ନବମ ଶ୍ରେଣୀ ଛାତ୍ରୀକୁ ପେଟ୍ରୋଲ ଢାଳି ମାରିବାକୁ ଉଦ୍ୟମ

ଭଦ୍ରକ: ଧାମନଗର ବ୍ଲକ ଅନ୍ତର୍ଗତ ଧୁଷୁରୀ ଥାନା ଅଞ୍ଚଳର ଫତେପୁର ପଞ୍ଚାୟତରେ ଜଣେ ନବମ ଶ୍ରେଣୀର ଛାତ୍ରୀଙ୍କ ଉପରେ ପେଟ୍ରୋଲ ଢାଳି ଜୀବନ୍ତ ପୋଡ଼ି ମାରିବାକୁ ଉଦ୍ୟମ କରାଯାଇଥିବା ଅଭିଯୋଗ ହୋଇଛି। ପରିବାରର ଅଭିଯୋଗ ଅନୁସାରେ, ଧର୍ମାଗତପୁର ଗ୍ରାମର ୩୨ ବର୍ଷୀୟ ଦିଲ୍ଲିପ ଜେନା ଦୀର୍ଘଦିନ ଧରି ଛାତ୍ରୀଙ୍କୁ ପ୍ରେମ ପ୍ରସ୍ତାବ ଦେଉଥିଲେ। ଛାତ୍ରୀ ପ୍ରତ୍ୟାଖ୍ୟାନ କରିବା ପରେ ସେ ସ୍କୁଲକୁ ଯାଉଥିବା ବେଳେ ଅଟକାଇ ଏହି କାଣ୍ଡ ଘଟାଇବାକୁ ଉଦ୍ୟମ କରିଥିବା ଅଭିଯୋଗ ରହିଛି। ଛାତ୍ରୀଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ପହଞ୍ଚି ଅଭିଯୁକ୍ତଙ୍କୁ କାବୁ କରି ପୁଲିସଙ୍କ ଜିମା ଦେଇଥିଲେ, ଯାହା ଫଳରେ ଏକ ବଡ଼ ଅଘଟଣ ଟଳିଯାଇଥିବା କୁହାଯାଉଛି। ପୀଡ଼ିତାଙ୍କ ପରିବାର ଧୁଷୁରୀ ଥାନାରେ ଲିଖିତ ଅଭିଯୋଗ କରିଛନ୍ତି ଏବଂ ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ସ୍ଥାନୀୟ ସୂତ୍ର ଅନୁସାରେ, ଅଭିଯୁକ୍ତଙ୍କର ପୂର୍ବରୁ ଦୁଇଟି ବିବାହ ହୋଇଥିବା କଥା ମଧ୍ୟ ସାମ୍ନାକୁ ଆସିଛି।