ଜନବସତି ମଧ୍ୟରେ ବିଦେଶୀ ମଦ ଦୋକାନକୁ ବିରୋଧ, ତହସିଲଦାରଙ୍କୁ ଦାବିପତ୍ର

ଜନବସତି ଭିତରେ ବିଦେଶୀ ମଦ ଦୋକାନ ଖୋଲାକୁ ନେଇ ବଢ଼ିଛି ଜନଅସନ୍ତୋଷ। ସୁନ୍ଦରଗଡ଼ ଜିଲ୍ଲା କୁଆଁରମୁଣ୍ଡା ବ୍ଲକ ର ମୋଚିଟୋଲା ଗ୍ରାମର ଶତାଧିକ ପୁରୁଷ ଓ ମହିଳା ଏକତ୍ରିତ ହୋଇ ମଦ ଦୋକାନ ବିରୋଧରେ ଆନ୍ଦୋଳନ କରିଛନ୍ତି। ପଦଯାତ୍ରା କରିବା ସହ କୁଆଁରମୁଣ୍ଡା ତହସିଲଦାର ଙ୍କୁ ଦାବିପତ୍ର ପ୍ରଦାନ କରି ତୁରନ୍ତ ଦୋକାନ ସ୍ଥାନାନ୍ତର ପାଇଁ ଦାବି ଜଣାଇଛନ୍ତି ଗ୍ରାମବାସୀ। ସ୍ଥାନୀୟ ଲୋକଙ୍କ ଅଭିଯୋଗ ହେଉଛି, ପ୍ରସ୍ତାବିତ ମଦ ଦୋକାନ ନିକଟରେ ସ୍କୁଲ, ମନ୍ଦିର ଏବଂ ଅଙ୍ଗନୱାଡି କେନ୍ଦ୍ର ରହିଥିବା ବେଳେ କେଉଁ ନିୟମ ଆଧାରରେ ଏବଂ କାହାର ଅନୁମତିରେ ଏଠାରେ ମଦ ଦୋକାନ ଖୋଲାଯାଉଛି, ତାହାକୁ ନେଇ ପ୍ରଶ୍ନ ଉଠାଇଛନ୍ତି ସେମାନେ। ଏହାଦ୍ୱାରା ଅଞ୍ଚଳର ସାମାଜିକ ପରିବେଶ ନଷ୍ଟ ହେବା ସହିତ ଛାତ୍ରଛାତ୍ରୀ ଏବଂ ମହିଳାଙ୍କ ସୁରକ୍ଷା ଉପରେ ମଧ୍ୟ ପ୍ରଭାବ ପଡ଼ିପାରେ ବୋଲି ଆଶଙ୍କା ପ୍ରକାଶ କରିଛନ୍ତି। ତେବେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଦିନକୁ ଦିନ ଅସନ୍ତୋଷ ବଢ଼ୁଥିବା ବେଳେ ପ୍ରଶାସନ ଏହା ଉପରେ କଣ ପଦକ୍ଷେପ ନେଉଛି, ତାହା ଉପରେ ଏବେ ସମସ୍ତଙ୍କ ନଜର ରହିଛି।