ଅନଲାଇନ ବେଟିଂ ଆପ୍‌ରେ ପ୍ରାୟ ୨୦ ଲକ୍ଷ ଟଙ୍କାର ଠକେଇ: ଗଞ୍ଜାମ ସାଇବର ଥାନା ପୁଲିସ ଦ୍ୱାରା ୩ ଗିରଫ

ଗଞ୍ଜାମ : ଅନଲାଇନ ବେଟିଂ ଆପ୍‌ ଜରିଆରେ ଲୋକଙ୍କୁ ପ୍ରଲୋଭିତ କରି ପ୍ରାୟ ୨୦ ଲକ୍ଷ ଟଙ୍କା ଠକେଇ କରିବା ଅଭିଯୋଗରେ ଗଞ୍ଜାମ ସାଇବର ଥାନା ପୁଲିସ ଏକ ବଡ଼ ଧରଣର ର‍୍ୟାକେଟ୍‌ର ପର୍ଦ୍ଦାଫାଶ କରିଛି। ଏହି ଘଟଣାରେ ପୁଲିସ ୩ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି। ମିଳିଥିବା ସୂଚନା ମୁତାବକ, ଅନଲାଇନରେ ବେଟିଂ କରି ମୋଟା ଅଙ୍କର ଲାଭ କରାଇଦେବା ନାଁରେ ଏହି ର‍୍ୟାକେଟ୍‌ ସକ୍ରିୟ ରହିଥିଲା। ପ୍ରାୟ ୨୦ ଲକ୍ଷ ଟଙ୍କାର ସାଇବର ଠକେଇ ନେଇ ଅଭିଯୋଗ ହେବା ପରେ ଗଞ୍ଜାମ ସାଇବର ଥାନା ପୁଲିସ ଘଟଣାର ତଦନ୍ତ ଆରମ୍ଭ କରିଥିଲା। ପୁଲିସ ଚଢ଼ାଉ କରି ଏହି ବେଆଇନ କାରବାରରେ ସମ୍ପୃକ୍ତ ଥିବା ୩ ଜଣ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନଙ୍କ ନିକଟରୁ ବିଭିନ୍ନ ବ୍ୟକ୍ତିଙ୍କ ନାଁରେ ଥିବା ପାନ କାର୍ଡ (PAN Card), ଆଧାର କାର୍ଡ (Aadhaar Card) ଏବଂ ବ୍ୟାଙ୍କ ପାସବୁକ୍‌ ଆଦି ଗୁରୁତ୍ୱପୂର୍ଣ୍ଣ ଦସ୍ତାବିଜ ଜବତ କରାଯାଇଛି। ଅଭିଯୁକ୍ତମାନେ ଅନ୍ୟ ଲୋକଙ୍କ ନାଁରେ ନକଲି ଆକାଉଣ୍ଟ ଖୋଲି ଏହି ଠକେଇ ଟଙ୍କାର କାରବାର କରୁଥିବା ସନ୍ଦେହ କରାଯାଉଛି। ଏହି ର‍୍ୟାକେଟ୍‌ରେ ଆଉ କେଉଁମାନେ ସମ୍ପୃକ୍ତ ଅଛନ୍ତି ଏବଂ ଠକେଇ ଟଙ୍କା କେଉଁଆଡ଼େ ପଠାଯାଇଛି, ସେ ନେଇ ସାଇବର ଥାନା ପୁଲିସ ଅଧିକ ତଦନ୍ତ ଜାରି ରଖିଛି।