କେନାଲରେ ପଶିଲା ସ୍କର୍ପିଓ, ଅଳ୍ପକେ ବର୍ତ୍ତିଲେ ମାଆ-ପୁଅ

ତାଳଚେର: ନୂତନ ଜାତୀୟ ରାଜପଥ ନିର୍ମାଣ କାର୍ଯ୍ୟରେ ବିଳମ୍ବ ଏବଂ ରାସ୍ତାର ଦୁରବସ୍ଥା ଯୋଗୁଁ ତାଳଚେର ଅଞ୍ଚଳରେ ଯାତାୟାତ ସମସ୍ୟା ଦେଖାଦେଇଛି। ଏହାରି ମଧ୍ୟରେ ଟ୍ରାଫିକ୍ ଜାମ୍ ଏଡ଼ାଇବାକୁ କେନାଲ ରାସ୍ତାରେ ଯାଉଥିବା ଏକ ସ୍କର୍ପିଓ ଭାରସାମ୍ୟ ହରାଇ କେନାଲ ଭିତରକୁ ପଶିଯାଇଥିବା ଘଟଣା ଚର୍ଚ୍ଚାର ବିଷୟ ହୋଇଛି। ସୂଚନା ଅନୁସାରେ, ଆଜି ଟ୍ରାଫିକ୍ ଜାମ୍ ଯୋଗୁଁ ଜଣେ ମାଆ ଓ ତାଙ୍କ ପୁଅ ସ୍କର୍ପିଓ ଯୋଗେ କେନାଲ ରାସ୍ତା ଦେଇ ଯାଉଥିଲେ। ହଠାତ୍ ଗାଡ଼ିଟି ଭାରସାମ୍ୟ ହରାଇ କେନାଲ ଭିତରକୁ ପଶିଯାଇଥିଲା। ସେତେବେଳେ କେନାଲରେ ପାଣି ଭରି ରହିଥିବାରୁ ସ୍କର୍ପିଓଟି ପାଣିରେ ବୁଡ଼ିଯାଇଥିଲା। ତେବେ ଭାଗ୍ୟବଶତଃ ଗାଡ଼ିର ସନରୁଫ୍ ଥିବାରୁ ମାଆ-ପୁଅ ସେହି ବାଟ ଦେଇ ବାହାରକୁ ଆସିବାରେ ସକ୍ଷମ ହୋଇଥିଲେ। ପରେ ସ୍ଥାନୀୟ ଗ୍ରାମବାସୀଙ୍କ ସହାୟତାରେ ଉଭୟଙ୍କୁ ସୁରକ୍ଷିତ ଭାବେ ବାହାରକୁ ଅଣାଯାଇଥିଲା। ଏହି ଘଟଣାରେ କୌଣସି ଜୀବନହାନି ହୋଇନଥିବା ଜଣାପଡ଼ିଛି।