ଜହ୍ଲାଦ ପୁଅର ନୃଶଂସ କାଣ୍ଡ: ବାପାଙ୍କୁ ଇଟାରେ ପିଟି ହତ୍ୟା: ପୁଅ ନାଁରେ କଳଙ୍କ, ମଦ ପିଇବାର କୁପରିଣତି ନେଲା ଜୀବନ

ବୋଡ଼େନ: ମଣିଷ ସମ୍ପର୍କକୁ ଲଜ୍ଜିତ କରିଦେଇଥିବା ଏକ ନୃଶଂସ ଘଟଣା ବୋଡ଼େନ ଥାନା ଅନ୍ତର୍ଗତ ବାଗଲୋର କୁଟିଆପଡ଼ାରେ ଘଟିଛି। ମଦ୍ୟପାନ ପରେ ଜଣେ ୩୫ ବର୍ଷୀୟ ପୁଅ ନିଜ ୬୫ ବର୍ଷୀୟ ବୃଦ୍ଧ ବାପାଙ୍କୁ ଇଟାରେ ମୁଣ୍ଡ ଓ ମୁହଁକୁ ଏକାଧିକ ଥର ପିଟି ହତ୍ୟା କରିଥିବା ଅଭିଯୋଗ ଅଞ୍ଚଳରେ ତୀବ୍ର ଆଲୋଡ଼ନ ସୃଷ୍ଟି କରିଛି। ମୃତକ ହେଲେ ଭୂଷଣ ମାଝୀ (୬୫)। ଅଭିଯୁକ୍ତ ପୁଅ ବିନୋଦ ମାଝୀ (୩୫) ବୋଲି ଜଣାପଡ଼ିଛି। ସୂଚନା ଅନୁଯାୟୀ, ବୁଧବାର ରାତିରେ ବିନୋଦ ମଦ୍ୟପାନ କରି ନିଜ ସ୍ତ୍ରୀଙ୍କ ସହ ଝଗଡ଼ା କରି ଘରକୁ ଫେରିଥିଲେ। ପରେ କୌଣସି କାରଣକୁ ନେଇ ବାପା ଭୂଷଣଙ୍କ ସହ ତାଙ୍କର ବଚସା ହୋଇଥିଲା। ଏଥିରେ ଉତ୍ତ୍ୟକ୍ତ ହୋଇ ବିନୋଦ ଘରେ ପଡ଼ିଥିବା ଏକ ଇଟା ଉଠାଇ ବାପାଙ୍କ ମୁଣ୍ଡ ଓ ମୁହଁକୁ ବାରମ୍ବାର ଆଘାତ କରିଥିବା ଅଭିଯୋଗ ହୋଇଛି। ଗୁରୁତର ରକ୍ତସ୍ରାବ ଯୋଗୁଁ ଘଟଣାସ୍ଥଳରେ ହିଁ ଭୂଷଣଙ୍କ ମୃତ୍ୟୁ ଘଟିଥିଲା। ଘଟଣା ପରେ ଅଭିଯୁକ୍ତ ପୁଅ ଘରୁ ପଳାଇ ନଯାଇ ମୃତ ବାପାଙ୍କ ପାଖରେ ବସିଥିବା ଜଣାପଡ଼ିଛି। ପଡ଼ୋଶୀମାନେ ଘଟଣା ସମ୍ପର୍କରେ ଜାଣିବା ପରେ ବୋଡ଼େନ ପୁଲିସକୁ ସୂଚନା ଦେଇଥିଲେ। ଖବର ପାଇ ବୋଡ଼େନ ଥାନା ଅଧିକାରୀ ଧର୍ମେନ୍ଦ୍ର ଭୋଇଙ୍କ ନେତୃତ୍ୱରେ ପୁଲିସ ଟିମ୍ ଘଟଣାସ୍ଥଳରେ ପହଞ୍ଚିଥିଲା। ସାଇଣ୍ଟିଫିକ୍‌ ଟିମ୍‌ ମଧ୍ୟ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା। ପୁଲିସ ମୃତଦେହ ଜବତ କରି ବୋଡ଼େନ ଡାକ୍ତରଖାନାକୁ ବ୍ୟବଚ୍ଛେଦ ପାଇଁ ପଠାଇଛି। ବ୍ୟବଚ୍ଛେଦ ପରେ ମୃତଦେହ ପରିବାରବର୍ଗଙ୍କୁ ହସ୍ତାନ୍ତର କରାଯିବ ବୋଲି ପୁଲିସ ପକ୍ଷରୁ କୁହାଯାଇଛି। ଏନେଇ ବୋଡ଼େନ ଥାନାରେ ହତ୍ୟା ମାମଲା ରୁଜୁ ହୋଇଛି। ଅଭିଯୁକ୍ତ ବିନୋଦଙ୍କୁ ଗିରଫ କରି କୋର୍ଟରେ ହାଜର କରାଯିବା ପରେ ଜେଲ୍‌ ହାଜତକୁ ପଠାଯିବ ବୋଲି ଥାନା ଅଧିକାରୀ ଧର୍ମେନ୍ଦ୍ର ଭୋଇ କହିଛନ୍ତି। ଘଟଣାର ଅଧିକ ତଦନ୍ତ ଜାରି ରହିଛି। ଏହି ହୃଦୟବିଦାରକ ଘଟଣା ପରେ ସାରା ବାଗଲୋର କୁଟିଆପଡ଼ାରେ ଶୋକର ଛାୟା ଖେଳିଯାଇଛି। ଭୂଷଣ ଜଣେ ଶାନ୍ତ ସ୍ୱଭାବର ବ୍ୟକ୍ତି ଥିଲେ ବୋଲି ଗ୍ରାମବାସୀ କହିଛନ୍ତି। ଅନ୍ୟପକ୍ଷରେ ବିନୋଦ ନିଶାସକ୍ତ ଅବସ୍ଥାରେ ପୂର୍ବରୁ ମଧ୍ୟ ପରିବାରରେ ଝଗଡ଼ା କରୁଥିବା ସ୍ଥାନୀୟ ଲୋକେ କହିଛନ୍ତି। ମଦ ଓ ପାରିବାରିକ କଳହର ଏପରି ଭୟାବହ ପରିଣତି ସମାଜ ପାଇଁ ଏକ ଚେତାବନୀ ହୋଇଛି। ଯେଉଁ ପୁଅ ବୃଦ୍ଧାବସ୍ଥାରେ ବାପାଙ୍କର ସାହାରା ହେବା କଥା, ସେହି ପୁଅ ଯେତେବେଳେ ଜନ୍ମଦାତାଙ୍କ ଜୀବନ ନେଇଯାଏ, ସେତେବେଳେ ତାହା କେବଳ ଏକ ହତ୍ୟା ନୁହେଁ—ଏହା ପିତା-ପୁତ୍ର ସମ୍ପର୍କ ଉପରେ ଏକ କଳଙ୍କ। ମଦ୍ୟପାନ ଓ ନିଶାସକ୍ତି କିପରି ମଣିଷର ବିବେକ ହରାଇ ଏକ ପରିବାରକୁ ଛାରଖାର କରିପାରେ, ବୋଡ଼େନର ଏହି ଘଟଣା ତାହାର ଏକ ଜ୍ୱଳନ୍ତ ଉଦାହରଣ।