କୋଟି କୋଟି ଟଙ୍କାର ସ୍ୱେରେଜ୍ ପ୍ରକଳ୍ପ ଏବେ ଜଙ୍ଗଲ : ପ୍ରଶାସନର ଉଦାସୀନତା ନେଇ ଉଠିଲା ବଡ଼ ପ୍ରଶ୍ନବାଚୀ
Bhubaneswar (ଭୁବନେଶ୍ୱର)ରିପୋର୍ଟ ସୁଶାନ୍ତ କୁମାର ମହାକୁଡ଼, ଭୁବନେଶ୍ୱରJuly 1, 202628 views
ଭୁବନେଶ୍ୱର: ରାଜଧାନୀ ଭୁବନେଶ୍ୱରକୁ ସ୍ମାର୍ଟ ସିଟି କରିବା ପାଇଁ ଏବଂ ସହରର ବର୍ଜ୍ୟବସ୍ତୁ ନିଷ୍କାସନକୁ ସୁବ୍ୟବସ୍ଥିତ କରିବା ପାଇଁ ସରକାରଙ୍କ ପକ୍ଷରୁ କୋଟି କୋଟି ଟଙ୍କା ବ୍ୟୟରେ ସ୍ୱେରେଜ୍ ଲାଇନ (Sewerage Line) ନିର୍ମାଣ କରାଯାଇଥିଲା। କିନ୍ତୁ ବର୍ତ୍ତମାନ ଏହି ଅର୍ଥ କେବଳ ପାଣିରେ ପଡ଼ିଲା ଭଳି ମନେହେଉଛି। ରକ୍ଷଣାବେକ୍ଷଣ ଅଭାବରୁ ସହରର ବିଭିନ୍ନ ସ୍ଥାନରେ ଏହି ସ୍ୱେରେଜ୍ ଲାଇନଗୁଡ଼ିକ ଅଳିଆ ଆବର୍ଜନା ଏବଂ ଘଞ୍ଚ ଜଙ୍ଗଲରେ ପରିଣତ ହେବାକୁ ବସିଲାଣି।
ଦୁଇଟି ପାଚେରି ମଧ୍ୟରେ ଯାଇଥିବା ସ୍ୱେରେଜ୍ ଲାଇନଟି ସମ୍ପୂର୍ଣ୍ଣ ଭାବେ ବଣବୁଦା ଏବଂ ଗଛଲତାରେ ଆଚ୍ଛାଦିତ ହୋଇ ରହିଛି। ସ୍ୱେରେଜ୍ ମ୍ୟାନହୋଲ୍ (Manhole) ଚାରିପାଖରେ ଅନାବନା ଗଛ ଉଠିବା ସହ ପ୍ଲାଷ୍ଟିକ ଓ ଅନ୍ୟାନ୍ୟ ଆବର୍ଜନା ଜମା ହୋଇ ରହିଛି। ଯେଉଁ ଉଦ୍ଦେଶ୍ୟରେ ଏତେ ବଡ଼ ପ୍ରକଳ୍ପ ପ୍ରସ୍ତୁତ କରାଯାଇଥିଲା, ତାହା ବର୍ତ୍ତମାନ ସମ୍ପୂର୍ଣ୍ଣ ଅଚଳ ଅବସ୍ଥାକୁ ଚାଲିଯାଇଛି।
ତେବେ ଟଙ୍କା କାହାର, ସ୍ୱାର୍ଥ କାହାର ? ଜନସାଧାରଣଙ୍କ ଟିକସ ପଇସାରୁ ଖର୍ଚ୍ଚ ହୋଇଥିବା କୋଟି କୋଟି ଟଙ୍କା କାହିଁକି ଏଭଳି ଅଦରକାରୀ ଭାବେ ପଡ଼ି ରହିଛି ? କାହିଁକି ହେଉନାହିଁ ସଫାସୁତୁରା ? ସ୍ୱେରେଜ୍ ଲାଇନଗୁଡ଼ିକୁ ନିୟମିତ ବ୍ୟବଧାନରେ ସଫା କରିବା ଏବଂ ଏହାର ଯତ୍ନ ନେବା ପାଇଁ ଦାୟିତ୍ୱରେ ଥିବା କର୍ତ୍ତୃପକ୍ଷ କାହିଁକି ଆଖି ବୁଜି ବସିଛନ୍ତି ? ଏପରି ଅନେକ ପ୍ରଶ୍ନ ବୁଦ୍ଧିଜୀବୀଙ୍କ ମନରେ l
ତେବେ ଏଭଳି ଘଞ୍ଚ ବୁଦା ଓ ଜମା ହୋଇ ରହିଥିବା ଆବର୍ଜନା ଯୋଗୁଁ ମଶା, ମାଛି ଏବଂ ବିଷାକ୍ତ ସରୀସୃପଙ୍କ ପ୍ରାଦୁର୍ଭାବ ବଢ଼ୁଛି, ଯାହା ସ୍ଥାନୀୟ ବାସିନ୍ଦାଙ୍କ ସ୍ୱାସ୍ଥ୍ୟ ପାଇଁ ଏକ ବଡ଼ ବିପଦ।
ଏହି ସ୍ୱେରେଜ୍ ଲାଇନର ଦୟନୀୟ ଅବସ୍ଥା ଏବେ ସ୍ମାର୍ଟ ସିଟିର ବିକାଶ ଉପରେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ସ୍ଥାନୀୟ ବାସିନ୍ଦା ଏବଂ ବୁଦ୍ଧିଜୀବୀ ମାନେ ଦାବି କରିଛନ୍ତି ଯେ, ସମ୍ପୃକ୍ତ ବିଭାଗ ତୁରନ୍ତ ଏଥିପ୍ରତି ଦୃଷ୍ଟି ଦେଇ ଏହି ସ୍ଥାନ ଗୁଡ଼ିକୁ ସଫା କରନ୍ତୁ ଏବଂ ସ୍ୱେରେଜ୍ ଲାଇନକୁ କାର୍ଯ୍ୟକ୍ଷମ କରନ୍ତୁ, ଯଦ୍ୱାରା ଜନସାଧାରଣ ଏହାର ସୁଫଳ ପାଇପାରିବେ।