ମହାନଦୀ ସେତୁରୁ ଡେଇଁ ପଡ଼ିଥିବା ବୃଦ୍ଧ ଜୀବୀତ ଉଦ୍ଧାର | ଉଦ୍ଧାର କରିଥିବା ଯୁବକଙ୍କୁ ସମ୍ମାନୀତ କଲେ ଥାନା ଅଧିକାରୀ

ଜଗତପୁର: ମହାନଦୀ ସେତୁ ଉପରୁ ଡେଇଁ ପଡିଥିବା ଜଣେ ବୃଦ୍ଧଙ୍କୁ ଜଗତପୁର ସୁନାରୀ ବଣ ପାର୍ଶ୍ଵ ମହାନଦୀର ପ୍ରଖର ସ୍ରୋତରୁ ଜୀବୀତ ଉଦ୍ଧାର କଲେ ସ୍ଥାନୀୟ ଯୁବକ ସନାତନ ପାଳିଆ । ଉଦ୍ଧାର ବୃଦ୍ଧ ଜଣକ ହେଉଛନ୍ତି ଯାଜପୁର ଜିଲ୍ଲା ରାମଚନ୍ଦ୍ରପୁର ଥାନା ଅନ୍ତର୍ଗତ ହଳଦୀ ବସ୍ତାର ପ୍ରତାପ ଚନ୍ଦ୍ର ସାମଲ ( ୭୨) । ସାହସିକତାର ସହ ମହାନଦୀର ପ୍ରଖର ସ୍ରୋତରୁ ଉଦ୍ଧାର କରିଥିବା ଯୁବକଙ୍କୁ ଜଗତପୁର ଥାନା ଅଧିକାରୀ ପ୍ରଶାନ୍ତ କୁମାର ସାସମଲ ସମ୍ମାନୀତ କରିଛନ୍ତି । ସୂଚନା ଯୋଗ୍ୟ, ଯାଜପୁର ଅଞ୍ଚଳର ବୃଦ୍ଧ ପ୍ରତାପ ଭୁବନେଶ୍ଵର ତମାଣ୍ଡୋରେ ରହୁଥିଲେ । କିଛି ଦିନ ପୂର୍ବେ ତାଙ୍କ ମାଙ୍କ ଦେହାନ୍ତ ହୋଇ ଯାଇଥିଲା ।ସେହିଦିନ ଠାରୁ ପ୍ରତାପ ମାନସିକ ଚିନ୍ତାରେ ରହୁଥିଲେ । ଶୁକ୍ରବାର ସକାଳେ ପ୍ରତାପ ଜଗତପୁର ପାର୍ଶ୍ଵ ମହାନଦୀ ସେତୁ ଉପରୁ ଡେଇଁ ପଡିଥିଲେ । ପ୍ରତାପ ମହାନଦୀର ଭରା ପାଣି ଓ ପ୍ରଖର ସ୍ରୋତରେ ଭାସି ଭାସି ପ୍ରାୟ ୩ କିଲୋ ମିଟର ଦୂର ସୁନୀରୀ ବଣ ପର୍ଯ୍ୟନ୍ତ ଚାଲିଯାଇଥିଲେ | ସେହି ଗ୍ରାମର ଜଣେ ୨୬ ବର୍ଷୀୟ ଯୁବକ ସନାତନ ପାଳିଆ ସାହସିକତା ଦେଖାଇ ନିଜ ଜୀବନକୁ ବାଜି ଲଗାଇ ପ୍ରଖର ସ୍ରୋତରୁ ବୁଦ୍ଧଙ୍କୁ ଉଦ୍ଧାର କରିଥିଲେ । ସାହସିକତାର ସହ କୃଦ୍ଧଙ୍କୁ ଉଦ୍ଧାର କରିଥିବାରୁ ଜଗତପୁର ଥାନା ଅଧିକାରୀ ଶ୍ରୀ ସାସମଲ ସନାତନଙ୍କୁ ସମ୍ମାନୀତ କରିଥିଲେ । ଉଦ୍ଧାର ବୃଦ୍ଧଙ୍କୁ ତାଙ୍କ ପରିବାର ଲୋକଙ୍କୁ ଜିମା ଦିଆଯାଇଥିବା ଥାନା ପକ୍ଷରୁ ସୂଚନା ଦିଆ ଯାଇଛି ।