ଧାମନଗର ଏନଏସି କାର୍ଯ୍ୟାଳୟରେ ଚୋରି: ଥାନାରେ ଏତଲା, ପୋଲିସର ତଦନ୍ତ ଆରମ୍ଭ

ଭଦ୍ରକ ଜିଲ୍ଲାର ଧାମନଗର ବିଜ୍ଞାପିତ ଅଞ୍ଚଳ ପରିଷଦ ରେ ଦିନକୁ ଦିନ ଚୋରି ଘଟଣା ବଢ଼ିବାରେ ଲାଗିଛି। ଏହି କ୍ରମରେ ଧାମନଗର ଏନଏସି କାର୍ଯ୍ୟାଳୟ ପରିସରରେ ଘଟିଥିବା ଚୋରି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ସୂଚନା ଅନୁଯାୟୀ, ଗତ ରାତିରେ ଦୁର୍ବୃତ୍ତମାନେ ଏନଏସି କାର୍ଯ୍ୟାଳୟ ପରିସରରୁ ଏସିର ବିଭିନ୍ନ ଯନ୍ତ୍ରାଂଶ, ପାଞ୍ଚଟି ଅଟୋରେ ଲାଗିବା ପାଇଁ ରଖାଯାଇଥିବା ବ୍ୟାଟେରୀ ଏବଂ ବିଏସଏନଏଲ ବ୍ରଡବ୍ୟାଣ୍ଡ ସଂଯୋଗର ତାର କାଟି ନେଇଥିବା ଜଣାପଡ଼ିଛି। ଏହି ଘଟଣାରେ ବାହାରର କୌଣସି ଚୋରଙ୍କ ସମ୍ପୃକ୍ତତା ରହିଛି ନା କାର୍ଯ୍ୟାଳୟର କୌଣସି କର୍ମଚାରୀ କିମ୍ବା ଅଧିକାରୀଙ୍କ ସମ୍ପୃକ୍ତତା ରହିଛି, ସେନେଇ ସନ୍ଦେହ ପ୍ରକାଶ କରି ଧାମନଗର ଏନଏସିର ନିର୍ବାହୀ ଅଧିକାରୀ ସନ୍ତୋଷ କୁମାର ନାୟକ ଧାମନଗର ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ପାଇବା ପରେ ଆଇଆଇସି ଶୁଭ୍ରଜିତ ଦାଶଙ୍କ ନିର୍ଦ୍ଦେଶକ୍ରମେ ଏଏସଆଇ ନରେନ୍ଦ୍ର ରାଉତ ଘଟଣାସ୍ଥଳରେ ପହଞ୍ଚି ସିସିଟିଭି ଫୁଟେଜ ଯାଞ୍ଚ କରିବା ସହ ତଦନ୍ତ ଆରମ୍ଭ କରିଛନ୍ତି। ଏନେଇ ଧାମନଗର ଥାନାରେ କେସ ନମ୍ବର ୨୮୨/୨୬ ରେ ମାମଲା ରୁଜୁ ହୋଇଛି। ପୋଲିସ କହିଛି ଯେ, ଘଟଣାର ତଦନ୍ତ ଜୋରଦାର ଭାବେ ଚାଲିଛି ଏବଂ ଖୁବଶୀଘ୍ର ଚୋରଙ୍କୁ ଚିହ୍ନଟ କରି ଘଟଣାର ପର୍ଦ୍ଦାଫାସ କରାଯିବ ବୋଲି ଚର୍ଚ୍ଚା ହେଉଛି ।