାବିଲା କରିବା ଦିଗରେ ଏକ ନୂତନ ଦିଗଦର୍ଶନ ପ୍ରଦାନ କରିଛି ।

କୋମନା: ନୂଆପଡ଼ା ଜିଲ୍ଲାରେ ନିଶା କାରବାର ବିରୋଧୀ ଅଭିଯାନକୁ ଆହୁରି ତୀବ୍ର କରିଛି ପୋଲିସ । ବିଶ୍ୱସ୍ତ ସୂଚନା ଆଧାରରେ କୋମନା ପୋଲିସ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଇ ୧୩୧.୦୬୦ କିଲୋଗ୍ରାମ ଗଞ୍ଜେଇ ଜବତ କରାଯିବା ସହ ୫ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି । ପୋଲିସ ସୂତ୍ରରୁ ପ୍ରକାଶ ଯେ, ଗତ ୯ ତାରିଖରେ କୋମନା ଥାନା ଅଞ୍ଚଳରେ କିଛି ବ୍ୟକ୍ତି ବିପୁଳ ପରିମାଣର ଗଞ୍ଜେଇ ମଜୁତ ରଖି ଏହାକୁ ଛତିଶଗଡ଼ର ରାୟପୁରକୁ ଚାଲାଣ କରିବା ପାଇଁ ଅପେକ୍ଷା କରୁଥିବା ଖବର ମିଳିଥିଲା । ଏହାପରେ ପୋଲିସ ତୁରନ୍ତ ସକ୍ରିୟ ହୋଇ ବିଭିନ୍ନ ସ୍ଥାନରେ ଏକକାଳୀନ ଚଢ଼ାଉ ଆରମ୍ଭ କରିଥିଲା । ଚଢ଼ାଉ ସମୟରେ କିଛି ସନ୍ଦିଗ୍ଧ ବ୍ୟକ୍ତି ଘଟଣାସ୍ଥଳରୁ ଫେରାର ହେବାରେ ସଫଳ ହୋଇଥିଲେ ମଧ୍ୟ ପୋଲିସ ୫ ଜଣଙ୍କୁ କାବୁ କରି ଗିରଫ କରିଥିଲା। ଅଭିଯୁକ୍ତମାନଙ୍କ ନିକଟରୁ ୧୩୧.୦୬୦ କିଲୋଗ୍ରାମ ଗଞ୍ଜେଇ ଏବଂ ଏକ ଓପୋ A53 ମୋବାଇଲ ଫୋନ ଜବତ କରାଯାଇଛି । ପୋଲିସ ଏହି ମାମଲାରେ ଅଧିକ ତଦନ୍ତ ଜାରି ରଖିଥିବା ବେଳେ ଫେରାର ଅଭିଯୁକ୍ତମାନଙ୍କ ଗିରଫଦାରୀ ପାଇଁ ତଲାସି ଅଭିଯାନ ଚାଲିଛି । ଏଥିସହ ଗଞ୍ଜେଇ କାରବାରର ପଛରେ ଥିବା ନେଟୱାର୍କ, ଯୋଗାଣକାରୀ ଏବଂ ଗ୍ରାହକଙ୍କ ସଂପର୍କରେ ମଧ୍ୟ ତଦନ୍ତ ଆରମ୍ଭ କରାଯାଇଛି । ନିଶା କାରବାର ବିରୋଧରେ କୋମନା ପୋଲିସର ଏହି ସଫଳ ଅଭିଯାନ ସ୍ଥାନୀୟ ଅଞ୍ଚଳରେ ବେଆଇନ ମାଦକ ଦ୍ରବ୍ୟ ବ୍ୟବସାୟ ଉପରେ ଏକ ବଡ଼ ଆଘାତ ବୋଲି ମନେ କରାଯାଉଛି ।

ଚିକିଟି ପେଣ୍ଠ ହାଇସ୍କୁଲର ପ୍ରଥମ ପୂର୍ବତନ ପ୍ରଧାନ ଶିକ୍ଷକ ସ୍ବର୍ଗତ ସତ୍ୟନାରାୟଣ ସାହୁଙ୍କ ଦ୍ବାଦଶାହ ଉପଲକ୍ଷେ ସ୍ଥାନୀୟ ଅବସର ପ୍ରାପ୍ତ ସରକାରୀ କର୍ମଚାରୀ ସମନ୍ବୟ ସମିତି ତରଫରୁ ସ୍ମୃତି ଚାରଣ ସଭା ଆୟୋଜନ କରାଯାଇଥିଲା। ସ୍ବର୍ଗତ ସାହୁ ୧୯୭୩ଠାରୁ ଏହି ବିଦ୍ୟାଳୟରେ ଶିକ୍ଷକତା ଆରମ୍ଭ କରି ଏଠାରେ ହିଁ ଅବସର ନେଇଥିଲେ।ଶହ ଶହ ଶିକ୍ଷାର୍ଥୀଙ୍କ ପଥପ୍ରଦର୍ଶକ ସାଜି ସେମାନଙ୍କ ଜୀବନ ଗଢ଼ିଥିଲେ। ପ୍ରଥମେ ସ୍ବର୍ଗତ ସାହୁ ଙ୍କ ଫଟୋ ଚିତ୍ର ରେ ଉପସ୍ଥିତ କର୍ମଚାରୀ, ତାଙ୍କ ଛାତ୍ରଛାତ୍ରୀ ଓ ପରିବାର ପୁଷ୍ପାଞ୍ଜଳି ଅର୍ପଣ କରିଥିଲେ ପରେ ପରେ କର୍ମଚାରୀ ସଂଘର ସଭାପତି ମାନସ କସ୍ତୁରୀ ଗଣେଶ ପଣ୍ଡାଙ୍କ ସଭାପତିତ୍ବରେ ସ୍ମୃତି ସଭା ଆରମ୍ଭ ହୋଇଥିଲା। ସ୍ବର୍ଗତ ସାହୁଙ୍କ ସହକର୍ମୀ ସୁରେନ ପାଢ଼ୀ, ଧାର୍ମାରାଓ, ଏବିଇଓ ଶ୍ରୀ ନିଗମାନନ୍ଦ ପଣ୍ଡା, ଅବସରପ୍ରାପ୍ତ ଶିକ୍ଷକ ଦୁର୍ଗା ମାଧବ ମହାରଣା, ଚିତ୍ର ସେନ୍ ସାହୁ, ପ୍ରସନ୍ନ କୁମାର ପାଢ଼ୀ, ଆଡଭୋକେଟ୍ ଲକ୍ଷ୍ମୀ କାନ୍ତ ପ୍ରଧାନ, ଉଲ୍ଲାସ ଗୈ।ଡଃ ପ୍ରମୁଖ ପୂର୍ବ ଛାତ୍ର ଛାତ୍ରୀ ମାନେ ତାଙ୍କ ଶିକ୍ଷକତା ଜୀବନର ବିଭିନ୍ନ ସ୍ମୃତିକୁ ମନେପକାଇଥିଲେ। ପତ୍ନୀ ସରୋଜିନୀ, ପୁତ୍ର ଅକ୍ଷୟ, ଅମର, ଅରୁଣ ଓ ଝିଅ ସଶ୍ମୀତା ସପରିବାର ଉପସ୍ଥିତ ଥିଲେ। କାର୍ଯ୍ୟକ୍ରମ ଶେଷରେ ନୀଳମଣି ବେହେରା ଧନ୍ୟବାଦ ଅର୍ପଣ କରିଥିଲେ।।

ଟିଟିଲାଗଡ଼ :-୧୦/୬/୨୬ ଉତ୍କଳ କନ୍ଧ ସମାଜ ଟିଟିଲାଗଡ଼ ଲୁହା ପ୍ରଗଣା ଅଧୀନରେ ଥିବା କଳାହାଣ୍ଡି ଜିଲ୍ଲା ଭବାନୀପାଟଣା ସଦରବ୍ଲକ ଅଧିନସ୍ତ ମାଦିଗୁଡା ଗାଁ ଠାରେ ଏକ ଆଦିବାସୀ ସଚେତନତା ସଭା ଅନୁଷ୍ଠିତ ହୋଇଥିଲା l ଏଥିରେ ଉତ୍କଳ କନ୍ଧ ସମାଜ ଟିଟିଲାଗଡ଼ ଲୁହା ପ୍ରଗଣା ସମ୍ପାଦକ ଥବୀର ପୁଝାରୀ, ଆଦିବାସୀ ନେତା ହେମନ୍ତ ମାଝୀ, ଦିଲୀପ ମାଝୀ, ନାରୀନେତ୍ରୀ ରୀନା ମାଝୀ ସମୂହ ଯୋଗଦାନ ଦେଇ ଆଦିବାସୀ ମାନଙ୍କ ଅଧିକାର, ପରମ୍ପରା, ସଂସ୍କୃତି ଉପରେ ଆଲୋଚନା କରି ସମସ୍ତ ଆଦିବାସୀ ମାନଙ୍କୁ ଦିଗଦର୍ଶନ ଦେଇଥିଲେ l ଏଥିରେ ମାଦିଗୁଡା ପଞ୍ଚାୟତ ଲୁହା ପ୍ରଗଣା ସଭାପତି ନୃପରାଜ ମାଝୀ, ଏବଂ ବରିଷ୍ଠ ଆଦିବାସୀ ନେତା ପୂର୍ଣ୍ଣଚନ୍ଦ୍ର ମାଝୀ, ଧବଳେଶ୍ୱର ମାଝୀ ନିଜ ଗାଁର ସମସ୍ୟା ସଙ୍ଗେସଙ୍ଗେ ଆଖପାଖ ଅଞ୍ଚଳର ସମସ୍ୟାମାନ ଉପସ୍ଥାପନା କରିଥିଲେ l ପ୍ରତ୍ୟେକ ସମସ୍ୟା କୁ ଗମ୍ଭୀରତା ସହିତନେଇ ଆଗାମୀ ଦିନରେ ବିରାଟ ଆନ୍ଦୋଳନ କରାଯିବ ବୋଲି ସଭାରେ ସମସ୍ତଙ୍କର ସହମତି ପ୍ରକାଶ ପାଇଥିଲା l ଆଦିବାସୀମାନେ ଏକତାର ସହିତ ନିଜର ଅଧିକାର ଏବଂ ଅତ୍ୟାଚାର ବିରୁଦ୍ଧରେ ଲଢେଇ କରିବା ପାଇଁ ଆଦିବାସୀ ନେତାମାନେ ଆହ୍ୱାନ ଦେଇଥିଲେ l ଏହି କାର୍ଯ୍ୟକ୍ରମରେ ମାଦିଗୁଡା ଗ୍ରାମର ପୃଥ୍ୱୀରାଜ ମାଝୀ, ରାଜକୁମର ମାଝୀ, ଉତ୍ତରା ମାଝୀ, ରାଧୁ ଚରଣ ମାଝୀ, ହେମନ୍ତ ମାଝୀ, ମହେନ୍ଦ୍ର ମାଝୀ, ଜଳଧର ମାଝୀ, ଲିଙ୍ଗରାଜ ମାଝୀ, ଏବଂ ଗ୍ରାମର ଅନେକ ଆଦିବାସୀ ଓ ଚିକିଲି ଗ୍ରାମର ଆଦିବାସୀମାନେ ମଧ୍ୟ ଉପସ୍ଥିତ ଥିଲେ l

ସିନାପାଲି ଅଞ୍ଚଳରେ ଫୁଟବଲ୍ ପ୍ରେମୀଙ୍କ ମଧ୍ୟରେ ଉତ୍ସାହ ଓ କ୍ରୀଡ଼ା ଉନ୍ମାଦନା ସୃଷ୍ଟି କରିଥିବା ୨ୟ MMFC ଫ୍ଲଡ୍ ଲାଇଟ୍ ଫୁଟସାଲ୍ ଟୁର୍ଣ୍ଣାମେଣ୍ଟ-୨୦୨୬ ର ଗ୍ରାଣ୍ଡ ଫାଇନାଲ୍ ମ୍ୟାଚ୍ ମଙ୍ଗଳବାର ସନ୍ଧ୍ୟାରେ ପିଏମ୍ ଶ୍ରୀ ଉଚ୍ଚ ବିଦ୍ୟାଳୟ ଖେଳ ପଡ଼ିଆ, ସିନାପାଲିରେ ଅନୁଷ୍ଠିତ ହୋଇଥିଲା । MMFC ସିନାପାଲି ଆୟୋଜିତ ଏହି ପ୍ରତିଯୋଗିତାର ଫାଇନାଲ୍ ମ୍ୟାଚ୍‌ରେ MMFC ସିନାପାଲି ଓ ଭେଲ୍ଲା ଦଳ ମଧ୍ୟରେ ଜବରଦସ୍ତ ମୁକାବିଲା ଦେଖିବାକୁ ମିଳିଥିଲା । ଆରମ୍ଭରୁ ଉଭୟ ଦଳ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିବା ବେଳେ ମ୍ୟାଚ୍‌ଟି ଅତ୍ୟନ୍ତ ରୋମାଞ୍ଚକର ହୋଇଉଠିଥିଲା । ଦ୍ବିତୀୟ ହାଫରେ MMFC ସିନାପାଲି ୧-୦ ଗୋଲରେ ଭେଲ୍ଲାକୁ ପରାସ୍ତ କରି ଟୁର୍ଣ୍ଣାମେଣ୍ଟର ଚାମ୍ପିୟନ୍ ମୁକୁଟ ହାସଲ କରିଥିଲା । ବିଜେତା ଦଳକୁ ୭,୦୦୦ ଟଙ୍କା ନଗଦ ରାଶି ସହ ଟ୍ରଫି ଏବଂ ରନର୍ସଅପ୍ ଭେଲ୍ଲା ଦଳକୁ ୫,୦୦୦ ଟଙ୍କା ନଗଦ ରାଶି ସହ ଟ୍ରଫି ପ୍ରଦାନ କରାଯାଇଥିଲା । ଏଥିରେ ଖଡ଼ିଆଳ ବିଧାୟକ ଅଧିରାଜ ପାଣିଗ୍ରାହୀ ମୁଖ୍ୟ ଅତିଥି ଭାବେ ଯୋଗଦେଇ ଖେଳାଳିମାନଙ୍କୁ ଉତ୍ସାହିତ କରିବା ସହ କ୍ରୀଡ଼ାର ବିକାଶ ପାଇଁ ଏପରି ଆୟୋଜନର ଭୂମିକାକୁ ପ୍ରଶଂସା କରିଥିଲେ । ସମ୍ମାନିତ ଅତିଥି ଭାବେ ପୂର୍ବତନ ସାଂସଦ ପ୍ରାର୍ଥୀ ଲମ୍ବୋଦର ନିଆଲ, ସୁବ୍ରତ ଠାକୁର, ମୀନା ଘିଭେଲା, ବ୍ଲକ ଉପାଧ୍ୟାକ୍ଷା, ମନୀଷ କୁମାର ପଟେଲ, ସମିତି ସଭ୍ୟ, ଏବିଡିଓ ସୁବ୍ରତ କୁମାର ବେହେରା, ଅରିଗଞ୍ଜନ ଯୋଶୀ, ଘଣ୍ଟିଗୁଡ଼ା ସରପଞ୍ଚ ଖୁଟୁରାମ ସୁନାନୀ, ଚଟିଆଗୁଡ଼ା ସରପଞ୍ଚ ପ୍ରତିନିଧି ସଞ୍ଜୀବ ପାତ୍ର, ସୁପୁଚ୍ଛା ମାଉଲି ପାଣିଗ୍ରାହୀ ଓ ଶରତ ଚନ୍ଦ୍ର ମାଝୀ ପ୍ରମୁଖ ଉପସ୍ଥିତ ଥିଲେ । ଏହି ଗ୍ରାଣ୍ଡ ଫାଇନାଲ୍ ଅବସରରେ ସିନାପାଲି ଅଞ୍ଚଳର ୧୦ ଜଣ ପୂର୍ବତନ ଫୁଟବଲ୍ ଖେଳାଳିଙ୍କୁ ସେମାନଙ୍କ କ୍ରୀଡ଼ା ଅବଦାନ ପାଇଁ ସମ୍ମାନିତ କରାଯାଇଥିଲା, ଯାହା କାର୍ଯ୍ୟକ୍ରମର ଏକ ବିଶେଷ ଆକର୍ଷଣ ପାଲଟିଥିଲା । ବ୍ୟକ୍ତିଗତ ପୁରସ୍କାର ବିଭାଗରେ ଶଙ୍କର ସୁନା “ମ୍ୟାନ୍ ଅଫ୍ ଦ ସିରିଜ୍”, “ମ୍ୟାନ୍ ଅଫ୍ ଦ ଫାଇନାଲ୍” ଏବଂ “ବେଷ୍ଟ ସ୍କୋରର୍” ଭାବେ ତିନୋଟି ସମ୍ମାନ ହାସଲ କରିଥିଲେ । ଭେଲ୍ଲା ଦଳ “ବେଷ୍ଟ ଡିସିପ୍ଲିନ୍ ଟିମ୍” ସମ୍ମାନ ପାଇଥିବା ବେଳେ ଭେଲ୍ଲାର ଯୁବ ଖେଳାଳି ପ୍ରଦ୍ୟୁମ୍ନ “ଏମର୍ଜିଙ୍ଗ ପ୍ଲେୟର୍” ପୁରସ୍କାର ଅର୍ଜନ କରିଥିଲେ । ମ୍ୟାଚ୍‌କୁ ରିକୁ ମାଝୀ, ଚନ୍ଦ୍ର ମାଝୀ, ବିହାରୀଲାଲ ମସରା ଓ ସୁମନ ମାଝୀ ପରିଚାଳନା କରିଥିବା ବେଳେ ଜାତୀୟ ସ୍ତରୀୟ ଭାଷ୍ୟକାର ପ୍ରକାଶ ଚନ୍ଦ୍ର ପାତ୍ର ଓ ଭାସ୍କର ମାଝୀ ଆକର୍ଷଣୀୟ ଧାରାବିବରଣୀ ପ୍ରଦାନ କରିଥିଲେ । ଫାଇନାଲ୍ ମ୍ୟାଚ୍‌ର ସିଧା ପ୍ରସାରଣ ଏସ୍‌ଡି ବ୍ରଡକାଷ୍ଟ ୟୁଟ୍ୟୁବ୍ ଚ୍ୟାନେଲ୍ ମାଧ୍ୟମରେ କରାଯାଇଥିଲା, ଯାହାକୁ ଅନଲାଇନରେ ହଜାର ହଜାର ଦର୍ଶକ ଉପଭୋଗ କରିଥିଲେ । ଉଲ୍ଲେଖଯୋଗ୍ୟ ଯେ, ଏହି ଫ୍ଲଡ୍ ଲାଇଟ୍ ଫୁଟସାଲ୍ ଟୁର୍ଣ୍ଣାମେଣ୍ଟ ସିନାପାଲି ଅଞ୍ଚଳରେ କ୍ରୀଡ଼ା ପ୍ରତିଭା ବିକାଶ, ଯୁବପିଢ଼ୀଙ୍କୁ କ୍ରୀଡ଼ା ପ୍ରତି ଆକୃଷ୍ଟ କରିବା ଏବଂ ଭାଇଚାରାର ବାର୍ତ୍ତା ପ୍ରସାର କରିବାରେ ସଫଳ ହୋଇଛି ।

ନୂଆପଡ଼ା ଜିଲ୍ଲାରେ ଟେଲିକମ୍ ଭିତ୍ତିଭୂମିକୁ ଟାର୍ଗେଟ୍ କରି ଚାଲିଥିବା ଚୋରି ଘଟଣା ବିରୋଧରେ ପୋଲିସକୁ ବଡ଼ ସଫଳତା ମିଳିଛି । ଦେଦେଇ ଗ୍ରାମ ନିକଟସ୍ଥ ଜିଓ ଟାୱାରରୁ ତାମ୍ବା ତାର ଚୋରି ଉଦ୍ୟମ ଘଟଣାର ପର୍ଦ୍ଦାଫାଶ କରି ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିବା ସହ ବହୁ ଚୋରି ସାମଗ୍ରୀ ଜବତ କରିଛି ନୂଆପଡ଼ା ପୋଲିସ । ପୋଲିସ ସୂତ୍ରରୁ ପ୍ରକାଶ, ଗତ ୭ ଜୁନ୍ ଭୋର ପ୍ରାୟ ୨ଟା ସମୟରେ ଦେଦେଇ ଗ୍ରାମ ନିକଟରେ ଥିବା ଜିଓ ଟାୱାରରେ ଚୋରି ଉଦ୍ୟମ ସମ୍ପର୍କରେ ବିଶ୍ୱସ୍ତ ସୂଚନା ମିଳିଥିଲା । ସୂଚନା ପାଇବା ମାତ୍ରେ ନୂଆପଡ଼ା ପୋଲିସ ତୁରନ୍ତ ତଦନ୍ତ ଆରମ୍ଭ କରି ସ୍ୱତନ୍ତ୍ର ଟିମ୍ ଗଠନ କରିଥିଲା । ଟାୱାରର ଟେକ୍ନିସିଆନ୍ ଘଟଣାସ୍ଥଳରେ ପହଞ୍ଚିବା ବେଳେ ଦୁଇ ଜଣ ଅଜଣା ବ୍ୟକ୍ତି ଅନ୍ଧାରର ସୁଯୋଗ ନେଇ ଫେରାର ହୋଇଯାଇଥିଲେ । ପରବର୍ତ୍ତୀ ଯାଞ୍ଚରୁ ଜଣାପଡ଼ିଥିଲା ଯେ, ଟାୱାରର ଜେନେରେଟରକୁ ଭାଙ୍ଗି ଚୋରି କରିବା ପାଇଁ ଉଦ୍ୟମ କରାଯାଇଥିଲା । ଫେରାର ସମୟରେ ଦୁର୍ବୃତ୍ତମାନେ ଘଟଣାସ୍ଥଳରେ ଏକ ମୋଟରସାଇକେଲ, ଗାମୁଛା, ସ୍ପାନର, ସ୍କ୍ରୁ ଡ୍ରାଇଭର, ଚପଲ ଓ ଅନ୍ୟାନ୍ୟ ସାମଗ୍ରୀ ଛାଡ଼ି ପଳାଇଥିଲେ । ପୋଲିସ ସେଗୁଡ଼ିକୁ ଜବତ କରି ବୈଷୟିକ ତଦନ୍ତ ଓ ତଥ୍ୟ ବିଶ୍ଳେଷଣ ମାଧ୍ୟମରେ ଅଭିଯୁକ୍ତମାନଙ୍କ ନିକଟରେ ପହଞ୍ଚିଥିଲା । ତଦନ୍ତରୁ ମିଳିଥିବା ସୂତ୍ର ଆଧାରରେ କୋମନା ପୋଲିସର ସହଯୋଗରେ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିଲା । ସେମାନଙ୍କ ନିକଟରୁ ୫୪ କେଜି ତାମ୍ବା ତାର, ଏକ ସ୍କାଇ ବ୍ଲୁ ରଙ୍ଗର ଭିଭୋ ଭି୪୦ ମୋବାଇଲ ଫୋନ୍ ଏବଂ ଚୋରିରେ ବ୍ୟବହୃତ ଏକ ଧୂସର ରଙ୍ଗର ୟାମାହା FZS ମୋଟରସାଇକେଲ (ନମ୍ବର- OD-03-AE-5171) ଜବତ କରାଯାଇଛି । ଗିରଫ ଅଭିଯୁକ୍ତମାନେ ହେଲେ ବଲାଙ୍ଗୀର ଜିଲ୍ଲା ବେଲପଡ଼ା ଥାନା ଅନ୍ତର୍ଗତ ଘାଗରା ଗ୍ରାମର ଜାଦୁ ରୋହିଦାସ (୨୪) ଏବଂ ଚନ୍ଦା ମାଝୀ (୧୯)। ପୋଲିସ ରେକର୍ଡ ଅନୁଯାୟୀ, ଉଭୟଙ୍କ ବିରୋଧରେ ପୂର୍ବରୁ ଜୋଙ୍କ ଓ ଲାଠୋର ଥାନାରେ ଅପରାଧିକ ମାମଲା ରହିଛି । ଏହି ଘଟଣାରେ ଅନ୍ୟ କେହି ସଂପୃକ୍ତ ଅଛନ୍ତି କି ନାହିଁ ଏବଂ ଅନ୍ୟ ସମାନ ଚୋରି ଘଟଣା ସହ ସେମାନଙ୍କର ସମ୍ପର୍କ ରହିଛି କି ନାହିଁ, ସେନେଇ ପୋଲିସ ତଦନ୍ତ ଜାରି ରଖିଛି । ଟେଲିକମ୍ ଭିତ୍ତିଭୂମି ଉପରେ ଆକ୍ରମଣକୁ ଗୁରୁତର ଭାବେ ନେଇ ନୂଆପଡ଼ା ପୋଲିସର ଏହି ତ୍ୱରିତ ପଦକ୍ଷେପକୁ ସାଧାରଣରେ ପ୍ରଶଂସା କରାଯାଉଛି ।

ସିନାପାଲି, ସ୍ୱାସ୍ଥ୍ୟ, ପରିବେଶ ଓ ସବୁଜ ଭବିଷ୍ୟତର ସନ୍ଦେଶ ନେଇ ଆଜି ସକାଳ ୬ଟାରୁ ସିନାପାଲି ବନାଞ୍ଚଳରେ ବିଶ୍ୱ ସାଇକେଲ ଦିବସ-୨୦୨୬ ଓ “ସଣ୍ଡେଜ୍ ଅନ୍ ସାଇକେଲ” କାର୍ଯ୍ୟକ୍ରମ ଉତ୍ସାହ ଓ ଉଦ୍ଦୀପନାର ସହ ପାଳିତ ହୋଇଯାଇଛି । ଫିଟ୍ ଇଣ୍ଡିଆ ଆନ୍ଦୋଳନ ଅନ୍ତର୍ଗତ ଆୟୋଜିତ ଏହି ସଚେତନତାମୂଳକ ସାଇକେଲ ରାଲିରେ ବନ ବିଭାଗର ଅଧିକାରୀ, କର୍ମଚାରୀ ଓ ବନ୍ୟପ୍ରାଣୀ ସୁରକ୍ଷା କର୍ମୀମାନେ ଯୋଗଦେଇ ପରିବେଶ ସୁରକ୍ଷା ଏବଂ ସୁସ୍ଥ ଜୀବନଶୈଳୀର ବାର୍ତ୍ତା ପ୍ରଚାର କରିଥିଲେ । ସିନାପାଲି ବନ ପରିସର ଅଧିକାରୀ କାମେଶ୍ୱର ତାଣ୍ଡିଙ୍କ ନେତୃତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ବନପାଳ କନ୍ଦର୍ପ ସୁନାନୀ, ପୂର୍ଣ୍ଣଚନ୍ଦ୍ର ନାୟକ, ଚୁଡ଼ାନାଥ ସରାଫ, ସମୀରକାନ୍ତ ଠାକୁର, ରାମ ରଞ୍ଜନ ରାଉତ ଓ ରଞ୍ଜନ କୁମାର ସାହୁଙ୍କ ସମେତ ସମସ୍ତ ଫରେଷ୍ଟ ଗାର୍ଡ, ପାରା ଷ୍ଟାଫ୍ ଏବଂ ୱାଇଲ୍ଡଲାଇଫ୍ ଷ୍ଟାଫ୍ ସକ୍ରିୟ ଭାବେ ଅଂଶଗ୍ରହଣ କରିଥିଲେ । ସାଇକେଲ ରାଲି ମାଧ୍ୟମରେ “ରାଇଡ୍ ଗ୍ରୀନ୍, ବ୍ରିଦ୍ କ୍ଲିନ୍, ଲିଭ୍ ହେଲ୍ଥି” ବାର୍ତ୍ତାକୁ ଜନସାଧାରଣଙ୍କ ନିକଟରେ ପହଞ୍ଚାଇବା ସହ ପ୍ରଦୂଷଣମୁକ୍ତ ପରିବେଶ ଗଠନ, ଇନ୍ଧନ ସଞ୍ଚୟ, ଶାରୀରିକ ସୁସ୍ଥତା ଓ ବନ ସୁରକ୍ଷାର ଗୁରୁତ୍ୱ ବିଷୟରେ ସଚେତନ କରାଯାଇଥିଲା । ଅଂଶଗ୍ରହଣକାରୀମାନେ ସାଇକେଲ ଚଳାଇବାକୁ କେବଳ ଏକ ଯାତାୟାତ ମାଧ୍ୟମ ନୁହେଁ, ବରଂ ପ୍ରକୃତି ସହ ଯୋଡ଼ି ରହିବାର ଏକ ସୁନ୍ଦର ଉପାୟ ବୋଲି ମତ ପ୍ରକାଶ କରିଥିଲେ । ବନ ବିଭାଗ ପକ୍ଷରୁ କୁହାଯାଇଛି ଯେ, ପ୍ରତ୍ୟେକ ସାଇକେଲ ଯାତ୍ରା କାର୍ବନ ନିର୍ଗମନ କମାଇବା ସହ ଆଗାମୀ ପିଢ଼ି ପାଇଁ ଏକ ସ୍ୱଚ୍ଛ ଓ ସବୁଜ ପୃଥିବୀ ଗଢ଼ିବାରେ ସହାୟକ ହୁଏ । ଆଜିର ବ୍ୟସ୍ତ ଜୀବନରେ ସାଇକେଲ ଅଭ୍ୟାସ କେବଳ ଶରୀରକୁ ସୁସ୍ଥ ରଖେ ନାହିଁ, ମନକୁ ମଧ୍ୟ ପ୍ରଫୁଲ୍ଲିତ କରେ । ବିଶ୍ୱ ସାଇକେଲ ଦିବସ ଅବସରରେ ଆୟୋଜିତ ଏହି କାର୍ଯ୍ୟକ୍ରମ ସ୍ଥାନୀୟ ଅଞ୍ଚଳରେ ପରିବେଶ ପ୍ରେମ, ସ୍ୱାସ୍ଥ୍ୟ ସଚେତନତା ଓ ସାମାଜିକ ଦାୟିତ୍ୱବୋଧକୁ ଆହୁରି ସୁଦୃଢ଼ କରିଥିବା ଦେଖାଯାଇଛି ।

ରାଜଧାନୀ ଭୁବନେଶ୍ୱରସ୍ଥିତ ପ୍ରତିଷ୍ଠିତ ଜୟଦେବ ଭବନଠାରେ ଆଜି ‘ଓଡ଼ିଶା ଡିଜିଟାଲ ମିଡ଼ିଆ ମହାସଂଘ’ର ଏକ ଗୁରୁତ୍ୱପୂର୍ଣ୍ଣ ବାର୍ଷିକ ଉତ୍ସବ ପାଳନ କୁ ନେଇ ଏକ ପ୍ରସ୍ତୁତି ବୈଠକ ସଫଳତାର ସହ ଅନୁଷ୍ଠିତ ହୋଇଯାଇଛି। ଡିଜିଟାଲ ଗଣମାଧ୍ୟମ ସାମ୍ବାଦିକ ଙ୍କ ସୁରକ୍ଷା, ଅଧିକାର ଏବଂ ସାମ୍ବାଦିକମାନଙ୍କ କଲ୍ୟାଣ ଦିଗରେ କାର୍ଯ୍ୟ କରୁଥିବା ଏହି ଅଗ୍ରଣୀ ସଂଗଠନର ରାଜ୍ୟ ସ୍ତରୀୟ ବୈଠକରେ ଓଡ଼ିଶାର ବିଭିନ୍ନ ପ୍ରାନ୍ତରୁ ୭୦ରୁ ଊର୍ଦ୍ଧ୍ୱ ପ୍ରତିନିଧି ଓ କର୍ମକର୍ତ୍ତା ଯୋଗ ଦେଇଥିଲେ। ​ଏହି ବୈଠକ ସଂଘର ରାଜ୍ୟ ସଭାପତି ଶ୍ରୀ ମନୋଜ ଶତପଥୀଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିଲା। ବୈଠକର ସମସ୍ତ କାର୍ଯ୍ୟସୂଚୀକୁ ରାଜ୍ୟ ସାଧାରଣ ସମ୍ପାଦକ ଶ୍ରୀ କବିରାଜ ପାତ୍ର ଅତି ସୁଚାରୁରୂପେ ପରିଚାଳନା କରିଥିଲେ। ​ସଂଗଠନ ର ବରିଷ୍ଠ କାର୍ଯ୍ୟ କର୍ତ୍ତା ସୂର୍ଯ୍ୟକାନ୍ତ ସିଂ, ମୀରା ବାଇ ଦେଓ, ନିରଞ୍ଜନ ପାଣି, ଗୌରାଙ୍ଗ ଚରଣ ମହି, ଚନ୍ଦନା ଦାସ, ସଂଗ୍ରାମଜୀତ ନନ୍ଦ ପ୍ରମୁଖ ଉପସ୍ଥିତ ରହି ନିଜର ବହୁମୂଲ୍ୟ ମତାମତ ଦେଇଥିଲେ l ଓଡ଼ିଶାର ପ୍ରତ୍ୟେକ କୋଣ ଅନୁକୋଣରେ ଥିବା ଡିଜିଟାଲ ମିଡ଼ିଆ ଆକ୍ଟିଭିଷ୍ଟ ମାନଙ୍କୁ ସଂଘ ସହ ଯୋଡ଼ିବା ପାଇଁ ନୂତନ ସଭ୍ୟ ସଂଗ୍ରହ ଅଭିଯାନର ରୂପରେଖ ପ୍ରସ୍ତୁତି କରାଯାଇ ଥିଲା। ଆଗାମୀ ଦିନରେ ପ୍ରତିଭାବାନ ଓ ନିର୍ଭୀକ ଡିଜିଟାଲ ସାମ୍ବାଦିକମାନଙ୍କୁ ପୁରସ୍କୃତ କରିବା ପାଇଁ ତଥା ବିଭିନ୍ନ କ୍ଷେତ୍ରରେ ସମାଜ ର ଆଗଧାଡିରେ କାର୍ଯ୍ୟରତ ସାମାଜିକ କାର୍ଯ୍ୟକର୍ତ୍ତା ମାନଙ୍କୁ ସମ୍ମାନିତ କରିବା ପାଇଁ ଓଡିଶା ଆଇକନିକ ଆୱାର୍ଡ ଯୋଜନାର ପ୍ରଚଳନ ପାଇଁ ଏକ ବିସ୍ତୃତ ରୋଡ ମ୍ୟାପ ପ୍ରସ୍ତୁତ କରାଯାଇ ଥିଲା । ମାନ୍ୟବର ରାଜ୍ୟ ସଭାପତି ଶ୍ରୀ ମନୋଜ ଶତପଥୀ ଙ୍କ ଅନୁମୋଦନ କ୍ରମେ ଓଡିଶା ର ଆଉ ଚାରିଟି ଜିଲ୍ଲାରେ ଜିଲ୍ଲା ସଂଯୋଜକ ନିଯୁକ୍ତି କରାଗଲା l ବାଲେଶ୍ୱର ରେ ସମୀର କୁମାର ସାହୁ, ଭଦ୍ରକ ରେ କାଁହୁ ଚରଣ ଜେନା, ବରଗଡ଼ ରେ ମୁନ୍ନା ସାହୁ ଓ ଗଜପତି ରେ ଲଷ୍ମୀ ନାରାୟଣ ଆଚାର୍ଯ୍ୟଙ୍କୁ ଜିଲ୍ଲା ସଂଯୋଜକ ଭାବେ ନିଯୁକ୍ତି ଦିଆ ଯାଇଥିବା ମହାସଙ୍ଘ ତରଫରୁ କୁହା ଯାଇଛି l ​ଏହି ଅବସରରେ ରାଜ୍ୟର ବିଭିନ୍ନ ଜିଲ୍ଲାରୁ ଆସିଥିବା ସଂଘର ସଦସ୍ୟ ଓ ପ୍ରତିନିଧିମାନେ ନିଜ ନିଜ ଅଞ୍ଚଳର ସମସ୍ୟା ଓ ଅଭିଜ୍ଞତା ଉପସ୍ଥାପନ କରିଥିଲେ। ଡିଜିଟାଲ ମିଡ଼ିଆର ସୁରକ୍ଷା ଓ ଅଧିକାର ପାଇଁ ଏକତା ଅପରିହାର୍ଯ୍ୟ ବୋଲି ସମସ୍ତେ ମତପ୍ରକାଶ କରିବା ସହ ଆଗାମୀ ଦିନରେ ଓଡ଼ିଶା ଡିଜିଟାଲ ମିଡ଼ିଆ ମହାସଂଘକୁ ଆହୁରି ଅଧିକ ଶକ୍ତିଶାଳୀ ଓ ସୁଦୃଢ଼ କରିବା ପାଇଁ ସମସ୍ତେ ସମବେତ ଭାବେ ବଜ୍ର ଶପଥ ନେଇଥିଲେ।

ଟିଟିଲାଗଡ଼ : ଦ୍ଵିତୀୟ ପ୍ରଜାୟ ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ ଭିତ୍ତି ପ୍ରସ୍ତର ସ୍ଥାପନ କାର୍ଯ୍ୟକ୍ରମ ଟିଟିଲାଗଡ ବ୍ଲକ ସିହିନି ଗ୍ରାମରେ ଅନୁଷ୍ଠିତ ହୋଇଯାଇଛି। ଉକ୍ତ ଉତ୍ସବରେ ମୁଖ୍ୟ ଅତିଥି ଭାବେ ମାନ୍ୟବର ବିଧାୟକ ଶ୍ରୀଯୁକ୍ତ ନବୀନ ଜୈନ,ଏବଂ ବିଶେଷ ଅତିଥି ଭାବେ ବଲାଙ୍ଗୀର ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଶ୍ରୀଯୁକ୍ତ ପ୍ରବୀର କୁମାର ପଣ୍ଡା, ଜିଲ୍ଲାପରିଷଦ ସଭ୍ୟା ଶ୍ରୀମତୀ ଗୀତା ବିଶି, ସ୍ଥାନୀୟ ସରପଞ୍ଚ ଶ୍ରୀ ବୀରବର ସାହୁ,ବ୍ଲକ ଉପାଧ୍ୟକ୍ଷ ଶ୍ରୀ ଜଗତରାମ ରଣା, ଏ ବି ଇ ଓ ଶ୍ରୀ ତ୍ରିଲୋଚନ ମାଝୀ,ପ୍ରଧାନ ଶିକ୍ଷୟତ୍ରୀ ସରିତା ବରିହା, ସି ଆର୍ ସି ସି ବାବଲୁ ଜାଲ, ପରିଚାଳନା କମିଟି ସଭାପତି ଶ୍ରୀ ନେପାଳ ଚନ୍ଦନ ମଞ୍ଚାସିନ ଥିଲେ। କିଶୋର ବନଛୋର , ପଦ୍ମ ମାଝୀ, ଅରୁଣ ପଟ୍ଟନାୟକ, ମୀନକେତନ ନନ୍ଦ, ଆଦିତ୍ୟ ସାହୁ, ରଜତ ଛତର, ଝରଣା ପାଣ୍ଡେ, ଘନଶ୍ୟାମ ପଧାନ, ସୁଶାନ୍ତ ମାଝୀ, ରୋମା ସୁନା ଓ ଅନ୍ୟାନ୍ୟ ସହଯୋଗ କରିଥିଲେ। ମୀନକେତନ ନନ୍ଦ ମଞ୍ଚ ପରିଚାଳନା କରୁଥିଲେ। ଏହି କାର୍ଯ୍ୟକ୍ରମରେ ପଞ୍ଚାୟତର ଉଦେପୁର, କୁମୁଡ଼ା, କେଣ୍ଡୁମୁଣ୍ଡି, ଚିତାଲୋଲ, ବଛାଯୁଝା ଗ୍ରାମରୁ ମଧ୍ୟ ଅନେକ ଅଭିଭାବକ ଓ ମାନ୍ୟଗଣ୍ୟ ବ୍ୟକ୍ତିମାନେ ଉପସ୍ଥିତ ଥିଲେ। ଶେଷରେ ସି ଆର୍ ସି ସି ଗୌରୀ ମୁଣ୍ଡା ସମସ୍ତଙ୍କୁ ଧନ୍ୟବାଦ୍ ଜଣାଇ ସଭାକାର୍ଯ୍ୟ ଶେଷ କରିଥିଲେ l

ସିନାପାଲି: ବୋଡ଼େନ, ନୂଆପଡ଼ା ଜିଲ୍ଲା ବୋଡ଼େନ ଥାନା ଅନ୍ତର୍ଗତ ବୋଲଧାମାଳ ନିକଟ ବିଜୁ ଏକ୍ସପ୍ରେସ ୱେରେ ଶନିବାର ଏକ ହୃଦୟବିଦାରକ ସଡ଼କ ଦୁର୍ଘଟଣା ଘଟି ଜଣେ ଯୁବକଙ୍କ ଜୀବନ ନେଇଥିବାବେଳେ ଅନ୍ୟ ୩ ଜଣ ଗୁରୁତର ଆହତ ହୋଇଛନ୍ତି । ଦୁର୍ଘଟଣା ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି । ମୃତକ ହେଲେ କଳାହାଣ୍ଡି ଜିଲ୍ଲା ଧର୍ମଗଡ଼ ଥାନା ଅନ୍ତର୍ଗତ ତମ୍ବାଛଡ଼ା ଗ୍ରାମର ତପନ ପାତ୍ର । ସୂଚନା ଅନୁଯାୟୀ, ତପନ ପାତ୍ର ତାଙ୍କ ଭାଇ ସପନ ପାତ୍ର, ଖଇରପଦର ଗ୍ରାମର ଚନ୍ଦନ ପାତ୍ର ଓ କୋକସରା ଥାନା ଅନ୍ତର୍ଗତ ଝାରକୁମୁଡାମାଲ ଗ୍ରାମର ସ୍ମରଣ ପଣ୍ଡାଙ୍କ ସହ ଏକ କାର୍‌ ଯୋଗେ ଧର୍ମଗଡ଼ରୁ ଛତିଶଗଡ଼ର ରାୟପୁର ଅଭିମୁଖେ ଯାଉଥିଲେ । ତେବେ ବୋଲଧାମାଳ ନିକଟରେ ପହଞ୍ଚିବା ପରେ କାର୍‌ଟି ହଠାତ୍ ଭାରସାମ୍ୟ ହରାଇ ରାସ୍ତା ପାର୍ଶ୍ୱରେ ଦୁର୍ଘଟଣାଗ୍ରସ୍ତ ହୋଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ କାର୍‌ଟି ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇପଡ଼ିଥିଲା । ଦୁର୍ଘଟଣାଗ୍ରସ୍ତ ଗାଡ଼ିର ନମ୍ବର CG-04-MW-3974 ବୋଲି ଜଣାପଡ଼ିଛି । ଘଟଣା ପରେ ସ୍ଥାନୀୟ ଲୋକମାନେ ତୁରନ୍ତ ଉଦ୍ଧାର କାର୍ଯ୍ୟରେ ସାମିଲ ହୋଇ ଆହତମାନଙ୍କୁ କୋମନା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ । ସେଠାରେ ଡାକ୍ତର ତପନ ପାତ୍ରଙ୍କୁ ମୃତ ଘୋଷଣା କରିଥିବାବେଳେ ଅନ୍ୟ ତିନି ଜଣଙ୍କୁ ପ୍ରାଥମିକ ଚିକିତ୍ସା ପରେ ଉନ୍ନତ ଚିକିତ୍ସା ପାଇଁ ପରାମର୍ଶ ଦିଆଯାଇଛି । ଖବର ପାଇ ବୋଡ଼େନ ଥାନା ପୋଲିସ ତୁରନ୍ତ କୋମନା ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚି ମୃତଦେହକୁ ଜବତ କରିଥିଲା । ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କ ହସ୍ତରେ ସମର୍ପଣ କରାଯାଇଛି । ଏନେଇ ଏକ ମାମଲା ରୁଜୁ କରି ପୋଲିସ ତଦନ୍ତ ଜାରି ରଖିଛି । ଅନ୍ୟପକ୍ଷେ ରାସ୍ତାର ବେହାଲ ଅବସ୍ଥାକୁ ନେଇ ବଢ଼ୁଛି କ୍ଷୋଭ l ଏହି ଦୁର୍ଘଟଣା ପରେ ପୁଣିଥରେ ବିଜୁ ଏକ୍ସପ୍ରେସ ୱେର ଶୋଚନୀୟ ଅବସ୍ଥା ଚର୍ଚ୍ଚାକୁ ଆସିଛି । ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ରାସ୍ତାର ବିଭିନ୍ନ ସ୍ଥାନରେ ପିଚୁ ଦବିଯାଇ ବଡ଼ ବଡ଼ ଖାଲଖମା ସୃଷ୍ଟି ହୋଇଛି । ଫଳରେ ଦୈନିକ ଯାତାୟାତ ବିପଦପୂର୍ଣ୍ଣ ହୋଇପଡ଼ିଛି ଏବଂ ବାରମ୍ବାର ଦୁର୍ଘଟଣା ଘଟୁଛି । ଏତେ ସବୁ ଦୁର୍ଘଟଣା ସତ୍ତ୍ୱେ ସମ୍ପୃକ୍ତ ବିଭାଗ ପକ୍ଷରୁ ରାସ୍ତା ମରାମତି କିମ୍ବା ସୁରକ୍ଷାମୂଳକ ପଦକ୍ଷେପ ନିଆଯାଉ ନଥିବାରୁ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଦୁର୍ଘଟଣାପ୍ରବଣ ଏହି ରାସ୍ତାର ତୁରନ୍ତ ମରାମତି ସହ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବାକୁ ସାଧାରଣ ଲୋକ ଦାବି କରିଛନ୍ତି ।

ସିନାପାଲି, ଖେଳ କେବଳ ବିନୋଦନର ମାଧ୍ୟମ ନୁହେଁ, ବରଂ ଶୃଙ୍ଖଳା, ଭାଇଚାରା ଓ ସୁସ୍ଥ ସମାଜ ଗଠନର ଏକ ସଶକ୍ତ ଅସ୍ତ୍ର । ଏହି ମହାନ ବାର୍ତ୍ତାକୁ ନେଇ ସିନାପାଲି MMFC ପକ୍ଷରୁ ଆୟୋଜିତ “୨ୟ MMFC ଫୁଟସାଲ ଟୁର୍ଣ୍ଣାମେଣ୍ଟ-୨୦୨୬” ଶନିବାର ସିନାପାଲି ପିଏମଶ୍ରୀ ଉଚ୍ଚ ବିଦ୍ୟାଳୟ ଖେଳ ପଡ଼ିଆରେ ଆଡ଼ମ୍ବରପୂର୍ଣ୍ଣ ଭାବେ ଉଦ୍‌ଘାଟିତ ହୋଇଯାଇଛି । ଚାରି ଦିନିଆ ଏହି ଫୁଟସଲ ମହାକୁମ୍ଭରେ ସିନାପାଲି, କାପସି, ପଲସାପଡ଼ା, ଚଟିଆଗୁଡ଼ା, ଭେଲ୍ଲା, କରଙ୍ଗାମାଲ, ଆମଗୁଡ଼ା ସମେତ ମୋଟ ୮ଟି ଦଳ ଅଂଶଗ୍ରହଣ କରୁଛନ୍ତି । ଗ୍ରାମାଞ୍ଚଳର ଯୁବ ଖେଳାଳିମାନଙ୍କ ପ୍ରତିଭା ବିକାଶ ଓ ଖେଳ ପ୍ରତି ଆଗ୍ରହ ସୃଷ୍ଟି ଉଦ୍ଦେଶ୍ୟରେ ଆୟୋଜିତ ଏହି ଟୁର୍ଣ୍ଣାମେଣ୍ଟ ଅଞ୍ଚଳରେ ବେଶ ଉତ୍ସାହ ସୃଷ୍ଟି କରିଛି । ଉଦ୍‌ଘାଟନୀ ସମାରୋହରେ ସିନାପାଲି ବନାଞ୍ଚଳର ରେଞ୍ଜର କାମେଶ୍ୱର ତାଣ୍ଡି ମୁଖ୍ୟ ଅତିଥି ଭାବେ ଯୋଗଦେଇ ଟୁର୍ଣ୍ଣାମେଣ୍ଟକୁ ଉଦ୍‌ଘାଟନ କରିଥିଲେ । ସେ ନିଜ ଅଭିଭାଷଣରେ ଯୁବପିଢ଼ିଙ୍କୁ ଖେଳ ମାଧ୍ୟମରେ ସୁସ୍ଥ ଜୀବନଶୈଳୀ ଆପଣେଇବା ସହ ନିଶାମୁକ୍ତ ସମାଜ ଗଠନରେ ଅଗ୍ରଣୀ ଭୂମିକା ନେବାକୁ ଆହ୍ୱାନ କରିଥିଲେ । ସମ୍ମାନିତ ଅତିଥି ଭାବେ ମିନା ଘିଭେଲା, ମନୀଷ ପଟେଲ, ଖୁଟୁରାମ ସୁନାନୀ, ମନୋରଞ୍ଜନ ମେହେର, ଶଶିଭୂଷଣ ମାଝୀ, ମଧୁସୂଦନ ମାଝୀ, ରଜନୀ ମାଝୀ, ପୁସ୍ତମ ମାଝୀ, ନରେଶ ମାଝୀ, ଲମ୍ବୋଦର ମାଝୀ, ପୀତାମ୍ବର ମାଝୀ, ସୁଶାନ୍ତ କୁମାର ଓ ଦିଲ୍ଲୀପ କୁମାର ପ୍ରମୁଖ ଉପସ୍ଥିତ ରହି ଆୟୋଜକମାନଙ୍କୁ ଉତ୍ସାହିତ କରିଥିଲେ । ଫୁଟସଲର ନିୟମ ଅନୁଯାୟୀ ଛୋଟ ପଡ଼ିଆରେ ୭ ଜଣିଆ ଦଳ ସହିତ ମ୍ୟାଚ ଖେଳାଯାଉଛି । ଅଫସାଇଡ, ଫାଉଲ ଓ ଏୟାର ସଟ୍ ନିୟମ ନଥିବାବେଳେ ଅସୀମିତ ପରିବର୍ତ୍ତନ ସୁବିଧା ଖେଳକୁ ଅଧିକ ରୋମାଞ୍ଚକର କରିଛି । ଉଦ୍‌ଘାଟନୀ ଦିବସର ପ୍ରଥମ ମ୍ୟାଚରେ କାପସି SCFA ଓ ଚଟିଆଗୁଡ଼ା ଫରେଷ୍ଟ ମଧ୍ୟରେ ହୋଇଥିବା ରୋମାଞ୍ଚକର ମୁକାବିଲା ଟାଇ ରହିବା ପରେ ପେନାଲ୍ଟି ସୁଟ୍‌ଆଉଟ୍‌ରେ କାପସି ୩-୨ ଗୋଲରେ ବିଜୟୀ ହୋଇଥିଲା । ସେହିପରି ଦ୍ୱିତୀୟ ମ୍ୟାଚରେ ଭେଲ୍ଲା ଓ ସିନାପାଲି ମଧ୍ୟରେ ଜବରଦସ୍ତ ଲଢ଼େଇ ପରେ ପେନାଲ୍ଟି ସୁଟ୍‌ଆଉଟ୍‌ରେ ଭେଲ୍ଲା ଦଳ ୫-୪ ଗୋଲରେ ବିଜୟ ହାସଲ କରିଥିଲା । ଉଭୟ ମ୍ୟାଚ ଦର୍ଶକଙ୍କ ମଧ୍ୟରେ ଭରପୂର ଉତ୍ସାହ ଓ ରୋମାଞ୍ଚ ସୃଷ୍ଟି କରିଥିଲା । ରିକୁ ମାଝୀ, ଚନ୍ଦ୍ର ମାଝୀ, ସୁମନ, ବିହାରୀଲାଲ ମସରା ଓ ସୁବାଷ କୁଲ୍ଲୁ ରେଫରି ଭାବେ ଖେଳକୁ ସୁଚାରୁ ଭାବେ ପରିଚାଳନା କରିଥିବାବେଳେ ପ୍ରକାଶ ପାତ୍ର ଓ ଭାସ୍କର ମାଝୀଙ୍କ ଆକର୍ଷଣୀୟ ଧାରାବିବରଣୀ ଦର୍ଶକଙ୍କ ଉତ୍ସାହକୁ ଦ୍ୱିଗୁଣିତ କରିଥିଲା । ଗ୍ରାମାଞ୍ଚଳର ଯୁବକମାନଙ୍କ ମଧ୍ୟରେ ଲୁଚି ରହିଥିବା କ୍ରୀଡ଼ା ପ୍ରତିଭାକୁ ଆଗକୁ ଆଣିବା ଏବଂ ଏକ ସୁସ୍ଥ, ସଚେତନ ଓ ସକାରାତ୍ମକ ସମାଜ ଗଠନ ଦିଗରେ MMFC ର ଏହି ପ୍ରୟାସକୁ ସବୁ ମହଲରୁ ପ୍ରଶଂସା କରାଯାଉଛି ।