ଅର୍ଥାଭାବରୁ ପ୍ରତିଯୋଗୀ ପରୀକ୍ଷାରୁ ବଞ୍ଚିତ ଗରିବ ଛାତ୍ରଛାତ୍ରୀ

ଯାଜପୁର: ଦାରିଦ୍ର୍ୟ ସୀମାରେଖା ତଳେ ଥିବା ଅନେକ ମେଧାବୀ ଛାତ୍ରଛାତ୍ରୀଙ୍କ ପାଇଁ ଅର୍ଥାଭାବ ପ୍ରତିଯୋଗୀତାମୂଳକ ପରୀକ୍ଷାରେ ବାଧକ ସାଜିଛି। ବିଭିନ୍ନ ସରକାରୀ ଓ ବେସରକାରୀ ଚାକିରି ପାଇଁ ହେଉଥିବା ପରୀକ୍ଷାର ଫି’ ବାବଦରେ ମୋଟା ଅଙ୍କର ଟଙ୍କା ଦେବାକୁ ପଡ଼ୁଥିବାରୁ ଗରିବ ପରିବାରର ଛାତ୍ରଛାତ୍ରୀ ଅସୁବିଧାରେ ପଡ଼ୁଛନ୍ତି। ବ୍ୟାଙ୍କିଙ୍ଗ୍ ପରୀକ୍ଷାରେ ପ୍ରାୟ ହଜାର ଟଙ୍କା ପର୍ଯ୍ୟନ୍ତ ଖର୍ଚ୍ଚ ହେଉଥିବାର ଅଭିଯୋଗ ରହିଛି। ଏହା ସହ ପରୀକ୍ଷା କେନ୍ଦ୍ର ନିଜ ଜିଲ୍ଲାଠାରୁ ଦୂରରେ ହେବାରୁ ଯାତାୟାତ ଓ ରହଣି ପାଇଁ ଅତିରିକ୍ତ ଖର୍ଚ୍ଚ ମଧ୍ୟ ବହନ କରିବାକୁ ପଡ଼ୁଛି। ଫଳରେ ଅର୍ଥ ଅଭାବ ଯୋଗୁଁ ଅନେକ ମେଧାବୀ ଛାତ୍ରଛାତ୍ରୀ ଚାକିରି ପାଇଁ ନିଜ ଯୋଗ୍ୟତା ପ୍ରମାଣ କରିବାର ସୁଯୋଗରୁ ବଞ୍ଚିତ ହେଉଥିବା ଦାବି ହେଉଛି। ପରୀକ୍ଷା ଫି’ରେ ରିହାତି ଏବଂ ପରୀକ୍ଷା କେନ୍ଦ୍ର ନିକଟସ୍ଥ ଅଞ୍ଚଳରେ କରିବା ସହ ଗରିବ ଛାତ୍ରଛାତ୍ରୀଙ୍କ ପାଇଁ ସରକାର ସ୍ୱତନ୍ତ୍ର ସହାୟତା ଦେବାକୁ ଜନସାଧାରଣଙ୍କ ପକ୍ଷରୁ ଦାବି ହେଉଛି। ବ୍ୟାସନଗରରୁ ପ୍ରଦୀପ କୁମାର ପୃଷ୍ଟି, ସୃଷ୍ଟି ନ୍ୟୁଜ୍।