ଟାଙ୍ଗୀ ଏନ୍‌ଏସିରେ ମହମ୍ମଦଙ୍କ ୧୫୦୧ତମ ଜୟନ୍ତୀ ପାଳିତ

ଖୋର୍ଦ୍ଧା ଜିଲ୍ଲା ଟାଙ୍ଗୀ ଏନ୍‌ଏସିସ୍ଥିତ ମୁସଲମାନ ସାହିରେ ମହାପୁରୁଷ ମହମ୍ମଦଙ୍କ ୧୫୦୧ତମ ଜୟନ୍ତୀ ଆନନ୍ଦ ଓ ଉଲ୍ଲାସର ସହ ପାଳିତ ହୋଇଯାଇଛି। ଏହି ଅବସରରେ ମୁସଲିମ ସମ୍ପ୍ରଦାୟର ଲୋକମାନେ ସକାଳୁ ନୂଆ ବସ୍ତ୍ର ପରିଧାନ କରି ସ୍ଥାନୀୟ ଧାର୍ମିକ ସ୍ଥଳକୁ ଆସିଥିଲେ। ସେଠାରେ ପରସ୍ପରକୁ ଆଲିଙ୍ଗନ କରି ଜୟନ୍ତୀର ଶୁଭେଚ୍ଛା ଜଣାଇଥିଲେ। ପରେ ଅପରାହ୍ନରେ ଧାର୍ମିକ ସ୍ଥଳ ପରିସରରୁ ଏକ ଭବ୍ୟ ଧାର୍ମିକ ଶୋଭାଯାତ୍ରା ବାହାରି ଟାଙ୍ଗୀ ଏନ୍‌ଏସିର ବିଭିନ୍ନ ସାହି ଓ ଅଞ୍ଚଳ ପରିକ୍ରମା କରିଥିଲା। ଶୋଭାଯାତ୍ରାରେ ମୁସଲିମ ଗୁରୁ ହାପିଜ ଏସ୍‌କେ ତାସଲିମ, ଯୁଗୁନ ମୀରା, ଟବୁଲ ଖାଁ, ଗନି ଖାଁ, ସଲମାନ ଖାଁ ପ୍ରମୁଖ ନେତୃତ୍ୱ ନେଇଥିଲେ। ଶୋଭାଯାତ୍ରାକୁ ଶୃଙ୍ଖଳିତ ଓ ଶାନ୍ତିପୂର୍ଣ୍ଣ ଭାବେ ସମ୍ପନ୍ନ କରିବା ପାଇଁ ଟାଙ୍ଗୀ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା। ଶୋଭାଯାତ୍ରା ଶେଷ ହେବା ପରେ ଧାର୍ମିକ ସ୍ଥଳ ପରିସରରେ ସମସ୍ତଙ୍କ ପାଇଁ ଲସି ଓ ସର୍ବତର ବ୍ୟବସ୍ଥା କରାଯାଇଥିଲା। ଭାଇଚାରା, ସ୍ନେହ ଓ ସମ୍ପ୍ରୀତିର ବାର୍ତ୍ତା ମଧ୍ୟରେ ଜୟନ୍ତୀ ପାଳନ ହୋଇଥିବାରୁ ଅଞ୍ଚଳରେ ଉତ୍ସବମୁଖର ପରିବେଶ ସୃଷ୍ଟି ହୋଇଥିଲା।