​ଉତ୍କଳମଣି ଗୋପବନ୍ଧୁ ଆଦର୍ଶ ବୃଦ୍ଧାଶ୍ରମରେ ବରିଷ୍ଠ ସାମ୍ବାଦିକ ରବି ନାୟକଙ୍କ ସେବାମୂଳକ ପଦକ୍ଷେପ

ଭୁବନେଶ୍ୱର: "ମାନବ ସେବା ହିଁ ମାଧବ ସେବା" ଉକ୍ତିକୁ ସାର୍ଥକ କରି ବରିଷ୍ଠ ସାମ୍ବାଦିକ ରବି ନାୟକ ଭୁବନେଶ୍ୱରସ୍ଥିତ ଉତ୍କଳମଣି ଗୋପବନ୍ଧୁ ଆଦର୍ଶ ବୃଦ୍ଧାଶ୍ରମରେ ଏକ ସେବାମୂଳକ କାର୍ଯ୍ୟକ୍ରମର ଆୟୋଜନ କରିଛନ୍ତି। ଏହି ଅବସରରେ ଆଶ୍ରମରେ ରହୁଥିବା ବୃଦ୍ଧା ମାଆମାନଙ୍କୁ କ୍ଷୀର ଓ ବିସ୍କୁଟ ବଣ୍ଟନ କରାଯାଇଥିଲା। କାର୍ଯ୍ୟକ୍ରମରେ ରବି ନାୟକଙ୍କ ସହ ଅନେକ ବିଶିଷ୍ଟ ବ୍ୟକ୍ତି ଯୋଗଦେଇ ଅନ୍ତେବାସୀଙ୍କ ସହ କିଛି ସମୟ ଅତିବାହିତ କରିବା ସହ ନିଜ ହାତରେ ଖାଦ୍ୟ ସାମଗ୍ରୀ ବଣ୍ଟନ କରିଥିଲେ। ଏହି ସେବାମୂଳକ ପଦକ୍ଷେପ ବୃଦ୍ଧାଶ୍ରମର ମାଆମାନଙ୍କ ମୁହଁରେ ହସ ଫୁଟାଇଥିବା ବେଳେ ଉପସ୍ଥିତ ସମସ୍ତଙ୍କୁ ଭାବବିହ୍ୱଳ କରିଥିଲା। ଭୁବନେଶ୍ୱରର ଏସବିଆଇ ବ୍ୟାଙ୍କ ନିକଟରେ ଅବସ୍ଥିତ ଉତ୍କଳମଣି ଗୋପବନ୍ଧୁ ଆଦର୍ଶ ବୃଦ୍ଧାଶ୍ରମରେ ଅନୁଷ୍ଠିତ ଏହି କାର୍ଯ୍ୟକ୍ରମ ସମାଜରେ ଅବହେଳିତ ଓ ସାହାରା ଖୋଜୁଥିବା ବରିଷ୍ଠ ନାଗରିକଙ୍କ ପ୍ରତି ସହାନୁଭୂତି ଓ ଦାୟିତ୍ୱବୋଧର ବାର୍ତ୍ତା ଦେଇଛି। ଆଶ୍ରମ କର୍ତ୍ତୃପକ୍ଷ କହିଛନ୍ତି, ବର୍ତ୍ତମାନର ବ୍ୟସ୍ତବହୁଳ ଜୀବନରେ ବୃଦ୍ଧାଶ୍ରମରେ ରହୁଥିବା ପ୍ରବୀଣମାନଙ୍କ ସହ କିଛି ସମୟ ବିତାଇବା ଓ ସେମାନଙ୍କ ସୁଖଦୁଃଖ ବାଣ୍ଟିବା ଏକ ମହାନ ସାମାଜିକ କାର୍ଯ୍ୟ। ରବି ନାୟକଙ୍କ ଏହି ପଦକ୍ଷେପ ସମାଜର ଅନ୍ୟମାନଙ୍କୁ ମଧ୍ୟ ଏଭଳି ସେବାମୂଳକ କାର୍ଯ୍ୟରେ ସାମିଲ ହେବାକୁ ପ୍ରେରଣା ଯୋଗାଇବ ବୋଲି ସେମାନେ ଆଶା ପ୍ରକାଶ କରିଛନ୍ତି।