ବାହୁଦାରେ ବଢୁଛି ଜଳସ୍ତର, ବନ୍ୟା ଭୟରେ ଚିକିଟି-ପାତ୍ରପୁର

ଚିକିଟି, ୨୫/୯: ଲଗାଣ ବର୍ଷାରେ ଉଛୁଳିଛି ବାହୁଦା ନଦୀ। ଜଳସ୍ତର ବୃଦ୍ଧି ପାଇବା ସହ ଚିକିଟି ଓ ପାତ୍ରପୁର ବ୍ଲକର ବିଭିନ୍ନ ତଳିଆ ଅଞ୍ଚଳ ଓ ଚାଷଜମି ଜଳବନ୍ଦୀ ହୋଇପଡ଼ିଛି। ଗତ ଦୁଇ ଦିନର ଲଗାଣ ବର୍ଷା ଯୋଗୁଁ ନଦୀରେ ଜଳପ୍ରବାହ ବଢ଼ିଥିବାରୁ ନଦୀକୂଳିଆ ଅଞ୍ଚଳରେ ବନ୍ୟା ଆଶଙ୍କା ଦେଖାଦେଇଛି। ବିଭିନ୍ନ ସ୍ଥାନରେ ଚାଷଜମିରେ ପାଣି ପଶିଥିବାରୁ ଧାନ ଫସଲ ନଷ୍ଟ ହେବା ନେଇ ଚାଷୀଙ୍କ ମଧ୍ୟରେ ଚିନ୍ତା ବଢ଼ିଛି। ଜଳସ୍ତର ଆହୁରି ବଢ଼ିଲେ ନଦୀକୂଳିଆ ଗାଁଗୁଡ଼ିକ ପ୍ରଭାବିତ ହେବାର ଆଶଙ୍କା ରହିଛି। ଏଭଳି ସ୍ଥିତିରେ ପ୍ରଶାସନ ପକ୍ଷରୁ ନଦୀ ଓ ତଳିଆ ଅଞ୍ଚଳ ଉପରେ ନଜର ରଖିବା ସହ ଆବଶ୍ୟକ ପଦକ୍ଷେପ ନେବାକୁ ଦାବି ହେଉଛି।