ପୁରୀରେ ଆୟୋଜିତ ହେଲା ମାଗଣା କୃତ୍ରିମ ଅଙ୍ଗ ପ୍ରଦାନ ଶିବିର: ରୋଟାରୀ ଇଷ୍ଟ ଓ ଜଗନ୍ନାଥ ଧାମର ମିଳିତ ପ୍ରୟାସ

​ବ୍ରହ୍ମପୁର, ରାଜସ୍ଥାନ ଜୟପୁର ସ୍ଥିତ ‘ଶ୍ରୀ ଭାଗବାନ ମହାବୀର ବିକଳାଙ୍ଗ ସହାୟତା ସମିତି’ର ସହଯୋଗ, ରୋଟାରୀ କ୍ଲବ ଅଫ୍ ବ୍ରହ୍ମପୁର ଇଷ୍ଟ ଏବଂ ରୋଟାରୀ କ୍ଲବ ଅଫ୍ ଜଗନ୍ନାଥ ଧାମର ମିଳିତ ଆନୁକୂଲ୍ୟରେ ପୁରୀଠାରେ ଦିବ୍ୟାଙ୍ଗମାନଙ୍କ ପାଇଁ ଏକ ମାଗଣା କୃତ୍ରିମ ଅଙ୍ଗ ପ୍ରଦାନ ଶିବିର ସଫଳତାର ସହ ଆୟୋଜିତ ହୋଇଯାଇଛି। ​ଏହି ସେବାମୂଳକ କାର୍ଯ୍ୟକ୍ରମକୁ ରୋଟାରୀ ଜିଲ୍ଲା-୩୨୬୨ର ଗଭର୍ଣ୍ଣର ଅନିଲ କୁମାର ସାମଲ ଆନୁଷ୍ଠାନିକ ଭାବେ ଉଦ୍‌ଘାଟନ କରିଥିଲେ। ସଭାରେ ଉଦ୍‌ବୋଧନ ଦେଇ ସେ କହିଥିଲେ ଯେ, "ଦିବ୍ୟାଙ୍ଗମାନଙ୍କ କଲ୍ୟାଣ ପାଇଁ ସରକାରୀ ସ୍ତରରେ ବିଭିନ୍ନ ଯୋଜନା କାର୍ଯ୍ୟକାରୀ ହେଉଥିଲେ ହେଁ, ରୋଟାରୀ ତରଫରୁ ନିରବଚ୍ଛିନ୍ନ ଭାବେ ଚାଲିଥିବା ଏହିଭଳି ସେବାମୂଳକ କାର୍ଯ୍ୟକ୍ରମ ବାସ୍ତବରେ ଅତ୍ୟନ୍ତ ପ୍ରଶଂସନୀୟ।" ​ଏହି କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ପ୍ରାକ୍ତନ ପ୍ରାନ୍ତପାଳ ମନୋଜ କୁମାର ତ୍ରିପାଠୀ ଓ ପ୍ରଭୁଦତ୍ତ ସୁବୁଦ୍ଧି, କାର୍ଯ୍ୟକ୍ରମର ଚେୟାରମ୍ୟାନ ଅଜିତ କୁମାର ପୃଷ୍ଟି (ରୋଟାରୀ ଇଷ୍ଟ), ଜଗନ୍ନାଥ ଧାମର ସଭାପତି ସନମୋହନ ପ୍ରଧାନ ଏବଂ ରୋଟାରୀ ଇଷ୍ଟର ସଭାପତି ହୃଷୀକେଶ ପ୍ରଧାନ ଯୋଗଦେଇ ନିଜ ନିଜର ବକ୍ତବ୍ୟ ରଖିଥିଲେ। ​କାର୍ଯ୍ୟକ୍ରମକୁ ଶୃଙ୍ଖଳିତ ଭାବେ ପରିଚାଳନା କରିବାରେ ଜଗନ୍ନାଥ ଧାମର ସମ୍ପାଦକ ରବିନାରାୟଣ ସାହୁଙ୍କ ସମେତ ରୋଟାରୀ ଇଷ୍ଟର ଡଃ ସମ୍ବିତ ବେଗ୍ରାୟ, ରାଜେଶ୍ୱର ରାଓ, କାମରାଜୁ ମହାରଣା, ପ୍ରଦୀପ କୁମାର ପଣ୍ଡା, ଅସିତ ଦତ୍ତ, ଜୟନ୍ତ କିଶୋର ପାତ୍ର ଓ ଶାନ୍ତନୁ କୁମାର ପାତ୍ର ପ୍ରମୁଖ ସକ୍ରିୟ ସହଯୋଗ କରିଥିଲେ। ଏହି ଶିବିର ମାଧ୍ୟମରେ ଅନେକ ଦିବ୍ୟାଙ୍ଗ ଉପକୃତ ହୋଇପାରିଛନ୍ତି।