ଖରାରେ ତ୍ରାହି ତ୍ରାହି ସିନାପାଲି: ଜଳଛତ୍ର କେବେ

ମାର୍ଚ୍ଚ ମାସ ଆରମ୍ଭ ହେବା ସହିତ ସିନାପାଲି ଅଞ୍ଚଳରେ ଖରାର ପ୍ରକୋପ ଦିନକୁ ଦିନ ବଢ଼ୁଛି । ଦିନ ବେଳେ ତୀବ୍ର ଗରମ ଓ ସୂର୍ଯ୍ୟ କିରଣ ଲୋକଙ୍କ ଜୀବନକୁ ଅସହ୍ୟ କରିଦେଇଛି । ଏହି ପରିସ୍ଥିତିରେ ସାଧାରଣ ଲୋକ ଓ ପଥଚାରୀଙ୍କ ସୁବିଧା ପାଇଁ ସିନାପାଲି ବ୍ଲକର ପ୍ରତ୍ୟେକ ଅଞ୍ଚଳରେ ଜଳଛତ୍ର ଖୋଲିବାକୁ ଦାବି ଜୋରଦାର ହେଉଛି । ବଜାର ଅଞ୍ଚଳ, ବସ୍‌ଷ୍ଟାଣ୍ଡ, କାପସୀ, ଯୁଗେନପଦର, ଗୋଡ଼ାଳଛକ, ବ୍ଲକ ଛକ ତଥା ରାସ୍ତାରେ ଯାତାୟତ କରୁଥିବା ଲୋକମାନେ ତୀବ୍ର ଗରମରେ ପାଣି ପାଇଁ ଅସୁବିଧା ଭୋଗୁଛନ୍ତି । ପୂର୍ବରୁ ପ୍ରତିବର୍ଷ ଗ୍ରୀଷ୍ମ ଆରମ୍ଭ ହେଲେ ବିଭିନ୍ନ ସ୍ଥାନରେ ସେବାମୂଳକ ସଂଗଠନ ଓ ସାମାଜିକ କର୍ମୀମାନଙ୍କ ପକ୍ଷରୁ ଜଳଛତ୍ର ଖୋଲାଯାଉଥିଲା । କିନ୍ତୁ ଏବର୍ଷ ଖରା ଆଗୁଆଁ ଆସିଥିଲେ ମଧ୍ୟ କୌଣସି ସ୍ଥାନରେ ଏପର୍ଯ୍ୟନ୍ତ ଜଳଛତ୍ର ଦେଖିବାକୁ ମିଳୁନାହିଁ । ସ୍ଥାନୀୟ ଲୋକଙ୍କ କହିବା ଅନୁସାରେ, ଦିନକୁ ଦିନ ତାପମାତ୍ରା ବଢ଼ୁଥିବାରୁ ଯାତ୍ରୀ, ଶ୍ରମିକ ଓ ଦୂରଦୂରାନ୍ତରୁ ବଜାରକୁ ଆସୁଥିବା ଲୋକମାନେ ବହୁତ ଅସୁବିଧାର ସମ୍ମୁଖୀନ ହେଉଛନ୍ତି । ଏହି ପରିସ୍ଥିତିରେ ସିନାପାଲି ଗ୍ରାମ ପଂଚାୟତ, ସାମାଜିକ ସଂଗଠନ ଓ ସ୍ଥାନୀୟ ସମାଜସେବୀ ମାନେ ଆଗକୁ ଆସି ମୁଖ୍ୟ ଚକ, ବସ୍‌ଷ୍ଟାଣ୍ଡ ଓ ଜନସାଧାରଣ ଯାତାୟାତ କରୁଥିବା ସ୍ଥାନରେ ଶୀଘ୍ର ଜଳଛତ୍ର ବ୍ୟବସ୍ଥା କରିବାକୁ ଦାବି କରାଯାଇଛି । ଯଦି ସମୟରେ ଜଳଛତ୍ର ବ୍ୟବସ୍ଥା କରାଯାଏ, ତେବେ ଗରମରେ ଅସୁବିଧା ଭୋଗୁଥିବା ପଥଚାରୀ ଓ ଗରିବ ଲୋକମାନଙ୍କ ପାଇଁ ଏହା ବଡ଼ ସହାୟତା ହେବ ବୋଲି ସ୍ଥାନୀୟ ମତ ପ୍ରକାଶ ପାଇଛି । ଏବେ ଦେଖିବାକୁ ବାକି ରହିଲା, ସିନାପାଲିର ପ୍ରତ୍ୟେକ ଅଞ୍ଚଳରେ ଜଳଛତ୍ର କେବେ ଆରମ୍ଭ ହେବ ।