ଜୀବନରେ ଦାଦନ, ମୃତ୍ୟୁ ପରେ ବି ଦୁର୍ଦ୍ଦଶା: ୮ କିମି ଖଟିଆରେ ଗଲା ଶବ

କଳାହାଣ୍ଡି ଜିଲ୍ଲା ଦୁର୍ଗମ ଅଂଚଳ ଥୁଆମୁଳ ରାମପୁର ବ୍ଲକ ପାଡେପଦର ପଂଚାୟତ ଖମାରପଦର ଭାଟିପାସ ଗାଁରେ ଆଜି ବୁଧବାର ସକାଳ ୭ଟା ବେଳେ ଦେଖିବାକୁ ମିଳିଛି ଏକ ହୃଦୟ ବିଦାରକ ଦୃଶ୍ୟ । ଦୁଇ ମୁଠା ଦାନା ଯୋଗାଡ କରିବା ପାଇଁ ଦାଦନ ଖଟିବାକୁ ଯାଇଥିବା ଗାଁର ଶିବ ମାଝୀ ର ମୃତ୍ୟୁ ହେଇଥିଲା ହାଇଦ୍ରାବାଦ ଠାରେ । ଗତ ବିଳମ୍ବିତ ରାତିରେ ଶବ ପହଂଚିଥିଲା ଗାଁ ଠାରୁ ୮ କିଲୋମିଟର ଦୂରରେ ଥିବା ଦୁରେଶପଦର ନିକଟରେ । କିନ୍ତୁ ଡୁମନୀ ଜଙ୍ଗଲ ରାସ୍ତା କାଦୁଅମୟ । ତେଣୁ ଆଗକୁ ବଢି ପାରିନଥିଲା ଆମ୍ବୁଲାନ୍ସ । ବାଧ୍ଯ ହେଇ ରାତି ତମାମ ଶବକୁ ଧରି ଦୁରେଶପଦର ଡୁମନୀ ଜଙ୍ଗଲରେ ଅପେକ୍ଷା କରି ରହିଥିଲେ ପରିବାର ଏବଂ ସମ୍ପର୍କୀୟ । ଆଜି ସକାଳୁ ଏହି ୮ କିଲେମିଟର ରାସ୍ତାରେ ଖଟିଆରେ ବୋହି ଶବକୁ ନେଇ ଗାଁରେ ପହଂଚାଇଥିଲେ । ବର୍ଷକ ତଳେ ଶିବ ମାଝୀ ଦାଦନ ଯିବା ବେଳେ ଯେଉଁ ରାସ୍ତା ଦାଦନ ଯିବାକୁ ଅଟକାଇନଥିଲା ସେହି ରାସ୍ତା ଆଜି ଶବ ହେଇ ଫେରିବା ବେଳେ କାଦୁଅମୟ ରାସ୍ତା ଯୋଗୁଁ ଗାଁକୁ ପହଂଚାଇବାରେ ବାଧକ ସାଜିଥିଲା । ଏନେଇ ସାଧାରଣରେ ଆଲୋଡନ ସୃଷ୍ଟି କରିଛି । ଅନ୍ୟପଟେ ହଠାତ୍ ଶିବ ମାଝୀର ମୃତ୍ୟୁ କେଉଁ କାରଣରୁ ହେଲା ତାହା ଅସ୍ପଷ୍ଟ ।