ଜୈବ ବର୍ଜ୍ୟବସ୍ତୁ ପ୍ଲାଣ୍ଟକୁ ବିରୋଧ: ୧୪୯ ନମ୍ବର ଜାତୀୟ ରାଜପଥ ୧୨ ଘଣ୍ଟା ଅବରୋଧ

ଅନୁଗୋଳ: କଣିହାଁ ବ୍ଲକ ଅନ୍ତର୍ଗତ କର୍ଣ୍ଣପାଳ ପଞ୍ଚାୟତର ଶିପୁର ଗ୍ରାମରେ ପ୍ରସ୍ତାବିତ ଜୈବ ଚିକିତ୍ସା ଓ ବର୍ଜ୍ୟବସ୍ତୁ ଚିକିତ୍ସା ସୁବିଧା ପ୍ଲାଣ୍ଟ ନିର୍ମାଣକୁ ବିରୋଧ କରି ଗ୍ରାମବାସୀମାନେ ବୁଧବାର ୧୪୯ ନମ୍ବର ଜାତୀୟ ରାଜପଥକୁ ସରଧାପୁର ଛକ ଓ ଶିପୁର ବର ଛକ ନିକଟରେ ୧୨ ଘଣ୍ଟା ପାଇଁ ଅବରୋଧ କରିଥିଲେ। ଆନ୍ଦୋଳନକାରୀଙ୍କ ଅଭିଯୋଗ ଅନୁସାରେ, ପ୍ଲାଣ୍ଟଟି ସ୍ଥାପନ ହେଲେ ଆଖପାଖର ୨୦ରୁ ଅଧିକ ଗ୍ରାମର ଲୋକ ବିଭିନ୍ନ ରୋଗରେ ଆକ୍ରାନ୍ତ ହେବାର ଆଶଙ୍କା ରହିଛି। ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ରାଜପଥ ଅବରୋଧ ଯୋଗୁଁ ଯାତାୟାତ ବ୍ୟବସ୍ଥା ବାଧାପ୍ରାପ୍ତ ହୋଇଥିବା ବେଳେ ସମଲ ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣରେ ରଖିଥିଲେ। ପରେ କଣିହାଁ ତହସିଲଦାର ପ୍ରଣବ ପ୍ରକାଶ ପ୍ରଧାନ, ଏସଡିପିଓ ଭରତ ଚନ୍ଦ୍ର ସାହୁ ଓ ଉପଜିଲ୍ଲାପାଳ ଆଶିଷ ରଞ୍ଜନ ସାହୁ ଆନ୍ଦୋଳନକାରୀଙ୍କ ସହ ଆଲୋଚନା କରି ପ୍ଲାଣ୍ଟ ସମ୍ପର୍କରେ ପୁଙ୍ଖାନୁପୁଙ୍ଖ ତଦନ୍ତ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ପ୍ରଶାସନର ଆଶ୍ୱାସନ ପରେ କର୍ଣ୍ଣପାଳ ପଞ୍ଚାୟତର ଜନପ୍ରତିନିଧି ଓ ଗ୍ରାମବାସୀମାନେ ଆନ୍ଦୋଳନକୁ ସ୍ଥଗିତ ରଖି ରାଜପଥରେ ଗାଡ଼ି ଚଳାଚଳ ସ୍ୱାଭାବିକ କରିଥିଲେ।