ପବିତ୍ର ମୋହନ ମେଡିକାଲ୍‌ରେ ନିଯୁକ୍ତି ଦୁର୍ନୀତି ଅଭିଯୋଗ: ସିବିଆଇ ତଦନ୍ତ ଓ କେନ୍ଦ୍ରମନ୍ତ୍ରୀଙ୍କ ବରଖାସ୍ତ ଦାବି

ଅନୁଗୋଳ: ତାଳଚେର ସ୍ଥିତ ପବିତ୍ର ମୋହନ ମେଡିକାଲ୍ କଲେଜରେ ଷ୍ଟାଫ୍ ନର୍ସ ଓ ସ୍ୱାସ୍ଥ୍ୟ କର୍ମଚାରୀ ନିଯୁକ୍ତିରେ ହୋଇଥିବା କଥିତ ଦୁର୍ନୀତିର ସିବିଆଇ ତଦନ୍ତ ଏବଂ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବରଖାସ୍ତ ଦାବି କରିଛି ମହାନଦୀ କୋଇଲା ଶ୍ରମିକ କଂଗ୍ରେସ। ସଂଗଠନର ନେତା ରାଜକିଶୋର ସାହୁଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଉପ-ଜିଲ୍ଲାପାଳଙ୍କ ଜରିଆରେ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରିଛି। ଦାବିପତ୍ରରେ ଉଲ୍ଲେଖ କରାଯାଇଛି ଯେ, ୬୫୩ ଜଣ ସ୍ୱାସ୍ଥ୍ୟ କର୍ମଚାରୀଙ୍କ ମଧ୍ୟରୁ ୯୧ ଜଣ ଷ୍ଟାଫ୍ ନର୍ସଙ୍କ ପ୍ରମାଣପତ୍ର ଯାଞ୍ଚ ବେଳେ ୬୦ ଜଣ ଜାଲ୍ ସାର୍ଟିଫିକେଟ୍ ଆଧାରରେ ନିଯୁକ୍ତି ପାଇଥିବା ଅଭିଯୋଗ ସାମ୍ନାକୁ ଆସିଛି। ଏହି ଘଟଣାର ସମ୍ପୂର୍ଣ୍ଣ ସିବିଆଇ ତଦନ୍ତ, ସମସ୍ତ କର୍ମଚାରୀଙ୍କ ପ୍ରମାଣପତ୍ର ଯାଞ୍ଚ, କୋଇଲା ଖଣି ଅଞ୍ଚଳରେ ଠିକା ଶ୍ରମିକଙ୍କ ପୋଲିସ ଭେରିଫିକେସନ ବାଧ୍ୟତାମୂଳକ କରିବା ଏବଂ ତାଳଚେରକୁ ପ୍ରଦୂଷଣମୁକ୍ତ କରିବା ଭଳି ଦାବି ମଧ୍ୟ ଉଠାଯାଇଛି। ଦାବିପତ୍ର ପ୍ରଦାନ ବେଳେ କୀର୍ତ୍ତି ରଞ୍ଜନ ବିଶୋଇ, ଦାସରଥୀ ସାହୁ, କାଳିଆ ସାହୁ, ବିଭୂତି ସାହୁ ଓ ମିହିର ପ୍ରଧାନ ପ୍ରମୁଖ ଉପସ୍ଥିତ ଥିଲେ। ସଂଗଠନ ପକ୍ଷରୁ ଚେତାବନୀ ଦିଆଯାଇଛି ଯେ, ଦାବି ପୂରଣ ନ ହେଲେ ଆଗାମୀ ଦିନରେ ଆନ୍ଦୋଳନ ଜୋରଦାର ହେବ ।