Web News

ଗଞ୍ଜାମ, ଖଲ୍ଲିକୋଟ: ଜଣେ ଛାତ୍ରୀଙ୍କୁ କେତେକ ଯୁବକ ଅଶୋଭନୀୟ ଟିପ୍ପଣୀ ଦେବାକୁ ବିରୋଧ କରିବା ଜଣେ ଯୁବ ଶିକ୍ଷକଙ୍କୁ ମହଙ୍ଗା ପଡ଼ିଛି। ଏହାକୁ କେନ୍ଦ୍ର କରି ଜଣେ ଯୁବକ କାଠ ବାଡ଼ିରେ ଶିକ୍ଷକଙ୍କ ମୁଣ୍ଡକୁ ଆକ୍ରମଣ କରିଥିବା ଅଭିଯୋଗ ହୋଇଛି। ଆକ୍ରମଣରେ ଶିକ୍ଷକ ଗୁରୁତର ଆହତ ହୋଇ ବର୍ତ୍ତମାନ ବ୍ରହ୍ମପୁରସ୍ଥିତ ଏମ୍‌କେସିଜି ମେଡିକାଲ କଲେଜ ଓ ହସ୍ପିଟାଲରେ ଚିକିତ୍ସାଧୀନ ଥିବା ଜଣାପଡ଼ିଛି। ଘଟଣା ସମ୍ପର୍କରେ ବାଲୁକେଶ୍ୱର ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ସଞ୍ଜୟ କୁମାର ବେହେରାଙ୍କ ଲିଖିତ ଏତଲା ଆଧାରରେ ଖଲ୍ଲିକୋଟ ଥାନାରେ କେସ୍ ନଂ-୭୧୬, ତାରିଖ ୦୮.୦୯.୨୦୨୬ରେ ଭାରତୀୟ ନ୍ୟାୟ ସଂହିତା (ବିଏନ୍‌ଏସ୍‌)ର ଧାରା ୧୨୬(୨)/୧୦୯(୧)/୧୩୨/୧୨୧(୧)/୧୨୧(୨) ଅନୁଯାୟୀ ମାମଲା ରୁଜୁ ହୋଇଛି। ପୋଲିସ ସୂଚନା ଅନୁସାରେ, ସେପ୍ଟେମ୍ବର ୮ ତାରିଖ ସକାଳ ପ୍ରାୟ ୯ଟା ୪୫ ମିନିଟ୍‌ ସମୟରେ ବିଦ୍ୟାଳୟର ଶିକ୍ଷକ ଭବାନୀ ପ୍ରସାଦ ଦାସ ବିଦ୍ୟାଳୟ ଫାଟକ ନିକଟରେ ଠିଆ ହୋଇଥିଲେ। ଏହି ସମୟରେ ଜଣେ ଯୁବକ କାଠ ବାଡ଼ି ସାହାଯ୍ୟରେ ତାଙ୍କ ମୁଣ୍ଡକୁ ଆକ୍ରମଣ କରିଥିଲା। ଆକ୍ରମଣ ପରେ ଶିକ୍ଷକ ଘଟଣାସ୍ଥଳରେ ଅଚେତ ହୋଇ ପଡ଼ିଥିଲେ। ତାଙ୍କୁ ତୁରନ୍ତ ଖଲ୍ଲିକୋଟ ଚିକିତ୍ସାଳୟକୁ ନିଆଯାଇଥିଲା। ତେବେ ମୁଣ୍ଡରେ ଗୁରୁତର ଆଘାତ ହୋଇଥିବାରୁ ଡାକ୍ତର ତାଙ୍କୁ ବ୍ରହ୍ମପୁରସ୍ଥିତ ଏମ୍‌କେସିଜି ମେଡିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତର କରିଥିଲେ। ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଘଟଣାର କିଛି ଦିନ ପୂର୍ବରୁ କେତେକ ଯୁବକ ବିଦ୍ୟାଳୟର ଜଣେ ଛାତ୍ରୀଙ୍କୁ ଅଶୋଭନୀୟ ଟିପ୍ପଣୀ ଦେଉଥିଲେ। ଏହାକୁ ଶିକ୍ଷକ ଭବାନୀ ପ୍ରସାଦ ଦାସ ବିରୋଧ କରି ସମ୍ପୃକ୍ତ ଯୁବକମାନଙ୍କୁ ତାଗିଦ କରିଥିଲେ। ଏହାର ପ୍ରତିଶୋଧ ନେବା ଉଦ୍ଦେଶ୍ୟରେ ଶିକ୍ଷକଙ୍କ ଉପରେ ଆକ୍ରମଣ ହୋଇଥିବା ପୋଲିସ ତଦନ୍ତରୁ ଜଣାପଡ଼ିଛି। ଘଟଣାରେ ସମ୍ପୃକ୍ତ ଅଭିଯୁକ୍ତ ତୋଟାଗାଁର ବାଦଲ ପାହାନ (୧୯)ଙ୍କୁ ଖଲ୍ଲିକୋଟ ପୋଲିସ ଗିରଫ କରି ମାନ୍ୟବର ଅଦାଲତକୁ ଚାଲାଣ କରିଛି। ଅନ୍ୟପକ୍ଷରେ ମାମଲାର ତଦନ୍ତ ଜାରି ରହିଥିବା ପୋଲିସ ପକ୍ଷରୁ ସୂଚନା ମିଳିଛି।

ଭୁବନେଶ୍ୱର: ଡ୍ରେନ୍‌ ସଫା କରିବା ପରେ ବାହାରିଥିବା ମଇଳା ଓ ପଙ୍କକୁ ରାସ୍ତା ଉପରେ ଗଦା କରି ରଖାଯାଇଥିବା ଦୃଶ୍ୟ ସାମ୍ନାକୁ ଆସିଛି। ଫଳରେ ସ୍ଥାନୀୟ ଲୋକଙ୍କ ଯାତାୟାତରେ ସମସ୍ୟା ସୃଷ୍ଟି ହେବା ସହ ପରିବେଶ ମଧ୍ୟ ଅପରିଷ୍କାର ହୋଇପଡ଼ିଛି। ଡ୍ରେନ୍‌ରୁ ମଇଳା କାଢ଼ିବା ପରେ ତାହାକୁ ତୁରନ୍ତ ଉଠାଇ ନେବା ପରିବର୍ତ୍ତେ ରାସ୍ତା ଉପରେ ପକାଇ ରଖାଯାଇଥିବାରୁ ସାଧାରଣ ଲୋକ ଅସନ୍ତୋଷ ପ୍ରକାଶ କରିଛନ୍ତି। ସହରର ସ୍ୱଚ୍ଛତା ଓ ଡ୍ରେନେଜ୍ ବ୍ୟବସ୍ଥା BMCର ଦାୟିତ୍ୱ ମଧ୍ୟରେ ରହିଛି। ଲୋକଙ୍କ ପ୍ରଶ୍ନ—ଡ୍ରେନ୍ ସଫା କରାଯାଉଛି, କିନ୍ତୁ ରାସ୍ତା ଉପରେ ପଡ଼ିଥିବା ମଇଳା କେବେ ଉଠିବ? BMC କର୍ତ୍ତୃପକ୍ଷଙ୍କ ନିଘା କେବେ ପଡ଼ିବ? ସ୍ଥାନୀୟ ଲୋକେ ତୁରନ୍ତ ମଇଳା ହଟାଇ ରାସ୍ତାକୁ ସଫା କରିବା ସହ ଏଭଳି ଅବ୍ୟବସ୍ଥା ଯେପରି ପୁଣି ନହୁଏ, ସେଥିପାଇଁ ଦାବି କରିଛନ୍ତି।

ଭୁବନେଶ୍ୱର: ଦିନେ ନିଜ ପରିବାରକୁ ସୁଖରେ ରଖିବା ପାଇଁ ଖଟିଥିଲେ। ପୁଅ, ବୋହୂ ଓ ପିଲାମାନଙ୍କ ଭବିଷ୍ୟତ ପାଇଁ ନିଜ ସୁଖକୁ ଭୁଲି ଜୀବନସାରା ସଂଘର୍ଷ କରିଥିଲେ। ହେଲେ ଆଜି ବୟସର ଅପରାହ୍ନରେ ସେହି ବୃଦ୍ଧଙ୍କ ଜୀବନ ଅତ୍ୟନ୍ତ ଦୁଃଖଦ ପରିସ୍ଥିତିରେ ପହଞ୍ଚିଥିବା ଅଭିଯୋଗ ହୋଇଛି। ଭୁବନେଶ୍ୱର ନୟାପଲ୍ଲୀ ଅଞ୍ଚଳର ମହିଳା ଟାଙ୍କି ନିକଟରେ ରହୁଥିବା ଏହି ବୃଦ୍ଧଙ୍କୁ ନେଇ ସାମ୍ନାକୁ ଆସିଛି ଏକ ହୃଦୟସ୍ପର୍ଶୀ ଚିତ୍ର। ସ୍ଥାନୀୟ ଲୋକଙ୍କ କହିବା ଅନୁସାରେ, ବୃଦ୍ଧଙ୍କ ପୁଅ-ବୋହୂ ତାଙ୍କର ଯତ୍ନ ନେଉନଥିବାରୁ ସେ ଅସହାୟ ହୋଇପଡ଼ିଛନ୍ତି। ଜୀବିକା ପାଇଁ ରାତି ପାହିଲେ ଘର ଘର ବୁଲି ଭିକ୍ଷା ମାଗୁଥିବା କୁହାଯାଉଛି। ଯେଉଁ ବାପା ନିଜ ପରିବାରକୁ ସୁଖରେ ରଖିବା ପାଇଁ ଜୀବନର ସର୍ବସ୍ୱ ଦେଇଥିଲେ, ଆଜି ସେହି ବାପାଙ୍କୁ ଏଭଳି ଅବସ୍ଥାରେ ଦେଖି ଅନେକଙ୍କ ମନରେ ପ୍ରଶ୍ନ ଉଠୁଛି—ବୃଦ୍ଧ ବାପା-ମାଆଙ୍କ ପ୍ରତି ଆମର ଦାୟିତ୍ୱ କେଉଁଠି? ଏହି ଘଟଣା ପ୍ରତି ପ୍ରଶାସନ, ସମାଜସେବୀ ଓ ସାଧାରଣ ଲୋକେ ଦୃଷ୍ଟି ଦେଇ ବୃଦ୍ଧଙ୍କୁ ଆବଶ୍ୟକ ସହାୟତା ଯୋଗାଇଦେବାକୁ ଦାବି ଉଠିଛି।

ନୂଆପଡ଼ା, ତା. ୧୦/୦୯: ମାନବିକତା ଓ ଜନସେବାର ଏକ ଉଜ୍ଜ୍ୱଳ ଉଦାହରଣ ସୃଷ୍ଟି କରିଛନ୍ତି ନୂଆପଡ଼ା ଜିଲ୍ଲାପାଳ ମଧୁସୂଦନ ଦାଶ। ଆଜି ଜିଲ୍ଲା ଅଦାଲତ ନିକଟରେ ଜଣେ ଯୁବକ ଦୁର୍ଘଟଣାରେ ଆହତ ହୋଇ ରାସ୍ତାରେ ପଡ଼ିଥିବା ଦେଖି ଜିଲ୍ଲାପାଳ ତତ୍‌କ୍ଷଣାତ୍‌ ନିଜ ଗାଡ଼ି ଅଟକାଇଥିଲେ। ସେ ଘଟଣାସ୍ଥଳରେ ପହଞ୍ଚି ଆହତ ଯୁବକଙ୍କ ଅବସ୍ଥା ବୁଝିବା ସହ ତାଙ୍କୁ ତୁରନ୍ତ ଉଦ୍ଧାର କରି ଆମ୍ବୁଲାନ୍ସ ଯୋଗେ ଚିକିତ୍ସାଳୟକୁ ପଠାଇବାର ବ୍ୟବସ୍ଥା କରିଥିଲେ। ଏଥିସହ ଜିଲ୍ଲା ମୁଖ୍ୟ ଚିକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀ (CDMO)ଙ୍କ ସହ ଫୋନ୍‌ ଯୋଗେ ଆଲୋଚନା କରି ଆହତ ଯୁବକଙ୍କୁ ତୁରନ୍ତ ଆବଶ୍ୟକ ଚିକିତ୍ସା ସେବା ଯୋଗାଇଦେବାକୁ ନିର୍ଦ୍ଦେଶ ଦେଇଥିଲେ। ତାଙ୍କ ପରିବାରବର୍ଗଙ୍କୁ ମଧ୍ୟ ସୂଚନା ଦେବା ପାଇଁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ। ଜିଲ୍ଲାପାଳଙ୍କ ଏହି‌ ପଦକ୍ଷେପ ଓ ମାନବିକ ଆଭିମୁଖ୍ୟ ସାଧାରଣରେ ପ୍ରଶଂସା ପାଇଛି। ଜଣେ ପ୍ରଶାସନିକ ଅଧିକାରୀ ଭାବେ ନିଜ କର୍ତ୍ତବ୍ୟ ସହିତ ମାନବିକତାକୁ ସର୍ବାଗ୍ରେ ରଖି ଜିଲ୍ଲାପାଳଙ୍କ ଏହି ପଦକ୍ଷେପ ବିଭିନ୍ନ ମହଲରୁ ପ୍ରଶଂସା ଲାଭ କରିଛି।।

କୋକସରା: ୧୦/୦୯ — ଦୀର୍ଘଦିନ ଧରି ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଛି ଗମ୍ଭାରୀଗୁଡା ପ୍ରାଣୀ ସମ୍ପଦ କେନ୍ଦ୍ର। କେନ୍ଦ୍ରର ଛାତ ଓ କୋଠାର ଅବସ୍ଥା ଏବେ ବିପଦସଙ୍କୁଳ ହୋଇପଡ଼ିଥିବାରୁ ଯେକୌଣସି ସମୟରେ ଅଘଟଣ ଘଟିବା ଆଶଙ୍କା ଦେଖାଦେଇଛି। ହେଲେ ଏହାପ୍ରତି ପ୍ରଶାସନର ଦୃଷ୍ଟି ପଡ଼ୁନଥିବା ନେଇ ସ୍ଥାନୀୟ ମହଲରେ ଅସନ୍ତୋଷ ପ୍ରକାଶ ପାଇଛି। କଳାହାଣ୍ଡି ଜିଲ୍ଲା କୋକସରା ବ୍ଲକ ଅଧୀନ ଗମ୍ଭାରୀଗୁଡା ମୁଖ୍ୟ ଡିଗ୍ରୀ ଛକରେ ରହିଛି ଏହି ପ୍ରାଣୀ ସମ୍ପଦ କେନ୍ଦ୍ର। ବିଭିନ୍ନ କାର୍ଯ୍ୟରେ ପ୍ରତିଦିନ ଏଠାକୁ ଲୋକଙ୍କ ଯାତାୟାତ ଲାଗି ରହିଥାଏ। କିନ୍ତୁ କେନ୍ଦ୍ରର ଭୌତିକ ଅବସ୍ଥା ଏବେ ଚିନ୍ତାଜନକ ହୋଇପଡ଼ିଛି। କେନ୍ଦ୍ରର ଛାତରୁ ଧୀରେ ଧୀରେ ସିମେଣ୍ଟ ଅତଡ଼ା ଖସୁଥିବା ବେଳେ ଛାତରେ ବ୍ୟବହୃତ ଲୁହା ରଡ୍‌ଗୁଡ଼ିକ ମଧ୍ୟ ଦୁର୍ବଳ ହୋଇ ତଳକୁ ଓହ୍ଲାଇ ଆସିଛି। ଅନେକ ସ୍ଥାନରେ ଛାତର ସିମେଣ୍ଟ ଖସିଯାଇ ଭିତର ଗଠନ ସ୍ପଷ୍ଟ ଦେଖାଯାଉଛି। ଏଭଳି ବିପଦପୂର୍ଣ୍ଣ ପରିବେଶରେ କର୍ମଚାରୀ ଓ ସାଧାରଣ ଲୋକଙ୍କ ସୁରକ୍ଷା ନେଇ ପ୍ରଶ୍ନ ଉଠିଛି। ସ୍ଥାନୀୟ ଲୋକଙ୍କ କହିବାନୁସାରେ, ଦୀର୍ଘଦିନ ହେଲା କୋଠାର ମରାମତି କିମ୍ବା ପୁନରୁଦ୍ଧାର କରାଯାଇନଥିବାରୁ ଏହାର ସ୍ଥିତି ଦିନକୁ ଦିନ ଅଧିକ ଦୁର୍ବଳ ହେଉଛି। କେତେବେଳେ ଛାତ ଭୁଶୁଡ଼ି ପଡ଼ିବ, ତାହା କହିହେବ ନାହିଁ। ତେଣୁ ବଡ଼ ଅଘଟଣ ଘଟିବା ପୂର୍ବରୁ ପ୍ରଶାସନ ଏହି କୋଠାର ସ୍ଥିତି ଯାଞ୍ଚ କରି ଆବଶ୍ୟକ ପଦକ୍ଷେପ ନେବା ଜରୁରୀ ବୋଲି ମତ ପ୍ରକାଶ ପାଇଛି। ଏନେଇ ପ୍ରାଣୀ ସମ୍ପଦ କର୍ମଚାରୀଙ୍କୁ ପଚାରିବାରୁ, ବର୍ତ୍ତମାନ ପିଇଓ କ୍ୱାର୍ଟରକୁ ଅସ୍ଥାୟୀ ଭାବେ ପ୍ରାଣୀ ସମ୍ପଦ କେନ୍ଦ୍ର ସ୍ଥାନାନ୍ତର କରାଯାଇଥିବା ସେମାନେ ସୂଚନା ଦେଇଥିଲେ। ତେବେ ପୁରୁଣା କୋଠାର ଭବିଷ୍ୟତ ନେଇ ପ୍ରଶ୍ନ ଉଠିଛି। ପ୍ରଶାସନ ତୁରନ୍ତ ଘଟଣାସ୍ଥଳ ପରିଦର୍ଶନ କରି କୋଠାର ସୁରକ୍ଷା ଯାଞ୍ଚ କରିବା ସହ ଆବଶ୍ୟକ ମରାମତି କିମ୍ବା ନୂତନ ଗୃହ ନିର୍ମାଣ ପାଇଁ ପଦକ୍ଷେପ ନେବାକୁ ସ୍ଥାନୀୟ ଲୋକେ ଦାବି କରିଛନ୍ତି।

ଧାମନଗର: ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ଧାମନଗରର ବରିଷ୍ଠ ସାମ୍ବାଦିକ ବାସୁଦେବ ତ୍ରିପାଠୀ ଓ ତାଙ୍କ ଧର୍ମପତ୍ନୀ ଗୁରୁତର ଆହତ ହୋଇଥିବା ଖବର ସାମ୍ବାଦିକ ମହଲ ସମେତ ଧାମନଗର ଅଞ୍ଚଳବାସୀଙ୍କ ମଧ୍ୟରେ ଗଭୀର ଉଦ୍‌ବେଗ ଓ ଚିନ୍ତା ସୃଷ୍ଟି କରିଛି। ସୂଚନା ଅନୁଯାୟୀ, ବାସୁଦେବ ତ୍ରିପାଠୀ ଓ ତାଙ୍କ ଧର୍ମପତ୍ନୀ ବାଲେଶ୍ୱରରୁ ନିଜ କାର୍ଯ୍ୟ ସାରି କାର୍‌ ଯୋଗେ ଧାମନଗର ଫେରୁଥିଲେ। ଏହି ସମୟରେ ମଇଦାପୁର ନିକଟରେ ଆଗରେ ଯାଉଥିବା ଏକ ଟଲର ହଠାତ୍‌ ବ୍ରେକ୍‌ ମାରିଥିଲା। ଫଳରେ ପଛରେ ଆସୁଥିବା କାର୍‌ର ଚାଳକ ନିୟନ୍ତ୍ରଣ ହରାଇ ଟଲରର ପଛପଟେ ଧକ୍କା ଦେଇଥିଲେ। ଦୁର୍ଘଟଣାରେ କାର୍‌ରେ ଥିବା ବାସୁଦେବ ତ୍ରିପାଠୀ ଓ ତାଙ୍କ ଧର୍ମପତ୍ନୀ ଗୁରୁତର ଆହତ ହୋଇଥିଲେ। ଘଟଣା ପରେ ସ୍ଥାନୀୟ ଲୋକଙ୍କ ସହାୟତାରେ ଉଭୟଙ୍କୁ ତୁରନ୍ତ ଉଦ୍ଧାର କରାଯାଇ ପ୍ରଥମେ ଭଦ୍ରକ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତେବେ ବାସୁଦେବ ତ୍ରିପାଠୀଙ୍କ ଅବସ୍ଥା ଗୁରୁତର ଥିବାରୁ ଚିକିତ୍ସକଙ୍କ ପରାମର୍ଶକ୍ରମେ ତାଙ୍କୁ ଅଧିକ ଉନ୍ନତ ଚିକିତ୍ସା ପାଇଁ କଟକର ଅଶ୍ୱିନୀ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ସେଠାରେ ତାଙ୍କର ଚିକିତ୍ସା ଚାଲିଥିବା ଜଣାପଡ଼ିଛି। ବାସୁଦେବ ତ୍ରିପାଠୀଙ୍କ ଦୁର୍ଘଟଣା ଖବର ପ୍ରଚାର ହେବା ପରେ ଧାମନଗର ଅଞ୍ଚଳରେ ଶୋକ ଓ ଚିନ୍ତାର ବାତାବରଣ ସୃଷ୍ଟି ହୋଇଛି। ବିଭିନ୍ନ ମହଲରୁ ତାଙ୍କ ଆଶୁ ଆରୋଗ୍ୟ କାମନା କରାଯାଇଛି। ସେ ଓ ତାଙ୍କ ଧର୍ମପତ୍ନୀ ଶୀଘ୍ର ସୁସ୍ଥ ହୋଇ ଘରକୁ ଫେରନ୍ତୁ ବୋଲି ସାମ୍ବାଦିକ ମହଲ, ବନ୍ଧୁବର୍ଗ ଓ ଶୁଭେଚ୍ଛୁମାନେ ପ୍ରାର୍ଥନା କରିଛନ୍ତି। ଦୁର୍ଘଟଣାର ପ୍ରକୃତ କାରଣ ଓ ଘଟଣା ସମ୍ପର୍କରେ ଅଧିକ ତଥ୍ୟ ଜଣାପଡ଼ିବା ବାକି ରହିଛି।

*ଅନ୍ତର୍ଜାତୀୟ ଯୁବ ମହୋତ୍ସବ-୨୦୨୬ରେ ଭାରତକୁ ପ୍ରତିନିଧିତ୍ୱ ପାଇଁ ଆମନ୍ତ୍ରଣ* କଳାହାଣ୍ଡି/ ଭବାନୀପାଟଣା :- କଳାହାଣ୍ଡିର ମାଟିରୁ ନିଜ ଯାତ୍ରା ଆରମ୍ଭ କରି ଏବେ ଅନ୍ତର୍ଜାତୀୟ ମଞ୍ଚରେ ଭାରତର ସ୍ୱର ହେବାକୁ ଯାଉଛନ୍ତି କଳାହାଣ୍ଡିର ଯୁବ ପ୍ରତିଭା ଶୁଭଲକ୍ଷ୍ମୀ ଦାସ। ରୁଷିଆର ଏକାଟେରିନବର୍ଗ-ଏକ୍ସପୋରେ ସେପ୍ଟେମ୍ବର ୧୧ରୁ ୧୭ ତାରିଖ ପର୍ଯ୍ୟନ୍ତ ଆୟୋଜିତ ହେବାକୁ ଥିବା ଅନ୍ତର୍ଜାତୀୟ ଯୁବ ମହୋତ୍ସବ-୨୦୨୬ରେ ଭାରତକୁ ପ୍ରତିନିଧିତ୍ୱ କରିବା ପାଇଁ ଶୁଭଲକ୍ଷ୍ମୀଙ୍କୁ ଆନୁଷ୍ଠାନିକ ଭାବେ ଆମନ୍ତ୍ରଣ ମିଳିଛି। ଦେଶର ବିଭିନ୍ନ ପ୍ରାନ୍ତରୁ ଆସିଥିବା ଲକ୍ଷାଧିକ ଆବେଦନ ମଧ୍ୟରୁ ୧ ଲକ୍ଷ ୧୩ ହଜାରରୁ ଅଧିକ ଆବେଦନକାରୀଙ୍କ ମଧ୍ୟରୁ ଶୁଭଲକ୍ଷ୍ମୀଙ୍କ ଚୟନ ତାଙ୍କ ପ୍ରତିଭା, ଦକ୍ଷତା ଓ ଚିନ୍ତନଶୀଳତାର ଏକ ଉଜ୍ଜ୍ୱଳ ପ୍ରମାଣ ବୋଲି ମନେ କରାଯାଉଛି। ମହୋତ୍ସବରେ ଶୁଭଲକ୍ଷ୍ମୀ ‘ପ୍ରଗତି’ ନାମକ ଏକ ସ୍ୱତନ୍ତ୍ର ପ୍ରକଳ୍ପ ଉପସ୍ଥାପନ କରିବେ। ଭାରତ ଓ ରୁଷିଆ ମଧ୍ୟରେ ଯୁବ ସଂପୃକ୍ତି, ସାଂସ୍କୃତିକ ଆଦାନପ୍ରଦାନ ଓ ଲୋକ-ଲୋକ ସମ୍ପର୍କକୁ ଆହୁରି ସୁଦୃଢ଼ କରିବା ଏହି ପ୍ରକଳ୍ପର ମୁଖ୍ୟ ଉଦ୍ଦେଶ୍ୟ। ପାରମ୍ପରିକ କୂଟନୈତିକ ସମ୍ପର୍କ ସହ ଯୁବ କୂଟନୀତି କିପରି ଦୁଇ ଦେଶ ମଧ୍ୟରେ ଏକ ସକାରାତ୍ମକ ଓ ଦୃଢ଼ ସେତୁ ନିର୍ମାଣ କରିପାରେ, ସେ ଦିଗରେ ମଧ୍ୟ ‘ପ୍ରଗତି’ ନୂଆ ଚିନ୍ତାର ଦ୍ୱାର ଖୋଲିବ ବୋଲି ଆଶା କରାଯାଉଛି। ଶୁଭଲକ୍ଷ୍ମୀଙ୍କ କହିବାନୁଯାୟୀ, ଏହି ସୁଯୋଗ ତାଙ୍କ ପାଇଁ କେବଳ ଭାରତର ପ୍ରତିନିଧିତ୍ୱ କରିବାର ଅବସର ନୁହେଁ; ବରଂ ଏଭଳି ଏକ ଯୁବପିଢ଼ିର ପ୍ରତିନିଧିତ୍ୱ, ଯିଏ ଆଲୋଚନା, ସଂସ୍କୃତି ଓ ପରସ୍ପର ବୁଝାମଣା ମାଧ୍ୟମରେ ବିଶ୍ୱର ଦେଶଗୁଡ଼ିକୁ ଆହୁରି ନିକଟତର କରିବାରେ ବିଶ୍ୱାସ କରେ। ‘ପ୍ରଗତି’ ମାଧ୍ୟମରେ ଭାରତ ଓ ରୁଷିଆ ମଧ୍ୟରେ ଯୁବପିଢ଼ି ଏକ ସାର୍ଥକ ସେତୁ ଭାବେ କାର୍ଯ୍ୟ କରିପାରିବ ବୋଲି ସେ ଆଶାବାଦୀ। ଏହି ବିଶାଳ ଯୁବ ମହୋତ୍ସବରେ ପ୍ରଶାସନ, ଶିକ୍ଷା, ବିଜ୍ଞାନ, କଳା, ଉଦ୍ୟୋଗ ଓ ପ୍ରଯୁକ୍ତିବିଦ୍ୟା ସମେତ ବିଭିନ୍ନ କ୍ଷେତ୍ରର ଯୁବ ନେତୃତ୍ୱ ଏକାଠି ହେବେ। ବିଶ୍ୱର ୧୯୧ଟି ଦେଶରୁ ପ୍ରାୟ ୧୦ ହଜାର ଯୁବ ପ୍ରତିନିଧି ଏଥିରେ ଯୋଗଦେବାର କାର୍ଯ୍ୟକ୍ରମ ରହିଛି। ଜିଲ୍ଲାସ୍ତରରୁ ନିଜ ଯାତ୍ରା ଆରମ୍ଭ କରି ବିଶ୍ୱମଞ୍ଚରେ ଭାରତକୁ ପ୍ରତିନିଧିତ୍ୱ କରିବାର ଏହି ସୁଯୋଗ କେବଳ ଶୁଭଲକ୍ଷ୍ମୀଙ୍କ ପାଇଁ ନୁହେଁ, ସମଗ୍ର କଳାହାଣ୍ଡି ଜିଲ୍ଲା ପାଇଁ ମଧ୍ୟ ଗୌରବର ବିଷୟ। ତାଙ୍କର ଏହି ସଫଳତା ଅନେକ ଯୁବ ପ୍ରତିଭାଙ୍କୁ ନୂଆ ସ୍ୱପ୍ନ ଦେଖିବା ସହ ତାହାକୁ ସାକାର କରିବା ପାଇଁ ପ୍ରେରଣା ଦେବ ବୋଲି ଆଶା ପ୍ରକାଶ ପାଇଛି।

ଅନୁଗୋଳ: ଜିନ୍ଦଲ ଫାଉଣ୍ଡେସନର ‘ଉତ୍କର୍ଷ’ କୋଚିଂ କାର୍ଯ୍ୟକ୍ରମ ଜରିଆରେ ପ୍ରସ୍ତୁତି କରି ଓପିଏସସି ପରୀକ୍ଷାରେ ସଫଳତା ହାସଲ କରିଥିବା ୧୦ ଜଣ ପ୍ରାର୍ଥୀଙ୍କୁ ଜିନ୍ଦଲ ଷ୍ଟିଲ, ଅନୁଗୋଳ ପକ୍ଷରୁ ସମ୍ବର୍ଦ୍ଧିତ କରାଯାଇଛି। ଜିନ୍ଦଲ ଷ୍ଟିଲ ପରିସରରେ ଆୟୋଜିତ ସମ୍ବର୍ଦ୍ଧନା ସମାରୋହରେ ମୁଖ୍ୟ ପରିଚାଳନା ଅଧିକାରୀ ରାଜୀବ କୁମାର, କାର୍ଯ୍ୟନିର୍ବାହୀ ନିର୍ଦ୍ଦେଶକ ପି.କେ. ବିଜୁ ନାୟାର ଏବଂ ଜିନ୍ଦଲ ଫାଉଣ୍ଡେସନର ସିଏସଆର ଗୋଷ୍ଠୀ ମୁଖ୍ୟ ରିଷି ପଠାନିଆ ପ୍ରମୁଖ ଉପସ୍ଥିତ ଥିଲେ। ସଫଳ ପ୍ରାର୍ଥୀଙ୍କ ମଧ୍ୟରେ ସଂଗ୍ରାମ ପ୍ରଧାନ ୫ମ ସ୍ଥାନ, ସୁମନ ଗୁପ୍ତା ୧୫ତମ, ସୋମନାଥ ପତି ୧୭ତମ, ସୌରଭ ମହାପାତ୍ର ୩୦ତମ, ଶୁଭଲକ୍ଷ୍ମୀ ପାତ୍ର ୩୪ତମ, ଶତରୂପା ମିତ୍ର ୪୯ତମ, ଅକ୍ଷତା ସାହୁ ୭୧ତମ, ରବୀନ୍ଦ୍ର ରାଉତ ୧୦୭ତମ, ସୁଭାସ୍ମିତା ଜେନା ୧୧୧ତମ ଏବଂ ସଞ୍ଜୟ ପୁର୍ତ୍ତି ୧୪୧ତମ ସ୍ଥାନ ହାସଲ କରିଛନ୍ତି। ଜିନ୍ଦଲ ଫାଉଣ୍ଡେସନ ପକ୍ଷରୁ ଆର୍ଥିକ ଭାବେ ଅନଗ୍ରସର ପରିବାରର ସିଭିଲ ସର୍ଭିସ ଆଶାୟୀଙ୍କୁ ମାଗଣା କୋଚିଂ ଓ ଶୈକ୍ଷିକ ମାର୍ଗଦର୍ଶନ ଦିଆଯାଉଛି। ଗତ ୫ ବର୍ଷରେ ‘ଉତ୍କର୍ଷ’ ଜରିଆରେ ୬୮ ଜଣ ପ୍ରାର୍ଥୀ ଓପିଏସସିରେ ସଫଳ ହୋଇଥିବା ବେଳେ ୧୨୦ରୁ ଅଧିକ ପ୍ରାର୍ଥୀ ବିଭିନ୍ନ ସରକାରୀ ପରୀକ୍ଷାରେ ସଫଳତା ପାଇଛନ୍ତି। ସମାରୋହ ଶେଷରେ ସଫଳ ପ୍ରାର୍ଥୀମାନେ ଜିନ୍ଦଲ ଷ୍ଟିଲ ପ୍ଲାଣ୍ଟ ପରିଦର୍ଶନ କରିଥିଲେ।

ଅନୁଗୋଳ: ଜରୁରୀ ସମୟରେ ରକ୍ତଦାନ କରି ମାନବିକତାର ଉଦାହରଣ ସୃଷ୍ଟି କରିଛନ୍ତି ଲୁଲୁ ସେନା ଖିଣ୍ଡା ପଞ୍ଚାୟତ ସଭାପତି ସବ୍ୟସାଚୀ ସାହୁ। ଲୁଲୁ ସେନା ଗ୍ରୁପରେ ଅନୁଗୋଳ ସରକାରୀ ହସ୍ପିଟାଲରେ ଜଣେ ୯ ବର୍ଷର କୁନି ଝିଅ ପାଇଁ O+ ରକ୍ତର ଜରୁରୀ ଆବଶ୍ୟକତା ଥିବା ନେଇ ସୂଚନା ଆସିଥିଲା। ସୂଚନା ପାଇବା ମାତ୍ରେ ସବ୍ୟସାଚୀ ସାହୁ ବିଳମ୍ବ ନକରି ତୁରନ୍ତ ଅନୁଗୋଳ ସରକାରୀ ହସ୍ପିଟାଲରେ ପହଞ୍ଚି ରକ୍ତଦାନ କରିଥିଲେ। ତାଙ୍କ ରକ୍ତ ବଇଣ୍ଡା ଅଞ୍ଚଳର ସାଇନା ବେହେରାଙ୍କ ୯ ବର୍ଷର ଝିଅଙ୍କ ପାଇଁ ବ୍ୟବହାର କରାଯାଇଛି। ଜରୁରୀ ସମୟରେ ନିଜେ ଆଗେଇ ଆସି ରକ୍ତଦାନ କରିଥିବା ସବ୍ୟସାଚୀଙ୍କ ଏହି ପଦକ୍ଷେପକୁ ଲୁଲୁ ସେନା ପରିବାର ପକ୍ଷରୁ ପ୍ରଶଂସା କରାଯାଇଛି। ମାନବ ସେବା ଓ ରକ୍ତଦାନ ଭଳି କାର୍ଯ୍ୟ ମାଧ୍ୟମରେ ଲୁଲୁ ସେନା ସମାଜ ପାଇଁ ନିଜର ସେବା ଜାରି ରଖିଛି।

ଓଡ଼ିଶା ଡିଜିଟାଲ ମିଡ଼ିଆ ମହାସଂଘ (ODMM) ପକ୍ଷରୁ ଡିଜିଟାଲ ସାମ୍ବାଦିକତା ଓ ସାମ୍ବାଦିକମାନଙ୍କର ଦକ୍ଷତା ବୃଦ୍ଧି ନିମନ୍ତେ ଏକ ବିଶେଷ "ଡିଜିଟାଲ ସାମ୍ବାଦିକତା ଦକ୍ଷତା ବିକାଶ ପ୍ରଶିକ୍ଷଣ ଶିବିର" ଅନୁଷ୍ଠିତ ହୋଇଯାଇଛି। ​ଖବରର ମୁଖ୍ୟ ଅଂଶ: ​ଉଦ୍ଦେଶ୍ୟ: ବଦଳୁଥିବା ସମୟ ସହ ଡିଜିଟାଲ ଗଣମାଧ୍ୟମ କ୍ଷେତ୍ରରେ କାର୍ଯ୍ୟରତ ସାମ୍ବାଦିକମାନଙ୍କୁ ସାମ୍ବାଦିକତାର ନୂତନ କୌଶଳ, ନୈତିକତା ଓ ବୈଷୟିକ ଦକ୍ଷତା ସମ୍ପର୍କରେ ତାଲିମ ପ୍ରଦାନ କରିବା। ​ଅତିଥି ଓ ବକ୍ତା: କାର୍ଯ୍ୟକ୍ରମରେ ମହାସଂଘର ପ୍ରମୁଖ କର୍ମକର୍ତ୍ତା, ବରିଷ୍ଠ ସାମ୍ବାଦିକ ଏବଂ ଗଣମାଧ୍ୟମ ବିଶେଷଜ୍ଞମାନେ ମଞ୍ଚାସୀନ ହୋଇ ସାମ୍ବାଦିକମାନଙ୍କୁ ମାର୍ଗଦର୍ଶନ କରିଥିଲେ। ​ପ୍ରଶିକ୍ଷଣ: ଡିଜିଟାଲ ପ୍ଲାଟଫର୍ମରେ ସଠିକ୍ ଓ ସତ୍ୟସନ୍ଧାନୀ ଖବର ପରିବେଷଣ, ଭିଡିଓ ସାମ୍ବାଦିକତା ଏବଂ ଗଣମାଧ୍ୟମ ଆଇନ ବିଷୟରେ ଆଲୋଚନା କରାଯାଇଥିଲା। ​ଉପସ୍ଥିତି: ଶିବିରରେ ରାଜ୍ୟର ବିଭିନ୍ନ ପ୍ରାନ୍ତରୁ ଆସିଥିବା ବହୁ ସଂଖ୍ୟକ ଡିଜିଟାଲ ମିଡ଼ିଆ ପ୍ରତିନିଧି ଓ ସାମ୍ବାଦିକ ଯୋଗ ଦେଇଥିଲେ।

ସାଲିଆସାହି ଅଞ୍ଚଳର ଲଷ୍ମୀଧର ପାତ୍ରଙ୍କ ପୁଅଙ୍କ ବ୍ୟାଙ୍କ ଖାତାରୁ ଅଜ୍ଞାତ ଆକାଉଣ୍ଟକୁ ୯୯,୯୯୫ ଟଙ୍କା ଗାୟବ/ହଡ଼ପ ହୋଇଥିବା ଅଭିଯୋଗ ହୋଇଛି। ଆକାଉଣ୍ଟରୁ ଟଙ୍କା ଲୁଟ୍ ହେବା ପରେ କୌଣସି ସନ୍ତୋଷଜନକ ପଦକ୍ଷେପ ନମିଳିବାରୁ ପୀଡ଼ିତଙ୍କ ପରିବାର ଓ ପିତା-ମାତା ନ୍ୟାୟ ଦାବିରେ ବ୍ୟାଙ୍କ ସମ୍ମୁଖରେ ଧାରଣାରେ ବସିଛନ୍ତି ​ମୁଖ୍ୟ ଘଟଣାବଳୀ: ​ଠକେଇର ପରିମାଣ: ₹୯୯,୯୯୫ ​ପୀଡ଼ିତ ପରିବାର: ଲଷ୍ମୀଧର ପାତ୍ର (ସାଲିଆସାହି) ​ସମ୍ପୃକ୍ତ ୟୁନିୟନ ବ୍ୟାଙ୍କ (ନୟାପଲ୍ଲୀ ଶାଖା) ​ପ୍ରତିବାଦ: ଗାୟବ ହୋଇଥିବା ଟଙ୍କା ଫେରସ୍ତ ପାଇଁ ଏବଂ ଉଚିତ୍ ତଦନ୍ତ ଦାବିରେ ବ୍ୟାଙ୍କ ଆଗରେ ଧାରଣା ଓ ପ୍ରତିବାଦ। ​ଅଭିଯୋଗକାରୀଙ୍କ କହିବା ଅନୁଯାୟୀ, ବ୍ୟାଙ୍କ ଖାତାରୁ ବିନା ଅନୁମତିରେ ଏତେ ବଡ଼ ପରିମାଣର ଟଙ୍କା କଟିଯିବା ପରେ ସେମାନେ ନିରାଶ ହୋଇ ଏହି ପଦକ୍ଷେପ ନେଇଛନ୍ତି। ପୋଲିସ ଓ ସାଇବର ସେଲ୍ ଏହି ଘଟଣାର ତୁରନ୍ତ ତଦନ୍ତ କରି ଟଙ୍କା ଫେରାଇବାକୁ ପରିବାର ଲୋକେ ଦାବି କରିଛନ୍ତି।

ଯାଜପୁର, ତା ୦୯.୦୯.୨୦୨୬ ରିଖ: ଯାଜପୁର ଜିଲ୍ଲା ବରୀ ପଞ୍ଚାୟତ ସମିତି ପରିସରରେ ଆଜି ବ୍ଲକ୍ ସ୍ତରୀୟ ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଅଭିଯାନ ଶିବିର ୨୦୨୬ ସଫଳତାର ସହ ସମ୍ପନ୍ନ ହୋଇଯାଇଛି। ଏହି କାର୍ଯ୍ୟକ୍ରମରେ ଯାଜପୁର ସାଂସଦ ଡ଼ା. ରବୀନ୍ଦ୍ର ନାରାୟଣ ବେହେରା ମୁଖ୍ୟ ଅତିଥି ଭାବେ ଯୋଗଦେଇ ଭିନ୍ନକ୍ଷମମାନଙ୍କ ସଶକ୍ତୀକରଣ ଓ ସେମାନଙ୍କୁ ସମାଜର ମୁଖ୍ୟସ୍ରୋତରେ ସାମିଲ କରିବା ପାଇଁ ସରକାରୀ ସହାୟତାର ଗୁରୁତ୍ୱ ଉପରେ ବକ୍ତବ୍ୟ ରଖିଥିଲେ।ବରୀ ବିଧାୟକ ଶ୍ରୀ ବିଶ୍ୱରଂଜନ ମଲ୍ଲିକ ଏହି ଶିବିରରେ ସମ୍ମାନିତ ଅତିଥି ଭାବେ ଯୋଗଦେଇ ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଅଭିଯାନ ମାଧ୍ୟମରେ ଭିନ୍ନକ୍ଷମ ବ୍ୟକ୍ତିମାନଙ୍କୁ ସ୍ୱାବଲମ୍ବୀ କରିବା, ସେମାନଙ୍କ ଗତିଶୀଳତା ବୃଦ୍ଧି କରିବା ଏବଂ ସମାଜର ମୁଖ୍ୟସ୍ରୋତରେ ସମାନ ଭାବେ ସାମିଲ କରିବା ଦିଗରେ ଏପରି ଶିବିର ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି ବୋଲି ମତବ୍ୟକ୍ତ ରଖିଥିଲେ । ଏହି ଶିବିରରେ ମୋଟ ୨୫୧ ଜଣ ଭିନ୍ନକ୍ଷମ ସେମାନଙ୍କ ନାମ ପଞ୍ଜୀକରଣ କରିବା ସହ ଡାକ୍ତରୀ ଦଳ ଦ୍ୱାରା ସେମାନଙ୍କର ମୂଲ୍ୟାଙ୍କନ ଓ ପ୍ରମାଣପତ୍ର ଯାଞ୍ଚ କରାଯାଇଥିଲା। ସେଥିମଧ୍ୟରୁ ୧୩୫ ଜଣ ଶାରୀରିକ ଭିନ୍ନକ୍ଷମ (OH), ୩୨ ଜଣ ଦୃଷ୍ଟିହୀନ (VI), ୪୪ ଜଣ ଶ୍ରବଣବାଧିତ (HI), ୨୯ ଜଣ ମାନସିକ ଅଗ୍ରସର/ସିପି (MR/CP) ଏବଂ ୧୧ ଜଣ ବହୁବିଧ ଭିନ୍ନକ୍ଷମ (MD) ହିତାଧିକାରୀ ଶିବିରରେ ଅଂଶଗ୍ରହଣ କରିଥିଲେ। ଏହି କାର୍ଯ୍ୟକ୍ରମ ଅବସରରେ ମୁଖ୍ୟ ଅତିଥିଙ୍କ ଦ୍ୱାରା ତୁରନ୍ତ ସହାୟତା ସ୍ୱରୂପ ହିତାଧିକାରୀଙ୍କୁ ୩ଟି ଟ୍ରାଇ-ସାଇକେଲ୍ (Tricycle), ୧୨ଟି ହୁଇଲ୍ ଚେୟାର୍ (Wheelchair) , ୨ଟି Prosthesis , ୧ଟି Orthosis ,୧ଟି ମୋଟରାଇଜ୍ଡ ଟ୍ରାଇସାଇକେଲ୍ ଏବଂ ୧ଟି ୱାକର୍ ସହିତ ଅନ୍ୟାନ୍ୟ ଆବଶ୍ୟକୀୟ ସହାୟତା ପ୍ରଦାନ/ବଣ୍ଟନ କରାଯାଇଥିଲା। ଉକ୍ତ କାର୍ଯ୍ୟକ୍ରମରେ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଶ୍ରୀମତୀ ଜାନକୀ ହେମ୍ବ୍ରମ୍, ଗୋଷ୍ଠୀ ଉନ୍ନୟନ ଅଧିକାରୀ, ବରୀ ଶ୍ରୀମତୀ ମିନତୀ ଜଗଦେବ, ବ୍ଲକ ର ସମସ୍ତ ଅଧିକାରୀ ଓ କର୍ମଚାରୀ ସ୍ଥାନୀୟ ସରପଞ୍ଚ, ସମିତି ସଭ୍ୟ ପ୍ରମୁଖ ଉପସ୍ଥିତ ଥିଲେ।