ଚିକିଟି ରେ ସ୍କୁଲ ନିରାପତ୍ତା ସପ୍ତାହ ପାଳନ

ଚିକିଟି ଓସେପା ତରଫରୁ ସ୍କୁଲ ଗୁଡିକରେ ପାଳନ ହେଉଥିବା ବିଭିନ୍ନ କାର୍ଯ୍ୟକ୍ରମ ଭିତରୁ ସ୍କୁଲ ନିରାପତ୍ତା ସପ୍ତାହ ପାଳନ ଏକ ଉପଯୋଗୀ କାର୍ଯ୍ୟ କ୍ରମ। ଅଗଷ୍ଟ ମାସରେ ଏହା ପାଳନ କରି ସ୍କୁଲର ନିରାପତ୍ତା ଯାଞ୍ଚ କରି ପଦକ୍ଷେପ ନେବା ସହ ଲୋକଙ୍କୁ ନିରାପତ୍ତାର ବାର୍ତ୍ତା ଦେଇଥାନ୍ତି ଛାତ୍ର ଛାତ୍ରୀ ମାନେ। ଚିକିଟି ବ୍ଲକର ବିଭିନ୍ନ ବିଦ୍ୟାଳୟରେ ଏ କାର୍ଯ୍ୟକ୍ରମ ଚାଲୁ ରହିଥିବା ବେଳେ ଗୋଷ୍ଠୀ ଶିକ୍ଷାଧିକାରୀ ଙ୍କ ପୋଷ୍ୟ ବିଦ୍ୟାଳୟ କୋଳଥିଆ ପ୍ରାଥମିକ ବିଦ୍ୟାଳୟ ରେ ନିରାପତ୍ତା ସପ୍ତାହନ୍ତ କାର୍ଯ୍ୟକ୍ରମରେ ବିଇଓ ପନ୍ନଗ ଭୂଷଣ ମାଝି, ବିଆରସିସି ତ୍ରିନାଥ ମଳିକ, ସିଆରସିସି ଶ୍ରୀମତୀ ମିନତି ପାଠୀ, ବିଦ୍ୟାଳୟର ପ୍ରାକ୍ତନ ପ୍ରଧାନ ଶିକ୍ଷକ ରମାକାନ୍ତ ବେହେରା ପ୍ରମୁଖ ଯୋଗ ଦେଇ ପିଲାଙ୍କୁ ସଚେତନ କରାଇବା ସହ ସେମାନଙ୍କ ସହ ସ୍ଲୋଗାନ ଦେଇ ଶୋଭା ଯାତ୍ରାରେ ଯୋଗ ଦେଇଥିଲେ। ଛାତ୍ର ଛାତ୍ରୀଙ୍କ ଭିତରେ ଚିତ୍ରାଙ୍କନ ଓ ସ୍ଲୋଗାନ ପ୍ରତିଯୋଗିତା ହୋଇଥିଲା। ମୁଖ୍ୟ ଅତିଥି ଭାବେ ବିଇଓ ମହୋଦୟ ଏକ କାର୍ଯ୍ୟକ୍ରମର ରୂପରେଖ ଉପରେ ଆଲୋକପାତ କରି ଭବିଷ୍ୟତରେ ଭୂମିକମ୍ପ, ପ୍ରାକୃତିକ ବିପର୍ଯ୍ୟୟ ବା ଅଗ୍ନି ଭୟ କୁ ମଧ୍ୟ ସାମ୍ନା କରିବା ସାହସ ପିଲାମାନେ ବିଦ୍ୟାଳୟରୁ ହିଁ ଶିଖିପାରିବେ ବୋଲି କହିଥିଲେ। ବିଆରସିସି ଶ୍ରୀଯୁକ୍ତ ମଳିକ ଓ ସିଆରସିସି ମିନତି ପାଠୀ ନିଜ ନିଜ ବକ୍ତବ୍ୟରେ ପ୍ରାଥମିକ ଚିକିତ୍ସା, ସଡକ ନିରାପତ୍ତା, ବିଦ୍ୟାଳୟ ପରିସର ସୁରକ୍ଷା, ଶିଶୁ ସୁରକ୍ଷା, ସାଇବର ସୁରକ୍ଷା ଭଳି ସବୁ ପ୍ରକାର ସୁରକ୍ଷା ବ୍ୟବସ୍ଥା ବିଷୟରେ ବୁଝାଇଥିଲେ। ପ୍ରଧାନ ଶିକ୍ଷୟିତ୍ରୀ ପି ଜଗଦମ୍ବା ସ୍କୁଲ ସେଫଟି କମିଟି ସଦସ୍ୟ ମାନଙ୍କୁ ପରିଚୟ ପ୍ରଦାନ ସହ ତାଙ୍କ ଦାୟିତ୍ବ ଓ କର୍ତ୍ତବ୍ୟ ବିଷୟରେ ଅବଗତ କରାଇଥିଲେ। ଅନ୍ୟତମ ଅତିଥି ଭାବେ ରମାକାନ୍ତ ବେହେରା ସମସ୍ତଙ୍କୁ ଶପଥ ପାଠ କରାଇଥିଲେ। ସହକାରୀ ଶିକ୍ଷକ ସୁନୀଲ ପାଣିଗ୍ରାହୀ ଓ ଶିବରାମ ପାଢ଼ୀ କାର୍ଯ୍ୟକ୍ରମ ପରିଚାଳନା କରିଥିଲେ ପ୍ରଧାନ ଶିକ୍ଷୟିତ୍ରୀ ଧନ୍ୟବାଦ ଅର୍ପଣ କରିଥିଲେ।