୨୫ ବର୍ଷ ପରେ ଅବସରପ୍ରାପ୍ତ ପୌର କର୍ମଚାରୀଙ୍କୁ ମିଳିବ ବକେୟା ପାଉଣା, ମଞ୍ଜୁର ହେଲା ୪.୫୫ କୋଟି

ତାଳଚେର: ଦୀର୍ଘ ୨୫ ବର୍ଷ ଧରି ବକେୟା ଅବସରକାଳୀନ ପାଉଣାକୁ ଅପେକ୍ଷା କରିଥିବା ତାଳଚେର ପୌର ପରିଷଦର ଅବସରପ୍ରାପ୍ତ କର୍ମଚାରୀଙ୍କ ପାଇଁ ଆସିଛି ଖୁସି ଖବର। ରାଜ୍ୟ ସରକାରଙ୍କ ନଗର ଉନ୍ନୟନ ବିଭାଗ ପକ୍ଷରୁ ବକେୟା ପାଉଣା ପ୍ରଦାନ ନିମନ୍ତେ ୪ କୋଟି ୫୫ ଲକ୍ଷ ଟଙ୍କା ମଞ୍ଜୁର ହୋଇଛି। ଏହି ସମସ୍ୟାକୁ ତାଳଚେର ପୌର ପରିଷଦର ନଗରପାଳ ପବିତ୍ର ଭୂତିଆ ଗୁରୁତ୍ୱର ସହ ନେଇ ପୂର୍ବତନ କେନ୍ଦ୍ରମନ୍ତ୍ରୀ ତଥା ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାପରେ ଶ୍ରୀ ପ୍ରଧାନଙ୍କ ହସ୍ତକ୍ଷେପରେ ରାଜ୍ୟ ସରକାରଙ୍କ ପକ୍ଷରୁ ଏହି ଅର୍ଥ ମଞ୍ଜୁର ହୋଇଥିବା ଜଣାପଡ଼ିଛି। ଅର୍ଥ ମଞ୍ଜୁର ହେବା ପରେ ଅବସରପ୍ରାପ୍ତ କର୍ମଚାରୀ ଓ ସେମାନଙ୍କ ପରିବାରରେ ଖୁସିର ମାହୋଲ ସୃଷ୍ଟି ହୋଇଛି। ଏଥିପାଇଁ ନଗରପାଳ ପବିତ୍ର ଭୂତିଆ ଓ ସାଂସଦ ଧର୍ମେନ୍ଦ୍ର ପ୍ରଧାନଙ୍କୁ ପୌର କର୍ମଚାରୀ ଓ ତାଳଚେରବାସୀ କୃତଜ୍ଞତା ଜଣାଇଛନ୍ତି।