ସାତବାଟିଆ ବାଲି ଘାଟରେ ଅଘଟଣ, ମହାନଦୀରେ ବୁଡି ୨ ମୃତ, ଜଣେ ନିଖୋଜ, ଉଦ୍ଧାର କାର୍ଯ୍ୟ ଜାରି

ଜଗତପୁର:ଜଗତପୁର ସ୍ଥିତ ମହାନଦୀରେ ଏକ ଅଘଟଣ ଘଟିଛି । ମହାନଦୀରେ ବୁଡି ଦୁଇ ଜଣ ଯୁବକ ନିଖୋଜ ହୋଇଥିବା ଜଣାଯାଇଛି । ଜଗତପୁର ସାତବାଟିଆ ନିକଟ ମହାନଦୀ ବାଲି ଘାଟ ଠାରେ ଘଟିଛି ଏହି ଅଘଟଣ । ଘଟଣାସ୍ଥଳରେ ପୁଲିସ ଓ ଅଗ୍ନିଶମ ବାହିନୀର କର୍ମଚାରୀମାନେ ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି । ମିଳିଥିବା ସୂଚନା ଅନୁଯାୟୀ ରବିବାର ଦିନ କଟକ ନୂଆ ବଜାର ଅଂଚଳର ୪ ସାଙ୍ଗ ଗାଧୋଇବା ପାଇଁ ସାତବାଟିଆ ନିକଟ ମହାନଦୀକୁ ଯାଇଥିଲେ l ୪ ସାଙ୍ଗ ଗାଧୋଉଥିବା ବେଳେ କଲ୍ୟାଣୀ ନଗରର ଅମ୍ଲାନ ପ୍ରସାଦ ନାୟକ (୨୦) ସ୍ରୋତରେ ଭାସି ଯାଇଥିଲେ l ତାଙ୍କୁ ଉଦ୍ଧାର କରିବାକୁ ଅନ୍ୟ ୩ ସାଙ୍ଗ ଜଗତସିଂହପୁର କ୍ରିଷ୍ଣାନନ୍ଦପୁର ଲଙ୍କାପଡ଼ାର ମୂଳ ବାସିନ୍ଦା ତଥା ନୂଆବଜାର ମହିମା ନଗରରେ ରହୁଥିବା ପ୍ରତ୍ୟୁଷ ସ୍ୱାଇଁ (୨୦), ପୋତାପୋଖରୀର ଅର୍ଜିତ ସାହୁ(୨୧) ଓ ନୂଆବଜାର ବେଲେଶ୍ୱରର ମୁକ୍ତିପ୍ରସାଦ ଦାସ (୨୧) ଚେଷ୍ଟା କରିଥିଲେ l ପ୍ରତ୍ୟୁଷ ପହଁରି ପହଁରି ନିରାପଦରେ କୁଳରେ ପହଁଚି ଥିବା ବେଳେ ଉଦ୍ଧାର କରିବାକୁ ଯାଇଥିବା ୩ ସାଙ୍ଗ ନିଖୋଜ ହୋଇଯାଇଥିଲେ l  ଚାଉଳିଆଗଞ୍ଜ ଅଗ୍ନିଶମ ବାହିନୀର ତିନୋଟି ଟିମ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି | ଦୀର୍ଘ ସମୟ ଖୋଜାଖୋଜି କରିବା ପରେ ପ୍ରଥମେ ମୁକ୍ତିପ୍ରସାଦ ଓ କିଛି ସମୟ ପରେ ଅମ୍ଳାନଙ୍କ ମୃତ ଦେହ ଉଦ୍ଧାର କରାଯାଇଛି । ବିଳମ୍ବିତ ରାତ୍ରୀ ପର୍ଯ୍ୟନ୍ତ ଅନ୍ୟ ଜଣେ ଯୁବକ ଅର୍ଜିତଙ୍କୁ ଉଦ୍ଧାର କରାଯାଇ ପାରିନାହିଁ | ରାତି ସମୟରେ ଉଦ୍ଧାର କାର୍ଯ୍ୟ କଷ୍ଟ ହେଉଥିବା ସତ୍ତ୍ୱେ ରାଡି ପ୍ରାୟ ୧ଟା ପର୍ଯ୍ୟନ୍ତ ଉଦ୍ଧାର କାର୍ଯ୍ୟ ଜାରି ରହିଥିଲା | ଆଜି ସକାଳୁ ପୁଣି ଉଦ୍ଧାର କାର୍ଯ୍ୟ ଆରମ୍ଭ ହୋଇଥିବା ଜଣାପଡିଛି |