ମାନବିକତାର ପରିଚୟ: ବୁଦା ଉହାଡ଼ରୁ ତିନି ମାସର ଶିଶୁ ପୁତ୍ର ଉଦ୍ଧାର, ଦେବଦୂତ ସାଜିଲେ ରାଜମିସ୍ତ୍ରୀ

ଗଞ୍ଜାମ ଜିଲ୍ଲା ଚିକିଟି ଅଞ୍ଚଳରୁ ଆସିଛି ଏକ ଭାବବିହ୍ୱଳ କଲାଭଳି ଖବର। ​ଗଞ୍ଜାମ ଜିଲ୍ଲା ଚିକିଟି ଅଞ୍ଚଳର ରତ୍ନେଶ୍ୱରୀ ମନ୍ଦିର ବୁଲାଣି ରାସ୍ତାରେ ଗତକାଲି ସନ୍ଧ୍ୟାରେ ଦେଖିବାକୁ ମିଳିଛି ଏଭଳି ଏକ ହୃଦୟବିଦାରକ ଘଟଣା। ଦିଗପହଣ୍ଡି ବ୍ଲକ କରପଡା ପଂଚାୟତ ହାତୀଆଡି ଗ୍ରାମର ବାରିକ ମୁଳି ନାମକ ଜଣେ ରାଜମିସ୍ତ୍ରୀ କେ. ନୂଆଗାଁରୁ ନିଜ ଘରକାମ ସାରି ସନ୍ଧ୍ୟା ସମୟରେ ବାଇକ୍‌ ଯୋଗେ ନିଜ ଗ୍ରାମକୁ ଫେରୁଥିଲେ। ଏହି ସମୟରେ ରତ୍ନେଶ୍ଵରୀ ମନ୍ଦିର ବୁଲାଣି ରାସ୍ତା ପାର୍ଶ୍ୱରୁ ଏକ ଶିଶୁର କ୍ରନ୍ଦନ ଧ୍ୱନି ତାଙ୍କ କାନରେ ପଡ଼ିଥିଲା। ​ପ୍ରଥମେ ସେ ଆଗକୁ ଚାଲିଯାଇଥିଲେ ମଧ୍ୟ ମନରେ ସନ୍ଦେହ ହେବାରୁ ପୁଣି ପଛକୁ ଫେରି ଦେଖିଥିଲେ। ସେଠାରେ ଏକ ବୁଦା ଭିତରେ ପ୍ରାୟ ୩ ମାସର ଏକ ନିଷ୍ପାପ ଶିଶୁ ପୁତ୍ର କାନ୍ଦୁଥିବାର ସେ ଦେଖିବାକୁ ପାଇଥିଲେ। ବିଳମ୍ବ ନକରି ସେ ତୁରନ୍ତ ଶିଶୁଟିକୁ ଉଦ୍ଧାର କରିବା ସହ କେ. ନୂଆଗାଁ ପୋଲିସକୁ ଘଟଣା ସମ୍ପର୍କରେ ସୂଚନା ଦେଇଥିଲେ। ​ଖବର ପାଇ କେ. ନୂଆଗାଁ ଥାନା ଅଧିକାରୀ ବିଶ୍ୱଜିତ ନାୟକ ସଦଳବଳେ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ପୋଲିସ ଗାଡ଼ିରେ ଶିଶୁଟିକୁ ପ୍ରାଥମିକ ଚିକିତ୍ସା ପାଇଁ ଚିକିଟି ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ଶିଶୁର ସ୍ୱାସ୍ଥ୍ୟ ଅବସ୍ଥା ସ୍ଥିର ଏବଂ ଭଲ ଥିବା ପ୍ରକାଶ କରିଛନ୍ତି। ​ଏ ସମ୍ପର୍କରେ ଚିକିଟି ସିଡିପିଓ (CDPO) ଙ୍କୁ ମଧ୍ୟ ଅବଗତ କରାଯାଇଛି। ଶିଶୁଟିର ଅଧିକ ଯତ୍ନ ଏବଂ ଉତ୍ତମ ଚିକିତ୍ସା ପାଇଁ ତାକୁ ବ୍ରହ୍ମପୁର ବଡ଼ ମେଡିକାଲ (MKCG) କୁ ସ୍ଥାନାନ୍ତର କରିବା ପାଇଁ ଯୋଜନା ଚାଲିଛି। ପରବର୍ତ୍ତୀ ସମୟରେ ଉପ-ଜିଲ୍ଲାପାଳ (Sub-Collector) ଙ୍କ ସ୍ତରରେ ଶିଶୁର ଭବିଷ୍ୟତର ଲାଳନପାଳନ ଏବଂ ସୁରକ୍ଷା ନେଇ ସରକାରୀ ନିୟମ ଅନୁଯାୟୀ ବ୍ୟବସ୍ଥା କରାଯିବ ବୋଲି ସୂଚନା ମିଳିଛି। ​କେଉଁ ପରିସ୍ଥିତିରେ ଏବଂ କାହିଁକି ଶିଶୁଟିକୁ ଏଭଳି ନିଛାଟିଆ ରାସ୍ତାକଡ଼ରେ ଫିଙ୍ଗିଦିଆଗଲା, ସେ ନେଇ ପୋଲିସ ତଦନ୍ତ ଚଳାଇଛି। ମାତ୍ର ସନ୍ଧ୍ୟା ସମୟରେ ରାଜମିସ୍ତ୍ରୀ ବାରିକ ମୁଳିଙ୍କ ସତର୍କତା ଓ ମାନବିକତା ଯୋଗୁଁ ଆଜି ଏକ ନିଷ୍ପାପ ଶିଶୁର ଜୀବନ ବଞ୍ଚିଯାଇପାରିଛି, ଯାହାକୁ ନେଇ ସ୍ଥାନୀୟ ଅଞ୍ଚଳରେ ତାଙ୍କୁ ବେଶ୍ ପ୍ରଶଂସା କରାଯାଉଛି।