ବେଆଇନ ବ୍ରାଉନ ସୁଗାର ସହ ଆପାଚି ବାଇକ ଜବତ | ଜଣେ ଅଭିଯୁକ୍ତ ଗିରଫ

ଜଗତପୁର:କଟକ ଜିଲ୍ଲା ଅବକାରୀ ବିଭାଗ ଦ୍ୱାରା ଜଗତପୁର ସ୍ଥିତ ନିମପୁର ଷ୍ଟାଡିଅମ ନିକଟରୁ ବେଆଇନ ବ୍ରାଉନ ସୁଗାର ଜବତ କରାଯାଇଛି |ଏହି ବେଆଇନ ନିଶା କାରବାର ଅଭିଯୋଗରେ ଅବକାରୀ ବିଭାଗ ଜଣେ ଅଭିଯୁକ୍ତକୁ ଗିରଫ କରିଛି | ଗିରଫ ଅଭିଯୁକ୍ତ ଜଣକ ହେଲେ ସାଲେପୁର ଥାନା ଅନ୍ତର୍ଗତ ମହନା ବାସୁଦେବପୁର ଗ୍ରାମର ଆନନ୍ଦ ପୂଜାରୀ(୨୬)| ପ୍ରକାଶ ଯେ, ଓଡି୦୫ଏଇ ୨୦୫୮ ନମ୍ବର ଏକ ନାଲି ରଙ୍ଗର ଟିଭିଏସ୍ ଆପାଚି ମୋଟର ସାଇକେଲରେ ଜଣେ ଯୁବକ ବ୍ରାଉନ ସୁଗାର ଚାଲାଣ କରୁଥିବା ଖବର କଟକ ଜିଲ୍ଲା ଅବକାରୀ ଅଧିକ୍ଷକ କରୁଣା ଶଙ୍କର ତିୱାରୀଙ୍କୁ ମିଳିଥିଲା | ଅବକାରୀ ଅଧିକ୍ଷକ ଶ୍ରୀ ତିୱାରୀଙ୍କ ନିର୍ଦ୍ଧେଶ କ୍ରମେ କଟକ ଜିଲ୍ଲା ମୋବାଇଲ ସ୍କ୍ୱାର୍ଡ ଜଗତପୁର ଥାନା ଅନ୍ତର୍ଗତ ନିମପୁର ଷ୍ଟାଡିଅମ ନିକଟରେ ଚଢ଼ଉ କରିଥିଲେ | ଚଢ଼ଉ ସମୟରେ ସଂପୃକ୍ତ ଯୁବକଙ୍କ ଠାରୁ ୬୨ ଗ୍ରାମ ଓଜନର ବେଆଇନ ବ୍ରାଉନସୁଗାର ଜବତ କରାଯାଇଥିଲା | ଜବତ ବ୍ରାଉନ ସୁଗାରର ବଜାର ମୂଲ୍ୟ ପ୍ରାୟ ୭ ଲକ୍ଷ ୨୦ ହଜାର ଟଙ୍କା ହେବ ବୋଲି ବିଭାଗ ପକ୍ଷରୁ ସୁଚନା ଦିଆଯାଇଛି | ଅବକାରୀ ବିଭାଗ ସ୍କ୍ୱାର୍ଡ ଏହି ବେଆଇନ ନିଶା କାରବାରରେ ବ୍ୟବହୃତ ଟିଭିଏସ୍ ଆପାଚି ଗାଡିକୁ ଜବତ କରିବା ସହ ସଂପୃକ୍ତ ଯୁବକକୁ ଗିରଫ କରି କୋର୍ଟ ଚାଲାଣ କରାଯାଇଥିବା ସୂଚନା ଦେଇଛି | ଏହି ଚଢ଼ାଉରେ ଅବକାରୀ ମୋବାଇଲ ୟୁନିଟ ଅଧିକାରୀ ଭକ୍ତବତ୍ସଳ ବର୍ମା , ଏସ୍.ଆଇ. ଅକ୍ଷୟ କୁମାର ଜେନା, ଏ.ଏସ୍.ଆଇ. ଜୟ ପ୍ରକାଶ ବେହୁରିଆ, ଅବକାରୀ କନେଷ୍ଟବଳ ଅଜୟ କୁମାର ଜେନା, ଅବକାରୀ କନେଷ୍ଟବଳ ଦେବବ୍ରତ ଓଝା , ଅବକାରୀ କନେଷ୍ଟବଳ ଶଙ୍କର ସିଂ, ଅବକାରୀ କନେଷ୍ଟବଳ ପୂର୍ଣ୍ଣେଶ୍ୱର ମାଝୀ, ଅବକାରୀ କନେଷ୍ଟବଳ ମୋନାଲିସା କର ଓ ଅବକାରୀ କନେଷ୍ଟବଳ ଦମୟନ୍ତୀ ନାଥ ପ୍ରମ୍ମୁଖ ସାମିଲଥିଲେ l